| Library / Tipiṭaka / ཏིཔིཊཀ • Tipiṭaka / ཝཛིརབུདྡྷི-ཊཱིཀཱ • Vajirabuddhi-ṭīkā |
པཋམམཧཱསངྒཱིཏིཀཐཱཝཎྞནཱ
Paṭhamamahāsaṅgītikathāvaṇṇanā
པཋམམཧཱསངྒཱིཏི ནཱམ ཙཱཏི ཨེཏྠ ཙ-སདྡོ ཨཏིརེཀཏྠོ, ཏེན ཨཉྙཱཔི ཨཏྠཱིཏི དཱིཔེཏི། ཏམྤི སཱལཝནཾ ཨུཔགནྟྭཱ མིཏྟསུཧཛྫེ ཨཔལོཀེཏྭཱ ནིཝཏྟནཏོ ཨུཔཝཏྟནནྟི པཱཀཊཾ ཛཱཏཾ ཀིར། ཡམཀསཱལཱནནྟི ཨེཀཱ ཀིར སཱལཔནྟི སཱིསབྷཱགེ, ཨེཀཱ པཱདབྷཱགེ། ཏཏྲཱཔི ཨེཀོ ཏརུཎསཱལོ སཱིསབྷཱགསྶ ཨཱསནྣེ ཧོཏི, ཨེཀོ པཱདབྷཱགསྶ, མཱུལཁནྡྷཝིཊཔཔཏྟེཧི ཨཉྙམཉྙཾ སཾསིབྦིཏྭཱ ཋིཏསཱལཱནནྟིཔི ཝུཏྟཾ། ཨནུཔཱདིསེསཱཡ ནིབྦཱནདྷཱཏུཡཱཏི ཨིཏྠམྦྷཱུཏལཀྑཎེ ཀརཎཝཙནཾ ‘‘ཀཏཀིཙྩོ པཱིཏིཛ ཧཱས ཙེཏོ ཨཝེརམུཁེནཱབྷཏཀུཎྜལེནཱ’’ཏིཨཱདཱིསུ ཝིཡ། པརིནིབྦཱནེ པརིནིབྦཱནཧེཏུ, ཏསྨིཾ ཋཱནེ ཝཱ མཱ སོཙིཏྠ ཙིཏྟེན, མཱ པརིདེཝིཏྠ ཝཱཙཱཡ ‘‘པརིདེཝནཾ ཝིལཱཔ’’ནྟི ཝཙནཏོ། མཧཱསམཎེནཱཏི ནིསྶཀྐཏྠེ ཀརཎཝཙནཾ། སཱུརིཡཾ’སཱུབྷི པཊུཀརཱ’བྷཱ’རིཎསྶ ཏཱཎཱ ཨིཏྱཏྲེཝ། ཡཉྩ བྷགཝཏོ ཨནུགྒཧཾ, ཏསྶ ཨནུགྒཧསྶཱཏི ཨཱཙརིཡཱ། ཨེཀཙྩེ པན ‘‘ཡཾ ཡསྨཱ ཨཧཾ ཨནུགྒཧིཏོ’’ཏི ཝདནྟི། ནིབྦསནཱནཱིཏི ནིཊྛིཏཝསནཀིཙྩཱནི, མཡཱ པརིབྷུཉྫིཏྭཱ ཨཔནཱིཏཱནི ། ཡདི སུཡུཏྟཱནི དྷཱརེསྶསཱིཏི པུཙྪཏི, ཀཝཙསདིསཱནི སཱཎཱནི། ཨིསྶརིཡསདིསཱ ནཝ ཨནུཔུབྦཝིཧཱརཱདཡོ། ཨཊྛ སམཱཔཏྟིཡོ ནིརོདྷསམཱཔཏྟི ཙ པཊིལཱབྷཀྐམེན ‘‘ཨནུཔུབྦཝིཧཱརཱ’’ཏི ཝུཏྟཱ།
Paṭhamamahāsaṅgīti nāma cāti ettha ca-saddo atirekattho, tena aññāpi atthīti dīpeti. Tampi sālavanaṃ upagantvā mittasuhajje apaloketvā nivattanato upavattananti pākaṭaṃ jātaṃ kira. Yamakasālānanti ekā kira sālapanti sīsabhāge, ekā pādabhāge. Tatrāpi eko taruṇasālo sīsabhāgassa āsanne hoti, eko pādabhāgassa, mūlakhandhaviṭapapattehi aññamaññaṃ saṃsibbitvā ṭhitasālānantipi vuttaṃ. Anupādisesāya nibbānadhātuyāti itthambhūtalakkhaṇe karaṇavacanaṃ ‘‘katakicco pītija hāsa ceto averamukhenābhatakuṇḍalenā’’tiādīsu viya. Parinibbāne parinibbānahetu, tasmiṃ ṭhāne vā mā socittha cittena, mā paridevittha vācāya ‘‘paridevanaṃ vilāpa’’nti vacanato. Mahāsamaṇenāti nissakkatthe karaṇavacanaṃ. Sūriyaṃ’sūbhi paṭukarā’bhā’riṇassa tāṇā ityatreva. Yañca bhagavato anuggahaṃ, tassa anuggahassāti ācariyā. Ekacce pana ‘‘yaṃ yasmā ahaṃ anuggahito’’ti vadanti. Nibbasanānīti niṭṭhitavasanakiccāni, mayā paribhuñjitvā apanītāni . Yadi suyuttāni dhāressasīti pucchati, kavacasadisāni sāṇāni. Issariyasadisā nava anupubbavihārādayo. Aṭṭha samāpattiyo nirodhasamāpatti ca paṭilābhakkamena ‘‘anupubbavihārā’’ti vuttā.
ཨནཱགཏེ སནྣིཀཊྛེ, ཏཐཱཏཱིཏེ ཙིརནྟནེ།
Anāgate sannikaṭṭhe, tathātīte cirantane;
ཀཱལདྭཡེཔི ཀཝཱིཧི, པུརཱསདྡོ པཡུཛྫཏེ༎
Kāladvayepi kavīhi, purāsaddo payujjate.
སཏྠུསཱསནམེཝ པརིཡཏྟི སཏྠུསཱསནཔརིཡཏྟི, སཱ སུཏྟགེཡྻཱདིཝསེན ནཝངྒཱ། ཏིཔིཊཀམེཝ སབྦཔརིཡཏྟིཔྤབྷེདཾ དྷཱརེནྟཱིཏི ཏིཔིཊཀསབྦཔརིཡཏྟིཔྤབྷེདདྷརཱ། ‘‘ཝིནཱ ན སཀྐཱ’’ཏི ན ཝཏྟབྦཾ ‘‘ཏིཔིཊཀསབྦཔརིཡཏྟིཔྤབྷེདདྷརེ’’ཏི ཝུཏྟཏྟཱ, ཨེཝཾ སནྟེཔི ཨཏྠི ཝིསེསོ ཏེཧི སམྨུཁཱཔི ཨསམྨུཁཱཔི སུཏཾ, ཐེརེན པན ཨསམྨུཁཱཔཊིགྒཧིཏཾ ནཱམ ནཏྠཱིཏི། ན ཝཱཡནྟི ཨེཏྠ ཝཱཏི ཝིབྷཱསཱ, ཨཉྙཱསིཔི ན ཨཉྙཱསིཔཱིཏི ཨཏྠོ། ཏཏྲ ཨུཙྩིནནེ། བཧུསདྡོ ཝིཔུལླཏྠོ ‘‘ཨནནྟཔཱརཾ བཧུ ཝེདིཏབྦམིཏྱ’’ཏྲེཝ། པུབྦེ ‘‘ཏིཔིཊཀསབྦཔཨཡཏྟིཔྤབྷེདདྷརེ’’ཏི ཝུཏྟཏྟཱ ‘‘བཧུ ཙཱནེན…པེ॰… པརིཡཏྟོ’’ཏི ན ཡུཛྫཏཱིཏི ཙེ? ན, ཏིཔིཊཀསྶ ཨནནྟཏྟཱ, ཏསྨཱ ཨམྷེ ཨུཔཱདཱཡ ཏེན བཧུ པརིཡཏྟོཏི ཨདྷིཔྤཱཡོ། ཨིཏརཐཱ ཨཱནནྡཏྠེརོ ཏེཧི ཨཔྤསྶུཏོཏི ཨཱཔཛྫཏི, ‘‘ཨསམྨུཁཱ པཊིགྒཧིཏཾ ནཱམ ནཏྠཱི’’ཏི ཝཙནཝིརོདྷོ ཙ། ཨཌྜྷམཱསོ ཨཏིཀྐནྟོཏི ཨེཏྠ ཨེཀོ དིཝསོ ནཊྛོ, སོ པཱཊིཔདདིཝསོ, ཀོལཱཧལདིཝསོ ནཱམ སོ, ཏསྨཱ ཨིདྷ ན གཧིཏོ། སཾཝེགཝཏྠུཾ ཀིཏྟེཏྭཱ ཀཱིལ༹ནཏོ སཱདྷུཀཱིལ༹ནཾ ནཱམ། སྭེཔཱིཏི ཨཔི-སདྡོ ཨཔེཀྑཱམནྟཱནུཉྙཱཡ། སུབྷསུཏྟཾ ‘‘ཨཙིརཔརིནིབྦུཏེ བྷགཝཏཱི’’ཏི (དཱི॰ ནི॰ ༡.༤༤༤) ཝུཏྟཏྟཱ ཙཏུརཱསཱིཏིདྷམྨཀྑནྡྷསཧསྶེསུ ཨནྟོགདྷཾ ན ཧོཏཱིཏི ཙེ? ན, བྷགཝཏོ ཀཱལེ ལདྡྷནཡཏྟཱ ཀཐཱཝཏྠུ ཝིཡ། ཚཌྜིཏཱ པཏིཏཱ ཨུཀླཱཔཱ ཚཌྜིཏཔཏིཏཨུཀླཱཔཱ། ཨཱཎཱ ཨེཝ ཨཔྤཊིཧཏཊྛེན ཙཀྐནྟི ཨཱཎཱཙཀྐཾ། ཨེཀཏོ ཨེཏྠ ནིཔཏནྟཱིཏི ཨེཀནིཔཱཏནཾ། ཨཱཀཱསེན ཨཱགནྟྭཱ ནིསཱིདཱིཏི ཨེཀེཏི ཨེཏཾ དུཏིཡཝཱརེ གམནཾ སནྡྷཱཡཱཏི ཨཱཡསྨཱ ཨུཔཏིསྶོ ། པཋམཾ ཝཱ ཨཱཀཱསེན གནྟྭཱ པརིསཾ པཏྭཱ བྷིཀྑུཔནྟིཾ ཨཔཱིལེ༹ནྟོ པཐཝིཡཾ ནིམུཛྫིཏྭཱ ཨཱསནེ ཨེཝ ཨཏྟཱནཾ དསྶེསི། ཨུབྷཡཐཱ ཙ ཨཱཔཱཐཾ གཏོ, ཏེན ཨུབྷཡམྤི ཡུཛྫཏི, ཨཉྙཐཱ དྭཱིསུ ཨེཀཾ ཨབྷཱུཏཾ ཨཱཔཛྫཏི།
Satthusāsanameva pariyatti satthusāsanapariyatti, sā suttageyyādivasena navaṅgā. Tipiṭakameva sabbapariyattippabhedaṃ dhārentīti tipiṭakasabbapariyattippabhedadharā. ‘‘Vinā na sakkā’’ti na vattabbaṃ ‘‘tipiṭakasabbapariyattippabhedadhare’’ti vuttattā, evaṃ santepi atthi viseso tehi sammukhāpi asammukhāpi sutaṃ, therena pana asammukhāpaṭiggahitaṃ nāma natthīti. Na vāyanti ettha vāti vibhāsā, aññāsipi na aññāsipīti attho. Tatra uccinane. Bahusaddo vipullattho ‘‘anantapāraṃ bahu veditabbamitya’’treva. Pubbe ‘‘tipiṭakasabbapaayattippabhedadhare’’ti vuttattā ‘‘bahu cānena…pe… pariyatto’’ti na yujjatīti ce? Na, tipiṭakassa anantattā, tasmā amhe upādāya tena bahu pariyattoti adhippāyo. Itarathā ānandatthero tehi appassutoti āpajjati, ‘‘asammukhā paṭiggahitaṃ nāma natthī’’ti vacanavirodho ca. Aḍḍhamāso atikkantoti ettha eko divaso naṭṭho, so pāṭipadadivaso, kolāhaladivaso nāma so, tasmā idha na gahito. Saṃvegavatthuṃ kittetvā kīḷanato sādhukīḷanaṃ nāma. Svepīti api-saddo apekkhāmantānuññāya. Subhasuttaṃ ‘‘aciraparinibbute bhagavatī’’ti (dī. ni. 1.444) vuttattā caturāsītidhammakkhandhasahassesu antogadhaṃ na hotīti ce? Na, bhagavato kāle laddhanayattā kathāvatthu viya. Chaḍḍitā patitā uklāpā chaḍḍitapatitauklāpā. Āṇā eva appaṭihataṭṭhena cakkanti āṇācakkaṃ. Ekato ettha nipatantīti ekanipātanaṃ. Ākāsena āgantvā nisīdīti eketi etaṃ dutiyavāre gamanaṃ sandhāyāti āyasmā upatisso . Paṭhamaṃ vā ākāsena gantvā parisaṃ patvā bhikkhupantiṃ apīḷento pathaviyaṃ nimujjitvā āsane eva attānaṃ dassesi. Ubhayathā ca āpāthaṃ gato, tena ubhayampi yujjati, aññathā dvīsu ekaṃ abhūtaṃ āpajjati.
ཨཐ ཁོ ཨཱཡསྨཱ མཧཱཀསྶཔོ ཨཱཡསྨནྟཾ ཨུཔཱལིཾ པུཙྪི…པེ॰… ཨཱཡསྨཱ ཨུཔཱལིཏྠེརོ ཝིསྶཛྫེསཱིཏི ཨིདཾ པུབྦེ ‘‘པཋམཾ ཨཱཝུསོ ཨུཔཱལཱི’’ཏིཨཱདིནཱ (ཙཱུལ༹ཝ॰ ༤༣༩) ཝུཏྟཔུཙྪཱཝིསྶཛྫནཾ སངྑིཔིཏྭཱ སངྒཱིཏིཀཱརཀེཧི དསྶིཏཝཙནནྟི གཎྛིཔདེ ལིཁིཏཾ། ཏཐཱ ཧོཏུ, ཀིམཏྠཾ པནེཏྠ ‘‘ནིདཱནམྤི པུཙྪི, པུགྒལམྤི པུཙྪི, ཝཏྠུམྤི པུཙྪཱི’’ཏི ཨེཝཾ པུབྦེ དསྶིཏཱནུཀྐམེན ཨཝཏྭཱ ‘‘ཝཏྠུམྤི པུཙྪི, ནིདཱནམྤི པུཙྪི, པུགྒལམྤི པུཙྪཱི’’ཏི ཨེཝཾ ཨནུཀྐམོ ཀཏོཏི? ‘‘ཝཏྠུམཱུལཀཏྟཱ སིཀྑཱཔདཔཉྙཏྟིཡཱ ཨུཔྤཊིཔཱཊིཡཱ ཝུཏྟ’’ནྟི ཝདནྟི ཨེཀེ། ཨེཏྠ པན ཝིཙཱརཎཱ ཝེརཉྫཀཎྜེ སམྤཏྟེ ཀརཱིཡཏི། རཱཛཱགཱརཀེཏི ཨེཝཾནཱམཀེ ཨུཡྻཱནེ། ཨབྷིརམནཱརཧཾ ཀིར རཱཛཱགཱརམྤི། ཏཏྠ, ཡསྶ ཝསེནེཏཾ ཨེཝཾ ནཱམཾ ལབྷཏི། ཨཐ ཁོ ‘‘ཨཱཡསྨཱ མཧཱཀསྶཔོ’’ཏིཨཱདིནཱ པུབྦེ ཝུཏྟམེཝ སངྑིཔིཏྭཱ དསྶེཏི སངྒཱིཏིཀཱརཀོ ཝསཱིགཎོ། ཡདི ཨེཝཾ ཡཐཱ ནིདཱནམྤི པུཙྪི, པུགྒལམྤི པུཙྪཱིཏི ཨེཏྠ པུཙྪཱཀྐམོ དསྶིཏོ, ཏཐཱ ཨཱནནྡཏྠེརསྶ ཝིསྶཛྫནཀྐམོཔི ཀིམཏྠཾ ན དསྶིཏོཏི ཙེ? ཨིམིནཱནུཀྐམེན སངྒཧཾ པཉྩཔི ནིཀཱཡཱ ཨནཱརུལ༹ྷཱཏི དསྶནཏྠཾ། ཀཐཾ པན ཨཱརུལ༹ྷཱཏི? ཨཱཡསྨཱ མཧཱཀསྶཔོ པཉྩཔི ནིཀཱཡེ ཨནུཀྐམེནེཝ པུཙྪི, ཨཱནནྡཏྠེརོ པན ཨནུཀྐམེནེཝ པུཙྪིཏམྤི ཨཔུཙྪིཏམྤི ཏསྶ ཏསྶ སུཏྟསྶ སབྷཱཝཾ ཨནྟརཱ ཨུཔྤནྣཾ ཝཏྠུཾ ཨུདྡེསནིདྡེསཀྐམཾ མཱཏིཀཱཝིབྷངྒཀྐམནྟི ཨེཝམཱདིསབྦཾ ཨནུརཱུཔཝཙནཾ པཀྑིཔིཏྭཱ ཝིསྶཛྫེསི, ཏེནེཝཱཧ ‘‘ཨེཏེནེཝ ཨུཔཱཡེན པཉྩཔི ནིཀཱཡེ པུཙྪཱི’’ཏི། ཨཐ ཝཱ ‘‘ཨམྦལཊྛིཀཱཡཾ རཱཛཱགཱརཀེ’’ཏི ཝཏྟབྦེ ‘‘རཱཛཱགཱརཀེ ཨམྦལཊྛིཀཱཡ’’ནྟི ཨུཔྤཊིཔཱཊིཝཙནེནཔི ཨིམམཏྠཾ དཱིཔེཏི། ‘‘ཨམྦལཊྛིཀཱཡཾ ཝིཧརཏི རཱཛཱགཱརཀེ’’ཏི ཧི ཝུཏྟཾ།
Athakho āyasmā mahākassapo āyasmantaṃ upāliṃ pucchi…pe… āyasmā upālitthero vissajjesīti idaṃ pubbe ‘‘paṭhamaṃ āvuso upālī’’tiādinā (cūḷava. 439) vuttapucchāvissajjanaṃ saṅkhipitvā saṅgītikārakehi dassitavacananti gaṇṭhipade likhitaṃ. Tathā hotu, kimatthaṃ panettha ‘‘nidānampi pucchi, puggalampi pucchi, vatthumpi pucchī’’ti evaṃ pubbe dassitānukkamena avatvā ‘‘vatthumpi pucchi, nidānampi pucchi, puggalampi pucchī’’ti evaṃ anukkamo katoti? ‘‘Vatthumūlakattā sikkhāpadapaññattiyā uppaṭipāṭiyā vutta’’nti vadanti eke. Ettha pana vicāraṇā verañjakaṇḍe sampatte karīyati. Rājāgāraketi evaṃnāmake uyyāne. Abhiramanārahaṃ kira rājāgārampi. Tattha, yassa vasenetaṃ evaṃ nāmaṃ labhati. Atha kho ‘‘āyasmā mahākassapo’’tiādinā pubbe vuttameva saṅkhipitvā dasseti saṅgītikārako vasīgaṇo. Yadi evaṃ yathā nidānampi pucchi, puggalampi pucchīti ettha pucchākkamo dassito, tathā ānandattherassa vissajjanakkamopi kimatthaṃ na dassitoti ce? Iminānukkamena saṅgahaṃ pañcapi nikāyā anāruḷhāti dassanatthaṃ. Kathaṃ pana āruḷhāti? Āyasmā mahākassapo pañcapi nikāye anukkameneva pucchi, ānandatthero pana anukkameneva pucchitampi apucchitampi tassa tassa suttassa sabhāvaṃ antarā uppannaṃ vatthuṃ uddesaniddesakkamaṃ mātikāvibhaṅgakkamanti evamādisabbaṃ anurūpavacanaṃ pakkhipitvā vissajjesi, tenevāha ‘‘eteneva upāyena pañcapi nikāye pucchī’’ti. Atha vā ‘‘ambalaṭṭhikāyaṃ rājāgārake’’ti vattabbe ‘‘rājāgārake ambalaṭṭhikāya’’nti uppaṭipāṭivacanenapi imamatthaṃ dīpeti. ‘‘Ambalaṭṭhikāyaṃ viharati rājāgārake’’ti hi vuttaṃ.
གཧཀཱརནྟི ཨིམསྶ ཨཏྟབྷཱཝགེཧསྶ ཀཱརཀཾ ཏཎྷཱཝཌྜྷཀིཾ གཝེསནྟོ ཡེན ཉཱཎེན སཀྐཱ སོ དཊྛུཾ, ཏསྶཏྠཱཡ དཱིཔངྐརཔཱདམཱུལེ ཀཏཱབྷིནཱིཧཱརོ ཨེཏྟཀཾ ཀཱལཾ ཨནེཀཛཱཏིསཾསཱརཾ ཏཾ ཉཱཎཾ ཨཝིནྡནྟོ ཝིཙརིནྟི ཨཏྠོ། དུཀྑཱ ཛཱཏི པུནཔྤུནནྟི ཨིདཾ གཧཀཱརཀགཝེསནསྶ ཀཱརཎཝཙནཾ། སབྦཱ ཏེ ཕཱསུཀཱཏི ཏཝ སབྦཱ ཨནཝསེསཀིལེསཕཱསུཀཱ མཡཱ བྷགྒཱ། གཧཀཱུཊཾ ནཱམ ཨཝིཛྫཱ། སོམནསྶསཧགཏཾ ཉཱཎཾ སོམནསྶམཡཾ། ན ཧི སོམནསྶམཡཾ ཉཱཎཾ ཁནྡྷསབྷཱཝབྷེདཏོ། དལ༹ྷཱིཀམྨསིཐིལཀརཎཔྤཡོཛནཱཏི ཡེབྷུཡྻཏཱཡ ཝུཏྟཾ, ཏཾ པན ཏཏྠ ཏཏྠ པཀཱསཡིསྶཱམ། ཨཉྙམཉྙསངྐརཝིརཧིཏེ དྷམྨེ ཙ ཝིནཡེ ཙཱཏི ཨེཏྠ པཱཎཱཏིཔཱཏོ ཨཀུསལནྟི ཨེཝམཱདཱིསུ མརཎཱདྷིཔྤཱཡསྶ ཛཱིཝིཏིནྡྲིཡུཔཙྪེདཀཔྤཡོགསམུཊྛཱཔིཀཱ ཙེཏནཱ ཨཀུསལཾ, ན པཱཎསངྑཱཏཛཱིཝིཏིནྡྲིཡསྶ ཨུཔཙྪེདཀསངྑཱཏོ ཨཏིཔཱཏོ། ཏཐཱ ཨདིནྣསྶ པརསནྟཀསྶ ཨཱདཱནསངྑཱཏཱ ཝིཉྙཏྟི ཨབྱཱཀཏོ དྷམྨོ, ཏབྦིཉྙཏྟིསམུཊྛཱཔིཀཱ ཐེཡྻཙེཏནཱ ཨཀུསལོ དྷམྨོཏི (པཊྛཱ॰ ༡.༡.༢༧) ཨེཝམཱདིནཱ ཨཉྙམཉྙསངྐརཝིརཧིཏེ དྷམྨེ པཊིབལོ ཝིནེཏུཾ། ཛཱཏརཱུཔརཛཏཾ པརསནྟཀཾ ཐེཡྻཙིཏྟེན གཎྷནྟསྶ ཡཐཱཝཏྠུཾ པཱརཱཛིཀཐུལླཙྩཡདུཀྐཊེསུ ཨཉྙཏརཾ, བྷཎྜཱགཱརིཀསཱིསེན དིཡྻམཱནཾ གཎྷནྟསྶ པཱཙིཏྟིཡཾ, ཨཏྟཏྠཱཡ གཎྷནྟསྶ ནིསྶགྒིཡཾ པཱཙིཏྟིཡཾ, ཀེཝལཾ ལོལཏཱཡ གཎྷནྟསྶ ཨནཱམཱསདུཀྐཊཾ, རཱུཔིཡཚཌྜཀསམྨཏསྶ ཨནཱཔཏྟཱིཏི ཨེཝཾ ཨཉྙམཉྙསངྐརཝིརཧིཏེ ཝིནཡེཔི པཊིབལོ ཝིནེཏུནྟི ཨཏྠོ། བྷཱཝེཏཱིཏི ཝཌྜྷེཏི, ཨེཏེན ཕལཝསེན ཛཝནཝསེན ཙ ཙིཏྟསྶ ཝུདྡྷིཾ དསྶེཏི། ‘‘ཨཝིསིཊྛ’’ནྟི པཱཋོ, སཱདྷཱརཎནྟི ཨཏྠོ།
Gahakāranti imassa attabhāvagehassa kārakaṃ taṇhāvaḍḍhakiṃ gavesanto yena ñāṇena sakkā so daṭṭhuṃ, tassatthāya dīpaṅkarapādamūle katābhinīhāro ettakaṃ kālaṃ anekajātisaṃsāraṃ taṃ ñāṇaṃ avindanto vicarinti attho. Dukkhā jāti punappunanti idaṃ gahakārakagavesanassa kāraṇavacanaṃ. Sabbā te phāsukāti tava sabbā anavasesakilesaphāsukā mayā bhaggā. Gahakūṭaṃ nāma avijjā. Somanassasahagataṃ ñāṇaṃ somanassamayaṃ. Na hi somanassamayaṃ ñāṇaṃ khandhasabhāvabhedato. Daḷhīkammasithilakaraṇappayojanāti yebhuyyatāya vuttaṃ, taṃ pana tattha tattha pakāsayissāma. Aññamaññasaṅkaravirahite dhamme ca vinaye cāti ettha pāṇātipāto akusalanti evamādīsu maraṇādhippāyassa jīvitindriyupacchedakappayogasamuṭṭhāpikā cetanā akusalaṃ, na pāṇasaṅkhātajīvitindriyassa upacchedakasaṅkhāto atipāto. Tathā adinnassa parasantakassa ādānasaṅkhātā viññatti abyākato dhammo, tabbiññattisamuṭṭhāpikā theyyacetanā akusalo dhammoti (paṭṭhā. 1.1.27) evamādinā aññamaññasaṅkaravirahite dhamme paṭibalo vinetuṃ. Jātarūparajataṃ parasantakaṃ theyyacittena gaṇhantassa yathāvatthuṃ pārājikathullaccayadukkaṭesu aññataraṃ, bhaṇḍāgārikasīsena diyyamānaṃ gaṇhantassa pācittiyaṃ, attatthāya gaṇhantassa nissaggiyaṃ pācittiyaṃ, kevalaṃ lolatāya gaṇhantassa anāmāsadukkaṭaṃ, rūpiyachaḍḍakasammatassa anāpattīti evaṃ aññamaññasaṅkaravirahite vinayepi paṭibalo vinetunti attho. Bhāvetīti vaḍḍheti, etena phalavasena javanavasena ca cittassa vuddhiṃ dasseti. ‘‘Avisiṭṭha’’nti pāṭho, sādhāraṇanti attho.
དེསེནྟསྶ ཝསེནེཏྠ, དེསནཱ པིཊཀཏྟཡཾ།
Desentassa vasenettha, desanā piṭakattayaṃ;
སཱསིཏབྦཝསེནེཏཾ, སཱསནནྟིཔི ཝུཙྩཏི༎
Sāsitabbavasenetaṃ, sāsanantipi vuccati.
ཀཐེཏབྦསྶ ཨཏྠསྶ, ཝསེནཱཔི ཀཐཱཏི ཙ།
Kathetabbassa atthassa, vasenāpi kathāti ca;
དེསནཱ སཱསནཱ ཀཐཱ, བྷེདམྤེཝཾ པཀཱསཡེ༎
Desanā sāsanā kathā, bhedampevaṃ pakāsaye.
སཱསནསྶ ནཔུཾསཀཏྟཱ ‘‘ཡཐཱ…པེ॰… དྷམྨསཱསནཱནཱི’’ཏི ཝུཏྟཾ། དུཙྩརིཏསཾཀིལེསཾ ནཱམ ཨཏྠཏོ ཙེཏནཱ, ཏཐཱཀཱརཔྤཝཏྟཙིཏྟུཔྤཱདོ ཝཱ། ཨནིཙྩཱདིལཀྑཎཾ པཊིཝིཛ྄ཛྷིཏྭཱ པཝཏྟཏྟཱ ཝིཔསྶནཱཙིཏྟཱནི ཝིསཡཏོ ལོཀིཡཱ’བྷིསམཡོ ཨསམྨོཧཏོ ལོཀུཏྟརོ, ལོཀུཏྟརོ ཨེཝ ཝཱ ཨབྷིསམཡོ ཝིསཡཏོ ནིབྦཱནསངྑཱཏསྶ ཨཏྠསྶ, ཨིཏརསྶ མགྒཱདིཀསྶ ཨསམྨོཧཏོཏིཔི ཨེཀེ། ཨེཏྠ ‘‘པཊིཝེདྷོ’’ཏི ཝུཏྟཾ ཉཱཎཾ, ཏཾ ཀཐཾ གམྦྷཱིརནྟི ཙེ? གམྦྷཱིརསྶ ཨུདཀསྶ པམཱཎགྒཧཎཀཱལེ དཱིགྷེན པམཱཎེན བྷཝིཏབྦཾ, ཨེཝཾ ཨལབྦྷནེཡྻབྷཱཝདསྶནཏྠཾ ཨིདཱནཱིཏི ཝུཏྟནྟི ཨེཀེ། ཡསྶ ཙཏྠཱཡ མགྒཕལཏྠཱཡ། ཏཉྩ ཨཏྠཾ ནཱནུབྷོནྟི ནཱདྷིགཙྪནྟི ཀཉྩི ཨཏྟནཱ ཨདྷིཔྤེཏཾ, ཨིཏིཝཱདཔམོཀྑཉྩ། ཀསྨཱ? ཨཏྠསྶ ཨནུཔཔརིཀྑིཏྭཱ གཧིཏཏྟཱ། ཨདྷིགཏཕལཏྟཱ པཊིཝིདྡྷཱཀུཔྤོ། པུན ཁཱིཎཱསཝགྒཧཎེན ཨརཧནྟམེཝ དསྶེཏི, ན སེཀྑཾ། སོ ཧི ཡཐཱ བྷཎྜཱགཱརིཀོ རཉྙོ ཀཊཀམཀུཊཱདིཾ གོཔེཏྭཱ ཨིཙྪིཏིཙྪིཏཀྑཎེ ཨུཔནེཏི, ཨེཝཾ སཧེཏུཀཱནཾ སཏྟཱནཾ མགྒཕལཏྠཱཡ དྷམྨཾ དེསེསི། ཏཱསཾཡེཝ ཏཏྠ ཝིནཡཔིཊཀེ པབྷེདཏོ ཝུཏྟཏྟཱ, ཝཱཡམིཏྭཱ ཏཱ ཨེཝ པཱཔུཎཱཏཱིཏི ཨཱཙརིཡཱ། ཀིམཏྠཾ ཏིསྶོཝ ཝིཛྫཱ ཏཏྠ ཝིབྷཏྟཱཏི? སཱིལསམྤཏྟིཡཱ ཨེཏཔརམུཔནིསྶཡབྷཱཝཏོ། ‘‘ཨཔརེཧིཔི སཏྟཧངྒེཧི སམནྣཱགཏོ བྷིཀྑུ ཝིནཡདྷརོ ཧོཏི། ཨཱཔཏྟིཾ ཛཱནཱཏི, ཨནཱཔཏྟིཾ, ལཧུཀཾ ཨཱཔཏྟིཾ, གརུཀཾ ཨཱཔཏྟིཾ, ཨནེཀཝིཧིཏཾ པུབྦེནིཝཱསཾ ཨནུསྶརཏི…པེ॰… དིབྦེན ཙཀྑུནཱ ཝིསུདྡྷེན ཨཏིཀྐནྟམཱནུསཀེན སཏྟེ པསྶཏི…པེ॰… ཨཱསཝཱནཉྩ ཁཡཱ…པེ॰… ཨུཔསམྤཛྫ ཝིཧརཏཱི’’ཏི (པརི॰ ༣༢༧) སུཏྟམེཏྠ སཱདྷཀཾ། ཝིནཡཾ པརིཡཱཔུཎིཏྭཱ སཱིལསམྤཏྟིཾ ནིསྶཱཡ ཨཱསཝཀྑཡཉཱཎེན སཧེཝ ཝིཡ དིབྦཙཀྑུཔུབྦེནིཝཱསཱནུསྶཏིཉཱཎཱནི པཊིལབྷཏི། ཝིསུཾ ཨེཏེསཾ པརིཀམྨཀིཙྩཾ ནཏྠཱིཏི དསྶནཏྠཾ ཏཱསཾཡེཝཱཏི ཝུཏྟནྟི ཙ ཝདནྟི ཨེཀེ། ཨབྷིདྷམྨེ པན ཏིསྶོཝིཛྫཱ ཚ ཨབྷིཉྙཱ ཙཏསྶོ ཙ པཊིསམྦྷིདཱ ཨཉྙེ ཙ སམྨཔྤདྷཱནཱདཡོ གུཎཝིསེསཱ ཝིབྷཏྟཱ། ཀིཉྩཱཔི ཝིབྷཏྟཱ, ཏཐཱཔི ཝིསེསཏོ པཉྙཱཛཱཏིཀཏྟཱ ཙཏསྶོ པཊིསམྦྷིདཱ པཱཔུཎཱཏཱིཏི དསྶནཏྠཾ ཏཱསཾ ཏཏྠེཝཱཏི ཨཝདྷཱརཎཝིཔལླཱསོ ཀཏོ། ཨཏྟནཱ དུགྒཧིཏེན དྷམྨེནཱཏི པཱཋསེསོ། ཀཏྟརི ཙེཏཾ ཀརཎཝཙནཾ, ཧེཏུཏྠེ ཙ, ཨཏྟནཱ དུགྒཧིཏཧེཏཱུཏི ཨདྷིཔྤཱཡོ། ཀསྨཱ པནཱཏི ‘‘ཨནུལོམིཀོ’’ཏི ཝུཏྟཏྠཾ དཱིཔེཏི།
Sāsanassa napuṃsakattā ‘‘yathā…pe… dhammasāsanānī’’ti vuttaṃ. Duccaritasaṃkilesaṃ nāma atthato cetanā, tathākārappavattacittuppādo vā. Aniccādilakkhaṇaṃ paṭivijjhitvā pavattattā vipassanācittāni visayato lokiyā’bhisamayo asammohato lokuttaro, lokuttaro eva vā abhisamayo visayato nibbānasaṅkhātassa atthassa, itarassa maggādikassa asammohatotipi eke. Ettha ‘‘paṭivedho’’ti vuttaṃ ñāṇaṃ, taṃ kathaṃ gambhīranti ce? Gambhīrassa udakassa pamāṇaggahaṇakāle dīghena pamāṇena bhavitabbaṃ, evaṃ alabbhaneyyabhāvadassanatthaṃ idānīti vuttanti eke. Yassa catthāya maggaphalatthāya. Tañca atthaṃ nānubhonti nādhigacchanti kañci attanā adhippetaṃ, itivādapamokkhañca. Kasmā? Atthassa anupaparikkhitvā gahitattā. Adhigataphalattā paṭividdhākuppo. Puna khīṇāsavaggahaṇena arahantameva dasseti, na sekkhaṃ. So hi yathā bhaṇḍāgāriko rañño kaṭakamakuṭādiṃ gopetvā icchiticchitakkhaṇe upaneti, evaṃ sahetukānaṃ sattānaṃ maggaphalatthāya dhammaṃ desesi. Tāsaṃyeva tattha vinayapiṭake pabhedato vuttattā, vāyamitvā tā eva pāpuṇātīti ācariyā. Kimatthaṃ tissova vijjā tattha vibhattāti? Sīlasampattiyā etaparamupanissayabhāvato. ‘‘Aparehipi sattahaṅgehi samannāgato bhikkhu vinayadharo hoti. Āpattiṃ jānāti, anāpattiṃ, lahukaṃ āpattiṃ, garukaṃ āpattiṃ, anekavihitaṃ pubbenivāsaṃ anussarati…pe… dibbena cakkhunā visuddhena atikkantamānusakena satte passati…pe… āsavānañca khayā…pe… upasampajja viharatī’’ti (pari. 327) suttamettha sādhakaṃ. Vinayaṃ pariyāpuṇitvā sīlasampattiṃ nissāya āsavakkhayañāṇena saheva viya dibbacakkhupubbenivāsānussatiñāṇāni paṭilabhati. Visuṃ etesaṃ parikammakiccaṃ natthīti dassanatthaṃ tāsaṃyevāti vuttanti ca vadanti eke. Abhidhamme pana tissovijjā cha abhiññā catasso ca paṭisambhidā aññe ca sammappadhānādayo guṇavisesā vibhattā. Kiñcāpi vibhattā, tathāpi visesato paññājātikattā catasso paṭisambhidā pāpuṇātīti dassanatthaṃ tāsaṃ tatthevāti avadhāraṇavipallāso kato. Attanā duggahitena dhammenāti pāṭhaseso. Kattari cetaṃ karaṇavacanaṃ, hetutthe ca, attanā duggahitahetūti adhippāyo. Kasmā panāti ‘‘anulomiko’’ti vuttatthaṃ dīpeti.
པཋམམཧཱསངྒཱིཏིཀཐཱཝཎྞནཱནཡོ།
Paṭhamamahāsaṅgītikathāvaṇṇanānayo.
