| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৩. পঠমমরণস্সতিসুত্তং
3. Paṭhamamaraṇassatisuttaṃ
৭৩. একং সমযং ভগৰা নাতিকে 1 ৰিহরতি গিঞ্জকাৰসথে। তত্র খো ভগৰা ভিক্খূ আমন্তেসি – ‘‘ভিক্খৰো’’তি । ‘‘ভদন্তে’’তি তে ভিক্খূ ভগৰতো পচ্চস্সোসুং। ভগৰা এতদৰোচ – ‘‘মরণস্সতি, ভিক্খৰে, ভাৰিতা বহুলীকতা মহপ্ফলা হোতি মহানিসংসা অমতোগধা অমতপরিযোসানা। ভাৰেথ নো তুম্হে, ভিক্খৰে, মরণস্সতি’’ন্তি।
73. Ekaṃ samayaṃ bhagavā nātike 2 viharati giñjakāvasathe. Tatra kho bhagavā bhikkhū āmantesi – ‘‘bhikkhavo’’ti . ‘‘Bhadante’’ti te bhikkhū bhagavato paccassosuṃ. Bhagavā etadavoca – ‘‘maraṇassati, bhikkhave, bhāvitā bahulīkatā mahapphalā hoti mahānisaṃsā amatogadhā amatapariyosānā. Bhāvetha no tumhe, bhikkhave, maraṇassati’’nti.
এৰং ৰুত্তে অঞ্ঞতরো ভিক্খু ভগৰন্তং এতদৰোচ – ‘‘অহং খো, ভন্তে, ভাৰেমি মরণস্সতি’’ন্তি। ‘‘যথা কথং পন ত্ৰং, ভিক্খু, ভাৰেসি মরণস্সতি’’ন্তি? ‘‘ইধ ময্হং, ভন্তে, এৰং হোতি – ‘অহো ৰতাহং রত্তিন্দিৰং জীৰেয্যং , ভগৰতো সাসনং মনসি করেয্যং, বহু 3 ৰত মে কতং অস্সা’তি। এৰং খো অহং, ভন্তে, ভাৰেমি মরণস্সতি’’ন্তি।
Evaṃ vutte aññataro bhikkhu bhagavantaṃ etadavoca – ‘‘ahaṃ kho, bhante, bhāvemi maraṇassati’’nti. ‘‘Yathā kathaṃ pana tvaṃ, bhikkhu, bhāvesi maraṇassati’’nti? ‘‘Idha mayhaṃ, bhante, evaṃ hoti – ‘aho vatāhaṃ rattindivaṃ jīveyyaṃ , bhagavato sāsanaṃ manasi kareyyaṃ, bahu 4 vata me kataṃ assā’ti. Evaṃ kho ahaṃ, bhante, bhāvemi maraṇassati’’nti.
অঞ্ঞতরোপি খো ভিক্খু ভগৰন্তং এতদৰোচ – ‘‘অহম্পি খো, ভন্তে, ভাৰেমি মরণস্সতি’’ন্তি। ‘‘যথা কথং পন ত্ৰং, ভিক্খু, ভাৰেসি মরণস্সতি’’ন্তি? ‘‘ইধ ময্হং, ভন্তে, এৰং হোতি – ‘অহো ৰতাহং দিৰসং জীৰেয্যং, ভগৰতো সাসনং মনসি করেয্যং, বহু ৰত মে কতং অস্সা’তি। এৰং খো অহং, ভন্তে, ভাৰেমি মরণস্সতি’’ন্তি।
Aññataropi kho bhikkhu bhagavantaṃ etadavoca – ‘‘ahampi kho, bhante, bhāvemi maraṇassati’’nti. ‘‘Yathā kathaṃ pana tvaṃ, bhikkhu, bhāvesi maraṇassati’’nti? ‘‘Idha mayhaṃ, bhante, evaṃ hoti – ‘aho vatāhaṃ divasaṃ jīveyyaṃ, bhagavato sāsanaṃ manasi kareyyaṃ, bahu vata me kataṃ assā’ti. Evaṃ kho ahaṃ, bhante, bhāvemi maraṇassati’’nti.
অঞ্ঞতরোপি খো ভিক্খু ভগৰন্তং এতদৰোচ – ‘‘অহম্পি খো, ভন্তে, ভাৰেমি মরণস্সতি’’ন্তি। ‘‘যথা কথং পন ত্ৰং, ভিক্খু, ভাৰেসি মরণস্সতি’’ন্তি? ‘‘ইধ ময্হং, ভন্তে, এৰং হোতি – ‘অহো ৰতাহং উপড্ঢদিৰসং জীৰেয্যং, ভগৰতো সাসনং মনসি করেয্যং, বহু ৰত মে কতং অস্সা’তি। এৰং খো অহং, ভন্তে, ভাৰেমি মরণস্সতি’’ন্তি।
Aññataropi kho bhikkhu bhagavantaṃ etadavoca – ‘‘ahampi kho, bhante, bhāvemi maraṇassati’’nti. ‘‘Yathā kathaṃ pana tvaṃ, bhikkhu, bhāvesi maraṇassati’’nti? ‘‘Idha mayhaṃ, bhante, evaṃ hoti – ‘aho vatāhaṃ upaḍḍhadivasaṃ jīveyyaṃ, bhagavato sāsanaṃ manasi kareyyaṃ, bahu vata me kataṃ assā’ti. Evaṃ kho ahaṃ, bhante, bhāvemi maraṇassati’’nti.
অঞ্ঞতরোপি খো ভিক্খু ভগৰন্তং এতদৰোচ – ‘‘অহম্পি খো, ভন্তে, ভাৰেমি মরণস্সতি’’ন্তি । ‘‘যথা কথং পন ত্ৰং, ভিক্খু, ভাৰেসি মরণস্সতি’’ন্তি? ‘‘ইধ ময্হং, ভন্তে, এৰং হোতি – ‘অহো ৰতাহং তদন্তরং জীৰেয্যং যদন্তরং একপিণ্ডপাতং ভুঞ্জামি, ভগৰতো সাসনং মনসি করেয্যং, বহু ৰত মে কতং অস্সা’তি। এৰং খো অহং, ভন্তে, ভাৰেমি মরণস্সতি’’ন্তি।
Aññataropi kho bhikkhu bhagavantaṃ etadavoca – ‘‘ahampi kho, bhante, bhāvemi maraṇassati’’nti . ‘‘Yathā kathaṃ pana tvaṃ, bhikkhu, bhāvesi maraṇassati’’nti? ‘‘Idha mayhaṃ, bhante, evaṃ hoti – ‘aho vatāhaṃ tadantaraṃ jīveyyaṃ yadantaraṃ ekapiṇḍapātaṃ bhuñjāmi, bhagavato sāsanaṃ manasi kareyyaṃ, bahu vata me kataṃ assā’ti. Evaṃ kho ahaṃ, bhante, bhāvemi maraṇassati’’nti.
অঞ্ঞতরোপি খো ভিক্খু ভগৰন্তং এতদৰোচ – ‘‘অহম্পি খো, ভন্তে, ভাৰেমি মরণস্সতি’’ন্তি। ‘‘যথা কথং পন ত্ৰং, ভিক্খু, ভাৰেসি মরণস্সতি’’ন্তি? ‘‘ইধ ময্হং , ভন্তে, এৰং হোতি – ‘অহো ৰতাহং তদন্তরং জীৰেয্যং যদন্তরং উপড্ঢপিণ্ডপাতং ভুঞ্জামি, ভগৰতো সাসনং মনসি করেয্যং, বহু ৰত মে কতং অস্সা’তি। এৰং খো অহং, ভন্তে, ভাৰেমি মরণস্সতি’’ন্তি।
Aññataropi kho bhikkhu bhagavantaṃ etadavoca – ‘‘ahampi kho, bhante, bhāvemi maraṇassati’’nti. ‘‘Yathā kathaṃ pana tvaṃ, bhikkhu, bhāvesi maraṇassati’’nti? ‘‘Idha mayhaṃ , bhante, evaṃ hoti – ‘aho vatāhaṃ tadantaraṃ jīveyyaṃ yadantaraṃ upaḍḍhapiṇḍapātaṃ bhuñjāmi, bhagavato sāsanaṃ manasi kareyyaṃ, bahu vata me kataṃ assā’ti. Evaṃ kho ahaṃ, bhante, bhāvemi maraṇassati’’nti.
অঞ্ঞতরোপি খো ভিক্খু ভগৰন্তং এতদৰোচ – ‘‘অহম্পি খো, ভন্তে, ভাৰেমি মরণস্সতি’’ন্তি। ‘‘যথা কথং পন ত্ৰং, ভিক্খু, ভাৰেসি মরণস্সতি’’ন্তি? ‘‘ইধ ময্হং, ভন্তে, এৰং হোতি – ‘অহো ৰতাহং তদন্তরং জীৰেয্যং যদন্তরং চত্তারো পঞ্চ আলোপে সঙ্খাদিত্ৰা 5 অজ্ঝোহরামি, ভগৰতো সাসনং মনসি করেয্যং, বহু ৰত মে কতং অস্সা’তি। এৰং খো অহং, ভন্তে, ভাৰেমি মরণস্সতি’’ন্তি।
Aññataropi kho bhikkhu bhagavantaṃ etadavoca – ‘‘ahampi kho, bhante, bhāvemi maraṇassati’’nti. ‘‘Yathā kathaṃ pana tvaṃ, bhikkhu, bhāvesi maraṇassati’’nti? ‘‘Idha mayhaṃ, bhante, evaṃ hoti – ‘aho vatāhaṃ tadantaraṃ jīveyyaṃ yadantaraṃ cattāro pañca ālope saṅkhāditvā 6 ajjhoharāmi, bhagavato sāsanaṃ manasi kareyyaṃ, bahu vata me kataṃ assā’ti. Evaṃ kho ahaṃ, bhante, bhāvemi maraṇassati’’nti.
অঞ্ঞতরোপি খো ভিক্খু ভগৰন্তং এতদৰোচ – ‘‘অহম্পি খো, ভন্তে, ভাৰেমি মরণস্সতি’’ন্তি। ‘‘যথা কথং পন ত্ৰং, ভিক্খু, ভাৰেসি মরণস্সতি’’ন্তি? ‘‘ইধ ময্হং, ভন্তে, এৰং হোতি – ‘অহো ৰতাহং তদন্তরং জীৰেয্যং যদন্তরং একং আলোপং সঙ্খাদিত্ৰা 7 অজ্ঝোহরামি, ভগৰতো সাসনং মনসি করেয্যং, বহু ৰত মে কতং অস্সা’তি। এৰং খো অহং, ভন্তে, ভাৰেমি মরণস্সতি’’ন্তি।
Aññataropi kho bhikkhu bhagavantaṃ etadavoca – ‘‘ahampi kho, bhante, bhāvemi maraṇassati’’nti. ‘‘Yathā kathaṃ pana tvaṃ, bhikkhu, bhāvesi maraṇassati’’nti? ‘‘Idha mayhaṃ, bhante, evaṃ hoti – ‘aho vatāhaṃ tadantaraṃ jīveyyaṃ yadantaraṃ ekaṃ ālopaṃ saṅkhāditvā 8 ajjhoharāmi, bhagavato sāsanaṃ manasi kareyyaṃ, bahu vata me kataṃ assā’ti. Evaṃ kho ahaṃ, bhante, bhāvemi maraṇassati’’nti.
অঞ্ঞতরোপি খো ভিক্খু ভগৰন্তং এতদৰোচ – ‘‘অহম্পি খো, ভন্তে, ভাৰেমি মরণস্সতি’’ন্তি। ‘‘যথা কথং পন ত্ৰং, ভিক্খু, ভাৰেসি মরণস্সতি’’ন্তি? ‘‘ইধ ময্হং ভন্তে, এৰং হোতি – ‘অহো ৰতাহং তদন্তরং জীৰেয্যং যদন্তরং অস্সসিত্ৰা ৰা পস্সসামি, পস্সসিত্ৰা ৰা অস্সসামি, ভগৰতো সাসনং মনসি করেয্যং, বহু ৰত মে কতং অস্সা’তি। এৰং খো অহং, ভন্তে ভাৰেমি মরণস্সতি’’ন্তি।
Aññataropi kho bhikkhu bhagavantaṃ etadavoca – ‘‘ahampi kho, bhante, bhāvemi maraṇassati’’nti. ‘‘Yathā kathaṃ pana tvaṃ, bhikkhu, bhāvesi maraṇassati’’nti? ‘‘Idha mayhaṃ bhante, evaṃ hoti – ‘aho vatāhaṃ tadantaraṃ jīveyyaṃ yadantaraṃ assasitvā vā passasāmi, passasitvā vā assasāmi, bhagavato sāsanaṃ manasi kareyyaṃ, bahu vata me kataṃ assā’ti. Evaṃ kho ahaṃ, bhante bhāvemi maraṇassati’’nti.
এৰং ৰুত্তে ভগৰা তে ভিক্খূ এতদৰোচ – ‘‘য্ৰাযং 9, ভিক্খৰে, ভিক্খু এৰং মরণস্সতিং ভাৰেতি – ‘অহো ৰতাহং রত্তিন্দিৰং জীৰেয্যং, ভগৰতো সাসনং মনসি করেয্যং, বহু ৰত মে কতং অস্সা’তি। যো চাযং 10, ভিক্খৰে, ভিক্খু এৰং মরণস্সতিং ভাৰেতি – ‘অহো ৰতাহং দিৰসং জীৰেয্যং, ভগৰতো সাসনং মনসি করেয্যং, বহু ৰত মে কতং অস্সা’তি; যো চাযং 11, ভিক্খৰে, ভিক্খু এৰং মরণস্সতিং ভাৰেতি – ‘অহো ৰতাহং উপড্ঢদিৰসং জীৰেয্যং, ভগৰতো সাসনং মনসি করেয্যং, বহু ৰত মে কতং অস্সা’তি। যো চাযং 12, ভিক্খৰে, ভিক্খু এৰং মরণস্সতিং ভাৰেতি – ‘অহো ৰতাহং তদন্তরং জীৰেয্যং যদন্তরং একপিণ্ডপাতং ভুঞ্জামি, ভগৰতো সাসনং মনসি করেয্যং, বহু ৰত মে কতং অস্সা’তি; যো চাযং 13, ভিক্খৰে, ভিক্খু এৰং মরণস্সতিং ভাৰেতি – ‘অহো ৰতাহং তদন্তরং জীৰেয্যং যদন্তরং উপড্ঢপিণ্ডপাতং ভুঞ্জামি, ভগৰতো সাসনং মনসি করেয্যং, বহু ৰত মে কতং অস্সা’তি। যো চাযং 14, ভিক্খৰে, ভিক্খু এৰং মরণস্সতিং ভাৰেতি – ‘অহো ৰতাহং তদন্তরং জীৰেয্যং যদন্তরং চত্তারো পঞ্চ আলোপে সঙ্খাদিত্ৰা অজ্ঝোহরামি, ভগৰতো সাসনং মনসি করেয্যং, বহু ৰত মে কতং অস্সা’তি – ইমে ৰুচ্চন্তি, ভিক্খৰে, ‘ভিক্খূ পমত্তা ৰিহরন্তি, দন্ধং মরণস্সতিং ভাৰেন্তি আসৰানং খযায’’’।
Evaṃ vutte bhagavā te bhikkhū etadavoca – ‘‘yvāyaṃ 15, bhikkhave, bhikkhu evaṃ maraṇassatiṃ bhāveti – ‘aho vatāhaṃ rattindivaṃ jīveyyaṃ, bhagavato sāsanaṃ manasi kareyyaṃ, bahu vata me kataṃ assā’ti. Yo cāyaṃ 16, bhikkhave, bhikkhu evaṃ maraṇassatiṃ bhāveti – ‘aho vatāhaṃ divasaṃ jīveyyaṃ, bhagavato sāsanaṃ manasi kareyyaṃ, bahu vata me kataṃ assā’ti; yo cāyaṃ 17, bhikkhave, bhikkhu evaṃ maraṇassatiṃ bhāveti – ‘aho vatāhaṃ upaḍḍhadivasaṃ jīveyyaṃ, bhagavato sāsanaṃ manasi kareyyaṃ, bahu vata me kataṃ assā’ti. Yo cāyaṃ 18, bhikkhave, bhikkhu evaṃ maraṇassatiṃ bhāveti – ‘aho vatāhaṃ tadantaraṃ jīveyyaṃ yadantaraṃ ekapiṇḍapātaṃ bhuñjāmi, bhagavato sāsanaṃ manasi kareyyaṃ, bahu vata me kataṃ assā’ti; yo cāyaṃ 19, bhikkhave, bhikkhu evaṃ maraṇassatiṃ bhāveti – ‘aho vatāhaṃ tadantaraṃ jīveyyaṃ yadantaraṃ upaḍḍhapiṇḍapātaṃ bhuñjāmi, bhagavato sāsanaṃ manasi kareyyaṃ, bahu vata me kataṃ assā’ti. Yo cāyaṃ 20, bhikkhave, bhikkhu evaṃ maraṇassatiṃ bhāveti – ‘aho vatāhaṃ tadantaraṃ jīveyyaṃ yadantaraṃ cattāro pañca ālope saṅkhāditvā ajjhoharāmi, bhagavato sāsanaṃ manasi kareyyaṃ, bahu vata me kataṃ assā’ti – ime vuccanti, bhikkhave, ‘bhikkhū pamattā viharanti, dandhaṃ maraṇassatiṃ bhāventi āsavānaṃ khayāya’’’.
‘‘যো চ খ্ৰাযং 21, ভিক্খৰে, ভিক্খু এৰং মরণস্সতিং ভাৰেতি – ‘অহো ৰতাহং তদন্তরং জীৰেয্যং যদন্তরং একং আলোপং সঙ্খাদিত্ৰা অজ্ঝোহরামি, ভগৰতো সাসনং মনসি করেয্যং, বহু ৰত মে কতং অস্সা’তি। যো চাযং 22, ভিক্খৰে, ভিক্খু এৰং মরণস্সতিং ভাৰেতি – ‘অহো ৰতাহং তদন্তরং জীৰেয্যং যদন্তরং অস্সসিত্ৰা ৰা পস্সসামি, পস্সসিত্ৰা ৰা অস্সসামি, ভগৰতো সাসনং মনসি করেয্যং, বহু ৰত মে কতং অস্সা’তি – ইমে ৰুচ্চন্তি, ভিক্খৰে, ‘ভিক্খূ অপ্পমত্তা ৰিহরন্তি, তিক্খং মরণস্সতিং ভাৰেন্তি আসৰানং খযায’’’।
‘‘Yo ca khvāyaṃ 23, bhikkhave, bhikkhu evaṃ maraṇassatiṃ bhāveti – ‘aho vatāhaṃ tadantaraṃ jīveyyaṃ yadantaraṃ ekaṃ ālopaṃ saṅkhāditvā ajjhoharāmi, bhagavato sāsanaṃ manasi kareyyaṃ, bahu vata me kataṃ assā’ti. Yo cāyaṃ 24, bhikkhave, bhikkhu evaṃ maraṇassatiṃ bhāveti – ‘aho vatāhaṃ tadantaraṃ jīveyyaṃ yadantaraṃ assasitvā vā passasāmi, passasitvā vā assasāmi, bhagavato sāsanaṃ manasi kareyyaṃ, bahu vata me kataṃ assā’ti – ime vuccanti, bhikkhave, ‘bhikkhū appamattā viharanti, tikkhaṃ maraṇassatiṃ bhāventi āsavānaṃ khayāya’’’.
‘‘তস্মাতিহ, ভিক্খৰে, এৰং সিক্খিতব্বং – ‘অপ্পমত্তা ৰিহরিস্সাম, তিক্খং মরণস্সতিং ভাৰযিস্সাম আসৰানং খযাযা’তি। এৰঞ্হি ৰো, ভিক্খৰে, সিক্খিতব্ব’’ন্তি। ততিযং।
‘‘Tasmātiha, bhikkhave, evaṃ sikkhitabbaṃ – ‘appamattā viharissāma, tikkhaṃ maraṇassatiṃ bhāvayissāma āsavānaṃ khayāyā’ti. Evañhi vo, bhikkhave, sikkhitabba’’nti. Tatiyaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৩-৯. মরণস্সতিসুত্তদ্ৰযাদিৰণ্ণনা • 3-9. Maraṇassatisuttadvayādivaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১-১০. সদ্ধাসুত্তাদিৰণ্ণনা • 1-10. Saddhāsuttādivaṇṇanā
