| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
9. பட²மமரணஸ்ஸதிஸுத்தவண்ணனா
9. Paṭhamamaraṇassatisuttavaṇṇanā
19. நவமே ஏவங்னாமகே கா³மேதி நாதிகானாமகங் கா³மங் நிஸ்ஸாய. த்³வின்னங் சூளபிதிமஹாபிதிபுத்தானங் த்³வே கா³மா, தேஸு ஏகஸ்மிங் கா³மே. ஞாதீனஞ்ஹி நிவாஸட்டா²னபூ⁴தோ கா³மோ ஞாதிகோ, ஞாதிகோயேவ நாதிகோ ஞ-காரஸ்ஸ ந-காராதே³ஸோ ‘‘அனிமித்தா ந நாயரே’’திஆதீ³ஸு (விஸுத்³தி⁴॰ 1.174; ஸங்॰ நி॰ அட்ட²॰ 1.1.20; ஜா॰ அட்ட²॰ 2.2.34) விய. ஸோ கிர கா³மோ யேஸங் ததா³ தேஸங் புப்³ப³புரிஸேன அத்தனோ ஞாதீனங் ஸாதா⁴ரணபா⁴வேன நிவஸிதோ, தேன ஞாதிகோதி பஞ்ஞாயித்த². அத² பச்சா² த்³வீஹி தா³யாதே³ஹி த்³விதா⁴ விப⁴ஜித்வா பரிபு⁴த்தோ. கி³ஞ்ஜகா வுச்சதி இட்ட²கா, கி³ஞ்ஜகாஹியேவ கதோ ஆவஸதோ²தி கி³ஞ்ஜகாவஸதோ². ஸோ ஹி ஆவாஸோ யதா² ஸுதா⁴பரிகம்மேன பயோஜனங் நத்தி², ஏவங் இட்ட²காஹி ஏவ சினித்வா சா²தெ³த்வா கதோ. தஸ்மிங் கிர பதே³ஸே மத்திகா ஸக்க²ரமரும்பவாலுகாதீ³ஹி அஸம்மிஸ்ஸா கதி²னா ஸண்ஹஸுகு²மா, தாய கதானி குலாலபா⁴ஜனானிபி ஸிலாமயானி விய த³ள்ஹானி. தஸ்மா தே உபாஸகா தாய மத்திகாய தீ³க⁴புதூ² இட்ட²கா காரெத்வா ட²பெத்வா ட²பெத்வா த்³வாரவாதபானகவாடதுலாயோ ஸப்³ப³ங் த³ப்³ப³ஸம்பா⁴ரேன வினா தாஹி இட்ட²காஹியேவ பாஸாத³ங் காரேஸுங். தேன வுத்தங் ‘‘இட்ட²காமயே பாஸாதே³’’தி.
19. Navame evaṃnāmake gāmeti nātikānāmakaṃ gāmaṃ nissāya. Dvinnaṃ cūḷapitimahāpitiputtānaṃ dve gāmā, tesu ekasmiṃ gāme. Ñātīnañhi nivāsaṭṭhānabhūto gāmo ñātiko, ñātikoyeva nātiko ña-kārassa na-kārādeso ‘‘animittā na nāyare’’tiādīsu (visuddhi. 1.174; saṃ. ni. aṭṭha. 1.1.20; jā. aṭṭha. 2.2.34) viya. So kira gāmo yesaṃ tadā tesaṃ pubbapurisena attano ñātīnaṃ sādhāraṇabhāvena nivasito, tena ñātikoti paññāyittha. Atha pacchā dvīhi dāyādehi dvidhā vibhajitvā paribhutto. Giñjakā vuccati iṭṭhakā, giñjakāhiyeva kato āvasathoti giñjakāvasatho. So hi āvāso yathā sudhāparikammena payojanaṃ natthi, evaṃ iṭṭhakāhi eva cinitvā chādetvā kato. Tasmiṃ kira padese mattikā sakkharamarumpavālukādīhi asammissā kathinā saṇhasukhumā, tāya katāni kulālabhājanānipi silāmayāni viya daḷhāni. Tasmā te upāsakā tāya mattikāya dīghaputhū iṭṭhakā kāretvā ṭhapetvā ṭhapetvā dvāravātapānakavāṭatulāyo sabbaṃ dabbasambhārena vinā tāhi iṭṭhakāhiyeva pāsādaṃ kāresuṃ. Tena vuttaṃ ‘‘iṭṭhakāmaye pāsāde’’ti.
ரத்திந்தி³வந்தி ஏகரத்திதி³வங். ப⁴க³வதோ ஸாஸனந்தி அரியமக்³க³ப்படிவேதா⁴வஹங் ஸத்து² ஓவாத³ங். ப³ஹு வத மே கதங் அஸ்ஸாதி ப³ஹு வத மயா அத்தஹிதங் பப்³ப³ஜிதகிச்சங் கதங் ப⁴வெய்ய.
Rattindivanti ekarattidivaṃ. Bhagavato sāsananti ariyamaggappaṭivedhāvahaṃ satthu ovādaṃ. Bahu vata me kataṃ assāti bahu vata mayā attahitaṃ pabbajitakiccaṃ kataṃ bhaveyya.
தத³ந்தரந்தி தத்தகங் வேலங். ஏகபிண்ட³பாதந்தி ஏகங் தி³வஸங் யாபனப்பஹோனகங் பிண்ட³பாதங். யாவ அந்தோ பவிட்ட²வாதோ ப³ஹி நிக்க²மதி, ப³ஹி நிக்க²ந்தவாதோ வா அந்தோ பவிஸதீதி ஏகஸ்ஸேவ பவேஸனிக்க²மோ விய வுத்தங், தங் நாஸிகாவாதபா⁴வஸாமஞ்ஞேனாதி த³ட்ட²ப்³ப³ங்.
Tadantaranti tattakaṃ velaṃ. Ekapiṇḍapātanti ekaṃ divasaṃ yāpanappahonakaṃ piṇḍapātaṃ. Yāva anto paviṭṭhavāto bahi nikkhamati, bahi nikkhantavātovā anto pavisatīti ekasseva pavesanikkhamo viya vuttaṃ, taṃ nāsikāvātabhāvasāmaññenāti daṭṭhabbaṃ.
பட²மமரணஸ்ஸதிஸுத்தவண்ணனா நிட்டி²தா.
Paṭhamamaraṇassatisuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 9. பட²மமரணஸ்ஸதிஸுத்தங் • 9. Paṭhamamaraṇassatisuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 9. பட²மமரணஸ்ஸதிஸுத்தவண்ணனா • 9. Paṭhamamaraṇassatisuttavaṇṇanā
