| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
৯. পঠমমরণস্সতিসুত্তৰণ্ণনা
9. Paṭhamamaraṇassatisuttavaṇṇanā
১৯. নৰমে এৰংনামকে গামেতি নাতিকানামকং গামং নিস্সায। দ্ৰিন্নং চূল়পিতিমহাপিতিপুত্তানং দ্ৰে গামা, তেসু একস্মিং গামে। ঞাতীনঞ্হি নিৰাসট্ঠানভূতো গামো ঞাতিকো, ঞাতিকোযেৰ নাতিকো ঞ-কারস্স ন-কারাদেসো ‘‘অনিমিত্তা ন নাযরে’’তিআদীসু (ৰিসুদ্ধি॰ ১.১৭৪; সং॰ নি॰ অট্ঠ॰ ১.১.২০; জা॰ অট্ঠ॰ ২.২.৩৪) ৰিয। সো কির গামো যেসং তদা তেসং পুব্বপুরিসেন অত্তনো ঞাতীনং সাধারণভাৰেন নিৰসিতো, তেন ঞাতিকোতি পঞ্ঞাযিত্থ। অথ পচ্ছা দ্ৰীহি দাযাদেহি দ্ৰিধা ৰিভজিত্ৰা পরিভুত্তো। গিঞ্জকা ৰুচ্চতি ইট্ঠকা, গিঞ্জকাহিযেৰ কতো আৰসথোতি গিঞ্জকাৰসথো। সো হি আৰাসো যথা সুধাপরিকম্মেন পযোজনং নত্থি, এৰং ইট্ঠকাহি এৰ চিনিত্ৰা ছাদেত্ৰা কতো। তস্মিং কির পদেসে মত্তিকা সক্খরমরুম্পৰালুকাদীহি অসম্মিস্সা কথিনা সণ্হসুখুমা, তায কতানি কুলালভাজনানিপি সিলামযানি ৰিয দল়্হানি। তস্মা তে উপাসকা তায মত্তিকায দীঘপুথূ ইট্ঠকা কারেত্ৰা ঠপেত্ৰা ঠপেত্ৰা দ্ৰারৰাতপানকৰাটতুলাযো সব্বং দব্বসম্ভারেন ৰিনা তাহি ইট্ঠকাহিযেৰ পাসাদং কারেসুং। তেন ৰুত্তং ‘‘ইট্ঠকামযে পাসাদে’’তি।
19. Navame evaṃnāmake gāmeti nātikānāmakaṃ gāmaṃ nissāya. Dvinnaṃ cūḷapitimahāpitiputtānaṃ dve gāmā, tesu ekasmiṃ gāme. Ñātīnañhi nivāsaṭṭhānabhūto gāmo ñātiko, ñātikoyeva nātiko ña-kārassa na-kārādeso ‘‘animittā na nāyare’’tiādīsu (visuddhi. 1.174; saṃ. ni. aṭṭha. 1.1.20; jā. aṭṭha. 2.2.34) viya. So kira gāmo yesaṃ tadā tesaṃ pubbapurisena attano ñātīnaṃ sādhāraṇabhāvena nivasito, tena ñātikoti paññāyittha. Atha pacchā dvīhi dāyādehi dvidhā vibhajitvā paribhutto. Giñjakā vuccati iṭṭhakā, giñjakāhiyeva kato āvasathoti giñjakāvasatho. So hi āvāso yathā sudhāparikammena payojanaṃ natthi, evaṃ iṭṭhakāhi eva cinitvā chādetvā kato. Tasmiṃ kira padese mattikā sakkharamarumpavālukādīhi asammissā kathinā saṇhasukhumā, tāya katāni kulālabhājanānipi silāmayāni viya daḷhāni. Tasmā te upāsakā tāya mattikāya dīghaputhū iṭṭhakā kāretvā ṭhapetvā ṭhapetvā dvāravātapānakavāṭatulāyo sabbaṃ dabbasambhārena vinā tāhi iṭṭhakāhiyeva pāsādaṃ kāresuṃ. Tena vuttaṃ ‘‘iṭṭhakāmaye pāsāde’’ti.
রত্তিন্দিৰন্তি একরত্তিদিৰং। ভগৰতো সাসনন্তি অরিযমগ্গপ্পটিৰেধাৰহং সত্থু ওৰাদং। বহু ৰত মে কতং অস্সাতি বহু ৰত মযা অত্তহিতং পব্বজিতকিচ্চং কতং ভৰেয্য।
Rattindivanti ekarattidivaṃ. Bhagavato sāsananti ariyamaggappaṭivedhāvahaṃ satthu ovādaṃ. Bahu vata me kataṃ assāti bahu vata mayā attahitaṃ pabbajitakiccaṃ kataṃ bhaveyya.
তদন্তরন্তি তত্তকং ৰেলং। একপিণ্ডপাতন্তি একং দিৰসং যাপনপ্পহোনকং পিণ্ডপাতং। যাৰ অন্তো পৰিট্ঠৰাতো বহি নিক্খমতি, বহি নিক্খন্তৰাতো ৰা অন্তো পৰিসতীতি একস্সেৰ পৰেসনিক্খমো ৰিয ৰুত্তং, তং নাসিকাৰাতভাৰসামঞ্ঞেনাতি দট্ঠব্বং।
Tadantaranti tattakaṃ velaṃ. Ekapiṇḍapātanti ekaṃ divasaṃ yāpanappahonakaṃ piṇḍapātaṃ. Yāva anto paviṭṭhavāto bahi nikkhamati, bahi nikkhantavātovā anto pavisatīti ekasseva pavesanikkhamo viya vuttaṃ, taṃ nāsikāvātabhāvasāmaññenāti daṭṭhabbaṃ.
পঠমমরণস্সতিসুত্তৰণ্ণনা নিট্ঠিতা।
Paṭhamamaraṇassatisuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ৯. পঠমমরণস্সতিসুত্তং • 9. Paṭhamamaraṇassatisuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৯. পঠমমরণস্সতিসুত্তৰণ্ণনা • 9. Paṭhamamaraṇassatisuttavaṇṇanā
