| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၉. ပဌမမရဏသ္သတိသုတ္တဝဏ္ဏနာ
9. Paṭhamamaraṇassatisuttavaṇṇanā
၁၉. နဝမေ နာတိကေတိ ဧဝံနာမကေ ဂာမေ။ ဂိဉ္ဇကာဝသထေတိ ဣဋ္ဌကာမယေ ပာသာဒေ။ အမတောဂဓာတိ နိဗ္ဗာနောဂဓာ, နိဗ္ဗာနပတိဋ္ဌာတိ အတ္ထော။ ဘာဝေထ နောတိ ဘာဝေထ နု။ မရဏသ္သတိန္တိ မရဏသ္သတိကမ္မဋ္ဌာနံ။ အဟော ဝတာတိ ပတ္ထနတ္ထေ နိပာတော။ ဗဟုံ ဝတ မေ ကတံ အသ္သာတိ တုမ္ဟာကံ သာသနေ မမ ကိစ္စံ ဗဟု ကတံ အသ္သ။ တဒန္တရန္တိ တံ အန္တရံ ခဏံ ဩကာသံ။ အသ္သသိတ္ဝာ ဝာ ပသ္သသာမီတိ ဧတ္ထ အသ္သာသော ဝုစ္စတိ အန္တော ပဝိသနဝာတော, ပသ္သာသော ဗဟိ နိက္ခမနဝာတော။ ဣတိ အယံ ဘိက္ခု ယာဝ အန္တော ပဝိဋ္ဌဝာတော ဗဟိ နိက္ခမတိ, ဗဟိ နိက္ခန္တော ဝာတော အန္တော ပဝိသတိ, တာဝ ဇီဝိတံ ပတ္ထေန္တော ဧဝမာဟ။ ဒန္ဓန္တိ မန္ဒံ ဂရုကံ အသီဃပ္ပဝတ္တံ။ အာသဝာနံ ခယာယာတိ အရဟတ္တဖလတ္ထာယ။ ဣမသ္မိံ သုတ္တေ မရဏသ္သတိ အရဟတ္တံ ပာပေတ္ဝာ ကထိတာတိ။
19. Navame nātiketi evaṃnāmake gāme. Giñjakāvasatheti iṭṭhakāmaye pāsāde. Amatogadhāti nibbānogadhā, nibbānapatiṭṭhāti attho. Bhāvetha noti bhāvetha nu. Maraṇassatinti maraṇassatikammaṭṭhānaṃ. Aho vatāti patthanatthe nipāto. Bahuṃvata me kataṃ assāti tumhākaṃ sāsane mama kiccaṃ bahu kataṃ assa. Tadantaranti taṃ antaraṃ khaṇaṃ okāsaṃ. Assasitvā vā passasāmīti ettha assāso vuccati anto pavisanavāto, passāso bahi nikkhamanavāto. Iti ayaṃ bhikkhu yāva anto paviṭṭhavāto bahi nikkhamati, bahi nikkhanto vāto anto pavisati, tāva jīvitaṃ patthento evamāha. Dandhanti mandaṃ garukaṃ asīghappavattaṃ. Āsavānaṃ khayāyāti arahattaphalatthāya. Imasmiṃ sutte maraṇassati arahattaṃ pāpetvā kathitāti.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၉. ပဌမမရဏသ္သတိသုတ္တံ • 9. Paṭhamamaraṇassatisuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၉. ပဌမမရဏသ္သတိသုတ္တဝဏ္ဏနာ • 9. Paṭhamamaraṇassatisuttavaṇṇanā
