| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৪. পঠমমারপাসসুত্তং
4. Paṭhamamārapāsasuttaṃ
১৪০. এৰং মে সুতং – একং সমযং ভগৰা বারাণসিযং ৰিহরতি ইসিপতনে মিগদাযে। তত্র খো ভগৰা ভিক্খূ আমন্তেসি – ‘‘ভিক্খৰো’’তি। ‘‘ভদন্তে’’তি তে ভিক্খূ ভগৰতো পচ্চস্সোসুং। ভগৰা এতদৰোচ –
140. Evaṃ me sutaṃ – ekaṃ samayaṃ bhagavā bārāṇasiyaṃ viharati isipatane migadāye. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca –
‘‘ময্হং খো, ভিক্খৰে, যোনিসো মনসিকারা যোনিসো সম্মপ্পধানা অনুত্তরা ৰিমুত্তি অনুপ্পত্তা, অনুত্তরা ৰিমুত্তি সচ্ছিকতা। তুম্হেপি, ভিক্খৰে, যোনিসো মনসিকারা যোনিসো সম্মপ্পধানা অনুত্তরং ৰিমুত্তিং অনুপাপুণাথ, অনুত্তরং ৰিমুত্তিং সচ্ছিকরোথা’’তি। অথ খো মারো পাপিমা যেন ভগৰা তেনুপসঙ্কমি; উপসঙ্কমিত্ৰা ভগৰন্তং গাথায অজ্ঝভাসি –
‘‘Mayhaṃ kho, bhikkhave, yoniso manasikārā yoniso sammappadhānā anuttarā vimutti anuppattā, anuttarā vimutti sacchikatā. Tumhepi, bhikkhave, yoniso manasikārā yoniso sammappadhānā anuttaraṃ vimuttiṃ anupāpuṇātha, anuttaraṃ vimuttiṃ sacchikarothā’’ti. Atha kho māro pāpimā yena bhagavā tenupasaṅkami; upasaṅkamitvā bhagavantaṃ gāthāya ajjhabhāsi –
‘‘বদ্ধোসি মারপাসেন, যে দিব্বা যে চ মানুসা।
‘‘Baddhosi mārapāsena, ye dibbā ye ca mānusā;
মারবন্ধনবদ্ধোসি, ন মে সমণ মোক্খসী’’তি॥
Mārabandhanabaddhosi, na me samaṇa mokkhasī’’ti.
মারবন্ধনমুত্তোম্হি, নিহতো ত্ৰমসি অন্তকা’’তি॥
Mārabandhanamuttomhi, nihato tvamasi antakā’’ti.
অথ খো মারো পাপিমা…পে॰… তত্থেৰন্তরধাযীতি।
Atha kho māro pāpimā…pe… tatthevantaradhāyīti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৪. পঠমমারপাসসুত্তৰণ্ণনা • 4. Paṭhamamārapāsasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৪. পঠমমারপাসসুত্তৰণ্ণনা • 4. Paṭhamamārapāsasuttavaṇṇanā
