| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၄. ပဌမမာရပာသသုတ္တဝဏ္ဏနာ
4. Paṭhamamārapāsasuttavaṇṇanā
၁၄၀. ဥပာယမနသိကာရေနာတိ အနိစ္စာဒီသု အနိစ္စာဒိတော မနသိကရဏေန။ ဥပာယဝီရိယေနာတိ အနုပ္ပန္နာကုသလာနံ အနုပ္ပာဒနာယ ဝိဓိနာ ပဝတ္တဝီရိယေန။ ကာရဏဝီရိယေနာတိ အနုပ္ပန္နာနုပ္ပာဒနာဒိအတ္ထသ္သ ကာရဏဘူတေန ဝီရိယေန။ အနုပ္ပန္နပာပကာနုပ္ပာဒနာဒိအတ္ထာနိ ဟိ ဝီရိယာနိ ယဒတ္ထံ ဟောန္တိ, တံ အတ္ထံ သာဓေန္တိယေဝာတိ ဧတသ္သ အတ္ထသ္သ ဒီပကော သမ္မာ-သဒ္ဒော။ ယောနိသောသမ္မာသဒ္ဒေန ဟိ ဥပာယကာရဏတ္ထဒီပကတံ သန္ဓာယ ‘‘ဥပာယဝီရိယေန ကာရဏဝီရိယေနာ’’တိ ဝုတ္တံ။ အရဟတ္တဖလဝိမုတ္တိ ဥက္ကဋ္ဌနိဒ္ဒေသေန။ မာရေန ‘‘မယ္ဟံ ခော, ဘိက္ခဝေ’’တိအာဒိကံ ဘဂဝတော ဝစနံ သုတ္ဝာ ဝုတ္တံ ‘‘အရဟတ္တံ ပတ္ဝာပိ န တုသ္သတီ’’တိအာဒိ။
140.Upāyamanasikārenāti aniccādīsu aniccādito manasikaraṇena. Upāyavīriyenāti anuppannākusalānaṃ anuppādanāya vidhinā pavattavīriyena. Kāraṇavīriyenāti anuppannānuppādanādiatthassa kāraṇabhūtena vīriyena. Anuppannapāpakānuppādanādiatthāni hi vīriyāni yadatthaṃ honti, taṃ atthaṃ sādhentiyevāti etassa atthassa dīpako sammā-saddo. Yonisosammāsaddena hi upāyakāraṇatthadīpakataṃ sandhāya ‘‘upāyavīriyena kāraṇavīriyenā’’ti vuttaṃ. Arahattaphalavimutti ukkaṭṭhaniddesena. Mārena ‘‘mayhaṃ kho, bhikkhave’’tiādikaṃ bhagavato vacanaṃ sutvā vuttaṃ ‘‘arahattaṃ patvāpi na tussatī’’tiādi.
ကိလေသပာသေနာတိ ကိလေသမာရသ္သ ဥပာယဘူတေန။ ကိလေသမာရော ဟိ သတ္တေ ကာမဂုဏပာသေဟိ နိဗန္ဓတိ, န ပန သယမေဝ။ တေနာဟ ‘‘ယေ ဒိဗ္ဗာ ကာမဂုဏသင္ခာတာ’’တိအာဒိ။ မာရဗန္ဓနေတိ ကိလေသမာရသ္သ ဗန္ဓနဋ္ဌာနေ, ဘဝစာရကေတိ အတ္ထော။ န မေ သမဏ မောက္ခသီတိ ဣဒံ မာရော ‘‘အနုတ္တရာ ဝိမုတ္တိ အနုပ္ပတ္တာ, ဝိမုတ္တာ သဗ္ဗပာသေဟီ’’တိ စ ဘဂဝတော ဝစနံ အသဒ္ဒဟန္တော ဝဒတိ သဒ္ဒဟန္တောပိ ဝာ ‘‘ဧဝမယံ ပရေသံ သတ္တာနံ မောက္ခာယ ဥသ္သာဟံ န ကရေယ္ယာ’’တိ အတ္တနော ကောဟညေ ဌတ္ဝာ ဝဒတိ။
Kilesapāsenāti kilesamārassa upāyabhūtena. Kilesamāro hi satte kāmaguṇapāsehi nibandhati, na pana sayameva. Tenāha ‘‘ye dibbā kāmaguṇasaṅkhātā’’tiādi. Mārabandhaneti kilesamārassa bandhanaṭṭhāne, bhavacāraketi attho. Na me samaṇa mokkhasīti idaṃ māro ‘‘anuttarā vimutti anuppattā, vimuttā sabbapāsehī’’ti ca bhagavato vacanaṃ asaddahanto vadati saddahantopi vā ‘‘evamayaṃ paresaṃ sattānaṃ mokkhāya ussāhaṃ na kareyyā’’ti attano kohaññe ṭhatvā vadati.
ပဌမမာရပာသသုတ္တဝဏ္ဏနာ နိဋ္ဌိတာ။
Paṭhamamārapāsasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၄. ပဌမမာရပာသသုတ္တံ • 4. Paṭhamamārapāsasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၄. ပဌမမာရပာသသုတ္တဝဏ္ဏနာ • 4. Paṭhamamārapāsasuttavaṇṇanā
