| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༥. པཋམམེཏྟཱསུཏྟཾ
5. Paṭhamamettāsuttaṃ
༡༢༥. ‘‘ཙཏྟཱརོམེ, བྷིཀྑཝེ, པུགྒལཱ སནྟོ སཾཝིཛྫམཱནཱ ལོཀསྨིཾ། ཀཏམེ ཙཏྟཱརོ? ཨིདྷ, བྷིཀྑཝེ, ཨེཀཙྩོ པུགྒལོ མེཏྟཱསཧགཏེན ཙེཏསཱ ཨེཀཾ དིསཾ ཕརིཏྭཱ ཝིཧརཏི, ཏཐཱ དུཏིཡཾ ཏཐཱ ཏཏིཡཾ ཏཐཱ ཙཏུཏྠཾ། ཨིཏི ཨུདྡྷམདྷོ ཏིརིཡཾ སབྦདྷི སབྦཏྟཏཱཡ སབྦཱཝནྟཾ ལོཀཾ མེཏྟཱསཧགཏེན ཙེཏསཱ ཝིཔུལེན མཧགྒཏེན ཨཔྤམཱཎེན ཨཝེརེན ཨབྱཱཔཛྫེན ཕརིཏྭཱ ཝིཧརཏི། སོ ཏདསྶཱདེཏི, ཏཾ ནིཀཱམེཏི, ཏེན ཙ ཝིཏྟིཾ ཨཱཔཛྫཏི། ཏཏྠ ཋིཏོ ཏདདྷིམུཏྟོ ཏབྦཧུལཝིཧཱརཱི ཨཔརིཧཱིནོ ཀཱལཾ ཀུརུམཱནོ བྲཧྨཀཱཡིཀཱནཾ དེཝཱནཾ སཧབྱཏཾ ཨུཔཔཛྫཏི། བྲཧྨཀཱཡིཀཱནཾ, བྷིཀྑཝེ, དེཝཱནཾ ཀཔྤོ ཨཱཡུཔྤམཱཎཾ། ཏཏྠ པུཐུཛྫནོ ཡཱཝཏཱཡུཀཾ ཋཏྭཱ ཡཱཝཏཀཾ ཏེསཾ དེཝཱནཾ ཨཱཡུཔྤམཱཎཾ ཏཾ སབྦཾ ཁེཔེཏྭཱ ནིརཡམྤི གཙྪཏི ཏིརཙྪཱནཡོནིམྤི གཙྪཏི པེཏྟིཝིསཡམྤི གཙྪཏི། བྷགཝཏོ པན སཱཝཀོ ཏཏྠ ཡཱཝཏཱཡུཀཾ ཋཏྭཱ ཡཱཝཏཀཾ ཏེསཾ དེཝཱནཾ ཨཱཡུཔྤམཱཎཾ ཏཾ སབྦཾ ཁེཔེཏྭཱ ཏསྨིཾཡེཝ བྷཝེ པརིནིབྦཱཡཏི། ཨཡཾ ཁོ , བྷིཀྑཝེ, ཝིསེསོ ཨཡཾ ཨདྷིཔྤཡཱསོ ཨིདཾ ནཱནཱཀརཎཾ སུཏཝཏོ ཨརིཡསཱཝཀསྶ ཨསྶུཏཝཏཱ པུཐུཛྫནེན, ཡདིདཾ གཏིཡཱ ཨུཔཔཏྟིཡཱ སཏི།
125. ‘‘Cattārome, bhikkhave, puggalā santo saṃvijjamānā lokasmiṃ. Katame cattāro? Idha, bhikkhave, ekacco puggalo mettāsahagatena cetasā ekaṃ disaṃ pharitvā viharati, tathā dutiyaṃ tathā tatiyaṃ tathā catutthaṃ. Iti uddhamadho tiriyaṃ sabbadhi sabbattatāya sabbāvantaṃ lokaṃ mettāsahagatena cetasā vipulena mahaggatena appamāṇena averena abyāpajjena pharitvā viharati. So tadassādeti, taṃ nikāmeti, tena ca vittiṃ āpajjati. Tattha ṭhito tadadhimutto tabbahulavihārī aparihīno kālaṃ kurumāno brahmakāyikānaṃ devānaṃ sahabyataṃ upapajjati. Brahmakāyikānaṃ, bhikkhave, devānaṃ kappo āyuppamāṇaṃ. Tattha puthujjano yāvatāyukaṃ ṭhatvā yāvatakaṃ tesaṃ devānaṃ āyuppamāṇaṃ taṃ sabbaṃ khepetvā nirayampi gacchati tiracchānayonimpi gacchati pettivisayampi gacchati. Bhagavato pana sāvako tattha yāvatāyukaṃ ṭhatvā yāvatakaṃ tesaṃ devānaṃ āyuppamāṇaṃ taṃ sabbaṃ khepetvā tasmiṃyeva bhave parinibbāyati. Ayaṃ kho , bhikkhave, viseso ayaṃ adhippayāso idaṃ nānākaraṇaṃ sutavato ariyasāvakassa assutavatā puthujjanena, yadidaṃ gatiyā upapattiyā sati.
‘‘པུན ཙཔརཾ, བྷིཀྑཝེ, ཨིདྷེཀཙྩོ པུགྒལོ ཀརུཎཱསཧགཏེན ཙེཏསཱ…པེ॰… མུདིཏཱསཧགཏེན ཙེཏསཱ…པེ॰… ཨུཔེཀྑཱསཧགཏེན ཙེཏསཱ ཨེཀཾ དིསཾ ཕརིཏྭཱ ཝིཧརཏི, ཏཐཱ དུཏིཡཾ ཏཐཱ ཏཏིཡཾ ཏཐཱ ཙཏུཏྠཾ། ཨིཏི ཨུདྡྷམདྷོ ཏིརིཡཾ སབྦདྷི སབྦཏྟཏཱཡ སབྦཱཝནྟཾ ལོཀཾ ཨུཔེཀྑཱསཧགཏེན ཙེཏསཱ ཝིཔུལེན མཧགྒཏེན ཨཔྤམཱཎེན ཨཝེརེན ཨབྱཱཔཛྫེན ཕརིཏྭཱ ཝིཧརཏི། སོ ཏདསྶཱདེཏི, ཏཾ ནིཀཱམེཏི, ཏེན ཙ ཝིཏྟིཾ ཨཱཔཛྫཏི། ཏཏྠ ཋིཏོ ཏདདྷིམུཏྟོ ཏབྦཧུལཝིཧཱརཱི ཨཔརིཧཱིནོ ཀཱལཾ ཀུརུམཱནོ ཨཱབྷསྶརཱནཾ 1 དེཝཱནཾ སཧབྱཏཾ ཨུཔཔཛྫཏི། ཨཱབྷསྶརཱནཾ, བྷིཀྑཝེ, དེཝཱནཾ དྭེ ཀཔྤཱ ཨཱཡུཔྤམཱཎཾ…པེ॰… སུབྷཀིཎྷཱནཾ 2 དེཝཱནཾ སཧབྱཏཾ ཨུཔཔཛྫཏི། སུབྷཀིཎྷཱནཾ, བྷིཀྑཝེ, དེཝཱནཾ ཙཏྟཱརོ ཀཔྤཱ ཨཱཡུཔྤམཱཎཾ…པེ॰… ཝེཧཔྥལཱནཾ དེཝཱནཾ སཧབྱཏཾ ཨུཔཔཛྫཏི། ཝེཧཔྥལཱནཾ, བྷིཀྑཝེ, དེཝཱནཾ པཉྩ ཀཔྤསཏཱནི ཨཱཡུཔྤམཱཎཾ། ཏཏྠ པུཐུཛྫནོ ཡཱཝཏཱཡུཀཾ ཋཏྭཱ ཡཱཝཏཀཾ ཏེསཾ དེཝཱནཾ ཨཱཡུཔྤམཱཎཾ ཏཾ སབྦཾ ཁེཔེཏྭཱ ནིརཡམྤི གཙྪཏི ཏིརཙྪཱནཡོནིམྤི གཙྪཏི པེཏྟིཝིསཡམྤི གཙྪཏི། བྷགཝཏོ པན སཱཝཀོ ཏཏྠ ཡཱཝཏཱཡུཀཾ ཋཏྭཱ ཡཱཝཏཀཾ ཏེསཾ དེཝཱནཾ ཨཱཡུཔྤམཱཎཾ ཏཾ སབྦཾ ཁེཔེཏྭཱ ཏསྨིཾཡེཝ བྷཝེ པརིནིབྦཱཡཏི། ཨཡཾ ཁོ, བྷིཀྑཝེ, ཝིསེསོ ཨཡཾ ཨདྷིཔྤཡཱསོ ཨིདཾ ནཱནཱཀརཎཾ སུཏཝཏོ ཨརིཡསཱཝཀསྶ ཨསྶུཏཝཏཱ པུཐུཛྫནེན, ཡདིདཾ གཏིཡཱ ཨུཔཔཏྟིཡཱ སཏི། ཨིམེ ཁོ, བྷིཀྑཝེ, ཙཏྟཱརོ པུགྒལཱ སནྟོ སཾཝིཛྫམཱནཱ ལོཀསྨི’’ནྟི། པཉྩམཾ།
‘‘Puna caparaṃ, bhikkhave, idhekacco puggalo karuṇāsahagatena cetasā…pe… muditāsahagatena cetasā…pe… upekkhāsahagatena cetasā ekaṃ disaṃ pharitvā viharati, tathā dutiyaṃ tathā tatiyaṃ tathā catutthaṃ. Iti uddhamadho tiriyaṃ sabbadhi sabbattatāya sabbāvantaṃ lokaṃ upekkhāsahagatena cetasā vipulena mahaggatena appamāṇena averena abyāpajjena pharitvā viharati. So tadassādeti, taṃ nikāmeti, tena ca vittiṃ āpajjati. Tattha ṭhito tadadhimutto tabbahulavihārī aparihīno kālaṃ kurumāno ābhassarānaṃ 3 devānaṃ sahabyataṃ upapajjati. Ābhassarānaṃ, bhikkhave, devānaṃ dve kappā āyuppamāṇaṃ…pe… subhakiṇhānaṃ 4 devānaṃ sahabyataṃ upapajjati. Subhakiṇhānaṃ, bhikkhave, devānaṃ cattāro kappā āyuppamāṇaṃ…pe… vehapphalānaṃ devānaṃ sahabyataṃ upapajjati. Vehapphalānaṃ, bhikkhave, devānaṃ pañca kappasatāni āyuppamāṇaṃ. Tattha puthujjano yāvatāyukaṃ ṭhatvā yāvatakaṃ tesaṃ devānaṃ āyuppamāṇaṃ taṃ sabbaṃ khepetvā nirayampi gacchati tiracchānayonimpi gacchati pettivisayampi gacchati. Bhagavato pana sāvako tattha yāvatāyukaṃ ṭhatvā yāvatakaṃ tesaṃ devānaṃ āyuppamāṇaṃ taṃ sabbaṃ khepetvā tasmiṃyeva bhave parinibbāyati. Ayaṃ kho, bhikkhave, viseso ayaṃ adhippayāso idaṃ nānākaraṇaṃ sutavato ariyasāvakassa assutavatā puthujjanena, yadidaṃ gatiyā upapattiyā sati. Ime kho, bhikkhave, cattāro puggalā santo saṃvijjamānā lokasmi’’nti. Pañcamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༥-༦. མེཏྟཱསུཏྟདྭཡཝཎྞནཱ • 5-6. Mettāsuttadvayavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༤-༦. དུཏིཡནཱནཱཀརཎསུཏྟཱདིཝཎྞནཱ • 4-6. Dutiyanānākaraṇasuttādivaṇṇanā
