| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
7. මිගජාලවග්‌ගො
7. Migajālavaggo
1. පඨමමිගජාලසුත්‌තං
1. Paṭhamamigajālasuttaṃ
63. සාවත්‌ථිනිදානං . අථ ඛො ආයස්‌මා මිගජාලො යෙන භගවා…පෙ.… එකමන්‌තං නිසින්‌නො ඛො ආයස්‌මා මිගජාලො භගවන්‌තං එතදවොච – ‘‘‘එකවිහාරී, එකවිහාරී’ති, භන්‌තෙ, වුච්‌චති. කිත්‌තාවතා නු ඛො, භන්‌තෙ, එකවිහාරී හොති, කිත්‌තාවතා ච පන සදුතියවිහාරී හොතී’’ති?
63. Sāvatthinidānaṃ . Atha kho āyasmā migajālo yena bhagavā…pe… ekamantaṃ nisinno kho āyasmā migajālo bhagavantaṃ etadavoca – ‘‘‘ekavihārī, ekavihārī’ti, bhante, vuccati. Kittāvatā nu kho, bhante, ekavihārī hoti, kittāvatā ca pana sadutiyavihārī hotī’’ti?
‘‘සන්‌ති ඛො, මිගජාල, චක්‌ඛුවිඤ්‌ඤෙය්‍යා රූපා ඉට්‌ඨා කන්‌තා මනාපා පියරූපා කාමූපසංහිතා රජනීයා. තඤ්‌චෙ භික්‌ඛු අභිනන්‌දති අභිවදති අජ්‌ඣොසාය තිට්‌ඨති. තස්‌ස තං අභිනන්‌දතො අභිවදතො අජ්‌ඣොසාය තිට්‌ඨතො උප්‌පජ්‌ජති නන්‌දී 1. නන්‌දියා සති සාරාගො හොති; සාරාගෙ සති සංයොගො හොති. නන්‌දිසංයොජනසංයුත්‌තො ඛො, මිගජාල, භික්‌ඛු සදුතියවිහාරීති වුච්‌චති. සන්‌ති…පෙ.… සන්‌ති ඛො, මිගජාල, ජිව්‌හාවිඤ්‌ඤෙය්‍යා රසා ඉට්‌ඨා කන්‌තා මනාපා පියරූපා කාමූපසංහිතා රජනීයා. තඤ්‌චෙ භික්‌ඛු අභිනන්‌දති අභිවදති අජ්‌ඣොසාය තිට්‌ඨති. තස්‌ස තං අභිනන්‌දතො අභිවදතො අජ්‌ඣොසාය තිට්‌ඨතො උප්‌පජ්‌ජති නන්‌දී. නන්‌දියා සති සාරාගො හොති; සාරාගෙ සති සංයොගො හොති. නන්‌දිසංයොජනසංයුත්‌තො ඛො, මිගජාල, භික්‌ඛු සදුතියවිහාරීති වුච්‌චති. එවංවිහාරී ච, මිගජාල, භික්‌ඛු කිඤ්‌චාපි අරඤ්‌ඤවනපත්‌ථානි පන්‌තානි සෙනාසනානි පටිසෙවති අප්‌පසද්‌දානි අප්‌පනිග්‌ඝොසානි විජනවාතානි මනුස්‌සරාහස්‌සෙය්‍යකානි 2 පටිසල්‌ලානසාරුප්‌පානි; අථ ඛො සදුතියවිහාරීති වුච්‌චති. තං කිස්‌ස හෙතු? තණ්‌හා හිස්‌ස දුතියා, සාස්‌ස අප්‌පහීනා. තස්‌මා සදුතියවිහාරී’’ති වුච්‌චති.
‘‘Santi kho, migajāla, cakkhuviññeyyā rūpā iṭṭhā kantā manāpā piyarūpā kāmūpasaṃhitā rajanīyā. Tañce bhikkhu abhinandati abhivadati ajjhosāya tiṭṭhati. Tassa taṃ abhinandato abhivadato ajjhosāya tiṭṭhato uppajjati nandī 3. Nandiyā sati sārāgo hoti; sārāge sati saṃyogo hoti. Nandisaṃyojanasaṃyutto kho, migajāla, bhikkhu sadutiyavihārīti vuccati. Santi…pe… santi kho, migajāla, jivhāviññeyyā rasā iṭṭhā kantā manāpā piyarūpā kāmūpasaṃhitā rajanīyā. Tañce bhikkhu abhinandati abhivadati ajjhosāya tiṭṭhati. Tassa taṃ abhinandato abhivadato ajjhosāya tiṭṭhato uppajjati nandī. Nandiyā sati sārāgo hoti; sārāge sati saṃyogo hoti. Nandisaṃyojanasaṃyutto kho, migajāla, bhikkhu sadutiyavihārīti vuccati. Evaṃvihārī ca, migajāla, bhikkhu kiñcāpi araññavanapatthāni pantāni senāsanāni paṭisevati appasaddāni appanigghosāni vijanavātāni manussarāhasseyyakāni 4 paṭisallānasāruppāni; atha kho sadutiyavihārīti vuccati. Taṃ kissa hetu? Taṇhā hissa dutiyā, sāssa appahīnā. Tasmā sadutiyavihārī’’ti vuccati.
‘‘සන්‌ති ච ඛො, මිගජාල, චක්‌ඛුවිඤ්‌ඤෙය්‍යා රූපා ඉට්‌ඨා කන්‌තා මනාපා පියරූපා කාමූපසංහිතා රජනීයා. තඤ්‌චෙ භික්‌ඛු නාභිනන්‌දති නාභිවදති නාජ්‌ඣොසාය තිට්‌ඨති. තස්‌ස තං අනභිනන්‌දතො අනභිවදතො අනජ්‌ඣොසාය තිට්‌ඨතො නන්‌දී නිරුජ්‌ඣති. නන්‌දියා අසති සාරාගො න හොති; සාරාගෙ අසති සංයොගො න හොති. නන්‌දිසංයොජනවිසංයුත්‌තො ඛො, මිගජාල, භික්‌ඛු එකවිහාරීති වුච්‌චති…පෙ.… සන්‌ති ච ඛො, මිගජාල, ජිව්‌හාවිඤ්‌ඤෙය්‍යා රසා…පෙ.… සන්‌ති ච ඛො, මිගජාල, මනොවිඤ්‌ඤෙය්‍යා ධම්‌මා ඉට්‌ඨා කන්‌තා මනාපා පියරූපා කාමූපසංහිතා රජනීයා. තඤ්‌චෙ භික්‌ඛු නාභිනන්‌දති නාභිවදති නාජ්‌ඣොසාය තිට්‌ඨති. තස්‌ස තං අනභිනන්‌දතො අනභිවදතො අනජ්‌ඣොසාය තිට්‌ඨතො නන්‌දී නිරුජ්‌ඣති. නන්‌දියා අසති සාරාගො න හොති; සාරාගෙ අසති සංයොගො න හොති. නන්‌දිසංයොජනවිප්‌පයුත්‌තො ඛො, මිගජාල, භික්‌ඛු එකවිහාරීති වුච්‌චති. එවංවිහාරී ච, මිගජාල, භික්‌ඛු කිඤ්‌චාපි ගාමන්‌තෙ විහරති ආකිණ්‌ණො භික්‌ඛූහි භික්‌ඛුනීහි උපාසකෙහි උපාසිකාහි රාජූහි රාජමහාමත්‌තෙහි තිත්‌ථියෙහි තිත්‌ථියසාවකෙහි . අථ ඛො එකවිහාරීති වුච්‌චති. තං කිස්‌ස හෙතු? තණ්‌හා හිස්‌ස දුතියා, සාස්‌ස පහීනා. තස්‌මා එකවිහාරීති වුච්‌චතී’’ති. පඨමං.
‘‘Santi ca kho, migajāla, cakkhuviññeyyā rūpā iṭṭhā kantā manāpā piyarūpā kāmūpasaṃhitā rajanīyā. Tañce bhikkhu nābhinandati nābhivadati nājjhosāya tiṭṭhati. Tassa taṃ anabhinandato anabhivadato anajjhosāya tiṭṭhato nandī nirujjhati. Nandiyā asati sārāgo na hoti; sārāge asati saṃyogo na hoti. Nandisaṃyojanavisaṃyutto kho, migajāla, bhikkhu ekavihārīti vuccati…pe… santi ca kho, migajāla, jivhāviññeyyā rasā…pe… santi ca kho, migajāla, manoviññeyyā dhammā iṭṭhā kantā manāpā piyarūpā kāmūpasaṃhitā rajanīyā. Tañce bhikkhu nābhinandati nābhivadati nājjhosāya tiṭṭhati. Tassa taṃ anabhinandato anabhivadato anajjhosāya tiṭṭhato nandī nirujjhati. Nandiyā asati sārāgo na hoti; sārāge asati saṃyogo na hoti. Nandisaṃyojanavippayutto kho, migajāla, bhikkhu ekavihārīti vuccati. Evaṃvihārī ca, migajāla, bhikkhu kiñcāpi gāmante viharati ākiṇṇo bhikkhūhi bhikkhunīhi upāsakehi upāsikāhi rājūhi rājamahāmattehi titthiyehi titthiyasāvakehi . Atha kho ekavihārīti vuccati. Taṃ kissa hetu? Taṇhā hissa dutiyā, sāssa pahīnā. Tasmā ekavihārīti vuccatī’’ti. Paṭhamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 1. පඨමමිගජාලසුත්‌තවණ්‌ණනා • 1. Paṭhamamigajālasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 1. පඨමමිගජාලසුත්‌තවණ්‌ණනා • 1. Paṭhamamigajālasuttavaṇṇanā
