| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
7. மிக³ஜாலவக்³கோ³
7. Migajālavaggo
1. பட²மமிக³ஜாலஸுத்தவண்ணனா
1. Paṭhamamigajālasuttavaṇṇanā
63. மிக³ஜாலவக்³க³ஸ்ஸ பட²மே சக்கு²விஞ்ஞெய்யாதி சக்கு²விஞ்ஞாணேன பஸ்ஸிதப்³பா³. ஸோதவிஞ்ஞெய்யாதீ³ஸுபி ஏஸேவ நயோ. இட்டா²தி பரியிட்டா² வா ஹொந்து மா வா, இட்டா²ரம்மணபூ⁴தாதி அத்தோ². கந்தாதி கமனீயா. மனாபாதி மனவட்³ட⁴னகா. பியரூபாதி பியஜாதிகா. காமூபஸங்ஹிதாதி ஆரம்மணங் கத்வா உப்பஜ்ஜமானேன காமேன உபஸங்ஹிதா ரஜனீயாதி ரஞ்ஜனீயா, ராகு³ப்பத்திகாரணபூ⁴தாதி அத்தோ². நந்தீ³தி தண்ஹானந்தீ³. ஸங்யோகோ³தி ஸங்யோஜனங். நந்தி³ஸங்யோஜனஸங்யுத்தோதி நந்தீ³ப³ந்த⁴னேன ப³த்³தோ⁴. அரஞ்ஞவனபத்தா²னீதி அரஞ்ஞானி ச வனபத்தா²னி ச. தத்த² கிஞ்சாபி அபி⁴த⁴ம்மே நிப்பரியாயேன ‘‘நிக்க²மித்வா ப³ஹி இந்த³கீ²லா ஸப்³ப³மேதங் அரஞ்ஞ’’ந்தி (விப⁴॰ 529) வுத்தங், ததா²பி யங் தங் ‘‘பஞ்சத⁴னுஸதிகங் பச்சி²ம’’ந்தி (பாரா॰ 654) அரஞ்ஞகங்க³னிப்பா²த³கங் ஸேனாஸனங் வுத்தங், ததே³வ அதி⁴ப்பேதந்தி வேதி³தப்³ப³ங். வனபத்த²ந்தி கா³மந்தங் அதிக்கமித்வா மனுஸ்ஸானங் அனுபசாரட்டா²னங், யத்த² ந கஸீயதி ந வபீயதி. வுத்தம்பி சேதங் –
63. Migajālavaggassa paṭhame cakkhuviññeyyāti cakkhuviññāṇena passitabbā. Sotaviññeyyādīsupi eseva nayo. Iṭṭhāti pariyiṭṭhā vā hontu mā vā, iṭṭhārammaṇabhūtāti attho. Kantāti kamanīyā. Manāpāti manavaḍḍhanakā. Piyarūpāti piyajātikā. Kāmūpasaṃhitāti ārammaṇaṃ katvā uppajjamānena kāmena upasaṃhitā rajanīyāti rañjanīyā, rāguppattikāraṇabhūtāti attho. Nandīti taṇhānandī. Saṃyogoti saṃyojanaṃ. Nandisaṃyojanasaṃyuttoti nandībandhanena baddho. Araññavanapatthānīti araññāni ca vanapatthāni ca. Tattha kiñcāpi abhidhamme nippariyāyena ‘‘nikkhamitvā bahi indakhīlā sabbametaṃ arañña’’nti (vibha. 529) vuttaṃ, tathāpi yaṃ taṃ ‘‘pañcadhanusatikaṃ pacchima’’nti (pārā. 654) araññakaṅganipphādakaṃ senāsanaṃ vuttaṃ, tadeva adhippetanti veditabbaṃ. Vanapatthanti gāmantaṃ atikkamitvā manussānaṃ anupacāraṭṭhānaṃ, yattha na kasīyati na vapīyati. Vuttampi cetaṃ –
‘‘வனபத்த²ந்தி தூ³ரானமேதங் ஸேனாஸனானங் அதி⁴வசனங். வனபத்த²ந்தி வனஸண்டா³னமேதங், வனபத்த²ந்தி பி⁴ங்ஸனகானமேதங், வனபத்த²ந்தி ஸலோமஹங்ஸானமேதங், வனபத்த²ந்தி பரியந்தானமேதங், வனபத்த²ந்தி அமனுஸ்ஸூபசாரானங் ஸேனாஸனானமேதங் அதி⁴வசன’’ந்தி (விப⁴॰ 531).
‘‘Vanapatthanti dūrānametaṃ senāsanānaṃ adhivacanaṃ. Vanapatthanti vanasaṇḍānametaṃ, vanapatthanti bhiṃsanakānametaṃ, vanapatthanti salomahaṃsānametaṃ, vanapatthanti pariyantānametaṃ, vanapatthanti amanussūpacārānaṃ senāsanānametaṃ adhivacana’’nti (vibha. 531).
எத்த² ச பரியந்தானந்தி இமங் ஏகங் பரியாயங் ட²பெத்வா ஸேஸபரியாயேஹி வனபத்தா²னி வேதி³தப்³பா³னி. பந்தானீதி பரியந்தானி அதிதூ³ரானி. அப்பஸத்³தா³னீதி உது³க்க²லமுஸலதா³ரகஸத்³தா³தீ³னங் அபா⁴வேன அப்பஸத்³தா³னி. அப்பனிக்³கோ⁴ஸானீதி தேஸங் தேஸங் நின்னாத³மஹானிக்³கோ⁴ஸஸ்ஸ அபா⁴வேன அப்பனிக்³கோ⁴ஸானி. விஜனவாதானீதி ஸஞ்சரணஜனஸ்ஸ ஸரீரவாதவிரஹிதானி. மனுஸ்ஸராஹஸ்ஸெய்யகானீதி மனுஸ்ஸானங் ரஹோகம்மஸ்ஸ அனுச்ச²விகானி. படிஸல்லானஸாருப்பானீதி நிலீயனஸாருப்பானி.
Ettha ca pariyantānanti imaṃ ekaṃ pariyāyaṃ ṭhapetvā sesapariyāyehi vanapatthāni veditabbāni. Pantānīti pariyantāni atidūrāni. Appasaddānīti udukkhalamusaladārakasaddādīnaṃ abhāvena appasaddāni. Appanigghosānīti tesaṃ tesaṃ ninnādamahānigghosassa abhāvena appanigghosāni. Vijanavātānīti sañcaraṇajanassa sarīravātavirahitāni. Manussarāhasseyyakānīti manussānaṃ rahokammassa anucchavikāni. Paṭisallānasāruppānīti nilīyanasāruppāni.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. பட²மமிக³ஜாலஸுத்தங் • 1. Paṭhamamigajālasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1. பட²மமிக³ஜாலஸுத்தவண்ணனா • 1. Paṭhamamigajālasuttavaṇṇanā
