| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
৭. মিগজালৰগ্গো
7. Migajālavaggo
১. পঠমমিগজালসুত্তৰণ্ণনা
1. Paṭhamamigajālasuttavaṇṇanā
৬৩. মিগজালৰগ্গস্স পঠমে চক্খুৰিঞ্ঞেয্যাতি চক্খুৰিঞ্ঞাণেন পস্সিতব্বা। সোতৰিঞ্ঞেয্যাদীসুপি এসেৰ নযো। ইট্ঠাতি পরিযিট্ঠা ৰা হোন্তু মা ৰা, ইট্ঠারম্মণভূতাতি অত্থো। কন্তাতি কমনীযা। মনাপাতি মনৰড্ঢনকা। পিযরূপাতি পিযজাতিকা। কামূপসংহিতাতি আরম্মণং কত্ৰা উপ্পজ্জমানেন কামেন উপসংহিতা রজনীযাতি রঞ্জনীযা, রাগুপ্পত্তিকারণভূতাতি অত্থো। নন্দীতি তণ্হানন্দী। সংযোগোতি সংযোজনং। নন্দিসংযোজনসংযুত্তোতি নন্দীবন্ধনেন বদ্ধো। অরঞ্ঞৰনপত্থানীতি অরঞ্ঞানি চ ৰনপত্থানি চ। তত্থ কিঞ্চাপি অভিধম্মে নিপ্পরিযাযেন ‘‘নিক্খমিত্ৰা বহি ইন্দখীলা সব্বমেতং অরঞ্ঞ’’ন্তি (ৰিভ॰ ৫২৯) ৰুত্তং, তথাপি যং তং ‘‘পঞ্চধনুসতিকং পচ্ছিম’’ন্তি (পারা॰ ৬৫৪) অরঞ্ঞকঙ্গনিপ্ফাদকং সেনাসনং ৰুত্তং, তদেৰ অধিপ্পেতন্তি ৰেদিতব্বং। ৰনপত্থন্তি গামন্তং অতিক্কমিত্ৰা মনুস্সানং অনুপচারট্ঠানং, যত্থ ন কসীযতি ন ৰপীযতি। ৰুত্তম্পি চেতং –
63. Migajālavaggassa paṭhame cakkhuviññeyyāti cakkhuviññāṇena passitabbā. Sotaviññeyyādīsupi eseva nayo. Iṭṭhāti pariyiṭṭhā vā hontu mā vā, iṭṭhārammaṇabhūtāti attho. Kantāti kamanīyā. Manāpāti manavaḍḍhanakā. Piyarūpāti piyajātikā. Kāmūpasaṃhitāti ārammaṇaṃ katvā uppajjamānena kāmena upasaṃhitā rajanīyāti rañjanīyā, rāguppattikāraṇabhūtāti attho. Nandīti taṇhānandī. Saṃyogoti saṃyojanaṃ. Nandisaṃyojanasaṃyuttoti nandībandhanena baddho. Araññavanapatthānīti araññāni ca vanapatthāni ca. Tattha kiñcāpi abhidhamme nippariyāyena ‘‘nikkhamitvā bahi indakhīlā sabbametaṃ arañña’’nti (vibha. 529) vuttaṃ, tathāpi yaṃ taṃ ‘‘pañcadhanusatikaṃ pacchima’’nti (pārā. 654) araññakaṅganipphādakaṃ senāsanaṃ vuttaṃ, tadeva adhippetanti veditabbaṃ. Vanapatthanti gāmantaṃ atikkamitvā manussānaṃ anupacāraṭṭhānaṃ, yattha na kasīyati na vapīyati. Vuttampi cetaṃ –
‘‘ৰনপত্থন্তি দূরানমেতং সেনাসনানং অধিৰচনং। ৰনপত্থন্তি ৰনসণ্ডানমেতং, ৰনপত্থন্তি ভিংসনকানমেতং, ৰনপত্থন্তি সলোমহংসানমেতং, ৰনপত্থন্তি পরিযন্তানমেতং, ৰনপত্থন্তি অমনুস্সূপচারানং সেনাসনানমেতং অধিৰচন’’ন্তি (ৰিভ॰ ৫৩১)।
‘‘Vanapatthanti dūrānametaṃ senāsanānaṃ adhivacanaṃ. Vanapatthanti vanasaṇḍānametaṃ, vanapatthanti bhiṃsanakānametaṃ, vanapatthanti salomahaṃsānametaṃ, vanapatthanti pariyantānametaṃ, vanapatthanti amanussūpacārānaṃ senāsanānametaṃ adhivacana’’nti (vibha. 531).
এত্থ চ পরিযন্তানন্তি ইমং একং পরিযাযং ঠপেত্ৰা সেসপরিযাযেহি ৰনপত্থানি ৰেদিতব্বানি। পন্তানীতি পরিযন্তানি অতিদূরানি। অপ্পসদ্দানীতি উদুক্খলমুসলদারকসদ্দাদীনং অভাৰেন অপ্পসদ্দানি। অপ্পনিগ্ঘোসানীতি তেসং তেসং নিন্নাদমহানিগ্ঘোসস্স অভাৰেন অপ্পনিগ্ঘোসানি। ৰিজনৰাতানীতি সঞ্চরণজনস্স সরীরৰাতৰিরহিতানি। মনুস্সরাহস্সেয্যকানীতি মনুস্সানং রহোকম্মস্স অনুচ্ছৰিকানি। পটিসল্লানসারুপ্পানীতি নিলীযনসারুপ্পানি।
Ettha ca pariyantānanti imaṃ ekaṃ pariyāyaṃ ṭhapetvā sesapariyāyehi vanapatthāni veditabbāni. Pantānīti pariyantāni atidūrāni. Appasaddānīti udukkhalamusaladārakasaddādīnaṃ abhāvena appasaddāni. Appanigghosānīti tesaṃ tesaṃ ninnādamahānigghosassa abhāvena appanigghosāni. Vijanavātānīti sañcaraṇajanassa sarīravātavirahitāni. Manussarāhasseyyakānīti manussānaṃ rahokammassa anucchavikāni. Paṭisallānasāruppānīti nilīyanasāruppāni.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১. পঠমমিগজালসুত্তং • 1. Paṭhamamigajālasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১. পঠমমিগজালসুত্তৰণ্ণনা • 1. Paṭhamamigajālasuttavaṇṇanā
