| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၇. မိဂဇာလဝဂ္ဂော
7. Migajālavaggo
၁. ပဌမမိဂဇာလသုတ္တဝဏ္ဏနာ
1. Paṭhamamigajālasuttavaṇṇanā
၆၃. စက္ခုဝိညာဏံ ဒသ္သနကိစ္စန္တိ ဝုတ္တစက္ခုဝိညာဏေန ပသ္သိတဗ္ဗန္တိ အာဟ ‘‘ဣဋ္ဌာရမ္မဏဘူတာ’’တိ။ ကမနီယာတိ ကာမေတဗ္ဗာ။ မနံ အပ္ပာယန္တီတိ မနာပာတိ အာဟ ‘‘မနဝဍ္ဎနကာ’’တိ။ ပိယာယိတဗ္ဗသဘာဝာ ပိယရူပာ။ ကာမူပသံဟိတာတိ ကာမပဋိသံယုတ္တာ။ အာလမ္ဗိတဗ္ဗတာ ဧဝ စေတ္ထ ဥပသံဟိတတာတိ ‘‘အာရမ္မဏံ ကတ္ဝာ’’တိအာဒိမာဟ။ တဏ္ဟာသင္ခာတာ နန္ဒီ တဏ္ဟာနန္ဒီ, န တုဋ္ဌိနန္ဒီယေဝ ‘‘နန္ဒိံ စရတီ’’တိအာဒီသု ဝိယ။ ဂာမန္တန္တိ ဂာမသမီပံ။ ‘‘အနုပစာရဋ္ဌာန’’န္တိ ဝတ္ဝာ တံ ဒသ္သေတိ ‘‘ယတ္ထာ’’တိအာဒိနာ။
63. Cakkhuviññāṇaṃ dassanakiccanti vuttacakkhuviññāṇena passitabbanti āha ‘‘iṭṭhārammaṇabhūtā’’ti. Kamanīyāti kāmetabbā. Manaṃ appāyantīti manāpāti āha ‘‘manavaḍḍhanakā’’ti. Piyāyitabbasabhāvā piyarūpā. Kāmūpasaṃhitāti kāmapaṭisaṃyuttā. Ālambitabbatā eva cettha upasaṃhitatāti ‘‘ārammaṇaṃ katvā’’tiādimāha. Taṇhāsaṅkhātā nandī taṇhānandī, na tuṭṭhinandīyeva ‘‘nandiṃ caratī’’tiādīsu viya. Gāmantanti gāmasamīpaṃ. ‘‘Anupacāraṭṭhāna’’nti vatvā taṃ dasseti ‘‘yatthā’’tiādinā.
ဧတ္ထာတိ ယထာနီဟတေ ပာဌေ။ ‘‘ဣမံ ဧကံ ပရိယာယံ ဌပေတ္ဝာ’’တိ ဝုတ္တံ တသ္သ ‘‘ပန္တာနီ’’တိပဒေန သင္ဂဟိတတ္တာ။ အပ္ပသဒ္ဒာနိ အပ္ပနိဂ္ဃောသာနီတိ ဧတ္ထ အပ္ပ-သဒ္ဒော အဘာဝတ္ထော။
Etthāti yathānīhate pāṭhe. ‘‘Imaṃ ekaṃ pariyāyaṃ ṭhapetvā’’ti vuttaṃ tassa ‘‘pantānī’’tipadena saṅgahitattā. Appasaddāni appanigghosānīti ettha appa-saddo abhāvattho.
ပဌမမိဂဇာလသုတ္တဝဏ္ဏနာ နိဋ္ဌိတာ။
Paṭhamamigajālasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁. ပဌမမိဂဇာလသုတ္တံ • 1. Paṭhamamigajālasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁. ပဌမမိဂဇာလသုတ္တဝဏ္ဏနာ • 1. Paṭhamamigajālasuttavaṇṇanā
