| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
3. பட²மனானாகரணஸுத்தவண்ணனா
3. Paṭhamanānākaraṇasuttavaṇṇanā
123. ததியே தத³ஸ்ஸாதே³தீதி தங் ஜா²னங் ஸுக²ஸ்ஸாதே³ன அஸ்ஸாதே³தி. நிகாமேதீதி பத்தே²தி. வித்திங் ஆபஜ்ஜதீதி துட்டி²ங் ஆபஜ்ஜதி. தத³தி⁴முத்தோதி தஸ்மிங் அதி⁴முத்தோ, தங் வா அதி⁴முத்தோ. தப்³ப³ஹுலவிஹாரீதி தேன ஜா²னேன ப³ஹுலங் விஹரந்தோ. ஸஹப்³யதங் உபபஜ்ஜதீதி ஸஹபா⁴வங் க³ச்ச²தி, தத்த² நிப்³ப³த்ததீதி அத்தோ². கப்போ ஆயுப்பமாணந்தி எத்த² பட²மஜ்ஜா²னங் அத்தி² ஹீனங், அத்தி² மஜ்ஜி²மங், அத்தி² பணீதங். தத்த² ஹீனேன உப்பன்னானங் கப்பஸ்ஸ ததியோ கொட்டா²ஸோ ஆயுப்பமாணங், மஜ்ஜி²மேன உபட்³ட⁴கப்போ, பணீதேன கப்போ. தங் ஸந்தா⁴யேதங் வுத்தங். நிரயம்பி க³ச்ச²தீதி நிரயக³மனீயஸ்ஸ கம்மஸ்ஸ அப்பஹீனத்தா அபராபரங் க³ச்ச²தி, ந அனந்தரமேவ. தஸ்மிங்யேவ ப⁴வே பரினிப்³பா³யதீதி தஸ்மிங்யேவ ரூபப⁴வே ட²த்வா பரினிப்³பா³யதி, ந ஹெட்டா² ஓதரதி. யதி³த³ங் க³தியா உபபத்தியா ஸதீதி யங் இத³ங் க³தியா ச உபபத்தியா ச ஸதி ஸேக²ஸ்ஸ அரியஸாவகஸ்ஸ படிஸந்தி⁴வஸேன ஹெட்டா² அனோதரித்வா தஸ்மிங்யேவ ரூபப⁴வே உபரி து³தியததியாதீ³ஸு அஞ்ஞதரஸ்மிங் ப்³ரஹ்மலோகே பரினிப்³பா³னங், புது²ஜ்ஜனஸ்ஸ பன நிரயாதி³க³மனங், இத³ங் நானாகரணந்தி அத்தோ².
123. Tatiye tadassādetīti taṃ jhānaṃ sukhassādena assādeti. Nikāmetīti pattheti. Vittiṃāpajjatīti tuṭṭhiṃ āpajjati. Tadadhimuttoti tasmiṃ adhimutto, taṃ vā adhimutto. Tabbahulavihārīti tena jhānena bahulaṃ viharanto. Sahabyataṃ upapajjatīti sahabhāvaṃ gacchati, tattha nibbattatīti attho. Kappo āyuppamāṇanti ettha paṭhamajjhānaṃ atthi hīnaṃ, atthi majjhimaṃ, atthi paṇītaṃ. Tattha hīnena uppannānaṃ kappassa tatiyo koṭṭhāso āyuppamāṇaṃ, majjhimena upaḍḍhakappo, paṇītena kappo. Taṃ sandhāyetaṃ vuttaṃ. Nirayampi gacchatīti nirayagamanīyassa kammassa appahīnattā aparāparaṃ gacchati, na anantarameva. Tasmiṃyeva bhave parinibbāyatīti tasmiṃyeva rūpabhave ṭhatvā parinibbāyati, na heṭṭhā otarati. Yadidaṃ gatiyā upapattiyā satīti yaṃ idaṃ gatiyā ca upapattiyā ca sati sekhassa ariyasāvakassa paṭisandhivasena heṭṭhā anotaritvā tasmiṃyeva rūpabhave upari dutiyatatiyādīsu aññatarasmiṃ brahmaloke parinibbānaṃ, puthujjanassa pana nirayādigamanaṃ, idaṃ nānākaraṇanti attho.
த்³வே கப்பாதி எத்தா²பி து³தியஜ்ஜா²னங் வுத்தனயேனேவ திவித⁴ங் ஹோதி. தத்த² பணீதபா⁴வனேன நிப்³ப³த்தானங் அட்ட²கப்பா ஆயுப்பமாணங், மஜ்ஜி²மேன சத்தாரோ, ஹீனேன த்³வே. தங் ஸந்தா⁴யேதங் வுத்தங். சத்தாரோ கப்பாதி எத்த² யங் ஹெட்டா² வுத்தங் ‘‘கப்போ, த்³வே கப்பா’’தி, தம்பி ஆஹரித்வா அத்தோ² வேதி³தப்³போ³. கப்போதி ச கு³ணஸ்ஸபி நாமங், தஸ்மா கப்போ த்³வே கப்பா சத்தாரோ கப்பாதி அயமெத்த² அத்தோ² த³ட்ட²ப்³போ³. இத³ங் வுத்தங் ஹோதி – யோ பட²மங் வுத்தோ கப்போ, ஸோ த்³வே வாரே க³ணெத்வா ஏகேன கு³ணேன த்³வே கப்பா ஹொந்தி, து³தியேன சத்தாரோ, புன தே சத்தாரோ கப்பாதி இமேஹி சதூஹி கு³ணேஹி கு³ணிதா ஏகேன கு³ணேன அட்ட² ஹொந்தி, து³தியேன ஸோளஸ, ததியேன த்³வத்திங்ஸ, சதுத்தே²ன சதுஸட்டீ²தி. ஏவமித⁴ பணீதஜ்ஜா²னவஸேன சதுஸட்டி² கப்பா க³ஹிதாதி வேதி³தப்³பா³. பஞ்ச கப்பஸதானீதி இத³ங் பணீதஸ்ஸேவ உபபத்திஜ்ஜா²னஸ்ஸ வஸேன வுத்தங். வேஹப்ப²லேஸு வா பட²மஜ்ஜா²னபூ⁴மிஆதீ³ஸு விய திண்ணங் ப்³ரஹ்மலோகானங் அபா⁴வதோ எத்தகமேவ ஆயுப்பமாணங். தஸ்மா ஏவங் வுத்தங்.
Dve kappāti etthāpi dutiyajjhānaṃ vuttanayeneva tividhaṃ hoti. Tattha paṇītabhāvanena nibbattānaṃ aṭṭhakappā āyuppamāṇaṃ, majjhimena cattāro, hīnena dve. Taṃ sandhāyetaṃ vuttaṃ. Cattārokappāti ettha yaṃ heṭṭhā vuttaṃ ‘‘kappo, dve kappā’’ti, tampi āharitvā attho veditabbo. Kappoti ca guṇassapi nāmaṃ, tasmā kappo dve kappā cattāro kappāti ayamettha attho daṭṭhabbo. Idaṃ vuttaṃ hoti – yo paṭhamaṃ vutto kappo, so dve vāre gaṇetvā ekena guṇena dve kappā honti, dutiyena cattāro, puna te cattāro kappāti imehi catūhi guṇehi guṇitā ekena guṇena aṭṭha honti, dutiyena soḷasa, tatiyena dvattiṃsa, catutthena catusaṭṭhīti. Evamidha paṇītajjhānavasena catusaṭṭhi kappā gahitāti veditabbā. Pañca kappasatānīti idaṃ paṇītasseva upapattijjhānassa vasena vuttaṃ. Vehapphalesu vā paṭhamajjhānabhūmiādīsu viya tiṇṇaṃ brahmalokānaṃ abhāvato ettakameva āyuppamāṇaṃ. Tasmā evaṃ vuttaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 3. பட²மனானாகரணஸுத்தங் • 3. Paṭhamanānākaraṇasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 3. பட²மனானாகரணஸுத்தவண்ணனா • 3. Paṭhamanānākaraṇasuttavaṇṇanā
