| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
3. பட²மனானாகரணஸுத்தவண்ணனா
3. Paṭhamanānākaraṇasuttavaṇṇanā
123. ததியே ப்³ரஹ்மகாயிகானங் தே³வானந்தி எத்த² ப்³ரஹ்மானங் காயோ ஸமூஹோதி ப்³ரஹ்மகாயோ, தப்பரியாபன்னதாய தத்த² க³தாதி ப்³ரஹ்மகாயிகா. ஏதாய ச ஸப்³ப³ஸ்ஸபி ப்³ரஹ்மகாயஸ்ஸ ஸமஞ்ஞாய ப⁴விதப்³ப³ங். ஆப⁴ஸ்ஸரானங் தே³வானந்திஆதி³னா பன து³தியஜ்ஜா²னபூ⁴மிகாதீ³னங் உபரி க³ஹிதத்தா கோ³ப³லீப³த்³த³ஞ்ஞாயேன தத³வஸிட்டா²னங் அயங் ஸமஞ்ஞா, தஸ்மா ‘‘ப்³ரஹ்மகாயிகானங் தே³வான’’ந்தி பட²மஜ்ஜா²னபூ⁴மிகானங்யேவ க³ஹணங் வேதி³தப்³ப³ங். ஸஹ ப்³யயதி க³ச்ச²தீதி ஸஹப்³யோ, ஸஹவத்தனகோ. தஸ்ஸ பா⁴வோ ஸஹப்³யதா, ஸஹபவத்தீதி ஆஹ ‘‘ஸஹபா⁴வங் உபக³ச்ச²தீ’’தி. கப்போ ஆயுப்பமாணந்தி எத்த² யதி³பி ப்³ரஹ்மபாரிஸஜ்ஜாதீ³னங் ஆயுனோ அந்தரங் அத்தி², உக்கட்ட²பரிச்சே²தே³ன பனேதங் வுத்தந்தி த³ஸ்ஸெந்தோ ‘‘பட²மஜ்ஜா²னங் அத்தி² ஹீன’’ந்திஆதி³மாஹ.
123. Tatiye brahmakāyikānaṃ devānanti ettha brahmānaṃ kāyo samūhoti brahmakāyo, tappariyāpannatāya tattha gatāti brahmakāyikā. Etāya ca sabbassapi brahmakāyassa samaññāya bhavitabbaṃ. Ābhassarānaṃ devānantiādinā pana dutiyajjhānabhūmikādīnaṃ upari gahitattā gobalībaddaññāyena tadavasiṭṭhānaṃ ayaṃ samaññā, tasmā ‘‘brahmakāyikānaṃ devāna’’nti paṭhamajjhānabhūmikānaṃyeva gahaṇaṃ veditabbaṃ. Saha byayati gacchatīti sahabyo, sahavattanako. Tassa bhāvo sahabyatā, sahapavattīti āha ‘‘sahabhāvaṃ upagacchatī’’ti. Kappo āyuppamāṇanti ettha yadipi brahmapārisajjādīnaṃ āyuno antaraṃ atthi, ukkaṭṭhaparicchedena panetaṃ vuttanti dassento ‘‘paṭhamajjhānaṃ atthi hīna’’ntiādimāha.
த்³வே கப்பா ஆயுப்பமாணந்தி எத்த² பன ஹீனஜ்ஜா²னேன நிப்³ப³த்தானங் வஸேன அயங் பரிச்சே²தோ³ கதோதி த³ஸ்ஸேதுங் ‘‘து³தியஜ்ஜா²னங் வுத்தனயேனேவ திவித⁴ங் ஹோதீ’’திஆதி³ ஆரத்³த⁴ங். சத்தாரோ கப்பாதி எத்த² பன உக்கட்ட²பரிச்சே²தே³ன சதுஸட்டி² கப்பா வத்தப்³பா³தி த³ஸ்ஸெந்தோ ‘‘யங் ஹெட்டா² வுத்தங் ‘கப்போ த்³வே கப்பா’தி , கம்பி ஆஹரித்வா அத்தோ² வேதி³தப்³போ³’’தி ஆஹ. கத²ங் பனெத்த² அயமத்தோ² லப்³ப⁴தீதி ஆஹ ‘‘கப்போதி ச கு³ணஸ்ஸபி நாம’’ந்தி. தத்த² பட²மங் வுத்தோ கப்போ, ததோ ஏகேன கு³ணேன, ஏகஸ்மிங் வாரே க³ணனாயாதி அத்தோ². த்³வே கப்பா ஹொந்தீதி ஏகவாரக³ணனாய கப்பஸ்ஸ த்³விகு³ணிதத்தா த்³வே மஹாகப்பா ஹொந்தீதி அத்தோ². து³தியேனாதி து³தியவாரக³ணனாய. சத்தாரோதி து³தியவாரக³ணனாய த்³வீஸு கப்பேஸு த்³விகு³ணிதேஸு சத்தாரோ மஹாகப்பா ஹொந்தீதி அத்தோ². புன தே சத்தாரோ கப்பாதி வுத்தனயேன த்³வே வாரே கு³ணெத்வா யே சத்தாரோ கப்பா த³ஸ்ஸிதா, புன தே சத்தாரோ கப்பா சதுக்³கு³ணா ஹொந்தீதி அத்தோ². இத³ங் வுத்தங் ஹோதி – த்³வே வாரே கு³ணெத்வா யே சத்தாரோ கப்பா த³ஸ்ஸிதா, தேஸு சதுக்க²த்துங் கு³ணிதேஸு சதுஸட்டி² கப்பா ஸம்பஜ்ஜந்தீதி. ததா² ஹி சத்தாரோ ஏகஸ்மிங் வாரே கு³ணிதா அட்ட² ஹொந்தி, புன தே அட்ட² து³தியவாரே கு³ணிதா ஸோளஸ ஹொந்தி, புன தே ஸோளஸ ததியவாரே கு³ணிதா த்³வத்திங்ஸ ஹொந்தி, புன தே த்³வத்திங்ஸ சதுத்த²வாரே கு³ணிதா சதுஸட்டி² ஹொந்தி. தேனேவாஹ ‘‘இமேஹி சதூஹி கு³ணேஹி கு³ணிதா ஏகேன கு³ணேன அட்ட² ஹொந்தீ’’திஆதி³. எத்த² ச ஹெட்டா² உபோஸத²ஸுத்தே (அ॰ நி॰ 3.71) –
Dve kappā āyuppamāṇanti ettha pana hīnajjhānena nibbattānaṃ vasena ayaṃ paricchedo katoti dassetuṃ ‘‘dutiyajjhānaṃ vuttanayeneva tividhaṃ hotī’’tiādi āraddhaṃ. Cattāro kappāti ettha pana ukkaṭṭhaparicchedena catusaṭṭhi kappā vattabbāti dassento ‘‘yaṃ heṭṭhā vuttaṃ ‘kappo dve kappā’ti , kampi āharitvā attho veditabbo’’ti āha. Kathaṃ panettha ayamattho labbhatīti āha ‘‘kappoti ca guṇassapi nāma’’nti. Tattha paṭhamaṃ vutto kappo, tato ekena guṇena, ekasmiṃ vāre gaṇanāyāti attho. Dve kappā hontīti ekavāragaṇanāya kappassa dviguṇitattā dve mahākappā hontīti attho. Dutiyenāti dutiyavāragaṇanāya. Cattāroti dutiyavāragaṇanāya dvīsu kappesu dviguṇitesu cattāro mahākappā hontīti attho. Puna te cattāro kappāti vuttanayena dve vāre guṇetvā ye cattāro kappā dassitā, puna te cattāro kappā catugguṇā hontīti attho. Idaṃ vuttaṃ hoti – dve vāre guṇetvā ye cattāro kappā dassitā, tesu catukkhattuṃ guṇitesu catusaṭṭhi kappā sampajjantīti. Tathā hi cattāro ekasmiṃ vāre guṇitā aṭṭha honti, puna te aṭṭha dutiyavāre guṇitā soḷasa honti, puna te soḷasa tatiyavāre guṇitā dvattiṃsa honti, puna te dvattiṃsa catutthavāre guṇitā catusaṭṭhi honti. Tenevāha ‘‘imehi catūhi guṇehi guṇitā ekena guṇena aṭṭha hontī’’tiādi. Ettha ca heṭṭhā uposathasutte (a. ni. 3.71) –
‘‘யானி மானுஸகானி பஞ்ஞாஸ வஸ்ஸானி, சாதுமஹாராஜிகானங் தே³வானங் ஏஸோ ஏகோ ரத்திந்தி³வோ’’தி –
‘‘Yāni mānusakāni paññāsa vassāni, cātumahārājikānaṃ devānaṃ eso eko rattindivo’’ti –
ஆதி³னா காமாவசரதே³வானமேவ ஆயுப்பமாணங் த³ஸ்ஸிதங். ஹெட்டா²யேவ –
Ādinā kāmāvacaradevānameva āyuppamāṇaṃ dassitaṃ. Heṭṭhāyeva –
‘‘தயோமே, பி⁴க்க²வே, புக்³க³லா ஸந்தோ ஸங்விஜ்ஜமானா லோகஸ்மிங். கதமே தயோ? இத⁴, பி⁴க்க²வே, ஏகச்சோ புக்³க³லோ ஸப்³ப³ஸோ ரூபஸஞ்ஞானங் ஸமதிக்கமா…பே॰… ஆகாஸானஞ்சாயதனூபகா³னங் தே³வானங் ஸஹப்³யதங் உபபஜ்ஜதி. ஆகாஸானஞ்சாயதனூபகா³னங், பி⁴க்க²வே, தே³வானங் வீஸதி கப்பஸஹஸ்ஸானி ஆயுப்பமாண’’ந்தி (அ॰ நி॰ 3.117) –
‘‘Tayome, bhikkhave, puggalā santo saṃvijjamānā lokasmiṃ. Katame tayo? Idha, bhikkhave, ekacco puggalo sabbaso rūpasaññānaṃ samatikkamā…pe… ākāsānañcāyatanūpagānaṃ devānaṃ sahabyataṃ upapajjati. Ākāsānañcāyatanūpagānaṃ, bhikkhave, devānaṃ vīsati kappasahassāni āyuppamāṇa’’nti (a. ni. 3.117) –
ஆதி³னா அரூபாவசரானங்யேவ ஆயுப்பமாணங் வுத்தங். இத⁴ பன ரூபாவசரானமேவ ஆயுப்பமாணங் த³ஸ்ஸிதங். விப⁴ங்க³பாளியங் (விப⁴॰ 1022) பன ‘‘மனுஸ்ஸானங் கித்தகங் ஆயுப்பமாணங், வஸ்ஸஸதங் அப்பங் வா பி⁴ய்யோ’’திஆதி³னா தே³வமனுஸ்ஸானஞ்சேவ ரூபாரூபாவசரஸத்தானஞ்ச ஆயுப்பமாணங் த³ஸ்ஸிதங்.
Ādinā arūpāvacarānaṃyeva āyuppamāṇaṃ vuttaṃ. Idha pana rūpāvacarānameva āyuppamāṇaṃ dassitaṃ. Vibhaṅgapāḷiyaṃ (vibha. 1022) pana ‘‘manussānaṃ kittakaṃ āyuppamāṇaṃ, vassasataṃ appaṃ vā bhiyyo’’tiādinā devamanussānañceva rūpārūpāvacarasattānañca āyuppamāṇaṃ dassitaṃ.
தத்த² ஸம்மாஸம்பு³த்³தே⁴ன மனுஸ்ஸானங் தே³வானஞ்ச ஆயுங் பரிச்சி²ந்த³மானேன சதூஸு அபாயேஸு பு⁴ம்மதே³வேஸு ச ஆயு ந பரிச்சி²ன்னங். தங் கஸ்மாதி? நிரயே தாவ கம்மமேவ பமாணங். யாவ கம்மங் ந கீ²யதி, தாவ பச்சந்தி. ததா² ஸேஸஅபாயேஸு. பு⁴ம்மதே³வானம்பி கம்மமேவ பமாணங். தத்த² நிப்³ப³த்தா ஹி கேசி ஸத்தாஹமத்தங் திட்ட²ந்தி, கேசி அட்³ட⁴மாஸங், கப்பங் திட்ட²மானாபி அத்தி²யேவ. தத்த² மனுஸ்ஸேஸு கி³ஹிபா⁴வே டி²தாயேவ ஸோதாபன்னாபி ஹொந்தி, ஸகதா³கா³மிப²லங் அனாகா³மிப²லங் அரஹத்தம்பி பாபுணந்தி, தேஸு ஸோதாபன்னாத³யோ யாவஜீவங் திட்ட²ந்தி, கீ²ணாஸவா பன பரினிப்³பா³யந்தி வா பப்³ப³ஜந்தி வா. கஸ்மா? அரஹத்தங் நாம ஸெட்ட²கு³ணங், கி³ஹிலிங்க³ங் ஹீனங், தங் ஹீனதாய உத்தமங் கு³ணங் தா⁴ரேதுங் ந ஸக்கோதி, தஸ்மா தே பரினிப்³பா³துகாமா வா ஹொந்தி பப்³ப³ஜிதுகாமா வா. பு⁴ம்மதே³வா பன அரஹத்தங் பத்தாபி யாவஜீவங் திட்ட²ந்தி, ச²ஸு காமாவசரேஸு தே³வேஸு ஸோதாபன்னஸகதா³கா³மினோ யாவஜீவங் திட்ட²ந்தி, அனாகா³மினா ரூபப⁴வங் க³ந்துங் வட்டதி கீ²ணாஸவேன பரினிப்³பா³துங். கஸ்மா? நிலீயனோகாஸஸ்ஸ அபா⁴வா. ரூபாவசராரூபாவசரேஸு ஸப்³பே³பி யாவஜீவங் திட்ட²ந்தி, தத்த² ரூபாவசரே நிப்³ப³த்தா ஸோதாபன்னஸகதா³கா³மினோ ந புன இதா⁴க³ச்ச²ந்தி, தத்தே²வ பரினிப்³பா³யந்தி. ஏதே ஹி ஜா²னஅனாகா³மினோ நாம.
Tattha sammāsambuddhena manussānaṃ devānañca āyuṃ paricchindamānena catūsu apāyesu bhummadevesu ca āyu na paricchinnaṃ. Taṃ kasmāti? Niraye tāva kammameva pamāṇaṃ. Yāva kammaṃ na khīyati, tāva paccanti. Tathā sesaapāyesu. Bhummadevānampi kammameva pamāṇaṃ. Tattha nibbattā hi keci sattāhamattaṃ tiṭṭhanti, keci aḍḍhamāsaṃ, kappaṃ tiṭṭhamānāpi atthiyeva. Tattha manussesu gihibhāve ṭhitāyeva sotāpannāpi honti, sakadāgāmiphalaṃ anāgāmiphalaṃ arahattampi pāpuṇanti, tesu sotāpannādayo yāvajīvaṃ tiṭṭhanti, khīṇāsavā pana parinibbāyanti vā pabbajanti vā. Kasmā? Arahattaṃ nāma seṭṭhaguṇaṃ, gihiliṅgaṃ hīnaṃ, taṃ hīnatāya uttamaṃ guṇaṃ dhāretuṃ na sakkoti, tasmā te parinibbātukāmā vā honti pabbajitukāmā vā. Bhummadevā pana arahattaṃ pattāpi yāvajīvaṃ tiṭṭhanti, chasu kāmāvacaresu devesu sotāpannasakadāgāmino yāvajīvaṃ tiṭṭhanti, anāgāminā rūpabhavaṃ gantuṃ vaṭṭati khīṇāsavena parinibbātuṃ. Kasmā? Nilīyanokāsassa abhāvā. Rūpāvacarārūpāvacaresu sabbepi yāvajīvaṃ tiṭṭhanti, tattha rūpāvacare nibbattā sotāpannasakadāgāmino na puna idhāgacchanti, tattheva parinibbāyanti. Ete hi jhānaanāgāmino nāma.
அட்ட²ஸமாபத்திலாபீ⁴னங் பன கிங் நியமேதி? பகு³ணஜ்ஜா²னங். யதே³வஸ்ஸ பகு³ணங் ஹோதி, தேன உபபஜ்ஜதி. ஸப்³பே³ஸு பகு³ணேஸு கிங் நியமேதி? நேவஸஞ்ஞானாஸஞ்ஞாயதனஸமாபத்தி. ஏகங்ஸேனேவ ஹி ஸோ நேவஸஞ்ஞானாஸஞ்ஞாயதனே உபபஜ்ஜதி. நவஸு ப்³ரஹ்மலோகேஸு நிப்³ப³த்தஅரியஸாவகானங் தத்ரூபபத்திபி உபரூபபத்திபி, ந ஹெட்டூ²பபத்தி. புது²ஜ்ஜனானங் பன தத்ரூபபத்திபி ஹோதி, உபரூபபத்திபி, ஹெட்டூ²பபத்திபி. பஞ்சஸு ஸுத்³தா⁴வாஸேஸு சதூஸு ச அரூபேஸு அரியஸாவகானங் தத்ரூபபத்திபி ஹோதி உபரூபபத்திபி. பட²மஜ்ஜா²னபூ⁴மியங் நிப்³ப³த்தோ அனாகா³மீ நவ ப்³ரஹ்மலோகே ஸோதெ⁴த்வா மத்த²கே டி²தோ பரினிப்³பா³தி. வேஹப்ப²லங், அகனிட்ட²ங், நேவஸஞ்ஞானாஸஞ்ஞாயதனந்தி இமே தயோ தே³வலோகா ஸெட்ட²ப⁴வா நாம. இமேஸு தீஸு டா²னேஸு நிப்³ப³த்தஅனாகா³மினோ நேவ உத்³த⁴ங் க³ச்ச²ந்தி, ந அதோ⁴, தத்த² தத்தே²வ பரினிப்³பா³யந்தீதி இத³ங் பகிண்ணகங் வேதி³தப்³ப³ங்.
Aṭṭhasamāpattilābhīnaṃ pana kiṃ niyameti? Paguṇajjhānaṃ. Yadevassa paguṇaṃ hoti, tena upapajjati. Sabbesu paguṇesu kiṃ niyameti? Nevasaññānāsaññāyatanasamāpatti. Ekaṃseneva hi so nevasaññānāsaññāyatane upapajjati. Navasu brahmalokesu nibbattaariyasāvakānaṃ tatrūpapattipi uparūpapattipi, na heṭṭhūpapatti. Puthujjanānaṃ pana tatrūpapattipi hoti, uparūpapattipi, heṭṭhūpapattipi. Pañcasu suddhāvāsesu catūsu ca arūpesu ariyasāvakānaṃ tatrūpapattipi hoti uparūpapattipi. Paṭhamajjhānabhūmiyaṃ nibbatto anāgāmī nava brahmaloke sodhetvā matthake ṭhito parinibbāti. Vehapphalaṃ, akaniṭṭhaṃ, nevasaññānāsaññāyatananti ime tayo devalokā seṭṭhabhavā nāma. Imesu tīsu ṭhānesu nibbattaanāgāmino neva uddhaṃ gacchanti, na adho, tattha tattheva parinibbāyantīti idaṃ pakiṇṇakaṃ veditabbaṃ.
பட²மனானாகரணஸுத்தவண்ணனா நிட்டி²தா.
Paṭhamanānākaraṇasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 3. பட²மனானாகரணஸுத்தங் • 3. Paṭhamanānākaraṇasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 3. பட²மனானாகரணஸுத்தவண்ணனா • 3. Paṭhamanānākaraṇasuttavaṇṇanā
