| Library / Tipiṭaka / д̇ибидага • Tipiṭaka / ан̇г̇уд̇д̇аранигааяа (дийгаа) • Aṅguttaranikāya (ṭīkā) |
3. батаманаанаагаран̣асуд̇д̇аван̣н̣анаа
3. Paṭhamanānākaraṇasuttavaṇṇanā
123. д̇ад̇ияз б̣рахмагааяигаанам̣ д̣̇зваананд̇и зд̇т̇а б̣рахмаанам̣ гааяо самууход̇и б̣рахмагааяо, д̇аббарияаабаннад̇ааяа д̇ад̇т̇а г̇ад̇аад̇и б̣рахмагааяигаа. зд̇ааяа жа саб̣б̣ассаби б̣рахмагааяасса саман̃н̃ааяа бхавид̇аб̣б̣ам̣. аабхассараанам̣ д̣̇зваананд̇иаад̣̇инаа бана д̣̇уд̇ияаж̇жхаанабхуумигаад̣̇ийнам̣ убари г̇ахид̇ад̇д̇аа г̇об̣алийб̣ад̣̇д̣̇ан̃н̃ааязна д̇ад̣̇авасидтаанам̣ аяам̣ саман̃н̃аа, д̇асмаа ‘‘б̣рахмагааяигаанам̣ д̣̇зваана’’нд̇и батамаж̇жхаанабхуумигаанам̣язва г̇ахан̣ам̣ взд̣̇ид̇аб̣б̣ам̣. саха б̣яаяад̇и г̇ажчад̇ийд̇и сахаб̣яо, сахавад̇д̇анаго. д̇асса бхааво сахаб̣яад̇аа, сахабавад̇д̇ийд̇и ааха ‘‘сахабхаавам̣ убаг̇ажчад̇ий’’д̇и. габбо ааяуббамаан̣анд̇и зд̇т̇а яад̣̇иби б̣рахмабаарисаж̇ж̇аад̣̇ийнам̣ ааяуно анд̇арам̣ ад̇т̇и, уггадтабарижчзд̣̇зна банзд̇ам̣ вуд̇д̇анд̇и д̣̇ассзнд̇о ‘‘батамаж̇жхаанам̣ ад̇т̇и хийна’’нд̇иаад̣̇имааха.
123. Tatiye brahmakāyikānaṃ devānanti ettha brahmānaṃ kāyo samūhoti brahmakāyo, tappariyāpannatāya tattha gatāti brahmakāyikā. Etāya ca sabbassapi brahmakāyassa samaññāya bhavitabbaṃ. Ābhassarānaṃ devānantiādinā pana dutiyajjhānabhūmikādīnaṃ upari gahitattā gobalībaddaññāyena tadavasiṭṭhānaṃ ayaṃ samaññā, tasmā ‘‘brahmakāyikānaṃ devāna’’nti paṭhamajjhānabhūmikānaṃyeva gahaṇaṃ veditabbaṃ. Saha byayati gacchatīti sahabyo, sahavattanako. Tassa bhāvo sahabyatā, sahapavattīti āha ‘‘sahabhāvaṃ upagacchatī’’ti. Kappo āyuppamāṇanti ettha yadipi brahmapārisajjādīnaṃ āyuno antaraṃ atthi, ukkaṭṭhaparicchedena panetaṃ vuttanti dassento ‘‘paṭhamajjhānaṃ atthi hīna’’ntiādimāha.
д̣̇вз габбаа ааяуббамаан̣анд̇и зд̇т̇а бана хийнаж̇жхаанзна ниб̣б̣ад̇д̇аанам̣ васзна аяам̣ барижчзд̣̇о гад̇од̇и д̣̇ассзд̇ум̣ ‘‘д̣̇уд̇ияаж̇жхаанам̣ вуд̇д̇анаязнзва д̇ивид̇хам̣ ход̇ий’’д̇иаад̣̇и аарад̣̇д̇хам̣. жад̇д̇ааро габбаад̇и зд̇т̇а бана уггадтабарижчзд̣̇зна жад̇усадти габбаа вад̇д̇аб̣б̣аад̇и д̣̇ассзнд̇о ‘‘яам̣ хздтаа вуд̇д̇ам̣ ‘габбо д̣̇вз габбаа’д̇и , гамби аахарид̇ваа ад̇т̇о взд̣̇ид̇аб̣б̣о’’д̇и ааха. гат̇ам̣ банзд̇т̇а аяамад̇т̇о лаб̣бхад̇ийд̇и ааха ‘‘габбод̇и жа г̇ун̣ассаби наама’’нд̇и. д̇ад̇т̇а батамам̣ вуд̇д̇о габбо, д̇ад̇о згзна г̇ун̣зна, згасмим̣ ваарз г̇ан̣анааяаад̇и ад̇т̇о. д̣̇вз габбаа хонд̇ийд̇и згаваараг̇ан̣анааяа габбасса д̣̇виг̇ун̣ид̇ад̇д̇аа д̣̇вз махаагаббаа хонд̇ийд̇и ад̇т̇о. д̣̇уд̇иязнаад̇и д̣̇уд̇ияаваараг̇ан̣анааяа. жад̇д̇аарод̇и д̣̇уд̇ияаваараг̇ан̣анааяа д̣̇вийсу габбзсу д̣̇виг̇ун̣ид̇зсу жад̇д̇ааро махаагаббаа хонд̇ийд̇и ад̇т̇о. буна д̇з жад̇д̇ааро габбаад̇и вуд̇д̇анаязна д̣̇вз ваарз г̇ун̣зд̇ваа яз жад̇д̇ааро габбаа д̣̇ассид̇аа, буна д̇з жад̇д̇ааро габбаа жад̇уг̇г̇ун̣аа хонд̇ийд̇и ад̇т̇о. ид̣̇ам̣ вуд̇д̇ам̣ ход̇и – д̣̇вз ваарз г̇ун̣зд̇ваа яз жад̇д̇ааро габбаа д̣̇ассид̇аа, д̇зсу жад̇угкад̇д̇ум̣ г̇ун̣ид̇зсу жад̇усадти габбаа самбаж̇ж̇анд̇ийд̇и. д̇ат̇аа хи жад̇д̇ааро згасмим̣ ваарз г̇ун̣ид̇аа адта хонд̇и, буна д̇з адта д̣̇уд̇ияаваарз г̇ун̣ид̇аа сол̣аса хонд̇и, буна д̇з сол̣аса д̇ад̇ияаваарз г̇ун̣ид̇аа д̣̇вад̇д̇им̣са хонд̇и, буна д̇з д̣̇вад̇д̇им̣са жад̇уд̇т̇аваарз г̇ун̣ид̇аа жад̇усадти хонд̇и. д̇знзвааха ‘‘имзхи жад̇уухи г̇ун̣зхи г̇ун̣ид̇аа згзна г̇ун̣зна адта хонд̇ий’’д̇иаад̣̇и. зд̇т̇а жа хздтаа убосат̇асуд̇д̇з (а. ни. 3.71) –
Dve kappā āyuppamāṇanti ettha pana hīnajjhānena nibbattānaṃ vasena ayaṃ paricchedo katoti dassetuṃ ‘‘dutiyajjhānaṃ vuttanayeneva tividhaṃ hotī’’tiādi āraddhaṃ. Cattāro kappāti ettha pana ukkaṭṭhaparicchedena catusaṭṭhi kappā vattabbāti dassento ‘‘yaṃ heṭṭhā vuttaṃ ‘kappo dve kappā’ti , kampi āharitvā attho veditabbo’’ti āha. Kathaṃ panettha ayamattho labbhatīti āha ‘‘kappoti ca guṇassapi nāma’’nti. Tattha paṭhamaṃ vutto kappo, tato ekena guṇena, ekasmiṃ vāre gaṇanāyāti attho. Dve kappā hontīti ekavāragaṇanāya kappassa dviguṇitattā dve mahākappā hontīti attho. Dutiyenāti dutiyavāragaṇanāya. Cattāroti dutiyavāragaṇanāya dvīsu kappesu dviguṇitesu cattāro mahākappā hontīti attho. Puna te cattāro kappāti vuttanayena dve vāre guṇetvā ye cattāro kappā dassitā, puna te cattāro kappā catugguṇā hontīti attho. Idaṃ vuttaṃ hoti – dve vāre guṇetvā ye cattāro kappā dassitā, tesu catukkhattuṃ guṇitesu catusaṭṭhi kappā sampajjantīti. Tathā hi cattāro ekasmiṃ vāre guṇitā aṭṭha honti, puna te aṭṭha dutiyavāre guṇitā soḷasa honti, puna te soḷasa tatiyavāre guṇitā dvattiṃsa honti, puna te dvattiṃsa catutthavāre guṇitā catusaṭṭhi honti. Tenevāha ‘‘imehi catūhi guṇehi guṇitā ekena guṇena aṭṭha hontī’’tiādi. Ettha ca heṭṭhā uposathasutte (a. ni. 3.71) –
‘‘яаани маанусагаани бан̃н̃ааса вассаани, жаад̇умахаарааж̇игаанам̣ д̣̇зваанам̣ зсо зго рад̇д̇инд̣̇иво’’д̇и –
‘‘Yāni mānusakāni paññāsa vassāni, cātumahārājikānaṃ devānaṃ eso eko rattindivo’’ti –
аад̣̇инаа гаамааважарад̣̇зваанамзва ааяуббамаан̣ам̣ д̣̇ассид̇ам̣. хздтааязва –
Ādinā kāmāvacaradevānameva āyuppamāṇaṃ dassitaṃ. Heṭṭhāyeva –
‘‘д̇аяомз, бхигкавз, буг̇г̇алаа санд̇о сам̣виж̇ж̇амаанаа логасмим̣. гад̇амз д̇аяо? ид̇ха, бхигкавз, згажжо буг̇г̇ало саб̣б̣асо руубасан̃н̃аанам̣ самад̇иггамаа…бз… аагаасаанан̃жааяад̇ануубаг̇аанам̣ д̣̇зваанам̣ сахаб̣яад̇ам̣ убабаж̇ж̇ад̇и. аагаасаанан̃жааяад̇ануубаг̇аанам̣, бхигкавз, д̣̇зваанам̣ вийсад̇и габбасахассаани ааяуббамаан̣а’’нд̇и (а. ни. 3.117) –
‘‘Tayome, bhikkhave, puggalā santo saṃvijjamānā lokasmiṃ. Katame tayo? Idha, bhikkhave, ekacco puggalo sabbaso rūpasaññānaṃ samatikkamā…pe… ākāsānañcāyatanūpagānaṃ devānaṃ sahabyataṃ upapajjati. Ākāsānañcāyatanūpagānaṃ, bhikkhave, devānaṃ vīsati kappasahassāni āyuppamāṇa’’nti (a. ni. 3.117) –
аад̣̇инаа аруубааважараанам̣язва ааяуббамаан̣ам̣ вуд̇д̇ам̣. ид̇ха бана руубааважараанамзва ааяуббамаан̣ам̣ д̣̇ассид̇ам̣. вибхан̇г̇абаал̣ияам̣ (вибха. 1022) бана ‘‘мануссаанам̣ гид̇д̇агам̣ ааяуббамаан̣ам̣, вассасад̇ам̣ аббам̣ ваа бхияяо’’д̇иаад̣̇инаа д̣̇звамануссаанан̃жзва руубааруубааважарасад̇д̇аанан̃жа ааяуббамаан̣ам̣ д̣̇ассид̇ам̣.
Ādinā arūpāvacarānaṃyeva āyuppamāṇaṃ vuttaṃ. Idha pana rūpāvacarānameva āyuppamāṇaṃ dassitaṃ. Vibhaṅgapāḷiyaṃ (vibha. 1022) pana ‘‘manussānaṃ kittakaṃ āyuppamāṇaṃ, vassasataṃ appaṃ vā bhiyyo’’tiādinā devamanussānañceva rūpārūpāvacarasattānañca āyuppamāṇaṃ dassitaṃ.
д̇ад̇т̇а саммаасамб̣уд̣̇д̇хзна мануссаанам̣ д̣̇зваанан̃жа ааяум̣ барижчинд̣̇амаанзна жад̇уусу абааязсу бхуммад̣̇звзсу жа ааяу на барижчиннам̣. д̇ам̣ гасмаад̇и? нираяз д̇аава гаммамзва бамаан̣ам̣. яаава гаммам̣ на кийяад̇и, д̇аава бажжанд̇и. д̇ат̇аа сзсаабааязсу. бхуммад̣̇зваанамби гаммамзва бамаан̣ам̣. д̇ад̇т̇а ниб̣б̣ад̇д̇аа хи гзжи сад̇д̇аахамад̇д̇ам̣ д̇идтанд̇и, гзжи ад̣дхамаасам̣, габбам̣ д̇идтамаанааби ад̇т̇иязва. д̇ад̇т̇а мануссзсу г̇ихибхаавз тид̇ааязва сод̇аабаннааби хонд̇и, сагад̣̇ааг̇аамипалам̣ анааг̇аамипалам̣ арахад̇д̇амби баабун̣анд̇и, д̇зсу сод̇аабаннаад̣̇аяо яааваж̇ийвам̣ д̇идтанд̇и, кийн̣аасаваа бана бариниб̣б̣ааяанд̇и ваа баб̣б̣аж̇анд̇и ваа. гасмаа? арахад̇д̇ам̣ наама сздтаг̇ун̣ам̣, г̇ихилин̇г̇ам̣ хийнам̣, д̇ам̣ хийнад̇ааяа уд̇д̇амам̣ г̇ун̣ам̣ д̇хаарзд̇ум̣ на саггод̇и, д̇асмаа д̇з бариниб̣б̣аад̇угаамаа ваа хонд̇и баб̣б̣аж̇ид̇угаамаа ваа. бхуммад̣̇зваа бана арахад̇д̇ам̣ бад̇д̇ааби яааваж̇ийвам̣ д̇идтанд̇и, часу гаамааважарзсу д̣̇звзсу сод̇аабаннасагад̣̇ааг̇аамино яааваж̇ийвам̣ д̇идтанд̇и, анааг̇ааминаа руубабхавам̣ г̇анд̇ум̣ ваддад̇и кийн̣аасавзна бариниб̣б̣аад̇ум̣. гасмаа? нилийяаногаасасса абхааваа. руубааважарааруубааважарзсу саб̣б̣зби яааваж̇ийвам̣ д̇идтанд̇и, д̇ад̇т̇а руубааважарз ниб̣б̣ад̇д̇аа сод̇аабаннасагад̣̇ааг̇аамино на буна ид̇хааг̇ажчанд̇и, д̇ад̇т̇зва бариниб̣б̣ааяанд̇и. зд̇з хи жхаанаанааг̇аамино наама.
Tattha sammāsambuddhena manussānaṃ devānañca āyuṃ paricchindamānena catūsu apāyesu bhummadevesu ca āyu na paricchinnaṃ. Taṃ kasmāti? Niraye tāva kammameva pamāṇaṃ. Yāva kammaṃ na khīyati, tāva paccanti. Tathā sesaapāyesu. Bhummadevānampi kammameva pamāṇaṃ. Tattha nibbattā hi keci sattāhamattaṃ tiṭṭhanti, keci aḍḍhamāsaṃ, kappaṃ tiṭṭhamānāpi atthiyeva. Tattha manussesu gihibhāve ṭhitāyeva sotāpannāpi honti, sakadāgāmiphalaṃ anāgāmiphalaṃ arahattampi pāpuṇanti, tesu sotāpannādayo yāvajīvaṃ tiṭṭhanti, khīṇāsavā pana parinibbāyanti vā pabbajanti vā. Kasmā? Arahattaṃ nāma seṭṭhaguṇaṃ, gihiliṅgaṃ hīnaṃ, taṃ hīnatāya uttamaṃ guṇaṃ dhāretuṃ na sakkoti, tasmā te parinibbātukāmā vā honti pabbajitukāmā vā. Bhummadevā pana arahattaṃ pattāpi yāvajīvaṃ tiṭṭhanti, chasu kāmāvacaresu devesu sotāpannasakadāgāmino yāvajīvaṃ tiṭṭhanti, anāgāminā rūpabhavaṃ gantuṃ vaṭṭati khīṇāsavena parinibbātuṃ. Kasmā? Nilīyanokāsassa abhāvā. Rūpāvacarārūpāvacaresu sabbepi yāvajīvaṃ tiṭṭhanti, tattha rūpāvacare nibbattā sotāpannasakadāgāmino na puna idhāgacchanti, tattheva parinibbāyanti. Ete hi jhānaanāgāmino nāma.
адтасамаабад̇д̇илаабхийнам̣ бана гим̣ нияамзд̇и? баг̇ун̣аж̇жхаанам̣. яад̣̇звасса баг̇ун̣ам̣ ход̇и, д̇зна убабаж̇ж̇ад̇и. саб̣б̣зсу баг̇ун̣зсу гим̣ нияамзд̇и? нзвасан̃н̃аанаасан̃н̃ааяад̇анасамаабад̇д̇и. згам̣сзнзва хи со нзвасан̃н̃аанаасан̃н̃ааяад̇анз убабаж̇ж̇ад̇и. навасу б̣рахмалогзсу ниб̣б̣ад̇д̇аарияасаавагаанам̣ д̇ад̇руубабад̇д̇иби убаруубабад̇д̇иби, на хздтуубабад̇д̇и. бут̇уж̇ж̇анаанам̣ бана д̇ад̇руубабад̇д̇иби ход̇и, убаруубабад̇д̇иби, хздтуубабад̇д̇иби. бан̃жасу суд̣̇д̇хааваасзсу жад̇уусу жа аруубзсу арияасаавагаанам̣ д̇ад̇руубабад̇д̇иби ход̇и убаруубабад̇д̇иби. батамаж̇жхаанабхуумияам̣ ниб̣б̣ад̇д̇о анааг̇аамий нава б̣рахмалогз сод̇хзд̇ваа мад̇т̇агз тид̇о бариниб̣б̣аад̇и. взхабпалам̣, аганидтам̣, нзвасан̃н̃аанаасан̃н̃ааяад̇ананд̇и имз д̇аяо д̣̇звалогаа сздтабхаваа наама. имзсу д̇ийсу таанзсу ниб̣б̣ад̇д̇аанааг̇аамино нзва уд̣̇д̇хам̣ г̇ажчанд̇и, на ад̇хо, д̇ад̇т̇а д̇ад̇т̇зва бариниб̣б̣ааяанд̇ийд̇и ид̣̇ам̣ багин̣н̣агам̣ взд̣̇ид̇аб̣б̣ам̣.
Aṭṭhasamāpattilābhīnaṃ pana kiṃ niyameti? Paguṇajjhānaṃ. Yadevassa paguṇaṃ hoti, tena upapajjati. Sabbesu paguṇesu kiṃ niyameti? Nevasaññānāsaññāyatanasamāpatti. Ekaṃseneva hi so nevasaññānāsaññāyatane upapajjati. Navasu brahmalokesu nibbattaariyasāvakānaṃ tatrūpapattipi uparūpapattipi, na heṭṭhūpapatti. Puthujjanānaṃ pana tatrūpapattipi hoti, uparūpapattipi, heṭṭhūpapattipi. Pañcasu suddhāvāsesu catūsu ca arūpesu ariyasāvakānaṃ tatrūpapattipi hoti uparūpapattipi. Paṭhamajjhānabhūmiyaṃ nibbatto anāgāmī nava brahmaloke sodhetvā matthake ṭhito parinibbāti. Vehapphalaṃ, akaniṭṭhaṃ, nevasaññānāsaññāyatananti ime tayo devalokā seṭṭhabhavā nāma. Imesu tīsu ṭhānesu nibbattaanāgāmino neva uddhaṃ gacchanti, na adho, tattha tattheva parinibbāyantīti idaṃ pakiṇṇakaṃ veditabbaṃ.
батаманаанаагаран̣асуд̇д̇аван̣н̣анаа нидтид̇аа.
Paṭhamanānākaraṇasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / ан̇г̇уд̇д̇аранигааяа • Aṅguttaranikāya / 3. батаманаанаагаран̣асуд̇д̇ам̣ • 3. Paṭhamanānākaraṇasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / ан̇г̇уд̇д̇аранигааяа (адтагат̇аа) • Aṅguttaranikāya (aṭṭhakathā) / 3. батаманаанаагаран̣асуд̇д̇аван̣н̣анаа • 3. Paṭhamanānākaraṇasuttavaṇṇanā
