| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
7-8. பட²மனாத²ஸுத்தாதி³வண்ணனா
7-8. Paṭhamanāthasuttādivaṇṇanā
17-18. ஸத்தமே யேஹி ஸீலாதீ³ஹி ஸமன்னாக³தோ பி⁴க்கு² த⁴ம்மஸரணதாய த⁴ம்மேனேவ நாத²தி ஆஸீஸதி அபி⁴ப⁴வதீதி நாதோ² வுச்சதி, தே தஸ்ஸ நாத²பா⁴வகரா த⁴ம்மா நாத²கரணாதி வுத்தாதி ஆஹ ‘‘அத்தனோ ஸனாத²பா⁴வகரா பதிட்ட²கராதி அத்தோ²’’தி. தத்த² அத்தனோ பதிட்ட²கராதி யஸ்ஸ நாத²பா⁴வகரா, தஸ்ஸ அத்தனோ பதிட்டா²விதா⁴யினோ. அப்பதிட்டோ² அனாதோ², ஸப்பதிட்டோ² ஸனாதோ²தி பதிட்ட²த்தோ² நாத²-ஸத்³தோ³. கல்யாணகு³ணயோக³தோ கல்யாணாதி த³ஸ்ஸெந்தோ ‘‘ஸீலாதி³கு³ணஸம்பன்னா’’தி ஆஹ. மிஜ்ஜனலக்க²ணா மெத்தா ஏதஸ்ஸ அத்தீ²தி மித்தோ. ஸோ வுத்தனயேன கல்யாணோ அஸ்ஸ அத்தீ²தி தஸ்ஸ அத்தி²தாமத்தங் கல்யாணமித்தபதே³ன வுத்தங். அஸ்ஸ தேன ஸப்³ப³காலங் அவிஜஹிதவாஸோதி தங் த³ஸ்ஸேதுங் ‘‘கல்யாணஸஹாயோ’’தி வுத்தந்தி ஆஹ ‘‘தேவஸ்ஸா’’தி. தே ஏவ கல்யாணமித்தா அஸ்ஸ பி⁴க்கு²னோ. ஸஹ அயனதோதி ஸஹ பவத்தனதோ. அஸமோதா⁴னே சித்தேன, ஸமோதா⁴னே பன சித்தேன சேவ காயேன ச ஸம்பவங்கோ. ஸுக²ங் வசோ ஏதஸ்மிங் அனுகூலகா³ஹிம்ஹி ஆத³ரகா³ரவவதி புக்³க³லேதி ஸுவசோ. தேனாஹ ‘‘ஸுகே²ன வத்தப்³போ³’’திஆதி³. க²மோதி க²ந்தோ. தமேவஸ்ஸ க²மபா⁴வங் த³ஸ்ஸேதுங் ‘‘கா³ள்ஹேனா’’திஆதி³ வுத்தங். வாமதோதி மிச்சா², அயோனிஸோ வா க³ண்ஹாதி. படிப்ப²ரதீதி படாணிகபா⁴வேன திட்ட²தி. பத³க்கி²ணங் க³ண்ஹாதீதி ஸம்மா, யோனிஸோ வா க³ண்ஹாதி.
17-18. Sattame yehi sīlādīhi samannāgato bhikkhu dhammasaraṇatāya dhammeneva nāthati āsīsati abhibhavatīti nātho vuccati, te tassa nāthabhāvakarā dhammā nāthakaraṇāti vuttāti āha ‘‘attano sanāthabhāvakarā patiṭṭhakarāti attho’’ti. Tattha attano patiṭṭhakarāti yassa nāthabhāvakarā, tassa attano patiṭṭhāvidhāyino. Appatiṭṭho anātho, sappatiṭṭho sanāthoti patiṭṭhattho nātha-saddo. Kalyāṇaguṇayogato kalyāṇāti dassento ‘‘sīlādiguṇasampannā’’ti āha. Mijjanalakkhaṇā mettā etassa atthīti mitto. So vuttanayena kalyāṇo assa atthīti tassa atthitāmattaṃ kalyāṇamittapadena vuttaṃ. Assa tena sabbakālaṃ avijahitavāsoti taṃ dassetuṃ ‘‘kalyāṇasahāyo’’ti vuttanti āha ‘‘tevassā’’ti. Te eva kalyāṇamittā assa bhikkhuno. Saha ayanatoti saha pavattanato. Asamodhāne cittena, samodhāne pana cittena ceva kāyena ca sampavaṅko. Sukhaṃ vaco etasmiṃ anukūlagāhimhi ādaragāravavati puggaleti suvaco. Tenāha ‘‘sukhena vattabbo’’tiādi. Khamoti khanto. Tamevassa khamabhāvaṃ dassetuṃ ‘‘gāḷhenā’’tiādi vuttaṃ. Vāmatoti micchā, ayoniso vā gaṇhāti. Paṭippharatīti paṭāṇikabhāvena tiṭṭhati. Padakkhiṇaṃ gaṇhātīti sammā, yoniso vā gaṇhāti.
உச்சாவசானீதி விபுலகு²த்³த³கானி. தத்ருபக³மனியாயாதி தத்ர தத்ர மஹந்தே கு²த்³த³கே ச கம்மே ஸாத⁴னவஸேன உபாயேன உபக³ச்ச²ந்தியா, தஸ்ஸ தஸ்ஸ கம்மஸ்ஸ நிப்பா²த³னே ஸமத்தா²யாதி அத்தோ². தத்ருபாயாயாதி வா தத்ர தத்ர கம்மே ஸாதே⁴தப்³பே³ உபாயபூ⁴தாய.
Uccāvacānīti vipulakhuddakāni. Tatrupagamaniyāyāti tatra tatra mahante khuddake ca kamme sādhanavasena upāyena upagacchantiyā, tassa tassa kammassa nipphādane samatthāyāti attho. Tatrupāyāyāti vā tatra tatra kamme sādhetabbe upāyabhūtāya.
த⁴ம்மே அஸ்ஸ காமோதி த⁴ம்மகாமோதி ப்³யதி⁴கரணானம்பி பா³ஹிரத்தோ² ஸமாஸோ ஹோதீதி கத்வா வுத்தங். காமேதப்³ப³தோ வா பியாயிதப்³ப³தோ காமோ, த⁴ம்மோ. த⁴ம்மோ காமோ அஸ்ஸாதி த⁴ம்மகாமோ. த⁴ம்மோதி பரியத்தித⁴ம்மோ அதி⁴ப்பேதோதி ஆஹ ‘‘தேபிடகங் பு³த்³த⁴வசனங் பியாயதீதி அத்தோ²’’தி. ஸமுதா³ஹரணங் கத²னங் ஸமுதா³ஹாரோ, பியோ ஸமுதா³ஹாரோ ஏதஸ்ஸாதி பியஸமுதா³ஹாரோ. ஸயஞ்சாதி எத்த² ச-ஸத்³தே³ன ‘‘ஸக்கச்ச’’ந்தி பத³ங் அனுகட்³ட⁴தி. தேன ஸயஞ்ச ஸக்கச்சங் தே³ஸேதுகாமோ ஹோதீதி யோஜனா. அபி⁴த⁴ம்மோ ஸத்த பகரணானி ‘‘அதி⁴கோ அபி⁴விஸிட்டோ² ச பரியத்தித⁴ம்மோ’’தி கத்வா. வினயோ உப⁴தோவிப⁴ங்கா³ வினயனதோ காயவாசானங். அபி⁴வினயோ க²ந்த⁴கபரிவாரா விஸேஸதோ ஆபி⁴ஸமாசாரிகத⁴ம்மகித்தனதோ. ஆபி⁴ஸமாசாரிகத⁴ம்மபாரிபூரிவஸேனேவ ஹி ஆதி³ப்³ரஹ்மசரியகத⁴ம்மபாரிபூரீ. த⁴ம்மோ ஏவ பிடகத்³வயஸ்ஸபி பரியத்தித⁴ம்மபா⁴வதோ. மக்³க³ப²லானி அபி⁴த⁴ம்மோ ‘‘நிப்³பா³னத⁴ம்மஸ்ஸ அபி⁴முகோ²’’தி கத்வா. கிலேஸவூபஸமகரணங் புப்³ப³பா⁴கி³யா திஸ்ஸோ ஸிக்கா² ஸங்கே²பதோ விவட்டனிஸ்ஸிதோ ஸமதோ² விபஸ்ஸனா ச. உளாரபாமோஜ்ஜோதி ப³லவபாமோஜ்ஜோ. காரணத்தே²தி நிமித்தத்தே². குஸலத⁴ம்மனிமித்தங் ஹிஸ்ஸ வீரியாரம்போ⁴. தேனாஹ ‘‘தேஸங் அதி⁴க³மத்தா²யா’’தி. குஸலேஸு த⁴ம்மேஸூதி வா நிப்பா²தே³தப்³பே³ பு⁴ம்மங் யதா² ‘‘சேதஸோ அவூபஸமே அயோனிஸோமனஸிகாரபத³ட்டா²ன’’ந்தி. அட்ட²மே நத்தி² வத்தப்³ப³ங்.
Dhamme assa kāmoti dhammakāmoti byadhikaraṇānampi bāhirattho samāso hotīti katvā vuttaṃ. Kāmetabbato vā piyāyitabbato kāmo, dhammo. Dhammo kāmo assāti dhammakāmo. Dhammoti pariyattidhammo adhippetoti āha ‘‘tepiṭakaṃ buddhavacanaṃ piyāyatīti attho’’ti. Samudāharaṇaṃ kathanaṃ samudāhāro, piyo samudāhāro etassāti piyasamudāhāro. Sayañcāti ettha ca-saddena ‘‘sakkacca’’nti padaṃ anukaḍḍhati. Tena sayañca sakkaccaṃ desetukāmo hotīti yojanā. Abhidhammo satta pakaraṇāni ‘‘adhiko abhivisiṭṭho ca pariyattidhammo’’ti katvā. Vinayo ubhatovibhaṅgā vinayanato kāyavācānaṃ. Abhivinayo khandhakaparivārā visesato ābhisamācārikadhammakittanato. Ābhisamācārikadhammapāripūrivaseneva hi ādibrahmacariyakadhammapāripūrī. Dhammo eva piṭakadvayassapi pariyattidhammabhāvato. Maggaphalāni abhidhammo ‘‘nibbānadhammassa abhimukho’’ti katvā. Kilesavūpasamakaraṇaṃ pubbabhāgiyā tisso sikkhā saṅkhepato vivaṭṭanissito samatho vipassanā ca. Uḷārapāmojjoti balavapāmojjo. Kāraṇattheti nimittatthe. Kusaladhammanimittaṃ hissa vīriyārambho. Tenāha ‘‘tesaṃ adhigamatthāyā’’ti. Kusalesu dhammesūti vā nipphādetabbe bhummaṃ yathā ‘‘cetaso avūpasame ayonisomanasikārapadaṭṭhāna’’nti. Aṭṭhame natthi vattabbaṃ.
பட²மனாத²ஸுத்தாதி³வண்ணனா நிட்டி²தா.
Paṭhamanāthasuttādivaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya
7. பட²மனாத²ஸுத்தங் • 7. Paṭhamanāthasuttaṃ
8. து³தியனாத²ஸுத்தங் • 8. Dutiyanāthasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā)
7. பட²மனாத²ஸுத்தவண்ணனா • 7. Paṭhamanāthasuttavaṇṇanā
8. து³தியனாத²ஸுத்தவண்ணனா • 8. Dutiyanāthasuttavaṇṇanā
