| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
7. பட²மனாத²ஸுத்தவண்ணனா
7. Paṭhamanāthasuttavaṇṇanā
17. ஸத்தமே ஸனாதா²தி ஸஞாதகா ப³ஹுஞாதிவக்³கா³ ஹுத்வா விஹரத². நாத²ங் கரொந்தீதி நாத²கரணா, அத்தனோ ஸனாத²பா⁴வகரா பதிட்டா²கராதி அத்தோ². கல்யாணமித்தோதிஆதீ³ஸு ஸீலாதி³கு³ணஸம்பன்னா கல்யாணா மித்தா அஸ்ஸாதி கல்யாணமித்தோ. தேவஸ்ஸ டா²னநிஸஜ்ஜாதீ³ஸு ஸஹ அயனதோ ஸஹாயாதி கல்யாணஸஹாயோ. சித்தேன சேவ காயேன ச கல்யாணமித்தேஸுயேவ ஸம்பவங்கோ ஓணதோதி கல்யாணஸம்பவங்கோ. ஸுவசோ ஹோதீதி ஸுகே²ன வத்தப்³போ³ ஹோதி, ஸுகே²ன அனுஸாஸிதப்³போ³. க²மோதி கா³ள்ஹேன ப²ருஸேன கக்க²ளேன வுத்தோ க²மதி ந குப்பதி. பத³க்கி²ணக்³கா³ஹீ அனுஸாஸனிந்தி யதா² ஏகச்சோ ஓவதி³யமானோ வாமதோ க³ண்ஹாதி, படிப்ப²ரதி வா, அஸ்ஸுணந்தோ வா க³ச்ச²தி, ஏவங் அகத்வா ‘‘ஓவத³த² , ப⁴ந்தே, அனுஸாஸத², தும்ஹேஸு அனோவத³ந்தேஸு கோ அஞ்ஞோ ஓவதி³ஸ்ஸதீ’’தி பத³க்கி²ணங் க³ண்ஹாதி.
17. Sattame sanāthāti sañātakā bahuñātivaggā hutvā viharatha. Nāthaṃ karontīti nāthakaraṇā, attano sanāthabhāvakarā patiṭṭhākarāti attho. Kalyāṇamittotiādīsu sīlādiguṇasampannā kalyāṇā mittā assāti kalyāṇamitto. Tevassa ṭhānanisajjādīsu saha ayanato sahāyāti kalyāṇasahāyo. Cittena ceva kāyena ca kalyāṇamittesuyeva sampavaṅko oṇatoti kalyāṇasampavaṅko. Suvacohotīti sukhena vattabbo hoti, sukhena anusāsitabbo. Khamoti gāḷhena pharusena kakkhaḷena vutto khamati na kuppati. Padakkhiṇaggāhī anusāsaninti yathā ekacco ovadiyamāno vāmato gaṇhāti, paṭippharati vā, assuṇanto vā gacchati, evaṃ akatvā ‘‘ovadatha , bhante, anusāsatha, tumhesu anovadantesu ko añño ovadissatī’’ti padakkhiṇaṃ gaṇhāti.
உச்சாவசானீதி உச்சனீசானி. கிங்கரணீயானீதி ‘‘கிங் கரோமீ’’தி ஏவங் வத்வா கத்தப்³ப³கம்மானி. தத்த² உச்சகம்மங் நாம சீவரஸ்ஸ கரணங் ரஜனங், சேதியே ஸுதா⁴கம்மங், உபோஸதா²கா³ரசேதியக⁴ரபோ³தி⁴க⁴ரேஸு கத்தப்³ப³கம்மந்தி ஏவமாதி³. அவசகம்மங் நாம பாத³தோ⁴வனமக்க²னாதி³கு²த்³த³ககம்மங். தத்ரூபாயாயாதி தத்ருபக³மனியாய. அலங் காதுந்தி காதுங் ஸமத்தோ² ஹோதி. அலங் ஸங்விதா⁴துந்தி விசாரேதுங் ஸமத்தோ² ஹோதி.
Uccāvacānīti uccanīcāni. Kiṃkaraṇīyānīti ‘‘kiṃ karomī’’ti evaṃ vatvā kattabbakammāni. Tattha uccakammaṃ nāma cīvarassa karaṇaṃ rajanaṃ, cetiye sudhākammaṃ, uposathāgāracetiyagharabodhigharesu kattabbakammanti evamādi. Avacakammaṃ nāma pādadhovanamakkhanādikhuddakakammaṃ. Tatrūpāyāyāti tatrupagamaniyāya. Alaṃ kātunti kātuṃ samattho hoti. Alaṃ saṃvidhātunti vicāretuṃ samattho hoti.
த⁴ம்மே அஸ்ஸ காமோ ஸினேஹோதி த⁴ம்மகாமோ, தேபிடகங் பு³த்³த⁴வசனங் பியாயதீதி அத்தோ². பியஸமுதா³ஹாரோதி பரஸ்மிங் கதெ²ந்தே ஸக்கச்சங் ஸுணாதி, ஸயஞ்ச பரேஸங் தே³ஸேதுகாமோ ஹோதீதி அத்தோ² . அபி⁴த⁴ம்மே அபி⁴வினயேதி எத்த² த⁴ம்மோ அபி⁴த⁴ம்மோ, வினயோ அபி⁴வினயோதி சதுக்கங் வேதி³தப்³ப³ங். தத்த² த⁴ம்மோதி ஸுத்தந்தபிடகங். அபி⁴த⁴ம்மோதி ஸத்த பகரணானி. வினயோதி உப⁴தோவிப⁴ங்கோ³. அபி⁴வினயோதி க²ந்த⁴கபரிவாரா. அத² வா ஸுத்தந்தபிடகம்பி அபி⁴த⁴ம்மபிடகம்பி த⁴ம்மோ ஏவ, மக்³க³ப²லானி அபி⁴த⁴ம்மோ. ஸகலவினயபிடகங் வினயோ, கிலேஸவூபஸமகரணங் அபி⁴வினயோ. இதி ஸப்³ப³ஸ்மிம்பி எத்த² த⁴ம்மே ச அபி⁴த⁴ம்மே ச வினயே ச அபி⁴வினயே ச உளாரபாமோஜ்ஜோ ஹோதீதி அத்தோ². குஸலேஸு த⁴ம்மேஸூதி காரணத்தே² பு⁴ம்மங், சாதுபூ⁴மககுஸலத⁴ம்மகாரணா தேஸங் அதி⁴க³மத்தா²ய அனிக்கி²த்தது⁴ரோ ஹோதீதி அத்தோ².
Dhamme assa kāmo sinehoti dhammakāmo, tepiṭakaṃ buddhavacanaṃ piyāyatīti attho. Piyasamudāhāroti parasmiṃ kathente sakkaccaṃ suṇāti, sayañca paresaṃ desetukāmo hotīti attho . Abhidhamme abhivinayeti ettha dhammo abhidhammo, vinayo abhivinayoti catukkaṃ veditabbaṃ. Tattha dhammoti suttantapiṭakaṃ. Abhidhammoti satta pakaraṇāni. Vinayoti ubhatovibhaṅgo. Abhivinayoti khandhakaparivārā. Atha vā suttantapiṭakampi abhidhammapiṭakampi dhammo eva, maggaphalāni abhidhammo. Sakalavinayapiṭakaṃ vinayo, kilesavūpasamakaraṇaṃ abhivinayo. Iti sabbasmimpi ettha dhamme ca abhidhamme ca vinaye ca abhivinaye ca uḷārapāmojjo hotīti attho. Kusalesu dhammesūti kāraṇatthe bhummaṃ, cātubhūmakakusaladhammakāraṇā tesaṃ adhigamatthāya anikkhittadhuro hotīti attho.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 7. பட²மனாத²ஸுத்தங் • 7. Paṭhamanāthasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 7-8. பட²மனாத²ஸுத்தாதி³வண்ணனா • 7-8. Paṭhamanāthasuttādivaṇṇanā
