| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
5. පඨමනතුම්‌හාකංසුත්‌තං
5. Paṭhamanatumhākaṃsuttaṃ
138. ‘‘යං, භික්‌ඛවෙ, න තුම්‌හාකං තං පජහථ. තං වො පහීනං හිතාය සුඛාය භවිස්‌සති. කිඤ්‌ච, භික්‌ඛවෙ, න තුම්‌හාකං? චක්‌ඛු, භික්‌ඛවෙ, න තුම්‌හාකං; තං පජහථ. තං වො පහීනං හිතාය සුඛාය භවිස්‌සති…පෙ.… ජිව්‌හා න තුම්‌හාකං ; තං පජහථ. සා වො පහීනා හිතාය සුඛාය භවිස්‌සති…පෙ.… මනො න තුම්‌හාකං; තං පජහථ. සො වො පහීනො හිතාය සුඛාය භවිස්‌සති. සෙය්‍යථාපි, භික්‌ඛවෙ, යං ඉමස්‌මිං ජෙතවනෙ තිණකට්‌ඨසාඛාපලාසං තං ජනො හරෙය්‍ය වා ඩහෙය්‍ය වා යථාපච්‌චයං වා කරෙය්‍ය, අපි නු තුම්‌හාකං එවමස්‌ස – ‘අම්‌හෙ ජනො හරති වා ඩහති වා යථාපච්‌චයං වා කරොතී’’’ති? ‘‘නො හෙතං, භන්‌තෙ’’. ‘‘තං කිස්‌ස හෙතු’’? ‘‘න හි නො එතං, භන්‌තෙ, අත්‌තා වා අත්‌තනියං වා’’ති. ‘‘එවමෙව ඛො, භික්‌ඛවෙ, චක්‌ඛු න තුම්‌හාකං; තං පජහථ. තං වො පහීනං හිතාය සුඛාය භවිස්‌සති…පෙ.… ජිව්‌හා න තුම්‌හාකං; තං පජහථ. සා වො පහීනා හිතාය සුඛාය භවිස්‌සති…පෙ.… මනො න තුම්‌හාකං ; තං පජහථ. සො වො පහීනො හිතාය සුඛාය භවිස්‌සතී’’ති. පඤ්‌චමං.
138. ‘‘Yaṃ, bhikkhave, na tumhākaṃ taṃ pajahatha. Taṃ vo pahīnaṃ hitāya sukhāya bhavissati. Kiñca, bhikkhave, na tumhākaṃ? Cakkhu, bhikkhave, na tumhākaṃ; taṃ pajahatha. Taṃ vo pahīnaṃ hitāya sukhāya bhavissati…pe… jivhā na tumhākaṃ ; taṃ pajahatha. Sā vo pahīnā hitāya sukhāya bhavissati…pe… mano na tumhākaṃ; taṃ pajahatha. So vo pahīno hitāya sukhāya bhavissati. Seyyathāpi, bhikkhave, yaṃ imasmiṃ jetavane tiṇakaṭṭhasākhāpalāsaṃ taṃ jano hareyya vā ḍaheyya vā yathāpaccayaṃ vā kareyya, api nu tumhākaṃ evamassa – ‘amhe jano harati vā ḍahati vā yathāpaccayaṃ vā karotī’’’ti? ‘‘No hetaṃ, bhante’’. ‘‘Taṃ kissa hetu’’? ‘‘Na hi no etaṃ, bhante, attā vā attaniyaṃ vā’’ti. ‘‘Evameva kho, bhikkhave, cakkhu na tumhākaṃ; taṃ pajahatha. Taṃ vo pahīnaṃ hitāya sukhāya bhavissati…pe… jivhā na tumhākaṃ; taṃ pajahatha. Sā vo pahīnā hitāya sukhāya bhavissati…pe… mano na tumhākaṃ ; taṃ pajahatha. So vo pahīno hitāya sukhāya bhavissatī’’ti. Pañcamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 4-12. දුතියරූපාරාමසුත්‌තාදිවණ්‌ණනා • 4-12. Dutiyarūpārāmasuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 4-12. දුතියරූපාරාමසුත්‌තාදිවණ්‌ණනා • 4-12. Dutiyarūpārāmasuttādivaṇṇanā
