| Library / Tipiṭaka / तिपिटक • Tipiṭaka / विमानवत्थुपाळि • Vimānavatthupāḷi |
६. पठमनावाविमानवत्थु
6. Paṭhamanāvāvimānavatthu
४३.
43.
‘‘सुवण्णच्छदनं नावं, नारि आरुय्ह तिट्ठसि।
‘‘Suvaṇṇacchadanaṃ nāvaṃ, nāri āruyha tiṭṭhasi;
४४.
44.
‘‘केन तेतादिसो वण्णो, केन ते इध मिज्झति।
‘‘Kena tetādiso vaṇṇo, kena te idha mijjhati;
उप्पज्जन्ति च ते भोगा, ये केचि मनसो पिया॥
Uppajjanti ca te bhogā, ye keci manaso piyā.
४५.
45.
‘‘पुच्छामि तं देवि महानुभावे, मनुस्सभूता किमकासि पुञ्ञं।
‘‘Pucchāmi taṃ devi mahānubhāve, manussabhūtā kimakāsi puññaṃ;
केनासि एवं जलितानुभावा, वण्णो च ते सब्बदिसा पभासती’’ति॥
Kenāsi evaṃ jalitānubhāvā, vaṇṇo ca te sabbadisā pabhāsatī’’ti.
४६.
46.
सा देवता अत्तमना, मोग्गल्लानेन पुच्छिता।
Sā devatā attamanā, moggallānena pucchitā;
पञ्हं पुट्ठा वियाकासि, यस्स कम्मस्सिदं फलं॥
Pañhaṃ puṭṭhā viyākāsi, yassa kammassidaṃ phalaṃ.
४७.
47.
‘‘अहं मनुस्सेसु मनुस्सभूता, पुरिमाय जातिया मनुस्सलोके।
‘‘Ahaṃ manussesu manussabhūtā, purimāya jātiyā manussaloke;
दिस्वान भिक्खू तसिते किलन्ते, उट्ठाय पातुं उदकं अदासिं॥
Disvāna bhikkhū tasite kilante, uṭṭhāya pātuṃ udakaṃ adāsiṃ.
४८.
48.
‘‘यो वे किलन्तान पिपासितानं, उट्ठाय पातुं उदकं ददाति।
‘‘Yo ve kilantāna pipāsitānaṃ, uṭṭhāya pātuṃ udakaṃ dadāti;
सीतोदका 3 तस्स भवन्ति नज्जो, पहूतमल्या बहुपुण्डरीका॥
Sītodakā 4 tassa bhavanti najjo, pahūtamalyā bahupuṇḍarīkā.
४९.
49.
‘‘तं आपगा 5 अनुपरियन्ति सब्बदा, सीतोदका वालुकसन्थता नदी।
‘‘Taṃ āpagā 6 anupariyanti sabbadā, sītodakā vālukasanthatā nadī;
अम्बा च साला तिलका च जम्बुयो, उद्दालका पाटलियो च फुल्ला॥
Ambā ca sālā tilakā ca jambuyo, uddālakā pāṭaliyo ca phullā.
५०.
50.
‘‘तं भूमिभागेहि उपेतरूपं, विमानसेट्ठं भुससोभमानं।
‘‘Taṃ bhūmibhāgehi upetarūpaṃ, vimānaseṭṭhaṃ bhusasobhamānaṃ;
५१.
51.
‘‘तेन मेतादिसो वण्णो, तेन मे इध मिज्झति।
‘‘Tena metādiso vaṇṇo, tena me idha mijjhati;
उप्पज्जन्ति च मे भोगा, ये केचि मनसो पिया॥
Uppajjanti ca me bhogā, ye keci manaso piyā.
५२.
52.
‘‘अक्खामि ते भिक्खु महानुभाव, मनुस्सभूता यमकासि पुञ्ञं।
‘‘Akkhāmi te bhikkhu mahānubhāva, manussabhūtā yamakāsi puññaṃ;
तेनम्हि एवं जलितानुभावा, वण्णो च मे सब्बदिसा पभासती’’ति॥
Tenamhi evaṃ jalitānubhāvā, vaṇṇo ca me sabbadisā pabhāsatī’’ti.
पठमनावाविमानं छट्ठं।
Paṭhamanāvāvimānaṃ chaṭṭhaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / विमानवत्थु-अट्ठकथा • Vimānavatthu-aṭṭhakathā / ६. पठमनावाविमानवण्णना • 6. Paṭhamanāvāvimānavaṇṇanā
