| Library / Tipiṭaka / திபிடக • Tipiṭaka / பஞ்சபகரண-அனுடீகா • Pañcapakaraṇa-anuṭīkā |
2. நித்³தே³ஸவண்ணனா
2. Niddesavaṇṇanā
1. பட²மனயோ ஸங்க³ஹாஸங்க³ஹபத³வண்ணனா
1. Paṭhamanayo saṅgahāsaṅgahapadavaṇṇanā
1. க²ந்த⁴பத³வண்ணனா
1. Khandhapadavaṇṇanā
6. ‘‘அபி⁴ஞ்ஞெய்யத⁴ம்மபா⁴வேன வுத்தா சத்தாரோ க²ந்தா⁴ ஹொந்தீ’’திஆதி³னா, ‘‘ரூபக்க²ந்தோ⁴ அபி⁴ஞ்ஞெய்யோ’’திஆதி³னா ச அபி⁴ஞ்ஞாதலக்க²ணவிஸயாதி ஆஹ ‘‘ஸபா⁴வதோ அபி⁴ஞ்ஞாதான’’ந்தி. பரிஞ்ஞெய்யதாதீ³தி ஆதி³-ஸத்³தே³ன பஹாதப்³ப³ஸச்சி²காதப்³ப³பா⁴வேதப்³ப³தா ஸங்க³ய்ஹதி. அதி⁴பதியாதீ³தி அதி⁴பதிபச்சயபா⁴வஉபட்டா²னபத³ஹனாதீ³னி. ஸச்சாதி³விஸேஸோ வியாதி து³க்க²ஸச்சாதி³பரியாயோ அபி⁴ஞ்ஞெய்யபீளனட்டா²தி³விஸேஸோ விய. ஏவஞ்ச கத்வாதி நயமுக²மாதிகாய அபி⁴ஞ்ஞெய்யனிஸ்ஸயேன வுச்சமானத்தா ஏவ. தேஸங் ரூபத⁴ம்மானங் பஞ்சன்னங் க²ந்தா⁴னங் க²ந்த⁴பா⁴வேன விய ரூபக்க²ந்த⁴பா⁴வேன ஸபா⁴க³தா ஹோதி, ந வேத³னாக்க²ந்தா⁴தி³பா⁴வேனாதி ஸங்க³ஹலக்க²ணமாஹ. இதீதி தஸ்மா, யஸ்மா ரூபத⁴ம்மா அஞ்ஞமஞ்ஞங் ரூபக்க²ந்த⁴பா⁴வேன ஸபா⁴கா³, தஸ்மாதி அத்தோ². ரூபக்க²ந்த⁴பா⁴வஸங்கா²தேன ரூபக்க²ந்த⁴பா⁴வேன அத்த²முகே²னேவ க³ஹணே. ஸத்³த³த்³வாரேன பன க³ஹணே ரூபக்க²ந்த⁴வசனஸங்கா²தேன வா ரூபக்க²ந்த⁴வசனவசனீயதாஸங்கா²தேன. இதா³னி தமேவத்த²ங் பாகடதரங் காதுங் ‘‘ரூபக்க²ந்தோ⁴தி ஹீ’’திஆதி³ வுத்தங்.
6. ‘‘Abhiññeyyadhammabhāvena vuttā cattāro khandhā hontī’’tiādinā, ‘‘rūpakkhandho abhiññeyyo’’tiādinā ca abhiññātalakkhaṇavisayāti āha ‘‘sabhāvato abhiññātāna’’nti. Pariññeyyatādīti ādi-saddena pahātabbasacchikātabbabhāvetabbatā saṅgayhati. Adhipatiyādīti adhipatipaccayabhāvaupaṭṭhānapadahanādīni. Saccādiviseso viyāti dukkhasaccādipariyāyo abhiññeyyapīḷanaṭṭhādiviseso viya. Evañca katvāti nayamukhamātikāya abhiññeyyanissayena vuccamānattā eva. Tesaṃ rūpadhammānaṃ pañcannaṃ khandhānaṃ khandhabhāvena viya rūpakkhandhabhāvena sabhāgatā hoti, na vedanākkhandhādibhāvenāti saṅgahalakkhaṇamāha. Itīti tasmā, yasmā rūpadhammā aññamaññaṃ rūpakkhandhabhāvena sabhāgā, tasmāti attho. Rūpakkhandhabhāvasaṅkhātena rūpakkhandhabhāvena atthamukheneva gahaṇe. Saddadvārena pana gahaṇe rūpakkhandhavacanasaṅkhātena vā rūpakkhandhavacanavacanīyatāsaṅkhātena. Idāni tamevatthaṃ pākaṭataraṃ kātuṃ ‘‘rūpakkhandhoti hī’’tiādi vuttaṃ.
புரிமேனாதி ரூபக்க²ந்தே⁴ன. ஸஞ்ஞாக்க²ந்த⁴மூலகாதிஆதீ³ஸு ‘‘புரிமேன யோஜியமானே’’திஆதி³ங் ஆனெத்வா யதா²ரஹங் யோஜேதப்³ப³ங். அபே⁴த³தோ பஞ்சகபுச்சா²விஸ்ஸஜ்ஜனங் க²ந்த⁴பத³னித்³தே³ஸே ஸப்³ப³பச்சி²மமேவாதி ஆஹ ‘‘பே⁴த³தோ பஞ்சகபுச்சா²விஸ்ஸஜ்ஜனானந்தர’’ந்தி.
Purimenāti rūpakkhandhena. Saññākkhandhamūlakātiādīsu ‘‘purimena yojiyamāne’’tiādiṃ ānetvā yathārahaṃ yojetabbaṃ. Abhedato pañcakapucchāvissajjanaṃ khandhapadaniddese sabbapacchimamevāti āha ‘‘bhedato pañcakapucchāvissajjanānantara’’nti.
ஆயதனபதா³தி³வண்ணனா
Āyatanapadādivaṇṇanā
40. யதி³பி ஏககேபி ஸதி³ஸங் விஸ்ஸஜ்ஜனங் விஸ்ஸஜ்ஜனங் ஸமுத³யமக்³க³ஸச்சானங் ‘‘ஸமுத³யஸச்சங் ஏகேன க²ந்தே⁴ன…பே॰… மக்³க³ஸச்சங் ஏகேன க²ந்தே⁴ன ஏகேனாயதனேன ஏகாய தா⁴துயா ஸங்க³ஹிதங், சதூஹி க²ந்தே⁴ஹி ஏகாத³ஸஹி ஆயதனேஹி ஸத்தரஸஹி தா⁴தூஹி அஸங்க³ஹித’’ந்தி (தா⁴து॰ 41) நித்³தி³ட்ட²த்தா. எத்தா²தி ஏதஸ்மிங் இந்த்³ரியபத³னித்³தே³ஸே . சக்கு²ஸோதசக்கு²ஸுகி²ந்த்³ரியது³கானந்தி சக்கு²ஸோதது³கங் சக்கு²ஸுகி²ந்த்³ரியது³கந்தி ஏதேஸங் து³கானங். சக்கு²ஸோதஸுகி²ந்த்³ரியானஞ்ஹி ‘‘ஏகேன க²ந்தே⁴ன ஏகேனாயதனேன ஏகாய தா⁴துயா ஸங்க³ஹிதங், சதூஹி க²ந்தே⁴ஹி ஏகாத³ஸஹி ஆயதனேஹி ஸத்தரஸஹி தா⁴தூஹி அஸங்க³ஹித’’ந்தி ஏககே ஸதி³ஸங் விஸ்ஸஜ்ஜனங். சக்கு²ஸோதிந்த்³ரியது³கஸ்ஸ பன ‘‘சக்கு²ந்த்³ரியஞ்ச ஸோதிந்த்³ரியஞ்ச ஏகேன க²ந்தே⁴ன த்³வீஹாயதனேஹி த்³வீஹி தா⁴தூஹி ஸங்க³ஹிதா, சதூஹி க²ந்தே⁴ஹி த³ஸஹாயதனேஹி ஸோளஸஹி தா⁴தூஹி அஸங்க³ஹிதா’’தி, ‘‘சக்கு²ந்த்³ரியஞ்ச ஸுகி²ந்த்³ரியஞ்ச த்³வீஹி க²ந்தே⁴ஹி த்³வீஹாயதனேஹி த்³வீஹி தா⁴தூஹி ஸங்க³ஹிதா, தீஹி க²ந்தே⁴ஹி த³ஸஹாயதனேஹி ஸோளஸஹி தா⁴தூஹி அஸங்க³ஹிதா’’தி சக்கு²ஸுகி²ந்த்³ரியது³கஸ்ஸ ச அஸதி³ஸங் விஸ்ஸஜ்ஜனங். நாபி து³கேஹி திகஸ்ஸாதி சக்கு²ஸோதசக்கு²ஸுகி²ந்த்³ரியாதி³து³கேஹி சக்கு²ஸோதஸுகி²ந்த்³ரியாதி³திகஸ்ஸ நாபி ஸதி³ஸங் விஸ்ஸஜ்ஜனங். இதா⁴தி ஸச்சபத³னித்³தே³ஸே. திகேன சாதி து³க்க²ஸமுத³யமக்³கா³தி³திகேன ச. ‘‘பஞ்சஹி க²ந்தே⁴ஹி த்³வாத³ஸஹாயதனேஹி அட்டா²ரஸஹி தா⁴தூஹி ஸங்க³ஹிதா, ந கேஹிசி க²ந்தே⁴ஹி ந கேஹிசி ஆயதனேஹி ந காஹிசி தா⁴தூஹி அஸங்க³ஹிதா’’தி ஸதி³ஸங் விஸ்ஸஜ்ஜனங்.
40. Yadipiekakepi sadisaṃ vissajjanaṃ vissajjanaṃ samudayamaggasaccānaṃ ‘‘samudayasaccaṃ ekena khandhena…pe… maggasaccaṃ ekena khandhena ekenāyatanena ekāya dhātuyā saṅgahitaṃ, catūhi khandhehi ekādasahi āyatanehi sattarasahi dhātūhi asaṅgahita’’nti (dhātu. 41) niddiṭṭhattā. Etthāti etasmiṃ indriyapadaniddese . Cakkhusotacakkhusukhindriyadukānanti cakkhusotadukaṃ cakkhusukhindriyadukanti etesaṃ dukānaṃ. Cakkhusotasukhindriyānañhi ‘‘ekena khandhena ekenāyatanena ekāya dhātuyā saṅgahitaṃ, catūhi khandhehi ekādasahi āyatanehi sattarasahi dhātūhi asaṅgahita’’nti ekake sadisaṃ vissajjanaṃ. Cakkhusotindriyadukassa pana ‘‘cakkhundriyañca sotindriyañca ekena khandhena dvīhāyatanehi dvīhi dhātūhi saṅgahitā, catūhi khandhehi dasahāyatanehi soḷasahi dhātūhi asaṅgahitā’’ti, ‘‘cakkhundriyañca sukhindriyañca dvīhi khandhehi dvīhāyatanehi dvīhi dhātūhi saṅgahitā, tīhi khandhehi dasahāyatanehi soḷasahi dhātūhi asaṅgahitā’’ti cakkhusukhindriyadukassa ca asadisaṃ vissajjanaṃ. Nāpi dukehi tikassāti cakkhusotacakkhusukhindriyādidukehi cakkhusotasukhindriyāditikassa nāpi sadisaṃ vissajjanaṃ. Idhāti saccapadaniddese. Tikena cāti dukkhasamudayamaggāditikena ca. ‘‘Pañcahi khandhehi dvādasahāyatanehi aṭṭhārasahi dhātūhi saṅgahitā, na kehici khandhehi na kehici āyatanehi na kāhici dhātūhi asaṅgahitā’’ti sadisaṃ vissajjanaṃ.
6. படிச்சஸமுப்பாத³வண்ணனா
6. Paṭiccasamuppādavaṇṇanā
61. அவிஜ்ஜாவசனேனாதி ‘‘அவிஜ்ஜாபச்சயா ஸங்கா²ரா’’தி எத்த² அவிஜ்ஜாக்³க³ஹணேன. விஸேஸனங் ந கத்தப்³ப³ங், ‘‘ஸப்³ப³ம்பி விஞ்ஞாண’’ந்தி வத்தப்³ப³ந்தி அதி⁴ப்பாயோ. தத்த² காரணமாஹ ‘‘குஸலாதீ³னம்பீ’’திஆதி³னா. விஸ்ஸஜ்ஜனாஸதி³ஸேன ஸப்³ப³விஞ்ஞாணாதி³ஸங்க³ஹணதோ. தேஸந்தி விஞ்ஞாணாதி³பதா³னங். இதா⁴தி இமஸ்மிங் பட²மனயே. அகம்மஜானம்பி ஸங்க³ஹிததா விஞ்ஞாயதி ஸத்³தா³யதனஸ்ஸபி க³ஹிதத்தா.
61. Avijjāvacanenāti ‘‘avijjāpaccayā saṅkhārā’’ti ettha avijjāggahaṇena. Visesanaṃ na kattabbaṃ, ‘‘sabbampi viññāṇa’’nti vattabbanti adhippāyo. Tattha kāraṇamāha ‘‘kusalādīnampī’’tiādinā. Vissajjanāsadisena sabbaviññāṇādisaṅgahaṇato. Tesanti viññāṇādipadānaṃ. Idhāti imasmiṃ paṭhamanaye. Akammajānampi saṅgahitatā viññāyati saddāyatanassapi gahitattā.
71. ஜாயமான…பே॰… மானானந்தி ஜாயமானாதி³அவத்தா²னங் த⁴ம்மானங். ஜாயமானாதி³பா⁴வமத்தத்தாதி நிப்³ப³த்தனாதி³அவத்தா²மத்தபா⁴வதோ. வினிப்³பு⁴ஜ்ஜித்வாதி அவத்தா²பா⁴வதோ வினிப்³போ⁴க³ங் கத்வா. பரமத்த²தோ அவிஜ்ஜமானானி, ஸபா⁴வமத்தபூ⁴தானீதி பரமத்த²த⁴ம்மானங் அவத்தா²பா⁴வமத்தபூ⁴தானி . அபரமத்த²ஸபா⁴வானிபி ரூபத⁴ம்மஸ்ஸ நிப்³ப³த்திஆதி³பா⁴வதோ ருப்பனபா⁴வேன க³ய்ஹந்தி. ததோ ‘‘ரூபக்க²ந்த⁴ஸ்ஸ ஸபா⁴கா³னி, அரூபானங் பன ஜாதிஜராமரணானீ’’தி ஆனெத்வா யோஜனா. ஏகேகபூ⁴தானீதி யதா² ஏகஸ்மிங் ரூபகலாபே ஜாதிஆதீ³னி ஏகேகானியேவ ஹொந்தி, ஏவங் ஏகஸ்மிங் அரூபகலாபேபீதி வுத்தங். தேனாஹ ‘‘ரூபகலாபஜாதிஆதீ³னி வியா’’திஆதி³. அனுப⁴வனஸஞ்ஜானநவிஜானநகிச்சானங் வேத³னாதீ³னங் நிப்³ப³த்திஆதி³பூ⁴தானிபி ஜாதிஆதீ³னி ததா² ந க³ய்ஹந்தீதி ஆஹ ‘‘வேதி³யன…பே॰… அக³ய்ஹமானானீ’’தி. தேன வேத³னாக்க²ந்தா⁴தீ³ஹி ஜாதிஆதீ³னங் ஸங்க³ஹாபா⁴வமாஹ. ‘‘ஜாதி, பி⁴க்க²வே, அனிச்சா ஸங்க²தா’’திஆதி³வசனதோ ஜாதிஆதீ³னம்பி ஸங்க²தபரியாயோ அத்தீ²தி ஸங்க²தாபி⁴ஸங்க²ரணகிச்சேன ஸங்கா²ரக்க²ந்தே⁴ன தேஸங் ஸங்க³ஹோதி வுத்தங் ‘‘ஸங்க²தா…பே॰… ஸபா⁴கா³னீ’’தி. தேனேவ ச ஸங்கா²ரக்க²ந்த⁴ஸ்ஸ அனேகந்தபரமத்த²கிச்சதா வேதி³தப்³பா³. ததா² து³விதா⁴னீதி வுத்தப்பகாரேன ரூபாரூபத⁴ம்மானங் நிப்³ப³த்திஆதி³பா⁴வேன த்³விப்பகாரானி. தேனாதி யதா²வுத்தஸபா⁴க³த்தே²ன. தேஹி க²ந்தா⁴தீ³ஹீதி ரூபக்க²ந்த⁴ஸங்கா²ரக்க²ந்த⁴த⁴ம்மாயதனத⁴ம்மதா⁴தூஹி.
71. Jāyamāna…pe… mānānanti jāyamānādiavatthānaṃ dhammānaṃ. Jāyamānādibhāvamattattāti nibbattanādiavatthāmattabhāvato. Vinibbhujjitvāti avatthābhāvato vinibbhogaṃ katvā. Paramatthato avijjamānāni, sabhāvamattabhūtānīti paramatthadhammānaṃ avatthābhāvamattabhūtāni . Aparamatthasabhāvānipi rūpadhammassa nibbattiādibhāvato ruppanabhāvena gayhanti. Tato ‘‘rūpakkhandhassa sabhāgāni, arūpānaṃ pana jātijarāmaraṇānī’’ti ānetvā yojanā. Ekekabhūtānīti yathā ekasmiṃ rūpakalāpe jātiādīni ekekāniyeva honti, evaṃ ekasmiṃ arūpakalāpepīti vuttaṃ. Tenāha ‘‘rūpakalāpajātiādīni viyā’’tiādi. Anubhavanasañjānanavijānanakiccānaṃ vedanādīnaṃ nibbattiādibhūtānipi jātiādīni tathā na gayhantīti āha ‘‘vediyana…pe… agayhamānānī’’ti. Tena vedanākkhandhādīhi jātiādīnaṃ saṅgahābhāvamāha. ‘‘Jāti, bhikkhave, aniccā saṅkhatā’’tiādivacanato jātiādīnampi saṅkhatapariyāyo atthīti saṅkhatābhisaṅkharaṇakiccena saṅkhārakkhandhena tesaṃ saṅgahoti vuttaṃ ‘‘saṅkhatā…pe… sabhāgānī’’ti. Teneva ca saṅkhārakkhandhassa anekantaparamatthakiccatā veditabbā. Tathā duvidhānīti vuttappakārena rūpārūpadhammānaṃ nibbattiādibhāvena dvippakārāni. Tenāti yathāvuttasabhāgatthena. Tehi khandhādīhīti rūpakkhandhasaṅkhārakkhandhadhammāyatanadhammadhātūhi.
பட²மனயஸங்க³ஹாஸங்க³ஹபத³வண்ணனா நிட்டி²தா.
Paṭhamanayasaṅgahāsaṅgahapadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / தா⁴துகதா²பாளி • Dhātukathāpāḷi / 1. ஸங்க³ஹாஸங்க³ஹபத³னித்³தே³ஸோ • 1. Saṅgahāsaṅgahapadaniddeso
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / பஞ்சபகரண-அட்ட²கதா² • Pañcapakaraṇa-aṭṭhakathā / 1. பட²மனயோ ஸங்க³ஹாஸங்க³ஹபத³வண்ணனா • 1. Paṭhamanayo saṅgahāsaṅgahapadavaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 1. பட²மனயோ ஸங்க³ஹாஸங்க³ஹபத³வண்ணனா • 1. Paṭhamanayo saṅgahāsaṅgahapadavaṇṇanā
