| Library / Tipiṭaka / তিপিটক • Tipiṭaka / উদানপাল়ি • Udānapāḷi |
৮. পাটলিগামিযৰগ্গো
8. Pāṭaligāmiyavaggo
১. পঠমনিব্বানপটিসংযুত্তসুত্তং
1. Paṭhamanibbānapaṭisaṃyuttasuttaṃ
৭১. এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ভগৰা ভিক্খূ নিব্বানপটিসংযুত্তায ধম্মিযা কথায সন্দস্সেতি সমাদপেতি সমুত্তেজেতি সম্পহংসেতি। তেধ ভিক্খূ 1 অট্ঠিং কত্ৰা 2 মনসি কত্ৰা সব্বং চেতসো 3 সমন্নাহরিত্ৰা ওহিতসোতা ধম্মং সুণন্তি।
71. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena bhagavā bhikkhū nibbānapaṭisaṃyuttāya dhammiyā kathāya sandasseti samādapeti samuttejeti sampahaṃseti. Tedha bhikkhū 4 aṭṭhiṃ katvā 5 manasi katvā sabbaṃ cetaso 6 samannāharitvā ohitasotā dhammaṃ suṇanti.
অথ খো ভগৰা এতমত্থং ৰিদিত্ৰা তাযং ৰেলাযং ইমং উদানং উদানেসি –
Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi –
‘‘অত্থি, ভিক্খৰে, তদাযতনং, যত্থ নেৰ পথৰী, ন আপো, ন তেজো, ন ৰাযো, ন আকাসানঞ্চাযতনং, ন ৰিঞ্ঞাণঞ্চাযতনং, ন আকিঞ্চঞ্ঞাযতনং, ন নেৰসঞ্ঞানাসঞ্ঞাযতনং, নাযং লোকো, ন পরলোকো, ন উভো চন্দিমসূরিযা। তত্রাপাহং, ভিক্খৰে, নেৰ আগতিং ৰদামি , ন গতিং, ন ঠিতিং, ন চুতিং, ন উপপত্তিং; অপ্পতিট্ঠং, অপ্পৰত্তং, অনারম্মণমেৰেতং। এসেৰন্তো দুক্খস্সা’’তি। পঠমং।
‘‘Atthi, bhikkhave, tadāyatanaṃ, yattha neva pathavī, na āpo, na tejo, na vāyo, na ākāsānañcāyatanaṃ, na viññāṇañcāyatanaṃ, na ākiñcaññāyatanaṃ, na nevasaññānāsaññāyatanaṃ, nāyaṃ loko, na paraloko, na ubho candimasūriyā. Tatrāpāhaṃ, bhikkhave, neva āgatiṃ vadāmi , na gatiṃ, na ṭhitiṃ, na cutiṃ, na upapattiṃ; appatiṭṭhaṃ, appavattaṃ, anārammaṇamevetaṃ. Esevanto dukkhassā’’ti. Paṭhamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / উদান-অট্ঠকথা • Udāna-aṭṭhakathā / ১. পঠমনিব্বানপটিসংযুত্তসুত্তৰণ্ণনা • 1. Paṭhamanibbānapaṭisaṃyuttasuttavaṇṇanā
