| Library / Tipiṭaka / තිපිටක • Tipiṭaka / උදානපාළි • Udānapāḷi |
8. පාටලිගාමියවග්‌ගො
8. Pāṭaligāmiyavaggo
1. පඨමනිබ්‌බානපටිසංයුත්‌තසුත්‌තං
1. Paṭhamanibbānapaṭisaṃyuttasuttaṃ
71. එවං මෙ සුතං – එකං සමයං භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තෙන ඛො පන සමයෙන භගවා භික්‌ඛූ නිබ්‌බානපටිසංයුත්‌තාය ධම්‌මියා කථාය සන්‌දස්‌සෙති සමාදපෙති සමුත්‌තෙජෙති සම්‌පහංසෙති. තෙධ භික්‌ඛූ 1 අට්‌ඨිං කත්‌වා 2 මනසි කත්‌වා සබ්‌බං චෙතසො 3 සමන්‌නාහරිත්‌වා ඔහිතසොතා ධම්‌මං සුණන්‌ති.
71. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena bhagavā bhikkhū nibbānapaṭisaṃyuttāya dhammiyā kathāya sandasseti samādapeti samuttejeti sampahaṃseti. Tedha bhikkhū 4 aṭṭhiṃ katvā 5 manasi katvā sabbaṃ cetaso 6 samannāharitvā ohitasotā dhammaṃ suṇanti.
අථ ඛො භගවා එතමත්‌ථං විදිත්‌වා තායං වෙලායං ඉමං උදානං උදානෙසි –
Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi –
‘‘අත්‌ථි, භික්‌ඛවෙ, තදායතනං, යත්‌ථ නෙව පථවී, න ආපො, න තෙජො, න වායො, න ආකාසානඤ්‌චායතනං, න විඤ්‌ඤාණඤ්‌චායතනං, න ආකිඤ්‌චඤ්‌ඤායතනං, න නෙවසඤ්‌ඤානාසඤ්‌ඤායතනං, නායං ලොකො, න පරලොකො, න උභො චන්‌දිමසූරියා. තත්‍රාපාහං, භික්‌ඛවෙ, නෙව ආගතිං වදාමි , න ගතිං, න ඨිතිං, න චුතිං, න උපපත්‌තිං; අප්‌පතිට්‌ඨං, අප්‌පවත්‌තං, අනාරම්‌මණමෙවෙතං. එසෙවන්‌තො දුක්‌ඛස්‌සා’’ති. පඨමං.
‘‘Atthi, bhikkhave, tadāyatanaṃ, yattha neva pathavī, na āpo, na tejo, na vāyo, na ākāsānañcāyatanaṃ, na viññāṇañcāyatanaṃ, na ākiñcaññāyatanaṃ, na nevasaññānāsaññāyatanaṃ, nāyaṃ loko, na paraloko, na ubho candimasūriyā. Tatrāpāhaṃ, bhikkhave, neva āgatiṃ vadāmi , na gatiṃ, na ṭhitiṃ, na cutiṃ, na upapattiṃ; appatiṭṭhaṃ, appavattaṃ, anārammaṇamevetaṃ. Esevanto dukkhassā’’ti. Paṭhamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / උදාන-අට්‌ඨකථා • Udāna-aṭṭhakathā / 1. පඨමනිබ්‌බානපටිසංයුත්‌තසුත්‌තවණ්‌ණනා • 1. Paṭhamanibbānapaṭisaṃyuttasuttavaṇṇanā
