| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
9. පඨමනිදානසුත්‌තං
9. Paṭhamanidānasuttaṃ
112. ‘‘තීණිමානි, භික්‌ඛවෙ, නිදානානි කම්‌මානං සමුදයාය. කතමානි තීණි? ලොභො නිදානං කම්‌මානං සමුදයාය, දොසො නිදානං කම්‌මානං සමුදයාය, මොහො නිදානං කම්‌මානං සමුදයාය. යං, භික්‌ඛවෙ, ලොභපකතං කම්‌මං ලොභජං ලොභනිදානං ලොභසමුදයං, තං කම්‌මං අකුසලං තං කම්‌මං සාවජ්‌ජං තං කම්‌මං දුක්‌ඛවිපාකං, තං කම්‌මං කම්‌මසමුදයාය සංවත්‌තති, න තං කම්‌මං කම්‌මනිරොධාය සංවත්‌තති. යං, භික්‌ඛවෙ, දොසපකතං කම්‌මං දොසජං දොසනිදානං දොසසමුදයං, තං කම්‌මං අකුසලං තං කම්‌මං සාවජ්‌ජං තං කම්‌මං දුක්‌ඛවිපාකං, තං කම්‌මං කම්‌මසමුදයාය සංවත්‌තති, න තං කම්‌මං කම්‌මනිරොධාය සංවත්‌තති. යං, භික්‌ඛවෙ, මොහපකතං කම්‌මං මොහජං මොහනිදානං මොහසමුදයං, තං කම්‌මං අකුසලං තං කම්‌මං සාවජ්‌ජං තං කම්‌මං දුක්‌ඛවිපාකං, තං කම්‌මං කම්‌මසමුදයාය සංවත්‌තති, න තං කම්‌මං කම්‌මනිරොධාය සංවත්‌තති. ඉමානි ඛො, භික්‌ඛවෙ, තීණි නිදානානි කම්‌මානං සමුදයාය.
112. ‘‘Tīṇimāni, bhikkhave, nidānāni kammānaṃ samudayāya. Katamāni tīṇi? Lobho nidānaṃ kammānaṃ samudayāya, doso nidānaṃ kammānaṃ samudayāya, moho nidānaṃ kammānaṃ samudayāya. Yaṃ, bhikkhave, lobhapakataṃ kammaṃ lobhajaṃ lobhanidānaṃ lobhasamudayaṃ, taṃ kammaṃ akusalaṃ taṃ kammaṃ sāvajjaṃ taṃ kammaṃ dukkhavipākaṃ, taṃ kammaṃ kammasamudayāya saṃvattati, na taṃ kammaṃ kammanirodhāya saṃvattati. Yaṃ, bhikkhave, dosapakataṃ kammaṃ dosajaṃ dosanidānaṃ dosasamudayaṃ, taṃ kammaṃ akusalaṃ taṃ kammaṃ sāvajjaṃ taṃ kammaṃ dukkhavipākaṃ, taṃ kammaṃ kammasamudayāya saṃvattati, na taṃ kammaṃ kammanirodhāya saṃvattati. Yaṃ, bhikkhave, mohapakataṃ kammaṃ mohajaṃ mohanidānaṃ mohasamudayaṃ, taṃ kammaṃ akusalaṃ taṃ kammaṃ sāvajjaṃ taṃ kammaṃ dukkhavipākaṃ, taṃ kammaṃ kammasamudayāya saṃvattati, na taṃ kammaṃ kammanirodhāya saṃvattati. Imāni kho, bhikkhave, tīṇi nidānāni kammānaṃ samudayāya.
‘‘තීණිමානි, භික්‌ඛවෙ, නිදානානි කම්‌මානං සමුදයාය. කතමානි තීණි? අලොභො නිදානං කම්‌මානං සමුදයාය, අදොසො නිදානං කම්‌මානං සමුදයාය, අමොහො නිදානං කම්‌මානං සමුදයාය. යං, භික්‌ඛවෙ, අලොභපකතං කම්‌මං අලොභජං අලොභනිදානං අලොභසමුදයං, තං කම්‌මං කුසලං තං කම්‌මං අනවජ්‌ජං තං කම්‌මං සුඛවිපාකං, තං කම්‌මං කම්‌මනිරොධාය සංවත්‌තති, න තං කම්‌මං කම්‌මසමුදයාය සංවත්‌තති. යං, භික්‌ඛවෙ, අදොසපකතං කම්‌මං අදොසජං අදොසනිදානං අදොසසමුදයං, තං කම්‌මං කුසලං තං කම්‌මං අනවජ්‌ජං තං කම්‌මං සුඛවිපාකං, තං කම්‌මං කම්‌මනිරොධාය සංවත්‌තති, න තං කම්‌මං කම්‌මසමුදයාය සංවත්‌තති. යං, භික්‌ඛවෙ, අමොහපකතං කම්‌මං අමොහජං අමොහනිදානං අමොහසමුදයං, තං කම්‌මං කුසලං තං කම්‌මං අනවජ්‌ජං තං කම්‌මං සුඛවිපාකං, තං කම්‌මං කම්‌මනිරොධාය සංවත්‌තති, න තං කම්‌මං කම්‌මසමුදයාය සංවත්‌තති. ඉමානි ඛො, භික්‌ඛවෙ, තීණි නිදානානි කම්‌මානං සමුදයායා’’ති. නවමං.
‘‘Tīṇimāni, bhikkhave, nidānāni kammānaṃ samudayāya. Katamāni tīṇi? Alobho nidānaṃ kammānaṃ samudayāya, adoso nidānaṃ kammānaṃ samudayāya, amoho nidānaṃ kammānaṃ samudayāya. Yaṃ, bhikkhave, alobhapakataṃ kammaṃ alobhajaṃ alobhanidānaṃ alobhasamudayaṃ, taṃ kammaṃ kusalaṃ taṃ kammaṃ anavajjaṃ taṃ kammaṃ sukhavipākaṃ, taṃ kammaṃ kammanirodhāya saṃvattati, na taṃ kammaṃ kammasamudayāya saṃvattati. Yaṃ, bhikkhave, adosapakataṃ kammaṃ adosajaṃ adosanidānaṃ adosasamudayaṃ, taṃ kammaṃ kusalaṃ taṃ kammaṃ anavajjaṃ taṃ kammaṃ sukhavipākaṃ, taṃ kammaṃ kammanirodhāya saṃvattati, na taṃ kammaṃ kammasamudayāya saṃvattati. Yaṃ, bhikkhave, amohapakataṃ kammaṃ amohajaṃ amohanidānaṃ amohasamudayaṃ, taṃ kammaṃ kusalaṃ taṃ kammaṃ anavajjaṃ taṃ kammaṃ sukhavipākaṃ, taṃ kammaṃ kammanirodhāya saṃvattati, na taṃ kammaṃ kammasamudayāya saṃvattati. Imāni kho, bhikkhave, tīṇi nidānāni kammānaṃ samudayāyā’’ti. Navamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 9. පඨමනිදානසුත්‌තවණ්‌ණනා • 9. Paṭhamanidānasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 4-9. සමණබ්‍රාහ්‌මණසුත්‌තාදිවණ්‌ණනා • 4-9. Samaṇabrāhmaṇasuttādivaṇṇanā
