| Library / Tipiṭaka / திபிடக • Tipiṭaka / கங்கா²விதரணீ-புராண-டீகா • Kaṅkhāvitaraṇī-purāṇa-ṭīkā |
அனியதகண்ட³ங்
Aniyatakaṇḍaṃ
1. பட²மானியதஸிக்கா²பத³வண்ணனா
1. Paṭhamāniyatasikkhāpadavaṇṇanā
அனியதே ஆதி³தோவ இத³ங் பகிண்ணகங். ஸெய்யதி²த³ங் – இத³ங் அனியதகண்ட³ங் நிப்பயோஜனங் தத்த² அபுப்³பா³பா⁴வதோதி சே? ந, க³ருகலஹுகபே⁴த³பி⁴ன்னாபத்திரோபனாரோபனக்கமலக்க²ணதீ³பனப்பயோஜனதோ. எத்த² ஹி ‘‘ஸா சே ஏவங் வதெ³ய்ய ‘அய்யோ மயா…பே॰… ஸோ ச தங் படிஜானாதி, ஆபத்தியா காரேதப்³போ³’’’திஆதி³னா (பாரா॰ 446) ஆபத்தியா க³ருகாய, லஹுகாய ச ஆரோபனக்கமலக்க²ணங், ‘‘ந காரேதப்³போ³’’தி இமினா அனாரோபனக்கமலக்க²ணஞ்ச த³ஸ்ஸிதங். லக்க²ணதீ³பனதோ ஆதி³ம்ஹி, அந்தே வா உத்³தி³ஸிதப்³ப³ந்தி சே? ந, அஸம்ப⁴வதோ. கத²ங் ந தாவ ஆதி³ம்ஹி ஸம்ப⁴வதி, யேஸமித³ங் லக்க²ணங், தேஸங் ஸிக்கா²பதா³னங் அத³ஸ்ஸிதத்தா. ந அந்தே க³ருகமிஸ்ஸகத்தா. தஸ்மா க³ருகலஹுகானங் மஜ்ஜே² ஏவ உத்³தி³ஸிதப்³ப³தங் அரஹதி உப⁴யமிஸ்ஸகத்தா. யா தத்த² பாசித்தியஸங்கா²தா லஹுகாபத்தி த³ஸ்ஸிதா, ஸாபி க³ருகாதி கதி²தா. தேனேவாஹ ‘‘மேது²னத⁴ம்மஸன்னிஸ்ஸிதகிலேஸஸங்கா²தேன ரஹஸ்ஸாதே³னா’’திஆதி³. தஸ்மா க³ருகானங் ஏவ அனந்தரங் உத்³தி³ட்ட²ந்திபி ஏகே. ஏவங் ஸதி பட²மானியதமேவாலங் தாவதா லக்க²ணதீ³பனஸித்³தி⁴தோ, கிங் து³தியேனாதி சே? ந, ஓகாஸனியமபச்சயமிச்சா²கா³ஹனிவாரணப்பயோஜனதோ. ‘‘படிச்ச²ன்னே ஆஸனே அலங்கம்மனியே’’தி ஓகாஸனியமதோ ஹி தப்³பி³பரீதே ஓகாஸே இத³ங் லக்க²ணங் ந விகப்பிதந்தி மிச்சா²கா³ஹோ ஹோதி. தங்னிவாரணதோ து³தியானியதம்பி ஸாத்த²கமேவாதி அதி⁴ப்பாயோ. கஸ்மா? ஓகாஸபே⁴த³தோ, ரஹோபே⁴த³தீ³பனதோ, ரஹோனிஸஜ்ஜஸ்ஸாத³பே⁴த³தீ³பனதோ. ஓகாஸனியமபா⁴வே ச ரஹோனிஸஜ்ஜஸ்ஸாத³பே⁴தோ³ ஜாதோ. த்³வின்னங் ரஹோனிஸஜ்ஜஸிக்கா²பதா³னங் நானாத்தஜானநஞ்ச ஸியா ததா² காயஸங்ஸக்³க³பே⁴த³தீ³பனதோ. நாலங் கம்மனியேபி ஹி ஓகாஸே அப்படிச்ச²ன்னே, படிச்ச²ன்னேபி வா நிஸின்னாய வாதபானகவாடச்சி²த்³தா³தீ³ஹி நிக்க²ந்தகேஸாதி³க்³க³ஹணேன காயஸங்ஸக்³கோ³ லப்³ப⁴தீதி ஏவமாத³யோபி நயா வித்தா²ரதோ வேதி³தப்³பா³.
Aniyate āditova idaṃ pakiṇṇakaṃ. Seyyathidaṃ – idaṃ aniyatakaṇḍaṃ nippayojanaṃ tattha apubbābhāvatoti ce? Na, garukalahukabhedabhinnāpattiropanāropanakkamalakkhaṇadīpanappayojanato. Ettha hi ‘‘sā ce evaṃ vadeyya ‘ayyo mayā…pe… so ca taṃ paṭijānāti, āpattiyā kāretabbo’’’tiādinā (pārā. 446) āpattiyā garukāya, lahukāya ca āropanakkamalakkhaṇaṃ, ‘‘na kāretabbo’’ti iminā anāropanakkamalakkhaṇañca dassitaṃ. Lakkhaṇadīpanato ādimhi, ante vā uddisitabbanti ce? Na, asambhavato. Kathaṃ na tāva ādimhi sambhavati, yesamidaṃ lakkhaṇaṃ, tesaṃ sikkhāpadānaṃ adassitattā. Na ante garukamissakattā. Tasmā garukalahukānaṃ majjhe eva uddisitabbataṃ arahati ubhayamissakattā. Yā tattha pācittiyasaṅkhātā lahukāpatti dassitā, sāpi garukāti kathitā. Tenevāha ‘‘methunadhammasannissitakilesasaṅkhātena rahassādenā’’tiādi. Tasmā garukānaṃ eva anantaraṃ uddiṭṭhantipi eke. Evaṃ sati paṭhamāniyatamevālaṃ tāvatā lakkhaṇadīpanasiddhito, kiṃ dutiyenāti ce? Na, okāsaniyamapaccayamicchāgāhanivāraṇappayojanato. ‘‘Paṭicchanne āsane alaṃkammaniye’’ti okāsaniyamato hi tabbiparīte okāse idaṃ lakkhaṇaṃ na vikappitanti micchāgāho hoti. Taṃnivāraṇato dutiyāniyatampi sātthakamevāti adhippāyo. Kasmā? Okāsabhedato, rahobhedadīpanato, rahonisajjassādabhedadīpanato. Okāsaniyamabhāve ca rahonisajjassādabhedo jāto. Dvinnaṃ rahonisajjasikkhāpadānaṃ nānāttajānanañca siyā tathā kāyasaṃsaggabhedadīpanato. Nālaṃ kammaniyepi hi okāse appaṭicchanne, paṭicchannepi vā nisinnāya vātapānakavāṭacchiddādīhi nikkhantakesādiggahaṇena kāyasaṃsaggo labbhatīti evamādayopi nayā vitthārato veditabbā.
தத்ரித³ங் முக²மத்தனித³ஸ்ஸனங் – ஓகாஸபே⁴த³தோதி அலங்கம்மனியனாலங்கம்மனியபே⁴த³தோ. படிச்ச²ன்னம்பி ஹி ஏகச்சங் நாலங்கம்மனியங் வாதபானாதி³னா அந்தரிதத்தா , உப⁴யப்படிச்ச²ன்னம்பி ஏகச்சங் நாலங்கம்மனியங் விஜானதங் அஜ்ஜோ²காஸத்தா. ரஹோபே⁴த³தீ³பனதோதி எத்த² ரஹபா⁴வஸாமஞ்ஞேபி ரஹோ த்³விதா⁴ படிச்ச²ன்னாபடிச்ச²ன்னபே⁴த³தோதி அதி⁴ப்பாயோ. ரஹோனிஸஜ்ஜஸ்ஸாத³பே⁴த³தீ³பனதோதி மேது²னஸ்ஸாத³வஸேன நிஸஜ்ஜா, து³ட்டு²ல்லஸ்ஸாத³வஸேன நிஸஜ்ஜாதி தாதி³ஸஸ்ஸ பே⁴த³ஸ்ஸ தீ³பனதோதி அத்தோ². ‘‘இத⁴ ஆக³தனயத்தா பி⁴க்கு²னிபாதிமொக்கே² இத³ங் கண்ட³ங் பரிஹீனந்தி வேதி³தப்³ப³’’ந்தி வத³ந்தி. ‘‘அட்டு²ப்பத்தியா தத்த² அனுப்பன்னத்தா’’தி ஏகே, தங் அனேகந்தபா⁴வதீ³பனதோ அயுத்தங். ஸப்³ப³பு³த்³த⁴காலே ஹி பி⁴க்கூ²னங் பஞ்ச, பி⁴க்கு²னீனங் சத்தாரோ ச உத்³தே³ஸா ஸந்தி. பாதிமொக்கு²த்³தே³ஸபஞ்ஞத்தியா அஸாதா⁴ரணத்தா தத்த² நித்³தி³ட்ட²ஸங்கா⁴தி³ஸேஸபாசித்தியானந்தி ஏகே. தாஸஞ்ஹி பி⁴க்கு²னீனங் உப்³ப⁴ஜாணுமண்ட³லிக (பாசி॰ 658) -அட்ட²வத்து²க (பாசி॰ 675) -வஸேன காயஸங்ஸக்³க³விஸேஸோ பாராஜிகவத்து², ‘‘ஹத்த²க்³க³ஹணங் வா ஸாதி³யெய்ய, காயங் வா தத³த்தா²ய உபஸங்ஹரெய்யா’’தி (பாசி॰ 675) வசனதோ ஸாதி³யனம்பி, ‘‘ஸந்திட்டெ²ய்ய வா’’தி (பாசி॰ 675) வசனதோ டா²னம்பி, ‘‘ஸங்கேதங் வா க³ச்செ²ய்யா’’தி (பாசி॰ 675) வசனதோ க³மனம்பி, ‘‘ச²ன்னங் வா அனுபவிஸெய்யா’’தி (பாசி॰ 675) வசனதோ படிச்ச²ன்னட்டா²னப்பவேஸோபி ஹோதி, ததா² ‘‘ரத்தந்த⁴காரே அப்பதீ³பே, படிச்ச²ன்னே ஓகாஸே அஜ்ஜோ²காஸே ஏகேனேகா ஸந்திட்டெ²ய்ய வா ஸல்லபெய்ய வா’’தி (பாசி॰ 839) வசனதோ து³ட்டு²ல்லவாசாபி பாசித்தியவத்து²கந்தி கத்வா தாஸங் அஞ்ஞதா² அனியதகண்ட³ஸ்ஸ அவத்தப்³ப³தாபத்திதோ ந வுத்தந்தி தேஸங் அதி⁴ப்பாயோ. பகிண்ணகங்.
Tatridaṃ mukhamattanidassanaṃ – okāsabhedatoti alaṃkammaniyanālaṃkammaniyabhedato. Paṭicchannampi hi ekaccaṃ nālaṃkammaniyaṃ vātapānādinā antaritattā , ubhayappaṭicchannampi ekaccaṃ nālaṃkammaniyaṃ vijānataṃ ajjhokāsattā. Rahobhedadīpanatoti ettha rahabhāvasāmaññepi raho dvidhā paṭicchannāpaṭicchannabhedatoti adhippāyo. Rahonisajjassādabhedadīpanatoti methunassādavasena nisajjā, duṭṭhullassādavasena nisajjāti tādisassa bhedassa dīpanatoti attho. ‘‘Idha āgatanayattā bhikkhunipātimokkhe idaṃ kaṇḍaṃ parihīnanti veditabba’’nti vadanti. ‘‘Aṭṭhuppattiyā tattha anuppannattā’’ti eke, taṃ anekantabhāvadīpanato ayuttaṃ. Sabbabuddhakāle hi bhikkhūnaṃ pañca, bhikkhunīnaṃ cattāro ca uddesā santi. Pātimokkhuddesapaññattiyā asādhāraṇattā tattha niddiṭṭhasaṅghādisesapācittiyānanti eke. Tāsañhi bhikkhunīnaṃ ubbhajāṇumaṇḍalika (pāci. 658) -aṭṭhavatthuka (pāci. 675) -vasena kāyasaṃsaggaviseso pārājikavatthu, ‘‘hatthaggahaṇaṃ vā sādiyeyya, kāyaṃ vā tadatthāya upasaṃhareyyā’’ti (pāci. 675) vacanato sādiyanampi, ‘‘santiṭṭheyya vā’’ti (pāci. 675) vacanato ṭhānampi, ‘‘saṅketaṃ vā gaccheyyā’’ti (pāci. 675) vacanato gamanampi, ‘‘channaṃ vā anupaviseyyā’’ti (pāci. 675) vacanato paṭicchannaṭṭhānappavesopi hoti, tathā ‘‘rattandhakāre appadīpe, paṭicchanne okāse ajjhokāse ekenekā santiṭṭheyya vā sallapeyya vā’’ti (pāci. 839) vacanato duṭṭhullavācāpi pācittiyavatthukanti katvā tāsaṃ aññathā aniyatakaṇḍassa avattabbatāpattito na vuttanti tesaṃ adhippāyo. Pakiṇṇakaṃ.
‘‘தே³ஸனாவுட்டா²னகா³மினீனங் ஆபத்தீனங் வஸேன அலஜ்ஜிஆத³யோ லஜ்ஜீனங் சோதெ³ஸ்ஸந்தீ’’தி ஆக³தத்தா லஜ்ஜிபக்³க³ஹத்தா²ய பதிரூபாயபி உபாஸிகாய வசனேன அகத்வா பி⁴க்கு²ஸ்ஸேவ படிஞ்ஞாய காதப்³ப³ந்தி ஆபத்தியோ பன லக்க²ணத³ஸ்ஸனத்த²ங் பஞ்ஞத்தங் வித்தா²ரனயமேவ க³ஹெத்வா வத்துங் யுத்தங் ‘‘இமே கோ² பனாயஸ்மந்தோ த்³வே அனியதா த⁴ம்மா’’தி (பாரா॰ 443) உத்³தே³ஸத³ஸ்ஸனத்தாதி லிகி²தங். ஸோதஸ்ஸ ரஹோதி எத்த² ரஹோதி வசனஸாமஞ்ஞதோ வுத்தங். து³ட்டு²ல்லஸாமஞ்ஞதோ து³ட்டு²ல்லாரோசனப்படிச்சா²த³னஸிக்கா²பதே³ஸு பாராஜிகவசனங் விய. தஸ்மா ‘‘சக்கு²ஸ்ஸேவ பன ரஹோ ‘ரஹோ’தி இத⁴ அதி⁴ப்பேதோ’’தி வுத்தங். கத²ங் பஞ்ஞாயதீதி சே? ‘‘மாதுகா³மோ நாம…பே॰… அந்தமஸோ தத³ஹுஜாதாபி தா³ரிகா’’தி (பாரா॰ 445) வுத்தத்தா து³ட்டு²ல்லோபா⁴ஸனங் இத⁴ நாதி⁴ப்பேதந்தி தீ³பிதமேவாதி. அந்தொத்³வாத³ஸஹத்தே²பீதி பி-ஸத்³தே³ன அபிஹிதகவாடஸ்ஸ க³ப்³ப⁴ஸ்ஸ த்³வாரே நிஸின்னோபீதி அத்தோ². அசேலகவக்³கே³ ரஹோபடிச்ச²ன்னாஸனஸிக்கா²பதே³ (பாசி॰ 288) ‘‘யோ கோசி விஞ்ஞூ புரிஸோ து³தியோ ஹோதீ’’தி இமஸ்ஸ அனுரூபதோ ‘‘இத்தீ²னங் பன ஸதம்பி அனாபத்திங் ந கரோதியேவா’’தி வுத்தங். ‘‘அலங்கம்மனியேதி ஸக்கா ஹோதி மேது²னங் த⁴ம்மங் படிஸேவிது’’ந்தி (பாரா॰ 445) விப⁴ங்கே³ வசனதோ ரஹோனிஸஜ்ஜஸ்ஸாதோ³ செத்த² மேது²னத⁴ம்மஸன்னிஸ்ஸிதகிலேஸோ, ந து³தியே விய து³ட்டு²ல்லவாசஸ்ஸாத³கிலேஸோ. தஸ்மா ச பஞ்ஞாயதி ஸோதஸ்ஸ ரஹோ நாதி⁴ப்பேதோதி.
‘‘Desanāvuṭṭhānagāminīnaṃ āpattīnaṃ vasena alajjiādayo lajjīnaṃ codessantī’’ti āgatattā lajjipaggahatthāya patirūpāyapi upāsikāya vacanena akatvā bhikkhusseva paṭiññāya kātabbanti āpattiyo pana lakkhaṇadassanatthaṃ paññattaṃ vitthāranayameva gahetvā vattuṃ yuttaṃ ‘‘ime kho panāyasmanto dve aniyatā dhammā’’ti (pārā. 443) uddesadassanattāti likhitaṃ. Sotassa rahoti ettha rahoti vacanasāmaññato vuttaṃ. Duṭṭhullasāmaññato duṭṭhullārocanappaṭicchādanasikkhāpadesu pārājikavacanaṃ viya. Tasmā ‘‘cakkhusseva pana raho ‘raho’ti idha adhippeto’’ti vuttaṃ. Kathaṃ paññāyatīti ce? ‘‘Mātugāmo nāma…pe… antamaso tadahujātāpi dārikā’’ti (pārā. 445) vuttattā duṭṭhullobhāsanaṃ idha nādhippetanti dīpitamevāti. Antodvādasahatthepīti pi-saddena apihitakavāṭassa gabbhassa dvāre nisinnopīti attho. Acelakavagge rahopaṭicchannāsanasikkhāpade (pāci. 288) ‘‘yo koci viññū puriso dutiyo hotī’’ti imassa anurūpato ‘‘itthīnaṃ pana satampi anāpattiṃ na karotiyevā’’ti vuttaṃ. ‘‘Alaṃkammaniyeti sakkā hoti methunaṃ dhammaṃ paṭisevitu’’nti (pārā. 445) vibhaṅge vacanato rahonisajjassādo cettha methunadhammasannissitakileso, na dutiye viya duṭṭhullavācassādakileso. Tasmā ca paññāyati sotassa raho nādhippetoti.
திண்ணங் த⁴ம்மானங் அஞ்ஞதரேன வதெ³ய்யாதி ரஹோனிஸஜ்ஜஸிக்கா²பத³வஸேன நிஸின்னஸ்ஸ தஸ்ஸானுஸாரேன பாசித்தியமேவ அவத்வா பாராஜிகஸங்கா⁴தி³ஸேஸாயபி ஆபத்தியா பே⁴த³த³ஸ்ஸனத்த²ங் வுத்தங். புன ஆபத்திப்படிஜானநங் அவத்வா கஸ்மா ‘‘நிஸஜ்ஜங் பி⁴க்கு² படிஜானமானோ’’தி வத்து²ப்படிஜானநங் வுத்தந்தி? வுச்சதே – ஆபத்தியா சோதி³தே வினயத⁴ரேன ‘‘கிஸ்மிங் வத்து²ஸ்மி’’ந்தி புச்சி²தே சுதி³தகேன ‘‘இமஸ்மிங் வத்து²ஸ்மி’’ந்தி வுத்தே வினயத⁴ரேன ‘‘ஈதி³ஸங் நாம அகாஸீ’’தி புச்சி²தே ஸோ வத்து²ங் படிஜானமானோவ காரேதப்³போ³தி த³ஸ்ஸனத்த²ங் ‘‘நிஸஜ்ஜங் பி⁴க்கு² படிஜானமானோ’’தி வுத்தங். யதி³ ஏவங் நிஸஜ்ஜங் படிஜானமானோபி ஆபத்தியாவ காரேதப்³போ³தி? அனுரூபமேவ. ஏவங் பன க³ஹேதப்³ப³ங் – திண்ணம்பி ஆபத்தீனங் வத்தூ²னி அக்³க³ஹெத்வா இத⁴ ஸிக்கா²பத³வஸேன நிஸஜ்ஜமேவ வுத்தங். தஸ்மிங் க³ஹிதேபி ஹி ஆபத்தி க³ஹிதாவ ஹோதீதி. யேன வா ஸாதி எத்த² வா-ஸத்³தோ³ ‘‘தேன ஸோ பி⁴க்கு² காரேதப்³போ³ வா’’தி யோஜேதப்³போ³. ஸோ ச விகப்பத்தோ². தஸ்மா ‘‘காரேதப்³போ³ வா படிஜானமானோ, ந வா காரேதப்³போ³ அப்படிஜானமானோ’’தி அத்தோ². தேன வுத்தங் ‘‘படிஜானமானோ வா’’திஆதி³. ரஹோனிஸஜ்ஜஸிக்கா²பத³வஸேன நிஸஜ்ஜபச்சயா ஆபத்தியா வுத்தத்தா ஸேஸேஸுபி ஸேஸஸிக்கா²பத³வஸேன ஆபத்தி க³ஹேதப்³பா³. ‘‘ஸமுட்டா²னாதீ³னி பட²மபாராஜிகஸதி³ஸானேவா’’தி வுத்தத்தா இத⁴ து³ட்டு²ல்லோபா⁴ஸனஸ்ஸ அனதி⁴ப்பேதபா⁴வோ வேதி³தப்³போ³.
Tiṇṇaṃ dhammānaṃ aññatarena vadeyyāti rahonisajjasikkhāpadavasena nisinnassa tassānusārena pācittiyameva avatvā pārājikasaṅghādisesāyapi āpattiyā bhedadassanatthaṃ vuttaṃ. Puna āpattippaṭijānanaṃ avatvā kasmā ‘‘nisajjaṃ bhikkhu paṭijānamāno’’ti vatthuppaṭijānanaṃ vuttanti? Vuccate – āpattiyā codite vinayadharena ‘‘kismiṃ vatthusmi’’nti pucchite cuditakena ‘‘imasmiṃ vatthusmi’’nti vutte vinayadharena ‘‘īdisaṃ nāma akāsī’’ti pucchite so vatthuṃ paṭijānamānova kāretabboti dassanatthaṃ ‘‘nisajjaṃ bhikkhu paṭijānamāno’’ti vuttaṃ. Yadi evaṃ nisajjaṃ paṭijānamānopi āpattiyāva kāretabboti? Anurūpameva. Evaṃ pana gahetabbaṃ – tiṇṇampi āpattīnaṃ vatthūni aggahetvā idha sikkhāpadavasena nisajjameva vuttaṃ. Tasmiṃ gahitepi hi āpatti gahitāva hotīti. Yena vā sāti ettha vā-saddo ‘‘tena so bhikkhu kāretabbo vā’’ti yojetabbo. So ca vikappattho. Tasmā ‘‘kāretabbo vā paṭijānamāno, na vā kāretabbo appaṭijānamāno’’ti attho. Tena vuttaṃ ‘‘paṭijānamāno vā’’tiādi. Rahonisajjasikkhāpadavasena nisajjapaccayā āpattiyā vuttattā sesesupi sesasikkhāpadavasena āpatti gahetabbā. ‘‘Samuṭṭhānādīni paṭhamapārājikasadisānevā’’ti vuttattā idha duṭṭhullobhāsanassa anadhippetabhāvo veditabbo.
பட²மானியதஸிக்கா²பத³வண்ணனா நிட்டி²தா.
Paṭhamāniyatasikkhāpadavaṇṇanā niṭṭhitā.
