| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༡. གངྒཱཔེཡྻཱལཝགྒོ
1. Gaṅgāpeyyālavaggo
༡. པཋམཔཱཙཱིནནིནྣསུཏྟཾ
1. Paṭhamapācīnaninnasuttaṃ
༩༡. སཱཝཏྠིནིདཱནཾ ། ‘‘སེཡྻཐཱཔི, བྷིཀྑཝེ, གངྒཱ ནདཱི པཱཙཱིནནིནྣཱ པཱཙཱིནཔོཎཱ པཱཙཱིནཔབྦྷཱརཱ; ཨེཝམེཝ ཁོ, བྷིཀྑཝེ, བྷིཀྑུ ཨརིཡཾ ཨཊྛངྒིཀཾ མགྒཾ བྷཱཝེནྟོ ཨརིཡཾ ཨཊྛངྒིཀཾ མགྒཾ བཧུལཱིཀརོནྟོ ནིབྦཱནནིནྣོ ཧོཏི ནིབྦཱནཔོཎོ ནིབྦཱནཔབྦྷཱརོ། ཀཐཉྩ, བྷིཀྑཝེ , བྷིཀྑུ ཨརིཡཾ ཨཊྛངྒིཀཾ མགྒཾ བྷཱཝེནྟོ ཨརིཡཾ ཨཊྛངྒིཀཾ མགྒཾ བཧུལཱིཀརོནྟོ ནིབྦཱནནིནྣོ ཧོཏི ནིབྦཱནཔོཎོ ནིབྦཱནཔབྦྷཱརོ? ཨིདྷ, བྷིཀྑཝེ, བྷིཀྑུ སམྨཱདིཊྛིཾ བྷཱཝེཏི ཝིཝེཀནིསྶིཏཾ ཝིརཱགནིསྶིཏཾ ནིརོདྷནིསྶིཏཾ ཝོསྶགྒཔརིཎཱམིཾ…པེ॰… སམྨཱསམཱདྷིཾ བྷཱཝེཏི ཝིཝེཀནིསྶིཏཾ ཝིརཱགནིསྶིཏཾ ནིརོདྷནིསྶིཏཾ ཝོསྶགྒཔརིཎཱམིཾ། ཨེཝཾ ཁོ, བྷིཀྑཝེ, བྷིཀྑུ ཨརིཡཾ ཨཊྛངྒིཀཾ མགྒཾ བྷཱཝེནྟོ ཨརིཡཾ ཨཊྛངྒིཀཾ མགྒཾ བཧུལཱིཀརོནྟོ ནིབྦཱནནིནྣོ ཧོཏི ནིབྦཱནཔོཎོ ནིབྦཱནཔབྦྷཱརོ’’ཏི། པཋམཾ།
91. Sāvatthinidānaṃ . ‘‘Seyyathāpi, bhikkhave, gaṅgā nadī pācīnaninnā pācīnapoṇā pācīnapabbhārā; evameva kho, bhikkhave, bhikkhu ariyaṃ aṭṭhaṅgikaṃ maggaṃ bhāvento ariyaṃ aṭṭhaṅgikaṃ maggaṃ bahulīkaronto nibbānaninno hoti nibbānapoṇo nibbānapabbhāro. Kathañca, bhikkhave , bhikkhu ariyaṃ aṭṭhaṅgikaṃ maggaṃ bhāvento ariyaṃ aṭṭhaṅgikaṃ maggaṃ bahulīkaronto nibbānaninno hoti nibbānapoṇo nibbānapabbhāro? Idha, bhikkhave, bhikkhu sammādiṭṭhiṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ…pe… sammāsamādhiṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ. Evaṃ kho, bhikkhave, bhikkhu ariyaṃ aṭṭhaṅgikaṃ maggaṃ bhāvento ariyaṃ aṭṭhaṅgikaṃ maggaṃ bahulīkaronto nibbānaninno hoti nibbānapoṇo nibbānapabbhāro’’ti. Paṭhamaṃ.
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༧. ཨེཀདྷམྨཔེཡྻཱལཝགྒཱདིཝཎྞནཱ • 7. Ekadhammapeyyālavaggādivaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༧. ཨེཀདྷམྨཔེཡྻཱལཝགྒཱདིཝཎྞནཱ • 7. Ekadhammapeyyālavaggādivaṇṇanā
