| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
9. பட²மபஜ்ஜுன்னதீ⁴துஸுத்தவண்ணனா
9. Paṭhamapajjunnadhītusuttavaṇṇanā
39. நவமே பஜ்ஜுன்னஸ்ஸ தீ⁴தாதி பஜ்ஜுன்னஸ்ஸ நாம வஸ்ஸவலாஹகதே³வரஞ்ஞோ சாதுமஹாராஜிகஸ்ஸ தீ⁴தா. அபி⁴வந்தே³தி ப⁴க³வா தும்ஹாகங் பாதே³ வந்தா³மி. சக்கு²மதாதி பஞ்சஹி சக்கூ²ஹி சக்கு²மந்தேன ததா²க³தேன. த⁴ம்மோ அனுபு³த்³தோ⁴தி, ‘‘இத³ங் மயா புப்³பே³ பரேஸங் ஸந்திகே கேவலங் ஸுதங்யேவ ஆஸீ’’தி வத³தி. ஸாஹங் தா³னீதி, ஸா அஹங் இதா³னி. ஸக்கி² ஜானாமீதி, படிவேத⁴வஸேன பச்சக்க²மேவ ஜானாமி. விக³ரஹந்தாதி, ‘‘ஹீனக்க²ரபத³ப்³யஞ்ஜனோ’’தி வா ‘‘அனிய்யானிகோ’’தி வா ஏவங் க³ரஹந்தா. ரோருவந்தி, த்³வே ரோருவா – தூ⁴மரோருவோ ச ஜாலரோருவோ ச. தத்த² தூ⁴மரோருவோ விஸுங் ஹோதி, ஜாலரோருவோதி பன அவீசிமஹானிரயஸ்ஸேவேதங் நாமங். தத்த² ஹி ஸத்தா அக்³கி³ம்ஹி ஜலந்தே ஜலந்தே புனப்புனங் ரவங் ரவந்தி, தஸ்மா ஸோ ‘‘ரோருவோ’’தி வுச்சதி. கோ⁴ரந்தி தா³ருணங். க²ந்தியா உபஸமேன உபேதாதி ருச்சித்வா க²மாபெத்வா க³ஹணக²ந்தியா ச ராகா³தி³உபஸமேன ச உபேதாதி. நவமங்.
39. Navame pajjunnassa dhītāti pajjunnassa nāma vassavalāhakadevarañño cātumahārājikassa dhītā. Abhivandeti bhagavā tumhākaṃ pāde vandāmi. Cakkhumatāti pañcahi cakkhūhi cakkhumantena tathāgatena. Dhammo anubuddhoti, ‘‘idaṃ mayā pubbe paresaṃ santike kevalaṃ sutaṃyeva āsī’’ti vadati. Sāhaṃ dānīti, sā ahaṃ idāni. Sakkhi jānāmīti, paṭivedhavasena paccakkhameva jānāmi. Vigarahantāti, ‘‘hīnakkharapadabyañjano’’ti vā ‘‘aniyyāniko’’ti vā evaṃ garahantā. Roruvanti, dve roruvā – dhūmaroruvo ca jālaroruvo ca. Tattha dhūmaroruvo visuṃ hoti, jālaroruvoti pana avīcimahānirayassevetaṃ nāmaṃ. Tattha hi sattā aggimhi jalante jalante punappunaṃ ravaṃ ravanti, tasmā so ‘‘roruvo’’ti vuccati. Ghoranti dāruṇaṃ. Khantiyā upasamena upetāti ruccitvā khamāpetvā gahaṇakhantiyā ca rāgādiupasamena ca upetāti. Navamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 9. பட²மபஜ்ஜுன்னதீ⁴துஸுத்தங் • 9. Paṭhamapajjunnadhītusuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 9. பட²மபஜ்ஜுன்னதீ⁴துஸுத்தவண்ணனா • 9. Paṭhamapajjunnadhītusuttavaṇṇanā
