| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৭. পঠমপাপধম্মসুত্তং
7. Paṭhamapāpadhammasuttaṃ
২০৭. ‘‘পাপঞ্চ ৰো, ভিক্খৰে, দেসেস্সামি, পাপেন পাপতরঞ্চ; কল্যাণঞ্চ, কল্যাণেন কল্যাণতরঞ্চ। তং সুণাথ…পে॰…।
207. ‘‘Pāpañca vo, bhikkhave, desessāmi, pāpena pāpatarañca; kalyāṇañca, kalyāṇena kalyāṇatarañca. Taṃ suṇātha…pe….
‘‘কতমো চ, ভিক্খৰে, পাপো? ইধ, ভিক্খৰে, একচ্চো পাণাতিপাতী হোতি…পে॰… মিচ্ছাদিট্ঠিকো হোতি। অযং ৰুচ্চতি, ভিক্খৰে, পাপো।
‘‘Katamo ca, bhikkhave, pāpo? Idha, bhikkhave, ekacco pāṇātipātī hoti…pe… micchādiṭṭhiko hoti. Ayaṃ vuccati, bhikkhave, pāpo.
‘‘কতমো চ, ভিক্খৰে, পাপেন পাপতরো? ইধ, ভিক্খৰে, একচ্চো অত্তনা চ পাণাতিপাতী হোতি, পরঞ্চ পাণাতিপাতে সমাদপেতি…পে॰… অত্তনা চ মিচ্ছাদিট্ঠিকো হোতি, পরঞ্চ মিচ্ছাদিট্ঠিযা সমাদপেতি। অযং ৰুচ্চতি, ভিক্খৰে, পাপেন পাপতরো।
‘‘Katamo ca, bhikkhave, pāpena pāpataro? Idha, bhikkhave, ekacco attanā ca pāṇātipātī hoti, parañca pāṇātipāte samādapeti…pe… attanā ca micchādiṭṭhiko hoti, parañca micchādiṭṭhiyā samādapeti. Ayaṃ vuccati, bhikkhave, pāpena pāpataro.
‘‘কতমো চ, ভিক্খৰে, কল্যাণো? ইধ, ভিক্খৰে, একচ্চো পাণাতিপাতা পটিৰিরতো হোতি…পে॰… সম্মাদিট্ঠিকো হোতি। অযং ৰুচ্চতি, ভিক্খৰে, কল্যাণো।
‘‘Katamo ca, bhikkhave, kalyāṇo? Idha, bhikkhave, ekacco pāṇātipātā paṭivirato hoti…pe… sammādiṭṭhiko hoti. Ayaṃ vuccati, bhikkhave, kalyāṇo.
‘‘কতমো চ, ভিক্খৰে, কল্যাণেন কল্যাণতরো? ইধ, ভিক্খৰে, একচ্চো অত্তনা চ পাণাতিপাতা পটিৰিরতো হোতি, পরঞ্চ পাণাতিপাতা ৰেরমণিযা সমাদপেতি…পে॰… অত্তনা চ সম্মাদিট্ঠিকো হোতি, পরঞ্চ সম্মাদিট্ঠিযা সমাদপেতি। অযং ৰুচ্চতি, ভিক্খৰে, কল্যাণেন কল্যাণতরো’’তি। সত্তমং।
‘‘Katamo ca, bhikkhave, kalyāṇena kalyāṇataro? Idha, bhikkhave, ekacco attanā ca pāṇātipātā paṭivirato hoti, parañca pāṇātipātā veramaṇiyā samādapeti…pe… attanā ca sammādiṭṭhiko hoti, parañca sammādiṭṭhiyā samādapeti. Ayaṃ vuccati, bhikkhave, kalyāṇena kalyāṇataro’’ti. Sattamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৭-১০. পাপধম্মসুত্তচতুক্কৰণ্ণনা • 7-10. Pāpadhammasuttacatukkavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১-১০. সিক্খাপদসুত্তাদিৰণ্ণনা • 1-10. Sikkhāpadasuttādivaṇṇanā
