| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
9. பட²மபாபணிகஸுத்தவண்ணனா
9. Paṭhamapāpaṇikasuttavaṇṇanā
19. நவமே பாபணிகோதி ஆபணிகோ, ஆபணங் உக்³கா⁴டெத்வா ப⁴ண்ட³விக்காயகஸ்ஸ வாணிஜஸ்ஸேதங் அதி⁴வசனங். அப⁴ப்³போ³தி அபா⁴ஜனபூ⁴தோ. ந ஸக்கச்சங் கம்மந்தங் அதி⁴ட்டா²தீதி யதா² அதி⁴ட்டி²தங் ஸுஅதி⁴ட்டி²தங் ஹோதி, ஏவங் ஸயங் அத்தபச்சக்க²ங் கரொந்தோ நாதி⁴ட்டா²தி. தத்த² பச்சூஸகாலே பத³ஸத்³தே³ன உட்டா²ய தீ³பங் ஜாலெத்வா ப⁴ண்ட³ங் பஸாரெத்வா அனிஸீத³ந்தோ புப்³ப³ண்ஹஸமயங் ந ஸக்கச்சங் கம்மந்தங் அதி⁴ட்டா²தி நாம. அயங் ஹி யங் சோரா ரத்திங் ப⁴ண்ட³ங் ஹரித்வா ‘‘இத³ங் அம்ஹாகங் ஹத்த²தோ விஸ்ஸஜ்ஜெஸ்ஸாமா’’தி ஆபணங் க³ந்த்வா அப்பேன அக்³கே⁴ன தெ³ந்தி, யம்பி ப³ஹுவேரினோ மனுஸ்ஸா ரத்திங் நக³ரே வஸித்வா பாதோவ ஆபணங் க³ந்த்வா ப⁴ண்ட³ங் க³ண்ஹந்தி, யங் வா பன ஜனபத³ங் க³ந்துகாமா மனுஸ்ஸா பாதோவ ஆபணங் க³ந்த்வா ப⁴ண்ட³ங் கிணந்தி, தப்பச்சயஸ்ஸ லாப⁴ஸ்ஸ அஸ்ஸாமிகோ ஹோதி.
19. Navame pāpaṇikoti āpaṇiko, āpaṇaṃ ugghāṭetvā bhaṇḍavikkāyakassa vāṇijassetaṃ adhivacanaṃ. Abhabboti abhājanabhūto. Nasakkaccaṃ kammantaṃ adhiṭṭhātīti yathā adhiṭṭhitaṃ suadhiṭṭhitaṃ hoti, evaṃ sayaṃ attapaccakkhaṃ karonto nādhiṭṭhāti. Tattha paccūsakāle padasaddena uṭṭhāya dīpaṃ jāletvā bhaṇḍaṃ pasāretvā anisīdanto pubbaṇhasamayaṃ na sakkaccaṃ kammantaṃ adhiṭṭhāti nāma. Ayaṃ hi yaṃ corā rattiṃ bhaṇḍaṃ haritvā ‘‘idaṃ amhākaṃ hatthato vissajjessāmā’’ti āpaṇaṃ gantvā appena agghena denti, yampi bahuverino manussā rattiṃ nagare vasitvā pātova āpaṇaṃ gantvā bhaṇḍaṃ gaṇhanti, yaṃ vā pana janapadaṃ gantukāmā manussā pātova āpaṇaṃ gantvā bhaṇḍaṃ kiṇanti, tappaccayassa lābhassa assāmiko hoti.
அஞ்ஞேஸங் போ⁴ஜனவேலாய பன பு⁴ஞ்ஜிதுங் ஆக³ந்த்வா பாதோவ ப⁴ண்ட³ங் படிஸாமெத்வா க⁴ரங் க³ந்த்வா பு⁴ஞ்ஜித்வா நித்³தா³யித்வா ஸாயங் புன ஆபணங் ஆக³ச்ச²ந்தோ மஜ்ஜ²ன்ஹிகஸமயங் ந ஸக்கச்சங் கம்மந்தங் அதி⁴ட்டா²தி நாம. ஸோ ஹி யங் சோரா பாதோவ விஸ்ஸஜ்ஜேதுங் ந ஸம்பாபுணிங்ஸு, தி³வாகாலே பன பரேஸங் அஸஞ்சாரக்க²ணே ஆபணங் க³ந்த்வா அப்பக்³கே⁴ன தெ³ந்தி, யஞ்ச போ⁴ஜனவேலாய புஞ்ஞவந்தோ இஸ்ஸரா ‘‘ஆபணதோ இத³ஞ்சித³ஞ்ச லத்³து⁴ங் வட்டதீ’’தி பஹிணித்வா ஆஹராபெந்தி, தப்பச்சயஸ்ஸ லாப⁴ஸ்ஸ அஸ்ஸாமிகோ ஹோதி.
Aññesaṃ bhojanavelāya pana bhuñjituṃ āgantvā pātova bhaṇḍaṃ paṭisāmetvā gharaṃ gantvā bhuñjitvā niddāyitvā sāyaṃ puna āpaṇaṃ āgacchanto majjhanhikasamayaṃ na sakkaccaṃ kammantaṃ adhiṭṭhāti nāma. So hi yaṃ corā pātova vissajjetuṃ na sampāpuṇiṃsu, divākāle pana paresaṃ asañcārakkhaṇe āpaṇaṃ gantvā appagghena denti, yañca bhojanavelāya puññavanto issarā ‘‘āpaṇato idañcidañca laddhuṃ vaṭṭatī’’ti pahiṇitvā āharāpenti, tappaccayassa lābhassa assāmiko hoti.
யாவ யாமபே⁴ரினிக்க²மனா பன அந்தோஆபணே தீ³பங் ஜாலாபெத்வா அனிஸீத³ந்தோ ஸாயன்ஹஸமயங் ந ஸக்கச்சங் கம்மந்தங் அதி⁴ட்டா²தி நாம. ஸோ ஹி யங் சோரா பாதோபி தி³வாபி விஸ்ஸஜ்ஜேதுங் ந ஸம்பாபுணிங்ஸு , ஸாயங் பன ஆபணங் க³ந்த்வா அப்பக்³கே⁴ன தெ³ந்தி, தப்பச்சயஸ்ஸ லாப⁴ஸ்ஸ அஸ்ஸாமிகோ ஹோதி.
Yāva yāmabherinikkhamanā pana antoāpaṇe dīpaṃ jālāpetvā anisīdanto sāyanhasamayaṃ na sakkaccaṃ kammantaṃ adhiṭṭhāti nāma. So hi yaṃ corā pātopi divāpi vissajjetuṃ na sampāpuṇiṃsu , sāyaṃ pana āpaṇaṃ gantvā appagghena denti, tappaccayassa lābhassa assāmiko hoti.
ந ஸக்கச்சங் ஸமாதி⁴னிமித்தங் அதி⁴ட்டா²தீதி ஸக்கச்சகிரியாய ஸமாதி⁴ங் ந ஸமாபஜ்ஜதி. எத்த² ச பாதோவ சேதியங்க³ணபோ³தி⁴யங்க³ணேஸு வத்தங் கத்வா ஸேனாஸனங் பவிஸித்வா யாவ பி⁴க்கா²சாரவேலா, தாவ ஸமாபத்திங் அப்பெத்வா அனிஸீத³ந்தோ புப்³ப³ண்ஹஸமயங் ந ஸக்கச்சங் ஸமாதி⁴னிமித்தங் அதி⁴ட்டா²தி நாம. பச்சா²ப⁴த்தங் பன பிண்ட³பாதபடிக்கந்தோ ரத்திட்டா²னதி³வாட்டா²னங் பவிஸித்வா யாவ ஸாயன்ஹஸமயா ஸமாபத்திங் அப்பெத்வா அனிஸீத³ந்தோ மஜ்ஜ²ன்ஹிகஸமயங் ந ஸக்கச்சங் ஸமாதி⁴னிமித்தங் அதி⁴ட்டா²தி நாம. ஸாயங் பன சேதியங் வந்தி³த்வா தே²ரூபட்டா²னங் கத்வா ஸேனாஸனங் பவிஸித்வா பட²மயாமங் ஸமாபத்திங் ஸமாபஜ்ஜித்வா அனிஸீத³ந்தோ ஸாயன்ஹஸமயங் ந ஸக்கச்சங் ஸமாதி⁴னிமித்தங் அதி⁴ட்டா²தி நாம. ஸுக்கபக்கோ² வுத்தபடிபக்க²னயேனேவ வேதி³தப்³போ³. அபிசெத்த² ‘‘ஸமாபத்திங் அப்பெத்வா’’தி வுத்தட்டா²னே ஸமாபத்தியா அஸதி விபஸ்ஸனாபி வட்டதி, ஸமாதி⁴னிமித்தந்தி ச ஸமாதி⁴ஆரம்மணம்பி வட்டதியேவ. வுத்தம்பி சேதங் – ‘‘ஸமாதி⁴பி ஸமாதி⁴னிமித்தங், ஸமாதா⁴ரம்மணம்பி ஸமாதி⁴னிமித்த’’ந்தி.
Na sakkaccaṃ samādhinimittaṃ adhiṭṭhātīti sakkaccakiriyāya samādhiṃ na samāpajjati. Ettha ca pātova cetiyaṅgaṇabodhiyaṅgaṇesu vattaṃ katvā senāsanaṃ pavisitvā yāva bhikkhācāravelā, tāva samāpattiṃ appetvā anisīdanto pubbaṇhasamayaṃ na sakkaccaṃ samādhinimittaṃ adhiṭṭhāti nāma. Pacchābhattaṃ pana piṇḍapātapaṭikkanto rattiṭṭhānadivāṭṭhānaṃ pavisitvā yāva sāyanhasamayā samāpattiṃ appetvā anisīdanto majjhanhikasamayaṃ na sakkaccaṃ samādhinimittaṃ adhiṭṭhāti nāma. Sāyaṃ pana cetiyaṃ vanditvā therūpaṭṭhānaṃ katvā senāsanaṃ pavisitvā paṭhamayāmaṃ samāpattiṃ samāpajjitvā anisīdanto sāyanhasamayaṃ na sakkaccaṃ samādhinimittaṃ adhiṭṭhāti nāma. Sukkapakkho vuttapaṭipakkhanayeneva veditabbo. Apicettha ‘‘samāpattiṃ appetvā’’ti vuttaṭṭhāne samāpattiyā asati vipassanāpi vaṭṭati, samādhinimittanti ca samādhiārammaṇampi vaṭṭatiyeva. Vuttampi cetaṃ – ‘‘samādhipi samādhinimittaṃ, samādhārammaṇampi samādhinimitta’’nti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 9. பட²மபாபணிகஸுத்தங் • 9. Paṭhamapāpaṇikasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 9. பட²மபாபணிகஸுத்தவண்ணனா • 9. Paṭhamapāpaṇikasuttavaṇṇanā
