| Library / Tipiṭaka / д̇ибидага • Tipiṭaka / ан̇г̇уд̇д̇аранигааяа (адтагат̇аа) • Aṅguttaranikāya (aṭṭhakathā) |
9. батамабаабан̣игасуд̇д̇аван̣н̣анаа
9. Paṭhamapāpaṇikasuttavaṇṇanā
19. навамз баабан̣игод̇и аабан̣иго, аабан̣ам̣ уг̇гхаадзд̇ваа бхан̣д̣авиггааяагасса ваан̣иж̇ассзд̇ам̣ ад̇хиважанам̣. абхаб̣б̣од̇и абхааж̇анабхууд̇о. на саггажжам̣ гамманд̇ам̣ ад̇хидтаад̇ийд̇и яат̇аа ад̇хидтид̇ам̣ суад̇хидтид̇ам̣ ход̇и, звам̣ саяам̣ ад̇д̇абажжагкам̣ гаронд̇о наад̇хидтаад̇и. д̇ад̇т̇а бажжуусагаалз бад̣̇асад̣̇д̣̇зна удтааяа д̣̇ийбам̣ ж̇аалзд̇ваа бхан̣д̣ам̣ басаарзд̇ваа анисийд̣̇анд̇о буб̣б̣ан̣хасамаяам̣ на саггажжам̣ гамманд̇ам̣ ад̇хидтаад̇и наама. аяам̣ хи яам̣ жораа рад̇д̇им̣ бхан̣д̣ам̣ харид̇ваа ‘‘ид̣̇ам̣ амхаагам̣ хад̇т̇ад̇о виссаж̇ж̇зссаамаа’’д̇и аабан̣ам̣ г̇анд̇ваа аббзна аг̇гхзна д̣̇знд̇и, яамби б̣ахувзрино мануссаа рад̇д̇им̣ наг̇арз васид̇ваа баад̇ова аабан̣ам̣ г̇анд̇ваа бхан̣д̣ам̣ г̇ан̣ханд̇и, яам̣ ваа бана ж̇анабад̣̇ам̣ г̇анд̇угаамаа мануссаа баад̇ова аабан̣ам̣ г̇анд̇ваа бхан̣д̣ам̣ гин̣анд̇и, д̇аббажжаяасса лаабхасса ассаамиго ход̇и.
19. Navame pāpaṇikoti āpaṇiko, āpaṇaṃ ugghāṭetvā bhaṇḍavikkāyakassa vāṇijassetaṃ adhivacanaṃ. Abhabboti abhājanabhūto. Nasakkaccaṃ kammantaṃ adhiṭṭhātīti yathā adhiṭṭhitaṃ suadhiṭṭhitaṃ hoti, evaṃ sayaṃ attapaccakkhaṃ karonto nādhiṭṭhāti. Tattha paccūsakāle padasaddena uṭṭhāya dīpaṃ jāletvā bhaṇḍaṃ pasāretvā anisīdanto pubbaṇhasamayaṃ na sakkaccaṃ kammantaṃ adhiṭṭhāti nāma. Ayaṃ hi yaṃ corā rattiṃ bhaṇḍaṃ haritvā ‘‘idaṃ amhākaṃ hatthato vissajjessāmā’’ti āpaṇaṃ gantvā appena agghena denti, yampi bahuverino manussā rattiṃ nagare vasitvā pātova āpaṇaṃ gantvā bhaṇḍaṃ gaṇhanti, yaṃ vā pana janapadaṃ gantukāmā manussā pātova āpaṇaṃ gantvā bhaṇḍaṃ kiṇanti, tappaccayassa lābhassa assāmiko hoti.
ан̃н̃зсам̣ бхож̇анавзлааяа бана бхун̃ж̇ид̇ум̣ ааг̇анд̇ваа баад̇ова бхан̣д̣ам̣ бадисаамзд̇ваа гхарам̣ г̇анд̇ваа бхун̃ж̇ид̇ваа нид̣̇д̣̇ааяид̇ваа сааяам̣ буна аабан̣ам̣ ааг̇ажчанд̇о маж̇жханхигасамаяам̣ на саггажжам̣ гамманд̇ам̣ ад̇хидтаад̇и наама. со хи яам̣ жораа баад̇ова виссаж̇ж̇зд̇ум̣ на самбаабун̣им̣су, д̣̇иваагаалз бана барзсам̣ асан̃жаарагкан̣з аабан̣ам̣ г̇анд̇ваа аббаг̇гхзна д̣̇знд̇и, яан̃жа бхож̇анавзлааяа бун̃н̃аванд̇о иссараа ‘‘аабан̣ад̇о ид̣̇ан̃жид̣̇ан̃жа лад̣̇д̇хум̣ ваддад̇ий’’д̇и бахин̣ид̇ваа аахараабзнд̇и, д̇аббажжаяасса лаабхасса ассаамиго ход̇и.
Aññesaṃ bhojanavelāya pana bhuñjituṃ āgantvā pātova bhaṇḍaṃ paṭisāmetvā gharaṃ gantvā bhuñjitvā niddāyitvā sāyaṃ puna āpaṇaṃ āgacchanto majjhanhikasamayaṃ na sakkaccaṃ kammantaṃ adhiṭṭhāti nāma. So hi yaṃ corā pātova vissajjetuṃ na sampāpuṇiṃsu, divākāle pana paresaṃ asañcārakkhaṇe āpaṇaṃ gantvā appagghena denti, yañca bhojanavelāya puññavanto issarā ‘‘āpaṇato idañcidañca laddhuṃ vaṭṭatī’’ti pahiṇitvā āharāpenti, tappaccayassa lābhassa assāmiko hoti.
яаава яаамабхзринигкаманаа бана анд̇оаабан̣з д̣̇ийбам̣ ж̇аалаабзд̇ваа анисийд̣̇анд̇о сааяанхасамаяам̣ на саггажжам̣ гамманд̇ам̣ ад̇хидтаад̇и наама. со хи яам̣ жораа баад̇оби д̣̇ивааби виссаж̇ж̇зд̇ум̣ на самбаабун̣им̣су , сааяам̣ бана аабан̣ам̣ г̇анд̇ваа аббаг̇гхзна д̣̇знд̇и, д̇аббажжаяасса лаабхасса ассаамиго ход̇и.
Yāva yāmabherinikkhamanā pana antoāpaṇe dīpaṃ jālāpetvā anisīdanto sāyanhasamayaṃ na sakkaccaṃ kammantaṃ adhiṭṭhāti nāma. So hi yaṃ corā pātopi divāpi vissajjetuṃ na sampāpuṇiṃsu , sāyaṃ pana āpaṇaṃ gantvā appagghena denti, tappaccayassa lābhassa assāmiko hoti.
на саггажжам̣ самаад̇хинимид̇д̇ам̣ ад̇хидтаад̇ийд̇и саггажжагирияааяа самаад̇хим̣ на самаабаж̇ж̇ад̇и. зд̇т̇а жа баад̇ова жзд̇ияан̇г̇ан̣аб̣од̇хияан̇г̇ан̣зсу вад̇д̇ам̣ гад̇ваа сзнаасанам̣ бависид̇ваа яаава бхигкаажааравзлаа, д̇аава самаабад̇д̇им̣ аббзд̇ваа анисийд̣̇анд̇о буб̣б̣ан̣хасамаяам̣ на саггажжам̣ самаад̇хинимид̇д̇ам̣ ад̇хидтаад̇и наама. бажчаабхад̇д̇ам̣ бана бин̣д̣абаад̇абадигганд̇о рад̇д̇идтаанад̣̇иваадтаанам̣ бависид̇ваа яаава сааяанхасамаяаа самаабад̇д̇им̣ аббзд̇ваа анисийд̣̇анд̇о маж̇жханхигасамаяам̣ на саггажжам̣ самаад̇хинимид̇д̇ам̣ ад̇хидтаад̇и наама. сааяам̣ бана жзд̇ияам̣ ванд̣̇ид̇ваа т̇зруубадтаанам̣ гад̇ваа сзнаасанам̣ бависид̇ваа батамаяаамам̣ самаабад̇д̇им̣ самаабаж̇ж̇ид̇ваа анисийд̣̇анд̇о сааяанхасамаяам̣ на саггажжам̣ самаад̇хинимид̇д̇ам̣ ад̇хидтаад̇и наама. суггабагко вуд̇д̇абадибагканаязнзва взд̣̇ид̇аб̣б̣о. абижзд̇т̇а ‘‘самаабад̇д̇им̣ аббзд̇ваа’’д̇и вуд̇д̇адтаанз самаабад̇д̇ияаа асад̇и вибассанааби ваддад̇и, самаад̇хинимид̇д̇анд̇и жа самаад̇хиаарамман̣амби ваддад̇иязва. вуд̇д̇амби жзд̇ам̣ – ‘‘самаад̇хиби самаад̇хинимид̇д̇ам̣, самаад̇хаарамман̣амби самаад̇хинимид̇д̇а’’нд̇и.
Na sakkaccaṃ samādhinimittaṃ adhiṭṭhātīti sakkaccakiriyāya samādhiṃ na samāpajjati. Ettha ca pātova cetiyaṅgaṇabodhiyaṅgaṇesu vattaṃ katvā senāsanaṃ pavisitvā yāva bhikkhācāravelā, tāva samāpattiṃ appetvā anisīdanto pubbaṇhasamayaṃ na sakkaccaṃ samādhinimittaṃ adhiṭṭhāti nāma. Pacchābhattaṃ pana piṇḍapātapaṭikkanto rattiṭṭhānadivāṭṭhānaṃ pavisitvā yāva sāyanhasamayā samāpattiṃ appetvā anisīdanto majjhanhikasamayaṃ na sakkaccaṃ samādhinimittaṃ adhiṭṭhāti nāma. Sāyaṃ pana cetiyaṃ vanditvā therūpaṭṭhānaṃ katvā senāsanaṃ pavisitvā paṭhamayāmaṃ samāpattiṃ samāpajjitvā anisīdanto sāyanhasamayaṃ na sakkaccaṃ samādhinimittaṃ adhiṭṭhāti nāma. Sukkapakkho vuttapaṭipakkhanayeneva veditabbo. Apicettha ‘‘samāpattiṃ appetvā’’ti vuttaṭṭhāne samāpattiyā asati vipassanāpi vaṭṭati, samādhinimittanti ca samādhiārammaṇampi vaṭṭatiyeva. Vuttampi cetaṃ – ‘‘samādhipi samādhinimittaṃ, samādhārammaṇampi samādhinimitta’’nti.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / ан̇г̇уд̇д̇аранигааяа • Aṅguttaranikāya / 9. батамабаабан̣игасуд̇д̇ам̣ • 9. Paṭhamapāpaṇikasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / ан̇г̇уд̇д̇аранигааяа (дийгаа) • Aṅguttaranikāya (ṭīkā) / 9. батамабаабан̣игасуд̇д̇аван̣н̣анаа • 9. Paṭhamapāpaṇikasuttavaṇṇanā
