| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၉. ပဌမပာပဏိကသုတ္တဝဏ္ဏနာ
9. Paṭhamapāpaṇikasuttavaṇṇanā
၁၉. နဝမေ ပာပဏိကောတိ အာပဏိကော, အာပဏံ ဥဂ္ဃာဋေတ္ဝာ ဘဏ္ဍဝိက္ကာယကသ္သ ဝာဏိဇသ္သေတံ အဓိဝစနံ။ အဘဗ္ဗောတိ အဘာဇနဘူတော။ န သက္ကစ္စံ ကမ္မန္တံ အဓိဋ္ဌာတီတိ ယထာ အဓိဋ္ဌိတံ သုအဓိဋ္ဌိတံ ဟောတိ, ဧဝံ သယံ အတ္တပစ္စက္ခံ ကရောန္တော နာဓိဋ္ဌာတိ။ တတ္ထ ပစ္စူသကာလေ ပဒသဒ္ဒေန ဥဋ္ဌာယ ဒီပံ ဇာလေတ္ဝာ ဘဏ္ဍံ ပသာရေတ္ဝာ အနိသီဒန္တော ပုဗ္ဗဏ္ဟသမယံ န သက္ကစ္စံ ကမ္မန္တံ အဓိဋ္ဌာတိ နာမ။ အယံ ဟိ ယံ စောရာ ရတ္တိံ ဘဏ္ဍံ ဟရိတ္ဝာ ‘‘ဣဒံ အမ္ဟာကံ ဟတ္ထတော ဝိသ္သဇ္ဇေသ္သာမာ’’တိ အာပဏံ ဂန္တ္ဝာ အပ္ပေန အဂ္ဃေန ဒေန္တိ, ယမ္ပိ ဗဟုဝေရိနော မနုသ္သာ ရတ္တိံ နဂရေ ဝသိတ္ဝာ ပာတောဝ အာပဏံ ဂန္တ္ဝာ ဘဏ္ဍံ ဂဏ္ဟန္တိ, ယံ ဝာ ပန ဇနပဒံ ဂန္တုကာမာ မနုသ္သာ ပာတောဝ အာပဏံ ဂန္တ္ဝာ ဘဏ္ဍံ ကိဏန္တိ, တပ္ပစ္စယသ္သ လာဘသ္သ အသ္သာမိကော ဟောတိ။
19. Navame pāpaṇikoti āpaṇiko, āpaṇaṃ ugghāṭetvā bhaṇḍavikkāyakassa vāṇijassetaṃ adhivacanaṃ. Abhabboti abhājanabhūto. Nasakkaccaṃ kammantaṃ adhiṭṭhātīti yathā adhiṭṭhitaṃ suadhiṭṭhitaṃ hoti, evaṃ sayaṃ attapaccakkhaṃ karonto nādhiṭṭhāti. Tattha paccūsakāle padasaddena uṭṭhāya dīpaṃ jāletvā bhaṇḍaṃ pasāretvā anisīdanto pubbaṇhasamayaṃ na sakkaccaṃ kammantaṃ adhiṭṭhāti nāma. Ayaṃ hi yaṃ corā rattiṃ bhaṇḍaṃ haritvā ‘‘idaṃ amhākaṃ hatthato vissajjessāmā’’ti āpaṇaṃ gantvā appena agghena denti, yampi bahuverino manussā rattiṃ nagare vasitvā pātova āpaṇaṃ gantvā bhaṇḍaṃ gaṇhanti, yaṃ vā pana janapadaṃ gantukāmā manussā pātova āpaṇaṃ gantvā bhaṇḍaṃ kiṇanti, tappaccayassa lābhassa assāmiko hoti.
အညေသံ ဘောဇနဝေလာယ ပန ဘုဉ္ဇိတုံ အာဂန္တ္ဝာ ပာတောဝ ဘဏ္ဍံ ပဋိသာမေတ္ဝာ ဃရံ ဂန္တ္ဝာ ဘုဉ္ဇိတ္ဝာ နိဒ္ဒာယိတ္ဝာ သာယံ ပုန အာပဏံ အာဂစ္ဆန္တော မဇ္ဈန္ဟိကသမယံ န သက္ကစ္စံ ကမ္မန္တံ အဓိဋ္ဌာတိ နာမ။ သော ဟိ ယံ စောရာ ပာတောဝ ဝိသ္သဇ္ဇေတုံ န သမ္ပာပုဏိံသု, ဒိဝာကာလေ ပန ပရေသံ အသဉ္စာရက္ခဏေ အာပဏံ ဂန္တ္ဝာ အပ္ပဂ္ဃေန ဒေန္တိ, ယဉ္စ ဘောဇနဝေလာယ ပုညဝန္တော ဣသ္သရာ ‘‘အာပဏတော ဣဒဉ္စိဒဉ္စ လဒ္ဓုံ ဝဋ္ဋတီ’’တိ ပဟိဏိတ္ဝာ အာဟရာပေန္တိ, တပ္ပစ္စယသ္သ လာဘသ္သ အသ္သာမိကော ဟောတိ။
Aññesaṃ bhojanavelāya pana bhuñjituṃ āgantvā pātova bhaṇḍaṃ paṭisāmetvā gharaṃ gantvā bhuñjitvā niddāyitvā sāyaṃ puna āpaṇaṃ āgacchanto majjhanhikasamayaṃ na sakkaccaṃ kammantaṃ adhiṭṭhāti nāma. So hi yaṃ corā pātova vissajjetuṃ na sampāpuṇiṃsu, divākāle pana paresaṃ asañcārakkhaṇe āpaṇaṃ gantvā appagghena denti, yañca bhojanavelāya puññavanto issarā ‘‘āpaṇato idañcidañca laddhuṃ vaṭṭatī’’ti pahiṇitvā āharāpenti, tappaccayassa lābhassa assāmiko hoti.
ယာဝ ယာမဘေရိနိက္ခမနာ ပန အန္တောအာပဏေ ဒီပံ ဇာလာပေတ္ဝာ အနိသီဒန္တော သာယန္ဟသမယံ န သက္ကစ္စံ ကမ္မန္တံ အဓိဋ္ဌာတိ နာမ။ သော ဟိ ယံ စောရာ ပာတောပိ ဒိဝာပိ ဝိသ္သဇ္ဇေတုံ န သမ္ပာပုဏိံသု , သာယံ ပန အာပဏံ ဂန္တ္ဝာ အပ္ပဂ္ဃေန ဒေန္တိ, တပ္ပစ္စယသ္သ လာဘသ္သ အသ္သာမိကော ဟောတိ။
Yāva yāmabherinikkhamanā pana antoāpaṇe dīpaṃ jālāpetvā anisīdanto sāyanhasamayaṃ na sakkaccaṃ kammantaṃ adhiṭṭhāti nāma. So hi yaṃ corā pātopi divāpi vissajjetuṃ na sampāpuṇiṃsu , sāyaṃ pana āpaṇaṃ gantvā appagghena denti, tappaccayassa lābhassa assāmiko hoti.
န သက္ကစ္စံ သမာဓိနိမိတ္တံ အဓိဋ္ဌာတီတိ သက္ကစ္စကိရိယာယ သမာဓိံ န သမာပဇ္ဇတိ။ ဧတ္ထ စ ပာတောဝ စေတိယင္ဂဏဗောဓိယင္ဂဏေသု ဝတ္တံ ကတ္ဝာ သေနာသနံ ပဝိသိတ္ဝာ ယာဝ ဘိက္ခာစာရဝေလာ, တာဝ သမာပတ္တိံ အပ္ပေတ္ဝာ အနိသီဒန္တော ပုဗ္ဗဏ္ဟသမယံ န သက္ကစ္စံ သမာဓိနိမိတ္တံ အဓိဋ္ဌာတိ နာမ။ ပစ္ဆာဘတ္တံ ပန ပိဏ္ဍပာတပဋိက္ကန္တော ရတ္တိဋ္ဌာနဒိဝာဋ္ဌာနံ ပဝိသိတ္ဝာ ယာဝ သာယန္ဟသမယာ သမာပတ္တိံ အပ္ပေတ္ဝာ အနိသီဒန္တော မဇ္ဈန္ဟိကသမယံ န သက္ကစ္စံ သမာဓိနိမိတ္တံ အဓိဋ္ဌာတိ နာမ။ သာယံ ပန စေတိယံ ဝန္ဒိတ္ဝာ ထေရူပဋ္ဌာနံ ကတ္ဝာ သေနာသနံ ပဝိသိတ္ဝာ ပဌမယာမံ သမာပတ္တိံ သမာပဇ္ဇိတ္ဝာ အနိသီဒန္တော သာယန္ဟသမယံ န သက္ကစ္စံ သမာဓိနိမိတ္တံ အဓိဋ္ဌာတိ နာမ။ သုက္ကပက္ခော ဝုတ္တပဋိပက္ခနယေနေဝ ဝေဒိတဗ္ဗော။ အပိစေတ္ထ ‘‘သမာပတ္တိံ အပ္ပေတ္ဝာ’’တိ ဝုတ္တဋ္ဌာနေ သမာပတ္တိယာ အသတိ ဝိပသ္သနာပိ ဝဋ္ဋတိ, သမာဓိနိမိတ္တန္တိ စ သမာဓိအာရမ္မဏမ္ပိ ဝဋ္ဋတိယေဝ။ ဝုတ္တမ္ပိ စေတံ – ‘‘သမာဓိပိ သမာဓိနိမိတ္တံ, သမာဓာရမ္မဏမ္ပိ သမာဓိနိမိတ္တ’’န္တိ။
Na sakkaccaṃ samādhinimittaṃ adhiṭṭhātīti sakkaccakiriyāya samādhiṃ na samāpajjati. Ettha ca pātova cetiyaṅgaṇabodhiyaṅgaṇesu vattaṃ katvā senāsanaṃ pavisitvā yāva bhikkhācāravelā, tāva samāpattiṃ appetvā anisīdanto pubbaṇhasamayaṃ na sakkaccaṃ samādhinimittaṃ adhiṭṭhāti nāma. Pacchābhattaṃ pana piṇḍapātapaṭikkanto rattiṭṭhānadivāṭṭhānaṃ pavisitvā yāva sāyanhasamayā samāpattiṃ appetvā anisīdanto majjhanhikasamayaṃ na sakkaccaṃ samādhinimittaṃ adhiṭṭhāti nāma. Sāyaṃ pana cetiyaṃ vanditvā therūpaṭṭhānaṃ katvā senāsanaṃ pavisitvā paṭhamayāmaṃ samāpattiṃ samāpajjitvā anisīdanto sāyanhasamayaṃ na sakkaccaṃ samādhinimittaṃ adhiṭṭhāti nāma. Sukkapakkho vuttapaṭipakkhanayeneva veditabbo. Apicettha ‘‘samāpattiṃ appetvā’’ti vuttaṭṭhāne samāpattiyā asati vipassanāpi vaṭṭati, samādhinimittanti ca samādhiārammaṇampi vaṭṭatiyeva. Vuttampi cetaṃ – ‘‘samādhipi samādhinimittaṃ, samādhārammaṇampi samādhinimitta’’nti.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၉. ပဌမပာပဏိကသုတ္တံ • 9. Paṭhamapāpaṇikasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၉. ပဌမပာပဏိကသုတ္တဝဏ္ဏနာ • 9. Paṭhamapāpaṇikasuttavaṇṇanā
