| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ (ਅਟ੍ਠਕਥਾ) • Aṅguttaranikāya (aṭṭhakathā) |
੯. ਪਠਮਪਾਪਣਿਕਸੁਤ੍ਤવਣ੍ਣਨਾ
9. Paṭhamapāpaṇikasuttavaṇṇanā
੧੯. ਨવਮੇ ਪਾਪਣਿਕੋਤਿ ਆਪਣਿਕੋ, ਆਪਣਂ ਉਗ੍ਘਾਟੇਤ੍વਾ ਭਣ੍ਡવਿਕ੍ਕਾਯਕਸ੍ਸ વਾਣਿਜਸ੍ਸੇਤਂ ਅਧਿવਚਨਂ। ਅਭਬ੍ਬੋਤਿ ਅਭਾਜਨਭੂਤੋ। ਨ ਸਕ੍ਕਚ੍ਚਂ ਕਮ੍ਮਨ੍ਤਂ ਅਧਿਟ੍ਠਾਤੀਤਿ ਯਥਾ ਅਧਿਟ੍ਠਿਤਂ ਸੁਅਧਿਟ੍ਠਿਤਂ ਹੋਤਿ, ਏવਂ ਸਯਂ ਅਤ੍ਤਪਚ੍ਚਕ੍ਖਂ ਕਰੋਨ੍ਤੋ ਨਾਧਿਟ੍ਠਾਤਿ। ਤਤ੍ਥ ਪਚ੍ਚੂਸਕਾਲੇ ਪਦਸਦ੍ਦੇਨ ਉਟ੍ਠਾਯ ਦੀਪਂ ਜਾਲੇਤ੍વਾ ਭਣ੍ਡਂ ਪਸਾਰੇਤ੍વਾ ਅਨਿਸੀਦਨ੍ਤੋ ਪੁਬ੍ਬਣ੍ਹਸਮਯਂ ਨ ਸਕ੍ਕਚ੍ਚਂ ਕਮ੍ਮਨ੍ਤਂ ਅਧਿਟ੍ਠਾਤਿ ਨਾਮ। ਅਯਂ ਹਿ ਯਂ ਚੋਰਾ ਰਤ੍ਤਿਂ ਭਣ੍ਡਂ ਹਰਿਤ੍વਾ ‘‘ਇਦਂ ਅਮ੍ਹਾਕਂ ਹਤ੍ਥਤੋ વਿਸ੍ਸਜ੍ਜੇਸ੍ਸਾਮਾ’’ਤਿ ਆਪਣਂ ਗਨ੍ਤ੍વਾ ਅਪ੍ਪੇਨ ਅਗ੍ਘੇਨ ਦੇਨ੍ਤਿ, ਯਮ੍ਪਿ ਬਹੁવੇਰਿਨੋ ਮਨੁਸ੍ਸਾ ਰਤ੍ਤਿਂ ਨਗਰੇ વਸਿਤ੍વਾ ਪਾਤੋવ ਆਪਣਂ ਗਨ੍ਤ੍વਾ ਭਣ੍ਡਂ ਗਣ੍ਹਨ੍ਤਿ, ਯਂ વਾ ਪਨ ਜਨਪਦਂ ਗਨ੍ਤੁਕਾਮਾ ਮਨੁਸ੍ਸਾ ਪਾਤੋવ ਆਪਣਂ ਗਨ੍ਤ੍વਾ ਭਣ੍ਡਂ ਕਿਣਨ੍ਤਿ, ਤਪ੍ਪਚ੍ਚਯਸ੍ਸ ਲਾਭਸ੍ਸ ਅਸ੍ਸਾਮਿਕੋ ਹੋਤਿ।
19. Navame pāpaṇikoti āpaṇiko, āpaṇaṃ ugghāṭetvā bhaṇḍavikkāyakassa vāṇijassetaṃ adhivacanaṃ. Abhabboti abhājanabhūto. Nasakkaccaṃ kammantaṃ adhiṭṭhātīti yathā adhiṭṭhitaṃ suadhiṭṭhitaṃ hoti, evaṃ sayaṃ attapaccakkhaṃ karonto nādhiṭṭhāti. Tattha paccūsakāle padasaddena uṭṭhāya dīpaṃ jāletvā bhaṇḍaṃ pasāretvā anisīdanto pubbaṇhasamayaṃ na sakkaccaṃ kammantaṃ adhiṭṭhāti nāma. Ayaṃ hi yaṃ corā rattiṃ bhaṇḍaṃ haritvā ‘‘idaṃ amhākaṃ hatthato vissajjessāmā’’ti āpaṇaṃ gantvā appena agghena denti, yampi bahuverino manussā rattiṃ nagare vasitvā pātova āpaṇaṃ gantvā bhaṇḍaṃ gaṇhanti, yaṃ vā pana janapadaṃ gantukāmā manussā pātova āpaṇaṃ gantvā bhaṇḍaṃ kiṇanti, tappaccayassa lābhassa assāmiko hoti.
ਅਞ੍ਞੇਸਂ ਭੋਜਨવੇਲਾਯ ਪਨ ਭੁਞ੍ਜਿਤੁਂ ਆਗਨ੍ਤ੍વਾ ਪਾਤੋવ ਭਣ੍ਡਂ ਪਟਿਸਾਮੇਤ੍વਾ ਘਰਂ ਗਨ੍ਤ੍વਾ ਭੁਞ੍ਜਿਤ੍વਾ ਨਿਦ੍ਦਾਯਿਤ੍વਾ ਸਾਯਂ ਪੁਨ ਆਪਣਂ ਆਗਚ੍ਛਨ੍ਤੋ ਮਜ੍ਝਨ੍ਹਿਕਸਮਯਂ ਨ ਸਕ੍ਕਚ੍ਚਂ ਕਮ੍ਮਨ੍ਤਂ ਅਧਿਟ੍ਠਾਤਿ ਨਾਮ। ਸੋ ਹਿ ਯਂ ਚੋਰਾ ਪਾਤੋવ વਿਸ੍ਸਜ੍ਜੇਤੁਂ ਨ ਸਮ੍ਪਾਪੁਣਿਂਸੁ, ਦਿવਾਕਾਲੇ ਪਨ ਪਰੇਸਂ ਅਸਞ੍ਚਾਰਕ੍ਖਣੇ ਆਪਣਂ ਗਨ੍ਤ੍વਾ ਅਪ੍ਪਗ੍ਘੇਨ ਦੇਨ੍ਤਿ, ਯਞ੍ਚ ਭੋਜਨવੇਲਾਯ ਪੁਞ੍ਞવਨ੍ਤੋ ਇਸ੍ਸਰਾ ‘‘ਆਪਣਤੋ ਇਦਞ੍ਚਿਦਞ੍ਚ ਲਦ੍ਧੁਂ વਟ੍ਟਤੀ’’ਤਿ ਪਹਿਣਿਤ੍વਾ ਆਹਰਾਪੇਨ੍ਤਿ, ਤਪ੍ਪਚ੍ਚਯਸ੍ਸ ਲਾਭਸ੍ਸ ਅਸ੍ਸਾਮਿਕੋ ਹੋਤਿ।
Aññesaṃ bhojanavelāya pana bhuñjituṃ āgantvā pātova bhaṇḍaṃ paṭisāmetvā gharaṃ gantvā bhuñjitvā niddāyitvā sāyaṃ puna āpaṇaṃ āgacchanto majjhanhikasamayaṃ na sakkaccaṃ kammantaṃ adhiṭṭhāti nāma. So hi yaṃ corā pātova vissajjetuṃ na sampāpuṇiṃsu, divākāle pana paresaṃ asañcārakkhaṇe āpaṇaṃ gantvā appagghena denti, yañca bhojanavelāya puññavanto issarā ‘‘āpaṇato idañcidañca laddhuṃ vaṭṭatī’’ti pahiṇitvā āharāpenti, tappaccayassa lābhassa assāmiko hoti.
ਯਾવ ਯਾਮਭੇਰਿਨਿਕ੍ਖਮਨਾ ਪਨ ਅਨ੍ਤੋਆਪਣੇ ਦੀਪਂ ਜਾਲਾਪੇਤ੍વਾ ਅਨਿਸੀਦਨ੍ਤੋ ਸਾਯਨ੍ਹਸਮਯਂ ਨ ਸਕ੍ਕਚ੍ਚਂ ਕਮ੍ਮਨ੍ਤਂ ਅਧਿਟ੍ਠਾਤਿ ਨਾਮ। ਸੋ ਹਿ ਯਂ ਚੋਰਾ ਪਾਤੋਪਿ ਦਿવਾਪਿ વਿਸ੍ਸਜ੍ਜੇਤੁਂ ਨ ਸਮ੍ਪਾਪੁਣਿਂਸੁ , ਸਾਯਂ ਪਨ ਆਪਣਂ ਗਨ੍ਤ੍વਾ ਅਪ੍ਪਗ੍ਘੇਨ ਦੇਨ੍ਤਿ, ਤਪ੍ਪਚ੍ਚਯਸ੍ਸ ਲਾਭਸ੍ਸ ਅਸ੍ਸਾਮਿਕੋ ਹੋਤਿ।
Yāva yāmabherinikkhamanā pana antoāpaṇe dīpaṃ jālāpetvā anisīdanto sāyanhasamayaṃ na sakkaccaṃ kammantaṃ adhiṭṭhāti nāma. So hi yaṃ corā pātopi divāpi vissajjetuṃ na sampāpuṇiṃsu , sāyaṃ pana āpaṇaṃ gantvā appagghena denti, tappaccayassa lābhassa assāmiko hoti.
ਨ ਸਕ੍ਕਚ੍ਚਂ ਸਮਾਧਿਨਿਮਿਤ੍ਤਂ ਅਧਿਟ੍ਠਾਤੀਤਿ ਸਕ੍ਕਚ੍ਚਕਿਰਿਯਾਯ ਸਮਾਧਿਂ ਨ ਸਮਾਪਜ੍ਜਤਿ। ਏਤ੍ਥ ਚ ਪਾਤੋવ ਚੇਤਿਯਙ੍ਗਣਬੋਧਿਯਙ੍ਗਣੇਸੁ વਤ੍ਤਂ ਕਤ੍વਾ ਸੇਨਾਸਨਂ ਪવਿਸਿਤ੍વਾ ਯਾવ ਭਿਕ੍ਖਾਚਾਰવੇਲਾ, ਤਾવ ਸਮਾਪਤ੍ਤਿਂ ਅਪ੍ਪੇਤ੍વਾ ਅਨਿਸੀਦਨ੍ਤੋ ਪੁਬ੍ਬਣ੍ਹਸਮਯਂ ਨ ਸਕ੍ਕਚ੍ਚਂ ਸਮਾਧਿਨਿਮਿਤ੍ਤਂ ਅਧਿਟ੍ਠਾਤਿ ਨਾਮ। ਪਚ੍ਛਾਭਤ੍ਤਂ ਪਨ ਪਿਣ੍ਡਪਾਤਪਟਿਕ੍ਕਨ੍ਤੋ ਰਤ੍ਤਿਟ੍ਠਾਨਦਿવਾਟ੍ਠਾਨਂ ਪવਿਸਿਤ੍વਾ ਯਾવ ਸਾਯਨ੍ਹਸਮਯਾ ਸਮਾਪਤ੍ਤਿਂ ਅਪ੍ਪੇਤ੍વਾ ਅਨਿਸੀਦਨ੍ਤੋ ਮਜ੍ਝਨ੍ਹਿਕਸਮਯਂ ਨ ਸਕ੍ਕਚ੍ਚਂ ਸਮਾਧਿਨਿਮਿਤ੍ਤਂ ਅਧਿਟ੍ਠਾਤਿ ਨਾਮ। ਸਾਯਂ ਪਨ ਚੇਤਿਯਂ વਨ੍ਦਿਤ੍વਾ ਥੇਰੂਪਟ੍ਠਾਨਂ ਕਤ੍વਾ ਸੇਨਾਸਨਂ ਪવਿਸਿਤ੍વਾ ਪਠਮਯਾਮਂ ਸਮਾਪਤ੍ਤਿਂ ਸਮਾਪਜ੍ਜਿਤ੍વਾ ਅਨਿਸੀਦਨ੍ਤੋ ਸਾਯਨ੍ਹਸਮਯਂ ਨ ਸਕ੍ਕਚ੍ਚਂ ਸਮਾਧਿਨਿਮਿਤ੍ਤਂ ਅਧਿਟ੍ਠਾਤਿ ਨਾਮ। ਸੁਕ੍ਕਪਕ੍ਖੋ વੁਤ੍ਤਪਟਿਪਕ੍ਖਨਯੇਨੇવ વੇਦਿਤਬ੍ਬੋ। ਅਪਿਚੇਤ੍ਥ ‘‘ਸਮਾਪਤ੍ਤਿਂ ਅਪ੍ਪੇਤ੍વਾ’’ਤਿ વੁਤ੍ਤਟ੍ਠਾਨੇ ਸਮਾਪਤ੍ਤਿਯਾ ਅਸਤਿ વਿਪਸ੍ਸਨਾਪਿ વਟ੍ਟਤਿ, ਸਮਾਧਿਨਿਮਿਤ੍ਤਨ੍ਤਿ ਚ ਸਮਾਧਿਆਰਮ੍ਮਣਮ੍ਪਿ વਟ੍ਟਤਿਯੇવ। વੁਤ੍ਤਮ੍ਪਿ ਚੇਤਂ – ‘‘ਸਮਾਧਿਪਿ ਸਮਾਧਿਨਿਮਿਤ੍ਤਂ, ਸਮਾਧਾਰਮ੍ਮਣਮ੍ਪਿ ਸਮਾਧਿਨਿਮਿਤ੍ਤ’’ਨ੍ਤਿ।
Na sakkaccaṃ samādhinimittaṃ adhiṭṭhātīti sakkaccakiriyāya samādhiṃ na samāpajjati. Ettha ca pātova cetiyaṅgaṇabodhiyaṅgaṇesu vattaṃ katvā senāsanaṃ pavisitvā yāva bhikkhācāravelā, tāva samāpattiṃ appetvā anisīdanto pubbaṇhasamayaṃ na sakkaccaṃ samādhinimittaṃ adhiṭṭhāti nāma. Pacchābhattaṃ pana piṇḍapātapaṭikkanto rattiṭṭhānadivāṭṭhānaṃ pavisitvā yāva sāyanhasamayā samāpattiṃ appetvā anisīdanto majjhanhikasamayaṃ na sakkaccaṃ samādhinimittaṃ adhiṭṭhāti nāma. Sāyaṃ pana cetiyaṃ vanditvā therūpaṭṭhānaṃ katvā senāsanaṃ pavisitvā paṭhamayāmaṃ samāpattiṃ samāpajjitvā anisīdanto sāyanhasamayaṃ na sakkaccaṃ samādhinimittaṃ adhiṭṭhāti nāma. Sukkapakkho vuttapaṭipakkhanayeneva veditabbo. Apicettha ‘‘samāpattiṃ appetvā’’ti vuttaṭṭhāne samāpattiyā asati vipassanāpi vaṭṭati, samādhinimittanti ca samādhiārammaṇampi vaṭṭatiyeva. Vuttampi cetaṃ – ‘‘samādhipi samādhinimittaṃ, samādhārammaṇampi samādhinimitta’’nti.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਅਙ੍ਗੁਤ੍ਤਰਨਿਕਾਯ • Aṅguttaranikāya / ੯. ਪਠਮਪਾਪਣਿਕਸੁਤ੍ਤਂ • 9. Paṭhamapāpaṇikasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā) / ੯. ਪਠਮਪਾਪਣਿਕਸੁਤ੍ਤવਣ੍ਣਨਾ • 9. Paṭhamapāpaṇikasuttavaṇṇanā
