Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³ • Bhikkhunīvibhaṅga

நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ

Namo tassa bhagavato arahato sammāsambuddhassa

பி⁴க்கு²னீவிப⁴ங்கோ³

Bhikkhunīvibhaṅgo

1. பாராஜிககண்ட³ங் (பி⁴க்கு²னீவிப⁴ங்கோ³)

1. Pārājikakaṇḍaṃ (bhikkhunīvibhaṅgo)

1. பட²மபாராஜிகங்

1. Paṭhamapārājikaṃ

656. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஸாள்ஹோ மிகா³ரனத்தா பி⁴க்கு²னிஸங்க⁴ஸ்ஸ விஹாரங் கத்துகாமோ ஹோதி. அத² கோ² ஸாள்ஹோ மிகா³ரனத்தா பி⁴க்கு²னியோ உபஸங்கமித்வா ஏதத³வோச – ‘‘இச்சா²மஹங், அய்யே, பி⁴க்கு²னிஸங்க⁴ஸ்ஸ விஹாரங் காதுங். தே³த² மே நவகம்மிகங் பி⁴க்கு²னி’’ந்தி. தேன கோ² பன ஸமயேன சதஸ்ஸோ ப⁴கி³னியோ பி⁴க்கு²னீஸு பப்³ப³ஜிதா ஹொந்தி – நந்தா³, நந்த³வதீ, ஸுந்த³ரீனந்தா³, து²ல்லனந்தா³தி. தாஸு ஸுந்த³ரீனந்தா³ பி⁴க்கு²னீ தருணபப்³ப³ஜிதா அபி⁴ரூபா ஹோதி த³ஸ்ஸனீயா பாஸாதி³கா பண்டி³தா ப்³யத்தா மேதா⁴வினீ த³க்கா² அனலஸா, தத்ருபாயாய வீமங்ஸாய ஸமன்னாக³தா, அலங் காதுங் அலங் ஸங்விதா⁴துங். அத² கோ² பி⁴க்கு²னிஸங்கோ⁴ ஸுந்த³ரீனந்த³ங் பி⁴க்கு²னிங் ஸம்மன்னித்வா ஸாள்ஹஸ்ஸ மிகா³ரனத்துனோ நவகம்மிகங் அதா³ஸி. தேன கோ² பன ஸமயேன ஸுந்த³ரீனந்தா³ பி⁴க்கு²னீ ஸாள்ஹஸ்ஸ மிகா³ரனத்துனோ நிவேஸனங் அபி⁴க்க²ணங் க³ச்ச²தி – ‘‘வாஸிங் தே³த², பரஸுங் ¹ தே³த², குடா²ரிங் ² தே³த², குத்³தா³லங் தே³த², நிகா²த³னங் தே³தா²’’தி. ஸாள்ஹோபி மிகா³ரனத்தா பி⁴க்கு²னுபஸ்ஸயங் அபி⁴க்க²ணங் க³ச்ச²தி கதாகதங் ஜானிதுங். தே அபி⁴ண்ஹத³ஸ்ஸனேன படிப³த்³த⁴சித்தா அஹேஸுங்.

656. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena sāḷho migāranattā bhikkhunisaṅghassa vihāraṃ kattukāmo hoti. Atha kho sāḷho migāranattā bhikkhuniyo upasaṅkamitvā etadavoca – ‘‘icchāmahaṃ, ayye, bhikkhunisaṅghassa vihāraṃ kātuṃ. Detha me navakammikaṃ bhikkhuni’’nti. Tena kho pana samayena catasso bhaginiyo bhikkhunīsu pabbajitā honti – nandā, nandavatī, sundarīnandā, thullanandāti. Tāsu sundarīnandā bhikkhunī taruṇapabbajitā abhirūpā hoti dassanīyā pāsādikā paṇḍitā byattā medhāvinī dakkhā analasā, tatrupāyāya vīmaṃsāya samannāgatā, alaṃ kātuṃ alaṃ saṃvidhātuṃ. Atha kho bhikkhunisaṅgho sundarīnandaṃ bhikkhuniṃ sammannitvā sāḷhassa migāranattuno navakammikaṃ adāsi. Tena kho pana samayena sundarīnandā bhikkhunī sāḷhassa migāranattuno nivesanaṃ abhikkhaṇaṃ gacchati – ‘‘vāsiṃ detha, parasuṃ ³ detha, kuṭhāriṃ ⁴ detha, kuddālaṃ detha, nikhādanaṃ dethā’’ti. Sāḷhopi migāranattā bhikkhunupassayaṃ abhikkhaṇaṃ gacchati katākataṃ jānituṃ. Te abhiṇhadassanena paṭibaddhacittā ahesuṃ.

அத² கோ² ஸாள்ஹோ மிகா³ரனத்தா ஸுந்த³ரீனந்த³ங் பி⁴க்கு²னிங் தூ³ஸேதுங் ஓகாஸங் அலப⁴மானோ ஏததே³வத்தா²ய பி⁴க்கு²னிஸங்க⁴ஸ்ஸ ப⁴த்தங் அகாஸி. அத² கோ² ஸாள்ஹோ மிகா³ரனத்தா ப⁴த்தக்³கே³ ஆஸனங் பஞ்ஞபெந்தோ – ‘‘எத்தகா பி⁴க்கு²னியோ அய்யாய ஸுந்த³ரீனந்தா³ய வுட்³ட⁴தரா’’தி ஏகமந்தங் ஆஸனங் பஞ்ஞபேஸி ‘‘எத்தகா நவகதரா’’தி – ஏகமந்தங் ஆஸனங் பஞ்ஞபேஸி. படிச்ச²ன்னே ஓகாஸே நிகூடே ஸுந்த³ரீனந்தா³ய பி⁴க்கு²னியா ஆஸனங் பஞ்ஞபேஸி, யதா² தே²ரா பி⁴க்கு²னியோ ஜானெய்யுங் – ‘‘நவகானங் பி⁴க்கு²னீனங் ஸந்திகே நிஸின்னா’’தி; நவகாபி பி⁴க்கு²னியோ ஜானெய்யுங் – ‘‘தே²ரானங் பி⁴க்கு²னீனங் ஸந்திகே நிஸின்னா’’தி. அத² கோ² ஸாள்ஹோ மிகா³ரனத்தா பி⁴க்கு²னிஸங்க⁴ஸ்ஸ காலங் ஆரோசாபேஸி – ‘‘காலோ, அய்யே, நிட்டி²தங் ப⁴த்த’’ந்தி. ஸுந்த³ரீனந்தா³ பி⁴க்கு²னீ ஸல்லக்கெ²த்வா – ‘‘ந ப³ஹுகதோ ஸாள்ஹோ மிகா³ரனத்தா பி⁴க்கு²னிஸங்க⁴ஸ்ஸ ப⁴த்தங் அகாஸி; மங் ஸோ தூ³ஸேதுகாமோ. ஸசாஹங் க³மிஸ்ஸாமி விஸ்ஸரோ மே ப⁴விஸ்ஸதீ’’தி, அந்தேவாஸினிங் பி⁴க்கு²னிங் ஆணாபேஸி – ‘‘க³ச்ச² மே பிண்ட³பாதங் நீஹர. யோ சே மங் புச்ச²தி, ‘கி³லானா’தி படிவேதே³ஹீ’’தி. ‘‘ஏவங், அய்யே’’தி கோ² ஸா பி⁴க்கு²னீ ஸுந்த³ரீனந்தா³ய பி⁴க்கு²னியா பச்சஸ்ஸோஸி.

Atha kho sāḷho migāranattā sundarīnandaṃ bhikkhuniṃ dūsetuṃ okāsaṃ alabhamāno etadevatthāya bhikkhunisaṅghassa bhattaṃ akāsi. Atha kho sāḷho migāranattā bhattagge āsanaṃ paññapento – ‘‘ettakā bhikkhuniyo ayyāya sundarīnandāya vuḍḍhatarā’’ti ekamantaṃ āsanaṃ paññapesi ‘‘ettakā navakatarā’’ti – ekamantaṃ āsanaṃ paññapesi. Paṭicchanne okāse nikūṭe sundarīnandāya bhikkhuniyā āsanaṃ paññapesi, yathā therā bhikkhuniyo jāneyyuṃ – ‘‘navakānaṃ bhikkhunīnaṃ santike nisinnā’’ti; navakāpi bhikkhuniyo jāneyyuṃ – ‘‘therānaṃ bhikkhunīnaṃ santike nisinnā’’ti. Atha kho sāḷho migāranattā bhikkhunisaṅghassa kālaṃ ārocāpesi – ‘‘kālo, ayye, niṭṭhitaṃ bhatta’’nti. Sundarīnandā bhikkhunī sallakkhetvā – ‘‘na bahukato sāḷho migāranattā bhikkhunisaṅghassa bhattaṃ akāsi; maṃ so dūsetukāmo. Sacāhaṃ gamissāmi vissaro me bhavissatī’’ti, antevāsiniṃ bhikkhuniṃ āṇāpesi – ‘‘gaccha me piṇḍapātaṃ nīhara. Yo ce maṃ pucchati, ‘gilānā’ti paṭivedehī’’ti. ‘‘Evaṃ, ayye’’ti kho sā bhikkhunī sundarīnandāya bhikkhuniyā paccassosi.

தேன கோ² பன ஸமயேன ஸாள்ஹோ மிகா³ரனத்தா ப³ஹித்³வாரகொட்ட²கே டி²தோ ஹோதி ஸுந்த³ரீனந்த³ங் பி⁴க்கு²னிங் படிபுச்ச²ந்தோ – ‘‘கஹங், அய்யே, அய்யா ஸுந்த³ரீனந்தா³? கஹங், அய்யே, அய்யா ஸுந்த³ரீனந்தா³’’தி? ஏவங் வுத்தே ஸுந்த³ரீனந்தா³ய பி⁴க்கு²னியா அந்தேவாஸினீ பி⁴க்கு²னீ ஸாள்ஹங் மிகா³ரனத்தாரங் ஏதத³வோச – ‘‘கி³லானாவுஸோ; பிண்ட³பாதங் நீஹரிஸ்ஸாமீ’’தி. அத² கோ² ஸாள்ஹோ மிகா³ரனத்தா – ‘‘யம்பாஹங் அத்தா²ய ⁵ பி⁴க்கு²னிஸங்க⁴ஸ்ஸ ப⁴த்தங் அகாஸிங் அய்யாய ஸுந்த³ரீனந்தா³ய காரணா’’தி மனுஸ்ஸே ஆணாபெத்வா – ‘‘பி⁴க்கு²னிஸங்க⁴ங் ப⁴த்தேன பரிவிஸதா²’’தி வத்வா யேன பி⁴க்கு²னுபஸ்ஸயோ தேனுபஸங்கமி. தேன கோ² பன ஸமயேன ஸுந்த³ரீனந்தா³ பி⁴க்கு²னீ ப³ஹாராமகொட்ட²கே டி²தா ஹோதி ஸாள்ஹங் மிகா³ரனத்தாரங் பதிமானெந்தீ. அத்³த³ஸா கோ² ஸுந்த³ரீனந்தா³ பி⁴க்கு²னீ ஸாள்ஹங் மிகா³ரனத்தாரங் தூ³ரதோவ ஆக³ச்ச²ந்தங். தி³ஸ்வான உபஸ்ஸயங் பவிஸித்வா ஸஸீஸங் பாருபித்வா மஞ்சகே நிபஜ்ஜி. அத² கோ² ஸாள்ஹோ மிகா³ரனத்தா யேன ஸுந்த³ரீனந்தா³ பி⁴க்கு²னீ தேனுபஸங்கமி; உபஸங்கமித்வா ஸுந்த³ரீனந்த³ங் பி⁴க்கு²னிங் ஏதத³வோச – ‘‘கிங் தே, அய்யே, அபா²ஸு, கிஸ்ஸ நிபன்னாஸீ’’தி? ‘‘ஏவஞ்ஹேதங், ஆவுஸோ, ஹோதி யா அனிச்ச²ந்தங் இச்ச²தீ’’தி. ‘‘க்யாஹங் தங், அய்யே , ந இச்சி²ஸ்ஸாமி? அபி சாஹங் ஓகாஸங் ந லபா⁴மி தங் தூ³ஸேது’’ந்தி. அவஸ்ஸுதோ அவஸ்ஸுதாய ஸுந்த³ரீனந்தா³ய பி⁴க்கு²னியா காயஸங்ஸக்³க³ங் ஸமாபஜ்ஜி.

Tena kho pana samayena sāḷho migāranattā bahidvārakoṭṭhake ṭhito hoti sundarīnandaṃ bhikkhuniṃ paṭipucchanto – ‘‘kahaṃ, ayye, ayyā sundarīnandā? Kahaṃ, ayye, ayyā sundarīnandā’’ti? Evaṃ vutte sundarīnandāya bhikkhuniyā antevāsinī bhikkhunī sāḷhaṃ migāranattāraṃ etadavoca – ‘‘gilānāvuso; piṇḍapātaṃ nīharissāmī’’ti. Atha kho sāḷho migāranattā – ‘‘yampāhaṃ atthāya ⁶ bhikkhunisaṅghassa bhattaṃ akāsiṃ ayyāya sundarīnandāya kāraṇā’’ti manusse āṇāpetvā – ‘‘bhikkhunisaṅghaṃ bhattena parivisathā’’ti vatvā yena bhikkhunupassayo tenupasaṅkami. Tena kho pana samayena sundarīnandā bhikkhunī bahārāmakoṭṭhake ṭhitā hoti sāḷhaṃ migāranattāraṃ patimānentī. Addasā kho sundarīnandā bhikkhunī sāḷhaṃ migāranattāraṃ dūratova āgacchantaṃ. Disvāna upassayaṃ pavisitvā sasīsaṃ pārupitvā mañcake nipajji. Atha kho sāḷho migāranattā yena sundarīnandā bhikkhunī tenupasaṅkami; upasaṅkamitvā sundarīnandaṃ bhikkhuniṃ etadavoca – ‘‘kiṃ te, ayye, aphāsu, kissa nipannāsī’’ti? ‘‘Evañhetaṃ, āvuso, hoti yā anicchantaṃ icchatī’’ti. ‘‘Kyāhaṃ taṃ, ayye , na icchissāmi? Api cāhaṃ okāsaṃ na labhāmi taṃ dūsetu’’nti. Avassuto avassutāya sundarīnandāya bhikkhuniyā kāyasaṃsaggaṃ samāpajji.

தேன கோ² பன ஸமயேன அஞ்ஞதரா பி⁴க்கு²னீ ஜராது³ப்³ப³லா சரணகி³லானா ஸுந்த³ரீனந்தா³ய பி⁴க்கு²னியா அவிதூ³ரே நிபன்னா ஹோதி. அத்³த³ஸா கோ² ஸா பி⁴க்கு²னீ ஸாள்ஹங் மிகா³ரனத்தாரங் அவஸ்ஸுதங் அவஸ்ஸுதாய ஸுந்த³ரீனந்தா³ய பி⁴க்கு²னியா காயஸங்ஸக்³க³ங் ஸமாபஜ்ஜந்தங். தி³ஸ்வான உஜ்ஜா²யதி கி²ய்யதி விபாசேதி – ‘‘கத²ஞ்ஹி நாம அய்யா ஸுந்த³ரீனந்தா³ அவஸ்ஸுதா அவஸ்ஸுதஸ்ஸ புரிஸபுக்³க³லஸ்ஸ காயஸங்ஸக்³க³ங் ஸாதி³யிஸ்ஸதீ’’தி ! அத² கோ² ஸா பி⁴க்கு²னீ பி⁴க்கு²னீனங் ஏதமத்த²ங் ஆரோசேஸி. யா தா பி⁴க்கு²னியோ அப்பிச்சா² ஸந்துட்டா² லஜ்ஜினியோ குக்குச்சிகா ஸிக்கா²காமா தா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம அய்யா ஸுந்த³ரீனந்தா³ அவஸ்ஸுதா அவஸ்ஸுதஸ்ஸ புரிஸபுக்³க³லஸ்ஸ காயஸங்ஸக்³க³ங் ஸாதி³யிஸ்ஸதீ’’தி! அத² கோ² தா பி⁴க்கு²னியோ பி⁴க்கூ²னங் ஏதமத்த²ங் ஆரோசேஸுங். யே தே பி⁴க்கூ² அப்பிச்சா² ஸந்துட்டா² லஜ்ஜினோ குக்குச்சகா ஸிக்கா²காமா தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ஸுந்த³ரீனந்தா³ பி⁴க்கு²னீ அவஸ்ஸுதா அவஸ்ஸுதஸ்ஸ புரிஸபுக்³க³லஸ்ஸ காயஸங்ஸக்³க³ங் ஸாதி³யிஸ்ஸதீ’’தி!

Tena kho pana samayena aññatarā bhikkhunī jarādubbalā caraṇagilānā sundarīnandāya bhikkhuniyā avidūre nipannā hoti. Addasā kho sā bhikkhunī sāḷhaṃ migāranattāraṃ avassutaṃ avassutāya sundarīnandāya bhikkhuniyā kāyasaṃsaggaṃ samāpajjantaṃ. Disvāna ujjhāyati khiyyati vipāceti – ‘‘kathañhi nāma ayyā sundarīnandā avassutā avassutassa purisapuggalassa kāyasaṃsaggaṃ sādiyissatī’’ti ! Atha kho sā bhikkhunī bhikkhunīnaṃ etamatthaṃ ārocesi. Yā tā bhikkhuniyo appicchā santuṭṭhā lajjiniyo kukkuccikā sikkhākāmā tā ujjhāyanti khiyyanti vipācenti – ‘‘kathañhi nāma ayyā sundarīnandā avassutā avassutassa purisapuggalassa kāyasaṃsaggaṃ sādiyissatī’’ti! Atha kho tā bhikkhuniyo bhikkhūnaṃ etamatthaṃ ārocesuṃ. Ye te bhikkhū appicchā santuṭṭhā lajjino kukkuccakā sikkhākāmā te ujjhāyanti khiyyanti vipācenti – ‘‘kathañhi nāma sundarīnandā bhikkhunī avassutā avassutassa purisapuggalassa kāyasaṃsaggaṃ sādiyissatī’’ti!

அத² கோ² தே பி⁴க்கூ² ஸுந்த³ரீனந்த³ங் பி⁴க்கு²னிங் அனேகபரியாயேன விக³ரஹித்வா ப⁴க³வதோ ஏதமத்த²ங் ஆரோசேஸுங். அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே பி⁴க்கு²ஸங்க⁴ங் ஸன்னிபாதாபெத்வா பி⁴க்கூ² படிபுச்சி² – ‘‘ஸச்சங் கிர, பி⁴க்க²வே, ஸுந்த³ரீனந்தா³ பி⁴க்கு²னீ அவஸ்ஸுதா அவஸ்ஸுதஸ்ஸ புரிஸபுக்³க³லஸ்ஸ காயஸங்ஸக்³க³ங் ஸாதி³யதீ’’தி ⁷? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா – ‘‘அனநுச்ச²விகங், பி⁴க்க²வே, ஸுந்த³ரீனந்தா³ய பி⁴க்கு²னியா அனநுலோமிகங் அப்பதிரூபங் அஸ்ஸாமணகங் அகப்பியங் அகரணீயங். கத²ஞ்ஹி நாம, பி⁴க்க²வே, ஸுந்த³ரீனந்தா³ பி⁴க்கு²னீ அவஸ்ஸுதா அவஸ்ஸுதஸ்ஸ புரிஸபுக்³க³லஸ்ஸ காயஸங்ஸக்³க³ங் ஸாதி³யிஸ்ஸதி! நேதங், பி⁴க்க²வே, அப்பஸன்னானங் வா பஸாதா³ய பஸன்னானங் வா பி⁴ய்யோபா⁴வாய. அத² க்²வேதங், பி⁴க்க²வே , அப்பஸன்னானஞ்சேவ அப்பஸாதா³ய பஸன்னானஞ்ச ஏகச்சானங் அஞ்ஞத²த்தாயா’’தி. அத² கோ² ப⁴க³வா ஸுந்த³ரீனந்த³ங் பி⁴க்கு²னிங் அனேகபரியாயேன விக³ரஹித்வா து³ப்³ப⁴ரதாய து³ப்போஸதாய மஹிச்ச²தாய அஸந்துட்டி²தாய ⁸ ஸங்க³ணிகாய கோஸஜ்ஜஸ்ஸ அவண்ணங் பா⁴ஸித்வா, அனேகபரியாயேன ஸுப⁴ரதாய ஸுபோஸதாய அப்பிச்ச²ஸ்ஸ ஸந்துட்ட²ஸ்ஸ ⁹ ஸல்லேக²ஸ்ஸ து⁴தஸ்ஸ பாஸாதி³கஸ்ஸ அபசயஸ்ஸ வீரியாரம்ப⁴ஸ்ஸ வண்ணங் பா⁴ஸித்வா, பி⁴க்கூ²னங் தத³னுச்ச²விகங் தத³னுலோமிகங் த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘தேன ஹி, பி⁴க்க²வே, பி⁴க்கு²னீனங் ஸிக்கா²பத³ங் பஞ்ஞபெஸ்ஸாமி த³ஸ அத்த²வஸே படிச்ச – ஸங்க⁴ஸுட்டு²தாய, ஸங்க⁴பா²ஸுதாய, து³ம்மங்கூனங் பி⁴க்கு²னீனங் நிக்³க³ஹாய , பேஸலானங் பி⁴க்கு²னீனங் பா²ஸுவிஹாராய, தி³ட்ட²த⁴ம்மிகானங் ஆஸவானங் ஸங்வராய, ஸம்பராயிகானங் ஆஸவானங் படிகா⁴தாய, அப்பஸன்னானங் பஸாதா³ய, பஸன்னானங் பி⁴ய்யோபா⁴வாய, ஸத்³த⁴ம்மட்டி²தியா வினயானுக்³க³ஹாய. ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –

Atha kho te bhikkhū sundarīnandaṃ bhikkhuniṃ anekapariyāyena vigarahitvā bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā bhikkhū paṭipucchi – ‘‘saccaṃ kira, bhikkhave, sundarīnandā bhikkhunī avassutā avassutassa purisapuggalassa kāyasaṃsaggaṃ sādiyatī’’ti ¹⁰? ‘‘Saccaṃ, bhagavā’’ti. Vigarahi buddho bhagavā – ‘‘ananucchavikaṃ, bhikkhave, sundarīnandāya bhikkhuniyā ananulomikaṃ appatirūpaṃ assāmaṇakaṃ akappiyaṃ akaraṇīyaṃ. Kathañhi nāma, bhikkhave, sundarīnandā bhikkhunī avassutā avassutassa purisapuggalassa kāyasaṃsaggaṃ sādiyissati! Netaṃ, bhikkhave, appasannānaṃ vā pasādāya pasannānaṃ vā bhiyyobhāvāya. Atha khvetaṃ, bhikkhave , appasannānañceva appasādāya pasannānañca ekaccānaṃ aññathattāyā’’ti. Atha kho bhagavā sundarīnandaṃ bhikkhuniṃ anekapariyāyena vigarahitvā dubbharatāya dupposatāya mahicchatāya asantuṭṭhitāya ¹¹ saṅgaṇikāya kosajjassa avaṇṇaṃ bhāsitvā, anekapariyāyena subharatāya suposatāya appicchassa santuṭṭhassa ¹² sallekhassa dhutassa pāsādikassa apacayassa vīriyārambhassa vaṇṇaṃ bhāsitvā, bhikkhūnaṃ tadanucchavikaṃ tadanulomikaṃ dhammiṃ kathaṃ katvā bhikkhū āmantesi – ‘‘tena hi, bhikkhave, bhikkhunīnaṃ sikkhāpadaṃ paññapessāmi dasa atthavase paṭicca – saṅghasuṭṭhutāya, saṅghaphāsutāya, dummaṅkūnaṃ bhikkhunīnaṃ niggahāya , pesalānaṃ bhikkhunīnaṃ phāsuvihārāya, diṭṭhadhammikānaṃ āsavānaṃ saṃvarāya, samparāyikānaṃ āsavānaṃ paṭighātāya, appasannānaṃ pasādāya, pasannānaṃ bhiyyobhāvāya, saddhammaṭṭhitiyā vinayānuggahāya. Evañca pana, bhikkhave, bhikkhuniyo imaṃ sikkhāpadaṃ uddisantu –

657. ‘‘யா பன பி⁴க்கு²னீ அவஸ்ஸுதா அவஸ்ஸுதஸ்ஸ புரிஸபுக்³க³லஸ்ஸ அத⁴க்க²கங் உப்³ப⁴ஜாணுமண்ட³லங் ஆமஸனங் வா பராமஸனங் வா க³ஹணங் வா சு²பனங் வா படிபீளனங் வா ஸாதி³யெய்ய, அயம்பி பாராஜிகா ஹோதி அஸங்வாஸா உப்³ப⁴ஜாணுமண்ட³லிகா’’தி.

657.‘‘Yā pana bhikkhunī avassutā avassutassa purisapuggalassa adhakkhakaṃ ubbhajāṇumaṇḍalaṃ āmasanaṃ vā parāmasanaṃ vā gahaṇaṃ vā chupanaṃ vā paṭipīḷanaṃ vā sādiyeyya, ayampi pārājikā hoti asaṃvāsā ubbhajāṇumaṇḍalikā’’ti.

658. யா பனாதி யா யாதி³ஸா யதா²யுத்தா யதா²ஜச்சா யதா²னாமா யதா²கொ³த்தா யதா²ஸீலா யதா²விஹாரினீ யதா²கோ³சரா தே²ரா வா நவா வா மஜ்ஜி²மா வா, ஏஸா வுச்சதி யா பனாதி.

658.Yāpanāti yā yādisā yathāyuttā yathājaccā yathānāmā yathāgottā yathāsīlā yathāvihārinī yathāgocarā therā vā navā vā majjhimā vā, esā vuccati yā panāti.

பி⁴க்கு²னீதி பி⁴க்கி²காதி பி⁴க்கு²னீ; பி⁴க்கா²சரியங் அஜ்ஜு²பக³தாதி பி⁴க்கு²னீ; பி⁴ன்னபடத⁴ராதி பி⁴க்கு²னீ ; ஸமஞ்ஞாய பி⁴க்கு²னீ; படிஞ்ஞாய பி⁴க்கு²னீ; ஏஹி பி⁴க்கு²னீதி பி⁴க்கு²னீ; தீஹி ஸரணக³மனேஹி உபஸம்பன்னாதி பி⁴க்கு²னீ; ப⁴த்³ரா பி⁴க்கு²னீ; ஸாரா பி⁴க்கு²னீ; ஸேகா² பி⁴க்கு²னீ; அஸேகா² பி⁴க்கு²னீ; ஸமக்³கே³ன உப⁴தோஸங்கே⁴ன ஞத்திசதுத்தே²ன கம்மேன அகுப்பேன டா²னாரஹேன உபஸம்பன்னாதி பி⁴க்கு²னீ. தத்ர யாயங் பி⁴க்கு²னீ ஸமக்³கே³ன உப⁴தோஸங்கே⁴ன ஞத்திசதுத்தே²ன கம்மேன அகுப்பேன டா²னாரஹேன உபஸம்பன்னா, அயங் இமஸ்மிங் அத்தே² அதி⁴ப்பேதா பி⁴க்கு²னீதி.

Bhikkhunīti bhikkhikāti bhikkhunī; bhikkhācariyaṃ ajjhupagatāti bhikkhunī; bhinnapaṭadharāti bhikkhunī ; samaññāya bhikkhunī; paṭiññāya bhikkhunī; ehi bhikkhunīti bhikkhunī; tīhi saraṇagamanehi upasampannāti bhikkhunī; bhadrā bhikkhunī; sārā bhikkhunī; sekhā bhikkhunī; asekhā bhikkhunī; samaggena ubhatosaṅghena ñatticatutthena kammena akuppena ṭhānārahena upasampannāti bhikkhunī. Tatra yāyaṃ bhikkhunī samaggena ubhatosaṅghena ñatticatutthena kammena akuppena ṭhānārahena upasampannā, ayaṃ imasmiṃ atthe adhippetā bhikkhunīti.

அவஸ்ஸுதா நாம ஸாரத்தா அபெக்க²வதீ படிப³த்³த⁴சித்தா.

Avassutā nāma sārattā apekkhavatī paṭibaddhacittā.

அவஸ்ஸுதோ நாம ஸாரத்தோ அபெக்க²வா படிப³த்³த⁴சித்தோ.

Avassuto nāma sāratto apekkhavā paṭibaddhacitto.

புரிஸபுக்³க³லோ நாம மனுஸ்ஸபுரிஸோ ந யக்கோ² ந பேதோ ந திரச்சா²னக³தோ விஞ்ஞூ படிப³லோ காயஸங்ஸக்³க³ங் ஸமாபஜ்ஜிதுங்.

Purisapuggalo nāma manussapuriso na yakkho na peto na tiracchānagato viññū paṭibalo kāyasaṃsaggaṃ samāpajjituṃ.

அத⁴க்க²கந்தி ஹெட்ட²க்க²கங்.

Adhakkhakanti heṭṭhakkhakaṃ.

உப்³ப⁴ஜாணுமண்ட³லந்தி உபரிஜாணுமண்ட³லங்.

Ubbhajāṇumaṇḍalanti uparijāṇumaṇḍalaṃ.

ஆமஸனங் நாம ஆமட்ட²மத்தங்.

Āmasanaṃ nāma āmaṭṭhamattaṃ.

பராமஸனங் நாம இதோசிதோ ச ஸஞ்சோபனங்.

Parāmasanaṃ nāma itocito ca sañcopanaṃ.

க³ஹணங் நாம க³ஹிதமத்தங்.

Gahaṇaṃ nāma gahitamattaṃ.

சு²பனங் நாம பு²ட்ட²மத்தங்.

Chupanaṃ nāma phuṭṭhamattaṃ.

படிபீளனங் வா ஸாதி³யெய்யாதி அங்க³ங் க³ஹெத்வா நிப்பீளனங் ஸாதி³யதி.

Paṭipīḷanaṃvā sādiyeyyāti aṅgaṃ gahetvā nippīḷanaṃ sādiyati.

அயம்பீதி புரிமாயோ உபாதா³ய வுச்சதி.

Ayampīti purimāyo upādāya vuccati.

பாராஜிகா ஹோதீதி ஸெய்யதா²பி நாம புரிஸோ ஸீஸச்சி²ன்னோ அப⁴ப்³போ³ தேன ஸரீரப³ந்த⁴னேன ஜீவிதுங், ஏவமேவ பி⁴க்கு²னீ அவஸ்ஸுதா அவஸ்ஸுதஸ்ஸ புரிஸபுக்³க³லஸ்ஸ அத⁴க்க²கங் உப்³ப⁴ஜாணுமண்ட³லங் ஆமஸனங் வா பராமஸனங் வா க³ஹணங் வா சு²பனங் வா படிபீளனங் வா ஸாதி³யந்தீ அஸ்ஸமணீ ஹோதி அஸக்யதீ⁴தா. தேன வுச்சதி பாராஜிகா ஹோதீதி.

Pārājikā hotīti seyyathāpi nāma puriso sīsacchinno abhabbo tena sarīrabandhanena jīvituṃ, evameva bhikkhunī avassutā avassutassa purisapuggalassa adhakkhakaṃ ubbhajāṇumaṇḍalaṃ āmasanaṃ vā parāmasanaṃ vā gahaṇaṃ vā chupanaṃ vā paṭipīḷanaṃ vā sādiyantī assamaṇī hoti asakyadhītā. Tena vuccati pārājikā hotīti.

அஸங்வாஸாதி ஸங்வாஸோ நாம ஏககம்மங் ஏகுத்³தே³ஸோ ஸமஸிக்க²தா, ஏஸோ ஸங்வாஸோ நாம. ஸோ தாய ஸத்³தி⁴ங் நத்தி², தேன வுச்சதி அஸங்வாஸாதி.

Asaṃvāsāti saṃvāso nāma ekakammaṃ ekuddeso samasikkhatā, eso saṃvāso nāma. So tāya saddhiṃ natthi, tena vuccati asaṃvāsāti.

659. உப⁴தோஅவஸ்ஸுதே அத⁴க்க²கங் உப்³ப⁴ஜாணுமண்ட³லங் காயேன காயங் ஆமஸதி, ஆபத்தி பாராஜிகஸ்ஸ. காயேன காயபடிப³த்³த⁴ங் ஆமஸதி, ஆபத்தி து²ல்லச்சயஸ்ஸ. காயபடிப³த்³தே⁴ன காயங் ஆமஸதி, ஆபத்தி து²ல்லச்சயஸ்ஸ. காயபடிப³த்³தே⁴ன காயபடிப³த்³த⁴ங் ஆமஸதி, ஆபத்தி து³க்கடஸ்ஸ.

659. Ubhatoavassute adhakkhakaṃ ubbhajāṇumaṇḍalaṃ kāyena kāyaṃ āmasati, āpatti pārājikassa. Kāyena kāyapaṭibaddhaṃ āmasati, āpatti thullaccayassa. Kāyapaṭibaddhena kāyaṃ āmasati, āpatti thullaccayassa. Kāyapaṭibaddhena kāyapaṭibaddhaṃ āmasati, āpatti dukkaṭassa.

நிஸ்ஸக்³கி³யேன காயங் ஆமஸதி , ஆபத்தி து³க்கடஸ்ஸ. நிஸ்ஸக்³கி³யேன காயபடிப³த்³த⁴ங் ஆமஸதி, ஆபத்தி து³க்கடஸ்ஸ. நிஸ்ஸக்³கி³யேன நிஸ்ஸக்³கி³யங் ஆமஸதி, ஆபத்தி து³க்கடஸ்ஸ.

Nissaggiyena kāyaṃ āmasati , āpatti dukkaṭassa. Nissaggiyena kāyapaṭibaddhaṃ āmasati, āpatti dukkaṭassa. Nissaggiyena nissaggiyaṃ āmasati, āpatti dukkaṭassa.

உப்³ப⁴க்க²கங் அதோ⁴ஜாணுமண்ட³லங் காயேன காயங் ஆமஸதி, ஆபத்தி து²ல்லச்சயஸ்ஸ. காயேன காயபடிப³த்³த⁴ங் ஆமஸதி, ஆபத்தி து³க்கடஸ்ஸ. காயபடிப³த்³தே⁴ன காயங் ஆமஸதி, ஆபத்தி து³க்கடஸ்ஸ. காயபடிப³த்³தே⁴ன காயபடிப³த்³த⁴ங் ஆமஸதி, ஆபத்தி து³க்கடஸ்ஸ.

Ubbhakkhakaṃ adhojāṇumaṇḍalaṃ kāyena kāyaṃ āmasati, āpatti thullaccayassa. Kāyena kāyapaṭibaddhaṃ āmasati, āpatti dukkaṭassa. Kāyapaṭibaddhena kāyaṃ āmasati, āpatti dukkaṭassa. Kāyapaṭibaddhena kāyapaṭibaddhaṃ āmasati, āpatti dukkaṭassa.

நிஸ்ஸக்³கி³யேன காயங் ஆமஸதி, ஆபத்தி து³க்கடஸ்ஸ. நிஸ்ஸக்³கி³யேன காயபடிப³த்³த⁴ங் ஆமஸதி, ஆபத்தி து³க்கடஸ்ஸ. நிஸ்ஸக்³கி³யேன நிஸ்ஸக்³கி³யங் ஆமஸதி, ஆபத்தி து³க்கடஸ்ஸ.