Library / Tipiṭaka / તિપિટક • Tipiṭaka / ભિક્ખુનીવિભઙ્ગ • Bhikkhunīvibhaṅga

નમો તસ્સ ભગવતો અરહતો સમ્માસમ્બુદ્ધસ્સ

Namo tassa bhagavato arahato sammāsambuddhassa

ભિક્ખુનીવિભઙ્ગો

Bhikkhunīvibhaṅgo

૧. પારાજિકકણ્ડં (ભિક્ખુનીવિભઙ્ગો)

1. Pārājikakaṇḍaṃ (bhikkhunīvibhaṅgo)

૧. પઠમપારાજિકં

1. Paṭhamapārājikaṃ

૬૫૬. તેન સમયેન બુદ્ધો ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તેન ખો પન સમયેન સાળ્હો મિગારનત્તા ભિક્ખુનિસઙ્ઘસ્સ વિહારં કત્તુકામો હોતિ. અથ ખો સાળ્હો મિગારનત્તા ભિક્ખુનિયો ઉપસઙ્કમિત્વા એતદવોચ – ‘‘ઇચ્છામહં, અય્યે, ભિક્ખુનિસઙ્ઘસ્સ વિહારં કાતું. દેથ મે નવકમ્મિકં ભિક્ખુનિ’’ન્તિ. તેન ખો પન સમયેન ચતસ્સો ભગિનિયો ભિક્ખુનીસુ પબ્બજિતા હોન્તિ – નન્દા, નન્દવતી, સુન્દરીનન્દા, થુલ્લનન્દાતિ. તાસુ સુન્દરીનન્દા ભિક્ખુની તરુણપબ્બજિતા અભિરૂપા હોતિ દસ્સનીયા પાસાદિકા પણ્ડિતા બ્યત્તા મેધાવિની દક્ખા અનલસા, તત્રુપાયાય વીમંસાય સમન્નાગતા, અલં કાતું અલં સંવિધાતું. અથ ખો ભિક્ખુનિસઙ્ઘો સુન્દરીનન્દં ભિક્ખુનિં સમ્મન્નિત્વા સાળ્હસ્સ મિગારનત્તુનો નવકમ્મિકં અદાસિ. તેન ખો પન સમયેન સુન્દરીનન્દા ભિક્ખુની સાળ્હસ્સ મિગારનત્તુનો નિવેસનં અભિક્ખણં ગચ્છતિ – ‘‘વાસિં દેથ, પરસું ¹ દેથ, કુઠારિં ² દેથ, કુદ્દાલં દેથ, નિખાદનં દેથા’’તિ. સાળ્હોપિ મિગારનત્તા ભિક્ખુનુપસ્સયં અભિક્ખણં ગચ્છતિ કતાકતં જાનિતું. તે અભિણ્હદસ્સનેન પટિબદ્ધચિત્તા અહેસું.

656. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena sāḷho migāranattā bhikkhunisaṅghassa vihāraṃ kattukāmo hoti. Atha kho sāḷho migāranattā bhikkhuniyo upasaṅkamitvā etadavoca – ‘‘icchāmahaṃ, ayye, bhikkhunisaṅghassa vihāraṃ kātuṃ. Detha me navakammikaṃ bhikkhuni’’nti. Tena kho pana samayena catasso bhaginiyo bhikkhunīsu pabbajitā honti – nandā, nandavatī, sundarīnandā, thullanandāti. Tāsu sundarīnandā bhikkhunī taruṇapabbajitā abhirūpā hoti dassanīyā pāsādikā paṇḍitā byattā medhāvinī dakkhā analasā, tatrupāyāya vīmaṃsāya samannāgatā, alaṃ kātuṃ alaṃ saṃvidhātuṃ. Atha kho bhikkhunisaṅgho sundarīnandaṃ bhikkhuniṃ sammannitvā sāḷhassa migāranattuno navakammikaṃ adāsi. Tena kho pana samayena sundarīnandā bhikkhunī sāḷhassa migāranattuno nivesanaṃ abhikkhaṇaṃ gacchati – ‘‘vāsiṃ detha, parasuṃ ³ detha, kuṭhāriṃ ⁴ detha, kuddālaṃ detha, nikhādanaṃ dethā’’ti. Sāḷhopi migāranattā bhikkhunupassayaṃ abhikkhaṇaṃ gacchati katākataṃ jānituṃ. Te abhiṇhadassanena paṭibaddhacittā ahesuṃ.

અથ ખો સાળ્હો મિગારનત્તા સુન્દરીનન્દં ભિક્ખુનિં દૂસેતું ઓકાસં અલભમાનો એતદેવત્થાય ભિક્ખુનિસઙ્ઘસ્સ ભત્તં અકાસિ. અથ ખો સાળ્હો મિગારનત્તા ભત્તગ્ગે આસનં પઞ્ઞપેન્તો – ‘‘એત્તકા ભિક્ખુનિયો અય્યાય સુન્દરીનન્દાય વુડ્ઢતરા’’તિ એકમન્તં આસનં પઞ્ઞપેસિ ‘‘એત્તકા નવકતરા’’તિ – એકમન્તં આસનં પઞ્ઞપેસિ. પટિચ્છન્ને ઓકાસે નિકૂટે સુન્દરીનન્દાય ભિક્ખુનિયા આસનં પઞ્ઞપેસિ, યથા થેરા ભિક્ખુનિયો જાનેય્યું – ‘‘નવકાનં ભિક્ખુનીનં સન્તિકે નિસિન્ના’’તિ; નવકાપિ ભિક્ખુનિયો જાનેય્યું – ‘‘થેરાનં ભિક્ખુનીનં સન્તિકે નિસિન્ના’’તિ. અથ ખો સાળ્હો મિગારનત્તા ભિક્ખુનિસઙ્ઘસ્સ કાલં આરોચાપેસિ – ‘‘કાલો, અય્યે, નિટ્ઠિતં ભત્ત’’ન્તિ. સુન્દરીનન્દા ભિક્ખુની સલ્લક્ખેત્વા – ‘‘ન બહુકતો સાળ્હો મિગારનત્તા ભિક્ખુનિસઙ્ઘસ્સ ભત્તં અકાસિ; મં સો દૂસેતુકામો. સચાહં ગમિસ્સામિ વિસ્સરો મે ભવિસ્સતી’’તિ, અન્તેવાસિનિં ભિક્ખુનિં આણાપેસિ – ‘‘ગચ્છ મે પિણ્ડપાતં નીહર. યો ચે મં પુચ્છતિ, ‘ગિલાના’તિ પટિવેદેહી’’તિ. ‘‘એવં, અય્યે’’તિ ખો સા ભિક્ખુની સુન્દરીનન્દાય ભિક્ખુનિયા પચ્ચસ્સોસિ.

Atha kho sāḷho migāranattā sundarīnandaṃ bhikkhuniṃ dūsetuṃ okāsaṃ alabhamāno etadevatthāya bhikkhunisaṅghassa bhattaṃ akāsi. Atha kho sāḷho migāranattā bhattagge āsanaṃ paññapento – ‘‘ettakā bhikkhuniyo ayyāya sundarīnandāya vuḍḍhatarā’’ti ekamantaṃ āsanaṃ paññapesi ‘‘ettakā navakatarā’’ti – ekamantaṃ āsanaṃ paññapesi. Paṭicchanne okāse nikūṭe sundarīnandāya bhikkhuniyā āsanaṃ paññapesi, yathā therā bhikkhuniyo jāneyyuṃ – ‘‘navakānaṃ bhikkhunīnaṃ santike nisinnā’’ti; navakāpi bhikkhuniyo jāneyyuṃ – ‘‘therānaṃ bhikkhunīnaṃ santike nisinnā’’ti. Atha kho sāḷho migāranattā bhikkhunisaṅghassa kālaṃ ārocāpesi – ‘‘kālo, ayye, niṭṭhitaṃ bhatta’’nti. Sundarīnandā bhikkhunī sallakkhetvā – ‘‘na bahukato sāḷho migāranattā bhikkhunisaṅghassa bhattaṃ akāsi; maṃ so dūsetukāmo. Sacāhaṃ gamissāmi vissaro me bhavissatī’’ti, antevāsiniṃ bhikkhuniṃ āṇāpesi – ‘‘gaccha me piṇḍapātaṃ nīhara. Yo ce maṃ pucchati, ‘gilānā’ti paṭivedehī’’ti. ‘‘Evaṃ, ayye’’ti kho sā bhikkhunī sundarīnandāya bhikkhuniyā paccassosi.

તેન ખો પન સમયેન સાળ્હો મિગારનત્તા બહિદ્વારકોટ્ઠકે ઠિતો હોતિ સુન્દરીનન્દં ભિક્ખુનિં પટિપુચ્છન્તો – ‘‘કહં, અય્યે, અય્યા સુન્દરીનન્દા? કહં, અય્યે, અય્યા સુન્દરીનન્દા’’તિ? એવં વુત્તે સુન્દરીનન્દાય ભિક્ખુનિયા અન્તેવાસિની ભિક્ખુની સાળ્હં મિગારનત્તારં એતદવોચ – ‘‘ગિલાનાવુસો; પિણ્ડપાતં નીહરિસ્સામી’’તિ. અથ ખો સાળ્હો મિગારનત્તા – ‘‘યમ્પાહં અત્થાય ⁵ ભિક્ખુનિસઙ્ઘસ્સ ભત્તં અકાસિં અય્યાય સુન્દરીનન્દાય કારણા’’તિ મનુસ્સે આણાપેત્વા – ‘‘ભિક્ખુનિસઙ્ઘં ભત્તેન પરિવિસથા’’તિ વત્વા યેન ભિક્ખુનુપસ્સયો તેનુપસઙ્કમિ. તેન ખો પન સમયેન સુન્દરીનન્દા ભિક્ખુની બહારામકોટ્ઠકે ઠિતા હોતિ સાળ્હં મિગારનત્તારં પતિમાનેન્તી. અદ્દસા ખો સુન્દરીનન્દા ભિક્ખુની સાળ્હં મિગારનત્તારં દૂરતોવ આગચ્છન્તં. દિસ્વાન ઉપસ્સયં પવિસિત્વા સસીસં પારુપિત્વા મઞ્ચકે નિપજ્જિ. અથ ખો સાળ્હો મિગારનત્તા યેન સુન્દરીનન્દા ભિક્ખુની તેનુપસઙ્કમિ; ઉપસઙ્કમિત્વા સુન્દરીનન્દં ભિક્ખુનિં એતદવોચ – ‘‘કિં તે, અય્યે, અફાસુ, કિસ્સ નિપન્નાસી’’તિ? ‘‘એવઞ્હેતં, આવુસો, હોતિ યા અનિચ્છન્તં ઇચ્છતી’’તિ. ‘‘ક્યાહં તં, અય્યે , ન ઇચ્છિસ્સામિ? અપિ ચાહં ઓકાસં ન લભામિ તં દૂસેતુ’’ન્તિ. અવસ્સુતો અવસ્સુતાય સુન્દરીનન્દાય ભિક્ખુનિયા કાયસંસગ્ગં સમાપજ્જિ.

Tena kho pana samayena sāḷho migāranattā bahidvārakoṭṭhake ṭhito hoti sundarīnandaṃ bhikkhuniṃ paṭipucchanto – ‘‘kahaṃ, ayye, ayyā sundarīnandā? Kahaṃ, ayye, ayyā sundarīnandā’’ti? Evaṃ vutte sundarīnandāya bhikkhuniyā antevāsinī bhikkhunī sāḷhaṃ migāranattāraṃ etadavoca – ‘‘gilānāvuso; piṇḍapātaṃ nīharissāmī’’ti. Atha kho sāḷho migāranattā – ‘‘yampāhaṃ atthāya ⁶ bhikkhunisaṅghassa bhattaṃ akāsiṃ ayyāya sundarīnandāya kāraṇā’’ti manusse āṇāpetvā – ‘‘bhikkhunisaṅghaṃ bhattena parivisathā’’ti vatvā yena bhikkhunupassayo tenupasaṅkami. Tena kho pana samayena sundarīnandā bhikkhunī bahārāmakoṭṭhake ṭhitā hoti sāḷhaṃ migāranattāraṃ patimānentī. Addasā kho sundarīnandā bhikkhunī sāḷhaṃ migāranattāraṃ dūratova āgacchantaṃ. Disvāna upassayaṃ pavisitvā sasīsaṃ pārupitvā mañcake nipajji. Atha kho sāḷho migāranattā yena sundarīnandā bhikkhunī tenupasaṅkami; upasaṅkamitvā sundarīnandaṃ bhikkhuniṃ etadavoca – ‘‘kiṃ te, ayye, aphāsu, kissa nipannāsī’’ti? ‘‘Evañhetaṃ, āvuso, hoti yā anicchantaṃ icchatī’’ti. ‘‘Kyāhaṃ taṃ, ayye , na icchissāmi? Api cāhaṃ okāsaṃ na labhāmi taṃ dūsetu’’nti. Avassuto avassutāya sundarīnandāya bhikkhuniyā kāyasaṃsaggaṃ samāpajji.

તેન ખો પન સમયેન અઞ્ઞતરા ભિક્ખુની જરાદુબ્બલા ચરણગિલાના સુન્દરીનન્દાય ભિક્ખુનિયા અવિદૂરે નિપન્ના હોતિ. અદ્દસા ખો સા ભિક્ખુની સાળ્હં મિગારનત્તારં અવસ્સુતં અવસ્સુતાય સુન્દરીનન્દાય ભિક્ખુનિયા કાયસંસગ્ગં સમાપજ્જન્તં. દિસ્વાન ઉજ્ઝાયતિ ખિય્યતિ વિપાચેતિ – ‘‘કથઞ્હિ નામ અય્યા સુન્દરીનન્દા અવસ્સુતા અવસ્સુતસ્સ પુરિસપુગ્ગલસ્સ કાયસંસગ્ગં સાદિયિસ્સતી’’તિ ! અથ ખો સા ભિક્ખુની ભિક્ખુનીનં એતમત્થં આરોચેસિ. યા તા ભિક્ખુનિયો અપ્પિચ્છા સન્તુટ્ઠા લજ્જિનિયો કુક્કુચ્ચિકા સિક્ખાકામા તા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ અય્યા સુન્દરીનન્દા અવસ્સુતા અવસ્સુતસ્સ પુરિસપુગ્ગલસ્સ કાયસંસગ્ગં સાદિયિસ્સતી’’તિ! અથ ખો તા ભિક્ખુનિયો ભિક્ખૂનં એતમત્થં આરોચેસું. યે તે ભિક્ખૂ અપ્પિચ્છા સન્તુટ્ઠા લજ્જિનો કુક્કુચ્ચકા સિક્ખાકામા તે ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ સુન્દરીનન્દા ભિક્ખુની અવસ્સુતા અવસ્સુતસ્સ પુરિસપુગ્ગલસ્સ કાયસંસગ્ગં સાદિયિસ્સતી’’તિ!

Tena kho pana samayena aññatarā bhikkhunī jarādubbalā caraṇagilānā sundarīnandāya bhikkhuniyā avidūre nipannā hoti. Addasā kho sā bhikkhunī sāḷhaṃ migāranattāraṃ avassutaṃ avassutāya sundarīnandāya bhikkhuniyā kāyasaṃsaggaṃ samāpajjantaṃ. Disvāna ujjhāyati khiyyati vipāceti – ‘‘kathañhi nāma ayyā sundarīnandā avassutā avassutassa purisapuggalassa kāyasaṃsaggaṃ sādiyissatī’’ti ! Atha kho sā bhikkhunī bhikkhunīnaṃ etamatthaṃ ārocesi. Yā tā bhikkhuniyo appicchā santuṭṭhā lajjiniyo kukkuccikā sikkhākāmā tā ujjhāyanti khiyyanti vipācenti – ‘‘kathañhi nāma ayyā sundarīnandā avassutā avassutassa purisapuggalassa kāyasaṃsaggaṃ sādiyissatī’’ti! Atha kho tā bhikkhuniyo bhikkhūnaṃ etamatthaṃ ārocesuṃ. Ye te bhikkhū appicchā santuṭṭhā lajjino kukkuccakā sikkhākāmā te ujjhāyanti khiyyanti vipācenti – ‘‘kathañhi nāma sundarīnandā bhikkhunī avassutā avassutassa purisapuggalassa kāyasaṃsaggaṃ sādiyissatī’’ti!

અથ ખો તે ભિક્ખૂ સુન્દરીનન્દં ભિક્ખુનિં અનેકપરિયાયેન વિગરહિત્વા ભગવતો એતમત્થં આરોચેસું. અથ ખો ભગવા એતસ્મિં નિદાને એતસ્મિં પકરણે ભિક્ખુસઙ્ઘં સન્નિપાતાપેત્વા ભિક્ખૂ પટિપુચ્છિ – ‘‘સચ્ચં કિર, ભિક્ખવે, સુન્દરીનન્દા ભિક્ખુની અવસ્સુતા અવસ્સુતસ્સ પુરિસપુગ્ગલસ્સ કાયસંસગ્ગં સાદિયતી’’તિ ⁷? ‘‘સચ્ચં, ભગવા’’તિ. વિગરહિ બુદ્ધો ભગવા – ‘‘અનનુચ્છવિકં, ભિક્ખવે, સુન્દરીનન્દાય ભિક્ખુનિયા અનનુલોમિકં અપ્પતિરૂપં અસ્સામણકં અકપ્પિયં અકરણીયં. કથઞ્હિ નામ, ભિક્ખવે, સુન્દરીનન્દા ભિક્ખુની અવસ્સુતા અવસ્સુતસ્સ પુરિસપુગ્ગલસ્સ કાયસંસગ્ગં સાદિયિસ્સતિ! નેતં, ભિક્ખવે, અપ્પસન્નાનં વા પસાદાય પસન્નાનં વા ભિય્યોભાવાય. અથ ખ્વેતં, ભિક્ખવે , અપ્પસન્નાનઞ્ચેવ અપ્પસાદાય પસન્નાનઞ્ચ એકચ્ચાનં અઞ્ઞથત્તાયા’’તિ. અથ ખો ભગવા સુન્દરીનન્દં ભિક્ખુનિં અનેકપરિયાયેન વિગરહિત્વા દુબ્ભરતાય દુપ્પોસતાય મહિચ્છતાય અસન્તુટ્ઠિતાય ⁸ સઙ્ગણિકાય કોસજ્જસ્સ અવણ્ણં ભાસિત્વા, અનેકપરિયાયેન સુભરતાય સુપોસતાય અપ્પિચ્છસ્સ સન્તુટ્ઠસ્સ ⁹ સલ્લેખસ્સ ધુતસ્સ પાસાદિકસ્સ અપચયસ્સ વીરિયારમ્ભસ્સ વણ્ણં ભાસિત્વા, ભિક્ખૂનં તદનુચ્છવિકં તદનુલોમિકં ધમ્મિં કથં કત્વા ભિક્ખૂ આમન્તેસિ – ‘‘તેન હિ, ભિક્ખવે, ભિક્ખુનીનં સિક્ખાપદં પઞ્ઞપેસ્સામિ દસ અત્થવસે પટિચ્ચ – સઙ્ઘસુટ્ઠુતાય, સઙ્ઘફાસુતાય, દુમ્મઙ્કૂનં ભિક્ખુનીનં નિગ્ગહાય , પેસલાનં ભિક્ખુનીનં ફાસુવિહારાય, દિટ્ઠધમ્મિકાનં આસવાનં સંવરાય, સમ્પરાયિકાનં આસવાનં પટિઘાતાય, અપ્પસન્નાનં પસાદાય, પસન્નાનં ભિય્યોભાવાય, સદ્ધમ્મટ્ઠિતિયા વિનયાનુગ્ગહાય. એવઞ્ચ પન, ભિક્ખવે, ભિક્ખુનિયો ઇમં સિક્ખાપદં ઉદ્દિસન્તુ –

Atha kho te bhikkhū sundarīnandaṃ bhikkhuniṃ anekapariyāyena vigarahitvā bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā bhikkhū paṭipucchi – ‘‘saccaṃ kira, bhikkhave, sundarīnandā bhikkhunī avassutā avassutassa purisapuggalassa kāyasaṃsaggaṃ sādiyatī’’ti ¹⁰? ‘‘Saccaṃ, bhagavā’’ti. Vigarahi buddho bhagavā – ‘‘ananucchavikaṃ, bhikkhave, sundarīnandāya bhikkhuniyā ananulomikaṃ appatirūpaṃ assāmaṇakaṃ akappiyaṃ akaraṇīyaṃ. Kathañhi nāma, bhikkhave, sundarīnandā bhikkhunī avassutā avassutassa purisapuggalassa kāyasaṃsaggaṃ sādiyissati! Netaṃ, bhikkhave, appasannānaṃ vā pasādāya pasannānaṃ vā bhiyyobhāvāya. Atha khvetaṃ, bhikkhave , appasannānañceva appasādāya pasannānañca ekaccānaṃ aññathattāyā’’ti. Atha kho bhagavā sundarīnandaṃ bhikkhuniṃ anekapariyāyena vigarahitvā dubbharatāya dupposatāya mahicchatāya asantuṭṭhitāya ¹¹ saṅgaṇikāya kosajjassa avaṇṇaṃ bhāsitvā, anekapariyāyena subharatāya suposatāya appicchassa santuṭṭhassa ¹² sallekhassa dhutassa pāsādikassa apacayassa vīriyārambhassa vaṇṇaṃ bhāsitvā, bhikkhūnaṃ tadanucchavikaṃ tadanulomikaṃ dhammiṃ kathaṃ katvā bhikkhū āmantesi – ‘‘tena hi, bhikkhave, bhikkhunīnaṃ sikkhāpadaṃ paññapessāmi dasa atthavase paṭicca – saṅghasuṭṭhutāya, saṅghaphāsutāya, dummaṅkūnaṃ bhikkhunīnaṃ niggahāya , pesalānaṃ bhikkhunīnaṃ phāsuvihārāya, diṭṭhadhammikānaṃ āsavānaṃ saṃvarāya, samparāyikānaṃ āsavānaṃ paṭighātāya, appasannānaṃ pasādāya, pasannānaṃ bhiyyobhāvāya, saddhammaṭṭhitiyā vinayānuggahāya. Evañca pana, bhikkhave, bhikkhuniyo imaṃ sikkhāpadaṃ uddisantu –

૬૫૭. ‘‘યા પન ભિક્ખુની અવસ્સુતા અવસ્સુતસ્સ પુરિસપુગ્ગલસ્સ અધક્ખકં ઉબ્ભજાણુમણ્ડલં આમસનં વા પરામસનં વા ગહણં વા છુપનં વા પટિપીળનં વા સાદિયેય્ય, અયમ્પિ પારાજિકા હોતિ અસંવાસા ઉબ્ભજાણુમણ્ડલિકા’’તિ.

657.‘‘Yā pana bhikkhunī avassutā avassutassa purisapuggalassa adhakkhakaṃ ubbhajāṇumaṇḍalaṃ āmasanaṃ vā parāmasanaṃ vā gahaṇaṃ vā chupanaṃ vā paṭipīḷanaṃ vā sādiyeyya, ayampi pārājikā hoti asaṃvāsā ubbhajāṇumaṇḍalikā’’ti.

૬૫૮. યા પનાતિ યા યાદિસા યથાયુત્તા યથાજચ્ચા યથાનામા યથાગોત્તા યથાસીલા યથાવિહારિની યથાગોચરા થેરા વા નવા વા મજ્ઝિમા વા, એસા વુચ્ચતિ યા પનાતિ.

658.Yāpanāti yā yādisā yathāyuttā yathājaccā yathānāmā yathāgottā yathāsīlā yathāvihārinī yathāgocarā therā vā navā vā majjhimā vā, esā vuccati yā panāti.

ભિક્ખુનીતિ ભિક્ખિકાતિ ભિક્ખુની; ભિક્ખાચરિયં અજ્ઝુપગતાતિ ભિક્ખુની; ભિન્નપટધરાતિ ભિક્ખુની ; સમઞ્ઞાય ભિક્ખુની; પટિઞ્ઞાય ભિક્ખુની; એહિ ભિક્ખુનીતિ ભિક્ખુની; તીહિ સરણગમનેહિ ઉપસમ્પન્નાતિ ભિક્ખુની; ભદ્રા ભિક્ખુની; સારા ભિક્ખુની; સેખા ભિક્ખુની; અસેખા ભિક્ખુની; સમગ્ગેન ઉભતોસઙ્ઘેન ઞત્તિચતુત્થેન કમ્મેન અકુપ્પેન ઠાનારહેન ઉપસમ્પન્નાતિ ભિક્ખુની. તત્ર યાયં ભિક્ખુની સમગ્ગેન ઉભતોસઙ્ઘેન ઞત્તિચતુત્થેન કમ્મેન અકુપ્પેન ઠાનારહેન ઉપસમ્પન્ના, અયં ઇમસ્મિં અત્થે અધિપ્પેતા ભિક્ખુનીતિ.

Bhikkhunīti bhikkhikāti bhikkhunī; bhikkhācariyaṃ ajjhupagatāti bhikkhunī; bhinnapaṭadharāti bhikkhunī ; samaññāya bhikkhunī; paṭiññāya bhikkhunī; ehi bhikkhunīti bhikkhunī; tīhi saraṇagamanehi upasampannāti bhikkhunī; bhadrā bhikkhunī; sārā bhikkhunī; sekhā bhikkhunī; asekhā bhikkhunī; samaggena ubhatosaṅghena ñatticatutthena kammena akuppena ṭhānārahena upasampannāti bhikkhunī. Tatra yāyaṃ bhikkhunī samaggena ubhatosaṅghena ñatticatutthena kammena akuppena ṭhānārahena upasampannā, ayaṃ imasmiṃ atthe adhippetā bhikkhunīti.

અવસ્સુતા નામ સારત્તા અપેક્ખવતી પટિબદ્ધચિત્તા.

Avassutā nāma sārattā apekkhavatī paṭibaddhacittā.

અવસ્સુતો નામ સારત્તો અપેક્ખવા પટિબદ્ધચિત્તો.

Avassuto nāma sāratto apekkhavā paṭibaddhacitto.

પુરિસપુગ્ગલો નામ મનુસ્સપુરિસો ન યક્ખો ન પેતો ન તિરચ્છાનગતો વિઞ્ઞૂ પટિબલો કાયસંસગ્ગં સમાપજ્જિતું.

Purisapuggalo nāma manussapuriso na yakkho na peto na tiracchānagato viññū paṭibalo kāyasaṃsaggaṃ samāpajjituṃ.

અધક્ખકન્તિ હેટ્ઠક્ખકં.

Adhakkhakanti heṭṭhakkhakaṃ.

ઉબ્ભજાણુમણ્ડલન્તિ ઉપરિજાણુમણ્ડલં.

Ubbhajāṇumaṇḍalanti uparijāṇumaṇḍalaṃ.

આમસનં નામ આમટ્ઠમત્તં.

Āmasanaṃ nāma āmaṭṭhamattaṃ.

પરામસનં નામ ઇતોચિતો ચ સઞ્ચોપનં.

Parāmasanaṃ nāma itocito ca sañcopanaṃ.

ગહણં નામ ગહિતમત્તં.

Gahaṇaṃ nāma gahitamattaṃ.

છુપનં નામ ફુટ્ઠમત્તં.

Chupanaṃ nāma phuṭṭhamattaṃ.

પટિપીળનં વા સાદિયેય્યાતિ અઙ્ગં ગહેત્વા નિપ્પીળનં સાદિયતિ.

Paṭipīḷanaṃvā sādiyeyyāti aṅgaṃ gahetvā nippīḷanaṃ sādiyati.

અયમ્પીતિ પુરિમાયો ઉપાદાય વુચ્ચતિ.

Ayampīti purimāyo upādāya vuccati.

પારાજિકા હોતીતિ સેય્યથાપિ નામ પુરિસો સીસચ્છિન્નો અભબ્બો તેન સરીરબન્ધનેન જીવિતું, એવમેવ ભિક્ખુની અવસ્સુતા અવસ્સુતસ્સ પુરિસપુગ્ગલસ્સ અધક્ખકં ઉબ્ભજાણુમણ્ડલં આમસનં વા પરામસનં વા ગહણં વા છુપનં વા પટિપીળનં વા સાદિયન્તી અસ્સમણી હોતિ અસક્યધીતા. તેન વુચ્ચતિ પારાજિકા હોતીતિ.

Pārājikā hotīti seyyathāpi nāma puriso sīsacchinno abhabbo tena sarīrabandhanena jīvituṃ, evameva bhikkhunī avassutā avassutassa purisapuggalassa adhakkhakaṃ ubbhajāṇumaṇḍalaṃ āmasanaṃ vā parāmasanaṃ vā gahaṇaṃ vā chupanaṃ vā paṭipīḷanaṃ vā sādiyantī assamaṇī hoti asakyadhītā. Tena vuccati pārājikā hotīti.

અસંવાસાતિ સંવાસો નામ એકકમ્મં એકુદ્દેસો સમસિક્ખતા, એસો સંવાસો નામ. સો તાય સદ્ધિં નત્થિ, તેન વુચ્ચતિ અસંવાસાતિ.

Asaṃvāsāti saṃvāso nāma ekakammaṃ ekuddeso samasikkhatā, eso saṃvāso nāma. So tāya saddhiṃ natthi, tena vuccati asaṃvāsāti.

૬૫૯. ઉભતોઅવસ્સુતે અધક્ખકં ઉબ્ભજાણુમણ્ડલં કાયેન કાયં આમસતિ, આપત્તિ પારાજિકસ્સ. કાયેન કાયપટિબદ્ધં આમસતિ, આપત્તિ થુલ્લચ્ચયસ્સ. કાયપટિબદ્ધેન કાયં આમસતિ, આપત્તિ થુલ્લચ્ચયસ્સ. કાયપટિબદ્ધેન કાયપટિબદ્ધં આમસતિ, આપત્તિ દુક્કટસ્સ.

659. Ubhatoavassute adhakkhakaṃ ubbhajāṇumaṇḍalaṃ kāyena kāyaṃ āmasati, āpatti pārājikassa. Kāyena kāyapaṭibaddhaṃ āmasati, āpatti thullaccayassa. Kāyapaṭibaddhena kāyaṃ āmasati, āpatti thullaccayassa. Kāyapaṭibaddhena kāyapaṭibaddhaṃ āmasati, āpatti dukkaṭassa.

નિસ્સગ્ગિયેન કાયં આમસતિ , આપત્તિ દુક્કટસ્સ. નિસ્સગ્ગિયેન કાયપટિબદ્ધં આમસતિ, આપત્તિ દુક્કટસ્સ. નિસ્સગ્ગિયેન નિસ્સગ્ગિયં આમસતિ, આપત્તિ દુક્કટસ્સ.

Nissaggiyena kāyaṃ āmasati , āpatti dukkaṭassa. Nissaggiyena kāyapaṭibaddhaṃ āmasati, āpatti dukkaṭassa. Nissaggiyena nissaggiyaṃ āmasati, āpatti dukkaṭassa.

ઉબ્ભક્ખકં અધોજાણુમણ્ડલં કાયેન કાયં આમસતિ, આપત્તિ થુલ્લચ્ચયસ્સ. કાયેન કાયપટિબદ્ધં આમસતિ, આપત્તિ દુક્કટસ્સ. કાયપટિબદ્ધેન કાયં આમસતિ, આપત્તિ દુક્કટસ્સ. કાયપટિબદ્ધેન કાયપટિબદ્ધં આમસતિ, આપત્તિ દુક્કટસ્સ.

Ubbhakkhakaṃ adhojāṇumaṇḍalaṃ kāyena kāyaṃ āmasati, āpatti thullaccayassa. Kāyena kāyapaṭibaddhaṃ āmasati, āpatti dukkaṭassa. Kāyapaṭibaddhena kāyaṃ āmasati, āpatti dukkaṭassa. Kāyapaṭibaddhena kāyapaṭibaddhaṃ āmasati, āpatti dukkaṭassa.

નિસ્સગ્ગિયેન કાયં આમસતિ, આપત્તિ દુક્કટસ્સ. નિસ્સગ્ગિયેન કાયપટિબદ્ધં આમસતિ, આપત્તિ દુક્કટસ્સ. નિસ્સગ્ગિયેન નિસ્સગ્ગિયં આમસતિ, આપત્તિ દુક્કટસ્સ.