Library / Tipiṭaka / တိပိဋက • Tipiṭaka / ဘိက္ခုနီဝိဘင္ဂ • Bhikkhunīvibhaṅga

။ နမော တသ္သ ဘဂဝတော အရဟတော သမ္မာသမ္ဗုဒ္ဓသ္သ။

Namo tassa bhagavato arahato sammāsambuddhassa

ဘိက္ခုနီဝိဘင္ဂော

Bhikkhunīvibhaṅgo

၁. ပာရာဇိကကဏ္ဍံ (ဘိက္ခုနီဝိဘင္ဂော)

1. Pārājikakaṇḍaṃ (bhikkhunīvibhaṅgo)

၁. ပဌမပာရာဇိကံ

1. Paṭhamapārājikaṃ

၆၅၆. တေန သမယေန ဗုဒ္ဓော ဘဂဝာ သာဝတ္ထိယံ ဝိဟရတိ ဇေတဝနေ အနာထပိဏ္ဍိကသ္သ အာရာမေ။ တေန ခော ပန သမယေန သာဠ္ဟော မိဂာရနတ္တာ ဘိက္ခုနိသင္ဃသ္သ ဝိဟာရံ ကတ္တုကာမော ဟောတိ။ အထ ခော သာဠ္ဟော မိဂာရနတ္တာ ဘိက္ခုနိယော ဥပသင္ကမိတ္ဝာ ဧတဒဝောစ – ‘‘ဣစ္ဆာမဟံ, အယ္ယေ, ဘိက္ခုနိသင္ဃသ္သ ဝိဟာရံ ကာတုံ။ ဒေထ မေ နဝကမ္မိကံ ဘိက္ခုနိ’’န္တိ။ တေန ခော ပန သမယေန စတသ္သော ဘဂိနိယော ဘိက္ခုနီသု ပဗ္ဗဇိတာ ဟောန္တိ – နန္ဒာ, နန္ဒဝတီ, သုန္ဒရီနန္ဒာ, ထုလ္လနန္ဒာတိ။ တာသု သုန္ဒရီနန္ဒာ ဘိက္ခုနီ တရုဏပဗ္ဗဇိတာ အဘိရူပာ ဟောတိ ဒသ္သနီယာ ပာသာဒိကာ ပဏ္ဍိတာ ဗ္ယတ္တာ မေဓာဝိနီ ဒက္ခာ အနလသာ, တတ္ရုပာယာယ ဝီမံသာယ သမန္နာဂတာ, အလံ ကာတုံ အလံ သံဝိဓာတုံ။ အထ ခော ဘိက္ခုနိသင္ဃော သုန္ဒရီနန္ဒံ ဘိက္ခုနိံ သမ္မန္နိတ္ဝာ သာဠ္ဟသ္သ မိဂာရနတ္တုနော နဝကမ္မိကံ အဒာသိ။ တေန ခော ပန သမယေန သုန္ဒရီနန္ဒာ ဘိက္ခုနီ သာဠ္ဟသ္သ မိဂာရနတ္တုနော နိဝေသနံ အဘိက္ခဏံ ဂစ္ဆတိ – ‘‘ဝာသိံ ဒေထ, ပရသုံ ¹ ဒေထ, ကုဌာရိံ ² ဒေထ, ကုဒ္ဒာလံ ဒေထ, နိခာဒနံ ဒေထာ’’တိ။ သာဠ္ဟောပိ မိဂာရနတ္တာ ဘိက္ခုနုပသ္သယံ အဘိက္ခဏံ ဂစ္ဆတိ ကတာကတံ ဇာနိတုံ။ တေ အဘိဏ္ဟဒသ္သနေန ပဋိဗဒ္ဓစိတ္တာ အဟေသုံ။

656. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena sāḷho migāranattā bhikkhunisaṅghassa vihāraṃ kattukāmo hoti. Atha kho sāḷho migāranattā bhikkhuniyo upasaṅkamitvā etadavoca – ‘‘icchāmahaṃ, ayye, bhikkhunisaṅghassa vihāraṃ kātuṃ. Detha me navakammikaṃ bhikkhuni’’nti. Tena kho pana samayena catasso bhaginiyo bhikkhunīsu pabbajitā honti – nandā, nandavatī, sundarīnandā, thullanandāti. Tāsu sundarīnandā bhikkhunī taruṇapabbajitā abhirūpā hoti dassanīyā pāsādikā paṇḍitā byattā medhāvinī dakkhā analasā, tatrupāyāya vīmaṃsāya samannāgatā, alaṃ kātuṃ alaṃ saṃvidhātuṃ. Atha kho bhikkhunisaṅgho sundarīnandaṃ bhikkhuniṃ sammannitvā sāḷhassa migāranattuno navakammikaṃ adāsi. Tena kho pana samayena sundarīnandā bhikkhunī sāḷhassa migāranattuno nivesanaṃ abhikkhaṇaṃ gacchati – ‘‘vāsiṃ detha, parasuṃ ³ detha, kuṭhāriṃ ⁴ detha, kuddālaṃ detha, nikhādanaṃ dethā’’ti. Sāḷhopi migāranattā bhikkhunupassayaṃ abhikkhaṇaṃ gacchati katākataṃ jānituṃ. Te abhiṇhadassanena paṭibaddhacittā ahesuṃ.

အထ ခော သာဠ္ဟော မိဂာရနတ္တာ သုန္ဒရီနန္ဒံ ဘိက္ခုနိံ ဒူသေတုံ ဩကာသံ အလဘမာနော ဧတဒေဝတ္ထာယ ဘိက္ခုနိသင္ဃသ္သ ဘတ္တံ အကာသိ။ အထ ခော သာဠ္ဟော မိဂာရနတ္တာ ဘတ္တဂ္ဂေ အာသနံ ပညပေန္တော – ‘‘ဧတ္တကာ ဘိက္ခုနိယော အယ္ယာယ သုန္ဒရီနန္ဒာယ ဝုဍ္ဎတရာ’’တိ ဧကမန္တံ အာသနံ ပညပေသိ ‘‘ဧတ္တကာ နဝကတရာ’’တိ – ဧကမန္တံ အာသနံ ပညပေသိ။ ပဋိစ္ဆန္နေ ဩကာသေ နိကူဋေ သုန္ဒရီနန္ဒာယ ဘိက္ခုနိယာ အာသနံ ပညပေသိ, ယထာ ထေရာ ဘိက္ခုနိယော ဇာနေယ္ယုံ – ‘‘နဝကာနံ ဘိက္ခုနီနံ သန္တိကေ နိသိန္နာ’’တိ; နဝကာပိ ဘိက္ခုနိယော ဇာနေယ္ယုံ – ‘‘ထေရာနံ ဘိက္ခုနီနံ သန္တိကေ နိသိန္နာ’’တိ။ အထ ခော သာဠ္ဟော မိဂာရနတ္တာ ဘိက္ခုနိသင္ဃသ္သ ကာလံ အာရောစာပေသိ – ‘‘ကာလော, အယ္ယေ, နိဋ္ဌိတံ ဘတ္တ’’န္တိ။ သုန္ဒရီနန္ဒာ ဘိက္ခုနီ သလ္လက္ခေတ္ဝာ – ‘‘န ဗဟုကတော သာဠ္ဟော မိဂာရနတ္တာ ဘိက္ခုနိသင္ဃသ္သ ဘတ္တံ အကာသိ; မံ သော ဒူသေတုကာမော။ သစာဟံ ဂမိသ္သာမိ ဝိသ္သရော မေ ဘဝိသ္သတီ’’တိ, အန္တေဝာသိနိံ ဘိက္ခုနိံ အာဏာပေသိ – ‘‘ဂစ္ဆ မေ ပိဏ္ဍပာတံ နီဟရ။ ယော စေ မံ ပုစ္ဆတိ, ‘ဂိလာနာ’တိ ပဋိဝေဒေဟီ’’တိ။ ‘‘ဧဝံ, အယ္ယေ’’တိ ခော သာ ဘိက္ခုနီ သုန္ဒရီနန္ဒာယ ဘိက္ခုနိယာ ပစ္စသ္သောသိ။

Atha kho sāḷho migāranattā sundarīnandaṃ bhikkhuniṃ dūsetuṃ okāsaṃ alabhamāno etadevatthāya bhikkhunisaṅghassa bhattaṃ akāsi. Atha kho sāḷho migāranattā bhattagge āsanaṃ paññapento – ‘‘ettakā bhikkhuniyo ayyāya sundarīnandāya vuḍḍhatarā’’ti ekamantaṃ āsanaṃ paññapesi ‘‘ettakā navakatarā’’ti – ekamantaṃ āsanaṃ paññapesi. Paṭicchanne okāse nikūṭe sundarīnandāya bhikkhuniyā āsanaṃ paññapesi, yathā therā bhikkhuniyo jāneyyuṃ – ‘‘navakānaṃ bhikkhunīnaṃ santike nisinnā’’ti; navakāpi bhikkhuniyo jāneyyuṃ – ‘‘therānaṃ bhikkhunīnaṃ santike nisinnā’’ti. Atha kho sāḷho migāranattā bhikkhunisaṅghassa kālaṃ ārocāpesi – ‘‘kālo, ayye, niṭṭhitaṃ bhatta’’nti. Sundarīnandā bhikkhunī sallakkhetvā – ‘‘na bahukato sāḷho migāranattā bhikkhunisaṅghassa bhattaṃ akāsi; maṃ so dūsetukāmo. Sacāhaṃ gamissāmi vissaro me bhavissatī’’ti, antevāsiniṃ bhikkhuniṃ āṇāpesi – ‘‘gaccha me piṇḍapātaṃ nīhara. Yo ce maṃ pucchati, ‘gilānā’ti paṭivedehī’’ti. ‘‘Evaṃ, ayye’’ti kho sā bhikkhunī sundarīnandāya bhikkhuniyā paccassosi.

တေန ခော ပန သမယေန သာဠ္ဟော မိဂာရနတ္တာ ဗဟိဒ္ဝာရကောဋ္ဌကေ ဌိတော ဟောတိ သုန္ဒရီနန္ဒံ ဘိက္ခုနိံ ပဋိပုစ္ဆန္တော – ‘‘ကဟံ, အယ္ယေ, အယ္ယာ သုန္ဒရီနန္ဒာ? ကဟံ, အယ္ယေ, အယ္ယာ သုန္ဒရီနန္ဒာ’’တိ? ဧဝံ ဝုတ္တေ သုန္ဒရီနန္ဒာယ ဘိက္ခုနိယာ အန္တေဝာသိနီ ဘိက္ခုနီ သာဠ္ဟံ မိဂာရနတ္တာရံ ဧတဒဝောစ – ‘‘ဂိလာနာဝုသော; ပိဏ္ဍပာတံ နီဟရိသ္သာမီ’’တိ။ အထ ခော သာဠ္ဟော မိဂာရနတ္တာ – ‘‘ယမ္ပာဟံ အတ္ထာယ ⁵ ဘိက္ခုနိသင္ဃသ္သ ဘတ္တံ အကာသိံ အယ္ယာယ သုန္ဒရီနန္ဒာယ ကာရဏာ’’တိ မနုသ္သေ အာဏာပေတ္ဝာ – ‘‘ဘိက္ခုနိသင္ဃံ ဘတ္တေန ပရိဝိသထာ’’တိ ဝတ္ဝာ ယေန ဘိက္ခုနုပသ္သယော တေနုပသင္ကမိ။ တေန ခော ပန သမယေန သုန္ဒရီနန္ဒာ ဘိက္ခုနီ ဗဟာရာမကောဋ္ဌကေ ဌိတာ ဟောတိ သာဠ္ဟံ မိဂာရနတ္တာရံ ပတိမာနေန္တီ။ အဒ္ဒသာ ခော သုန္ဒရီနန္ဒာ ဘိက္ခုနီ သာဠ္ဟံ မိဂာရနတ္တာရံ ဒူရတောဝ အာဂစ္ဆန္တံ။ ဒိသ္ဝာန ဥပသ္သယံ ပဝိသိတ္ဝာ သသီသံ ပာရုပိတ္ဝာ မဉ္စကေ နိပဇ္ဇိ။ အထ ခော သာဠ္ဟော မိဂာရနတ္တာ ယေန သုန္ဒရီနန္ဒာ ဘိက္ခုနီ တေနုပသင္ကမိ; ဥပသင္ကမိတ္ဝာ သုန္ဒရီနန္ဒံ ဘိက္ခုနိံ ဧတဒဝောစ – ‘‘ကိံ တေ, အယ္ယေ, အဖာသု, ကိသ္သ နိပန္နာသီ’’တိ? ‘‘ဧဝဉ္ဟေတံ, အာဝုသော, ဟောတိ ယာ အနိစ္ဆန္တံ ဣစ္ဆတီ’’တိ။ ‘‘က္ယာဟံ တံ, အယ္ယေ , န ဣစ္ဆိသ္သာမိ? အပိ စာဟံ ဩကာသံ န လဘာမိ တံ ဒူသေတု’’န္တိ။ အဝသ္သုတော အဝသ္သုတာယ သုန္ဒရီနန္ဒာယ ဘိက္ခုနိယာ ကာယသံသဂ္ဂံ သမာပဇ္ဇိ။

Tena kho pana samayena sāḷho migāranattā bahidvārakoṭṭhake ṭhito hoti sundarīnandaṃ bhikkhuniṃ paṭipucchanto – ‘‘kahaṃ, ayye, ayyā sundarīnandā? Kahaṃ, ayye, ayyā sundarīnandā’’ti? Evaṃ vutte sundarīnandāya bhikkhuniyā antevāsinī bhikkhunī sāḷhaṃ migāranattāraṃ etadavoca – ‘‘gilānāvuso; piṇḍapātaṃ nīharissāmī’’ti. Atha kho sāḷho migāranattā – ‘‘yampāhaṃ atthāya ⁶ bhikkhunisaṅghassa bhattaṃ akāsiṃ ayyāya sundarīnandāya kāraṇā’’ti manusse āṇāpetvā – ‘‘bhikkhunisaṅghaṃ bhattena parivisathā’’ti vatvā yena bhikkhunupassayo tenupasaṅkami. Tena kho pana samayena sundarīnandā bhikkhunī bahārāmakoṭṭhake ṭhitā hoti sāḷhaṃ migāranattāraṃ patimānentī. Addasā kho sundarīnandā bhikkhunī sāḷhaṃ migāranattāraṃ dūratova āgacchantaṃ. Disvāna upassayaṃ pavisitvā sasīsaṃ pārupitvā mañcake nipajji. Atha kho sāḷho migāranattā yena sundarīnandā bhikkhunī tenupasaṅkami; upasaṅkamitvā sundarīnandaṃ bhikkhuniṃ etadavoca – ‘‘kiṃ te, ayye, aphāsu, kissa nipannāsī’’ti? ‘‘Evañhetaṃ, āvuso, hoti yā anicchantaṃ icchatī’’ti. ‘‘Kyāhaṃ taṃ, ayye , na icchissāmi? Api cāhaṃ okāsaṃ na labhāmi taṃ dūsetu’’nti. Avassuto avassutāya sundarīnandāya bhikkhuniyā kāyasaṃsaggaṃ samāpajji.

တေန ခော ပန သမယေန အညတရာ ဘိက္ခုနီ ဇရာဒုဗ္ဗလာ စရဏဂိလာနာ သုန္ဒရီနန္ဒာယ ဘိက္ခုနိယာ အဝိဒူရေ နိပန္နာ ဟောတိ။ အဒ္ဒသာ ခော သာ ဘိက္ခုနီ သာဠ္ဟံ မိဂာရနတ္တာရံ အဝသ္သုတံ အဝသ္သုတာယ သုန္ဒရီနန္ဒာယ ဘိက္ခုနိယာ ကာယသံသဂ္ဂံ သမာပဇ္ဇန္တံ။ ဒိသ္ဝာန ဥဇ္ဈာယတိ ခိယ္ယတိ ဝိပာစေတိ – ‘‘ကထဉ္ဟိ နာမ အယ္ယာ သုန္ဒရီနန္ဒာ အဝသ္သုတာ အဝသ္သုတသ္သ ပုရိသပုဂ္ဂလသ္သ ကာယသံသဂ္ဂံ သာဒိယိသ္သတီ’’တိ ! အထ ခော သာ ဘိက္ခုနီ ဘိက္ခုနီနံ ဧတမတ္ထံ အာရောစေသိ။ ယာ တာ ဘိက္ခုနိယော အပ္ပိစ္ဆာ သန္တုဋ္ဌာ လဇ္ဇိနိယော ကုက္ကုစ္စိကာ သိက္ခာကာမာ တာ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ အယ္ယာ သုန္ဒရီနန္ဒာ အဝသ္သုတာ အဝသ္သုတသ္သ ပုရိသပုဂ္ဂလသ္သ ကာယသံသဂ္ဂံ သာဒိယိသ္သတီ’’တိ! အထ ခော တာ ဘိက္ခုနိယော ဘိက္ခူနံ ဧတမတ္ထံ အာရောစေသုံ။ ယေ တေ ဘိက္ခူ အပ္ပိစ္ဆာ သန္တုဋ္ဌာ လဇ္ဇိနော ကုက္ကုစ္စကာ သိက္ခာကာမာ တေ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ သုန္ဒရီနန္ဒာ ဘိက္ခုနီ အဝသ္သုတာ အဝသ္သုတသ္သ ပုရိသပုဂ္ဂလသ္သ ကာယသံသဂ္ဂံ သာဒိယိသ္သတီ’’တိ!

Tena kho pana samayena aññatarā bhikkhunī jarādubbalā caraṇagilānā sundarīnandāya bhikkhuniyā avidūre nipannā hoti. Addasā kho sā bhikkhunī sāḷhaṃ migāranattāraṃ avassutaṃ avassutāya sundarīnandāya bhikkhuniyā kāyasaṃsaggaṃ samāpajjantaṃ. Disvāna ujjhāyati khiyyati vipāceti – ‘‘kathañhi nāma ayyā sundarīnandā avassutā avassutassa purisapuggalassa kāyasaṃsaggaṃ sādiyissatī’’ti ! Atha kho sā bhikkhunī bhikkhunīnaṃ etamatthaṃ ārocesi. Yā tā bhikkhuniyo appicchā santuṭṭhā lajjiniyo kukkuccikā sikkhākāmā tā ujjhāyanti khiyyanti vipācenti – ‘‘kathañhi nāma ayyā sundarīnandā avassutā avassutassa purisapuggalassa kāyasaṃsaggaṃ sādiyissatī’’ti! Atha kho tā bhikkhuniyo bhikkhūnaṃ etamatthaṃ ārocesuṃ. Ye te bhikkhū appicchā santuṭṭhā lajjino kukkuccakā sikkhākāmā te ujjhāyanti khiyyanti vipācenti – ‘‘kathañhi nāma sundarīnandā bhikkhunī avassutā avassutassa purisapuggalassa kāyasaṃsaggaṃ sādiyissatī’’ti!

အထ ခော တေ ဘိက္ခူ သုန္ဒရီနန္ဒံ ဘိက္ခုနိံ အနေကပရိယာယေန ဝိဂရဟိတ္ဝာ ဘဂဝတော ဧတမတ္ထံ အာရောစေသုံ။ အထ ခော ဘဂဝာ ဧတသ္မိံ နိဒာနေ ဧတသ္မိံ ပကရဏေ ဘိက္ခုသင္ဃံ သန္နိပာတာပေတ္ဝာ ဘိက္ခူ ပဋိပုစ္ဆိ – ‘‘သစ္စံ ကိရ, ဘိက္ခဝေ, သုန္ဒရီနန္ဒာ ဘိက္ခုနီ အဝသ္သုတာ အဝသ္သုတသ္သ ပုရိသပုဂ္ဂလသ္သ ကာယသံသဂ္ဂံ သာဒိယတီ’’တိ ⁷? ‘‘သစ္စံ, ဘဂဝာ’’တိ။ ဝိဂရဟိ ဗုဒ္ဓော ဘဂဝာ – ‘‘အနနုစ္ဆဝိကံ, ဘိက္ခဝေ, သုန္ဒရီနန္ဒာယ ဘိက္ခုနိယာ အနနုလောမိကံ အပ္ပတိရူပံ အသ္သာမဏကံ အကပ္ပိယံ အကရဏီယံ။ ကထဉ္ဟိ နာမ, ဘိက္ခဝေ, သုန္ဒရီနန္ဒာ ဘိက္ခုနီ အဝသ္သုတာ အဝသ္သုတသ္သ ပုရိသပုဂ္ဂလသ္သ ကာယသံသဂ္ဂံ သာဒိယိသ္သတိ! နေတံ, ဘိက္ခဝေ, အပ္ပသန္နာနံ ဝာ ပသာဒာယ ပသန္နာနံ ဝာ ဘိယ္ယောဘာဝာယ။ အထ ခ္ဝေတံ, ဘိက္ခဝေ , အပ္ပသန္နာနဉ္စေဝ အပ္ပသာဒာယ ပသန္နာနဉ္စ ဧကစ္စာနံ အညထတ္တာယာ’’တိ။ အထ ခော ဘဂဝာ သုန္ဒရီနန္ဒံ ဘိက္ခုနိံ အနေကပရိယာယေန ဝိဂရဟိတ္ဝာ ဒုဗ္ဘရတာယ ဒုပ္ပောသတာယ မဟိစ္ဆတာယ အသန္တုဋ္ဌိတာယ ⁸ သင္ဂဏိကာယ ကောသဇ္ဇသ္သ အဝဏ္ဏံ ဘာသိတ္ဝာ, အနေကပရိယာယေန သုဘရတာယ သုပောသတာယ အပ္ပိစ္ဆသ္သ သန္တုဋ္ဌသ္သ ⁹ သလ္လေခသ္သ ဓုတသ္သ ပာသာဒိကသ္သ အပစယသ္သ ဝီရိယာရမ္ဘသ္သ ဝဏ္ဏံ ဘာသိတ္ဝာ, ဘိက္ခူနံ တဒနုစ္ဆဝိကံ တဒနုလောမိကံ ဓမ္မိံ ကထံ ကတ္ဝာ ဘိက္ခူ အာမန္တေသိ – ‘‘တေန ဟိ, ဘိက္ခဝေ, ဘိက္ခုနီနံ သိက္ခာပဒံ ပညပေသ္သာမိ ဒသ အတ္ထဝသေ ပဋိစ္စ – သင္ဃသုဋ္ဌုတာယ, သင္ဃဖာသုတာယ, ဒုမ္မင္ကူနံ ဘိက္ခုနီနံ နိဂ္ဂဟာယ , ပေသလာနံ ဘိက္ခုနီနံ ဖာသုဝိဟာရာယ, ဒိဋ္ဌဓမ္မိကာနံ အာသဝာနံ သံဝရာယ, သမ္ပရာယိကာနံ အာသဝာနံ ပဋိဃာတာယ, အပ္ပသန္နာနံ ပသာဒာယ, ပသန္နာနံ ဘိယ္ယောဘာဝာယ, သဒ္ဓမ္မဋ္ဌိတိယာ ဝိနယာနုဂ္ဂဟာယ။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခာပဒံ ဥဒ္ဒိသန္တု –

Atha kho te bhikkhū sundarīnandaṃ bhikkhuniṃ anekapariyāyena vigarahitvā bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā bhikkhū paṭipucchi – ‘‘saccaṃ kira, bhikkhave, sundarīnandā bhikkhunī avassutā avassutassa purisapuggalassa kāyasaṃsaggaṃ sādiyatī’’ti ¹⁰? ‘‘Saccaṃ, bhagavā’’ti. Vigarahi buddho bhagavā – ‘‘ananucchavikaṃ, bhikkhave, sundarīnandāya bhikkhuniyā ananulomikaṃ appatirūpaṃ assāmaṇakaṃ akappiyaṃ akaraṇīyaṃ. Kathañhi nāma, bhikkhave, sundarīnandā bhikkhunī avassutā avassutassa purisapuggalassa kāyasaṃsaggaṃ sādiyissati! Netaṃ, bhikkhave, appasannānaṃ vā pasādāya pasannānaṃ vā bhiyyobhāvāya. Atha khvetaṃ, bhikkhave , appasannānañceva appasādāya pasannānañca ekaccānaṃ aññathattāyā’’ti. Atha kho bhagavā sundarīnandaṃ bhikkhuniṃ anekapariyāyena vigarahitvā dubbharatāya dupposatāya mahicchatāya asantuṭṭhitāya ¹¹ saṅgaṇikāya kosajjassa avaṇṇaṃ bhāsitvā, anekapariyāyena subharatāya suposatāya appicchassa santuṭṭhassa ¹² sallekhassa dhutassa pāsādikassa apacayassa vīriyārambhassa vaṇṇaṃ bhāsitvā, bhikkhūnaṃ tadanucchavikaṃ tadanulomikaṃ dhammiṃ kathaṃ katvā bhikkhū āmantesi – ‘‘tena hi, bhikkhave, bhikkhunīnaṃ sikkhāpadaṃ paññapessāmi dasa atthavase paṭicca – saṅghasuṭṭhutāya, saṅghaphāsutāya, dummaṅkūnaṃ bhikkhunīnaṃ niggahāya , pesalānaṃ bhikkhunīnaṃ phāsuvihārāya, diṭṭhadhammikānaṃ āsavānaṃ saṃvarāya, samparāyikānaṃ āsavānaṃ paṭighātāya, appasannānaṃ pasādāya, pasannānaṃ bhiyyobhāvāya, saddhammaṭṭhitiyā vinayānuggahāya. Evañca pana, bhikkhave, bhikkhuniyo imaṃ sikkhāpadaṃ uddisantu –

၆၅၇. ‘‘ယာ ပန ဘိက္ခုနီ အဝသ္သုတာ အဝသ္သုတသ္သ ပုရိသပုဂ္ဂလသ္သ အဓက္ခကံ ဥဗ္ဘဇာဏုမဏ္ဍလံ အာမသနံ ဝာ ပရာမသနံ ဝာ ဂဟဏံ ဝာ ဆုပနံ ဝာ ပဋိပီဠနံ ဝာ သာဒိယေယ္ယ, အယမ္ပိ ပာရာဇိကာ ဟောတိ အသံဝာသာ ဥဗ္ဘဇာဏုမဏ္ဍလိကာ’’တိ။

657.‘‘Yā pana bhikkhunī avassutā avassutassa purisapuggalassa adhakkhakaṃ ubbhajāṇumaṇḍalaṃ āmasanaṃ vā parāmasanaṃ vā gahaṇaṃ vā chupanaṃ vā paṭipīḷanaṃ vā sādiyeyya, ayampi pārājikā hoti asaṃvāsā ubbhajāṇumaṇḍalikā’’ti.

၆၅၈. ယာ ပနာတိ ယာ ယာဒိသာ ယထာယုတ္တာ ယထာဇစ္စာ ယထာနာမာ ယထာဂောတ္တာ ယထာသီလာ ယထာဝိဟာရိနီ ယထာဂောစရာ ထေရာ ဝာ နဝာ ဝာ မဇ္ဈိမာ ဝာ, ဧသာ ဝုစ္စတိ ယာ ပနာတိ။

658.Yāpanāti yā yādisā yathāyuttā yathājaccā yathānāmā yathāgottā yathāsīlā yathāvihārinī yathāgocarā therā vā navā vā majjhimā vā, esā vuccati yā panāti.

ဘိက္ခုနီတိ ဘိက္ခိကာတိ ဘိက္ခုနီ; ဘိက္ခာစရိယံ အဇ္ဈုပဂတာတိ ဘိက္ခုနီ; ဘိန္နပဋဓရာတိ ဘိက္ခုနီ ; သမညာယ ဘိက္ခုနီ; ပဋိညာယ ဘိက္ခုနီ; ဧဟိ ဘိက္ခုနီတိ ဘိက္ခုနီ; တီဟိ သရဏဂမနေဟိ ဥပသမ္ပန္နာတိ ဘိက္ခုနီ; ဘဒ္ရာ ဘိက္ခုနီ; သာရာ ဘိက္ခုနီ; သေခာ ဘိက္ခုနီ; အသေခာ ဘိက္ခုနီ; သမဂ္ဂေန ဥဘတောသင္ဃေန ဉတ္တိစတုတ္ထေန ကမ္မေန အကုပ္ပေန ဌာနာရဟေန ဥပသမ္ပန္နာတိ ဘိက္ခုနီ။ တတ္ရ ယာယံ ဘိက္ခုနီ သမဂ္ဂေန ဥဘတောသင္ဃေန ဉတ္တိစတုတ္ထေန ကမ္မေန အကုပ္ပေန ဌာနာရဟေန ဥပသမ္ပန္နာ, အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။

Bhikkhunīti bhikkhikāti bhikkhunī; bhikkhācariyaṃ ajjhupagatāti bhikkhunī; bhinnapaṭadharāti bhikkhunī ; samaññāya bhikkhunī; paṭiññāya bhikkhunī; ehi bhikkhunīti bhikkhunī; tīhi saraṇagamanehi upasampannāti bhikkhunī; bhadrā bhikkhunī; sārā bhikkhunī; sekhā bhikkhunī; asekhā bhikkhunī; samaggena ubhatosaṅghena ñatticatutthena kammena akuppena ṭhānārahena upasampannāti bhikkhunī. Tatra yāyaṃ bhikkhunī samaggena ubhatosaṅghena ñatticatutthena kammena akuppena ṭhānārahena upasampannā, ayaṃ imasmiṃ atthe adhippetā bhikkhunīti.

အဝသ္သုတာ နာမ သာရတ္တာ အပေက္ခဝတီ ပဋိဗဒ္ဓစိတ္တာ။

Avassutā nāma sārattā apekkhavatī paṭibaddhacittā.

အဝသ္သုတော နာမ သာရတ္တော အပေက္ခဝာ ပဋိဗဒ္ဓစိတ္တော။

Avassuto nāma sāratto apekkhavā paṭibaddhacitto.

ပုရိသပုဂ္ဂလော နာမ မနုသ္သပုရိသော န ယက္ခော န ပေတော န တိရစ္ဆာနဂတော ဝိညူ ပဋိဗလော ကာယသံသဂ္ဂံ သမာပဇ္ဇိတုံ။

Purisapuggalo nāma manussapuriso na yakkho na peto na tiracchānagato viññū paṭibalo kāyasaṃsaggaṃ samāpajjituṃ.

အဓက္ခကန္တိ ဟေဋ္ဌက္ခကံ။

Adhakkhakanti heṭṭhakkhakaṃ.

ဥဗ္ဘဇာဏုမဏ္ဍလန္တိ ဥပရိဇာဏုမဏ္ဍလံ။

Ubbhajāṇumaṇḍalanti uparijāṇumaṇḍalaṃ.

အာမသနံ နာမ အာမဋ္ဌမတ္တံ။

Āmasanaṃ nāma āmaṭṭhamattaṃ.

ပရာမသနံ နာမ ဣတောစိတော စ သဉ္စောပနံ။

Parāmasanaṃ nāma itocito ca sañcopanaṃ.

ဂဟဏံ နာမ ဂဟိတမတ္တံ။

Gahaṇaṃ nāma gahitamattaṃ.

ဆုပနံ နာမ ဖုဋ္ဌမတ္တံ။

Chupanaṃ nāma phuṭṭhamattaṃ.

ပဋိပီဠနံ ဝာ သာဒိယေယ္ယာတိ အင္ဂံ ဂဟေတ္ဝာ နိပ္ပီဠနံ သာဒိယတိ။

Paṭipīḷanaṃvā sādiyeyyāti aṅgaṃ gahetvā nippīḷanaṃ sādiyati.

အယမ္ပီတိ ပုရိမာယော ဥပာဒာယ ဝုစ္စတိ။

Ayampīti purimāyo upādāya vuccati.

ပာရာဇိကာ ဟောတီတိ သေယ္ယထာပိ နာမ ပုရိသော သီသစ္ဆိန္နော အဘဗ္ဗော တေန သရီရဗန္ဓနေန ဇီဝိတုံ, ဧဝမေဝ ဘိက္ခုနီ အဝသ္သုတာ အဝသ္သုတသ္သ ပုရိသပုဂ္ဂလသ္သ အဓက္ခကံ ဥဗ္ဘဇာဏုမဏ္ဍလံ အာမသနံ ဝာ ပရာမသနံ ဝာ ဂဟဏံ ဝာ ဆုပနံ ဝာ ပဋိပီဠနံ ဝာ သာဒိယန္တီ အသ္သမဏီ ဟောတိ အသက္ယဓီတာ။ တေန ဝုစ္စတိ ပာရာဇိကာ ဟောတီတိ။

Pārājikā hotīti seyyathāpi nāma puriso sīsacchinno abhabbo tena sarīrabandhanena jīvituṃ, evameva bhikkhunī avassutā avassutassa purisapuggalassa adhakkhakaṃ ubbhajāṇumaṇḍalaṃ āmasanaṃ vā parāmasanaṃ vā gahaṇaṃ vā chupanaṃ vā paṭipīḷanaṃ vā sādiyantī assamaṇī hoti asakyadhītā. Tena vuccati pārājikā hotīti.

အသံဝာသာတိ သံဝာသော နာမ ဧကကမ္မံ ဧကုဒ္ဒေသော သမသိက္ခတာ, ဧသော သံဝာသော နာမ။ သော တာယ သဒ္ဓိံ နတ္ထိ, တေန ဝုစ္စတိ အသံဝာသာတိ။

Asaṃvāsāti saṃvāso nāma ekakammaṃ ekuddeso samasikkhatā, eso saṃvāso nāma. So tāya saddhiṃ natthi, tena vuccati asaṃvāsāti.

၆၅၉. ဥဘတောအဝသ္သုတေ အဓက္ခကံ ဥဗ္ဘဇာဏုမဏ္ဍလံ ကာယေန ကာယံ အာမသတိ, အာပတ္တိ ပာရာဇိကသ္သ။ ကာယေန ကာယပဋိဗဒ္ဓံ အာမသတိ, အာပတ္တိ ထုလ္လစ္စယသ္သ။ ကာယပဋိဗဒ္ဓေန ကာယံ အာမသတိ, အာပတ္တိ ထုလ္လစ္စယသ္သ။ ကာယပဋိဗဒ္ဓေန ကာယပဋိဗဒ္ဓံ အာမသတိ, အာပတ္တိ ဒုက္ကဋသ္သ။

659. Ubhatoavassute adhakkhakaṃ ubbhajāṇumaṇḍalaṃ kāyena kāyaṃ āmasati, āpatti pārājikassa. Kāyena kāyapaṭibaddhaṃ āmasati, āpatti thullaccayassa. Kāyapaṭibaddhena kāyaṃ āmasati, āpatti thullaccayassa. Kāyapaṭibaddhena kāyapaṭibaddhaṃ āmasati, āpatti dukkaṭassa.

နိသ္သဂ္ဂိယေန ကာယံ အာမသတိ , အာပတ္တိ ဒုက္ကဋသ္သ။ နိသ္သဂ္ဂိယေန ကာယပဋိဗဒ္ဓံ အာမသတိ, အာပတ္တိ ဒုက္ကဋသ္သ။ နိသ္သဂ္ဂိယေန နိသ္သဂ္ဂိယံ အာမသတိ, အာပတ္တိ ဒုက္ကဋသ္သ။

Nissaggiyena kāyaṃ āmasati , āpatti dukkaṭassa. Nissaggiyena kāyapaṭibaddhaṃ āmasati, āpatti dukkaṭassa. Nissaggiyena nissaggiyaṃ āmasati, āpatti dukkaṭassa.

ဥဗ္ဘက္ခကံ အဓောဇာဏုမဏ္ဍလံ ကာယေန ကာယံ အာမသတိ, အာပတ္တိ ထုလ္လစ္စယသ္သ။ ကာယေန ကာယပဋိဗဒ္ဓံ အာမသတိ, အာပတ္တိ ဒုက္ကဋသ္သ။ ကာယပဋိဗဒ္ဓေန ကာယံ အာမသတိ, အာပတ္တိ ဒုက္ကဋသ္သ။ ကာယပဋိဗဒ္ဓေန ကာယပဋိဗဒ္ဓံ အာမသတိ, အာပတ္တိ ဒုက္ကဋသ္သ။

Ubbhakkhakaṃ adhojāṇumaṇḍalaṃ kāyena kāyaṃ āmasati, āpatti thullaccayassa. Kāyena kāyapaṭibaddhaṃ āmasati, āpatti dukkaṭassa. Kāyapaṭibaddhena kāyaṃ āmasati, āpatti dukkaṭassa. Kāyapaṭibaddhena kāyapaṭibaddhaṃ āmasati, āpatti dukkaṭassa.