Library / Tipiṭaka / ཏིཔིཊཀ • Tipiṭaka / བྷིཀྑུནཱིཝིབྷངྒ • Bhikkhunīvibhaṅga

༎ ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ༎

Namo tassa bhagavato arahato sammāsambuddhassa

བྷིཀྑུནཱིཝིབྷངྒོ

Bhikkhunīvibhaṅgo

༡. པཱརཱཛིཀཀཎྜཾ (བྷིཀྑུནཱིཝིབྷངྒོ)

1. Pārājikakaṇḍaṃ (bhikkhunīvibhaṅgo)

༡. པཋམཔཱརཱཛིཀཾ

1. Paṭhamapārājikaṃ

༦༥༦. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན སཱལ༹ྷོ མིགཱརནཏྟཱ བྷིཀྑུནིསངྒྷསྶ ཝིཧཱརཾ ཀཏྟུཀཱམོ ཧོཏི། ཨཐ ཁོ སཱལ༹ྷོ མིགཱརནཏྟཱ བྷིཀྑུནིཡོ ཨུཔསངྐམིཏྭཱ ཨེཏདཝོཙ – ‘‘ཨིཙྪཱམཧཾ, ཨཡྻེ, བྷིཀྑུནིསངྒྷསྶ ཝིཧཱརཾ ཀཱཏུཾ། དེཐ མེ ནཝཀམྨིཀཾ བྷིཀྑུནི’’ནྟི། ཏེན ཁོ པན སམཡེན ཙཏསྶོ བྷགིནིཡོ བྷིཀྑུནཱིསུ པབྦཛིཏཱ ཧོནྟི – ནནྡཱ, ནནྡཝཏཱི, སུནྡརཱིནནྡཱ, ཐུལླནནྡཱཏི། ཏཱསུ སུནྡརཱིནནྡཱ བྷིཀྑུནཱི ཏརུཎཔབྦཛིཏཱ ཨབྷིརཱུཔཱ ཧོཏི དསྶནཱིཡཱ པཱསཱདིཀཱ པཎྜིཏཱ བྱཏྟཱ མེདྷཱཝིནཱི དཀྑཱ ཨནལསཱ, ཏཏྲུཔཱཡཱཡ ཝཱིམཾསཱཡ སམནྣཱགཏཱ, ཨལཾ ཀཱཏུཾ ཨལཾ སཾཝིདྷཱཏུཾ། ཨཐ ཁོ བྷིཀྑུནིསངྒྷོ སུནྡརཱིནནྡཾ བྷིཀྑུནིཾ སམྨནྣིཏྭཱ སཱལ༹ྷསྶ མིགཱརནཏྟུནོ ནཝཀམྨིཀཾ ཨདཱསི། ཏེན ཁོ པན སམཡེན སུནྡརཱིནནྡཱ བྷིཀྑུནཱི སཱལ༹ྷསྶ མིགཱརནཏྟུནོ ནིཝེསནཾ ཨབྷིཀྑཎཾ གཙྪཏི – ‘‘ཝཱསིཾ དེཐ, པརསུཾ ¹ དེཐ, ཀུཋཱརིཾ ² དེཐ, ཀུདྡཱལཾ དེཐ, ནིཁཱདནཾ དེཐཱ’’ཏི། སཱལ༹ྷོཔི མིགཱརནཏྟཱ བྷིཀྑུནུཔསྶཡཾ ཨབྷིཀྑཎཾ གཙྪཏི ཀཏཱཀཏཾ ཛཱནིཏུཾ། ཏེ ཨབྷིཎྷདསྶནེན པཊིབདྡྷཙིཏྟཱ ཨཧེསུཾ།

656. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena sāḷho migāranattā bhikkhunisaṅghassa vihāraṃ kattukāmo hoti. Atha kho sāḷho migāranattā bhikkhuniyo upasaṅkamitvā etadavoca – ‘‘icchāmahaṃ, ayye, bhikkhunisaṅghassa vihāraṃ kātuṃ. Detha me navakammikaṃ bhikkhuni’’nti. Tena kho pana samayena catasso bhaginiyo bhikkhunīsu pabbajitā honti – nandā, nandavatī, sundarīnandā, thullanandāti. Tāsu sundarīnandā bhikkhunī taruṇapabbajitā abhirūpā hoti dassanīyā pāsādikā paṇḍitā byattā medhāvinī dakkhā analasā, tatrupāyāya vīmaṃsāya samannāgatā, alaṃ kātuṃ alaṃ saṃvidhātuṃ. Atha kho bhikkhunisaṅgho sundarīnandaṃ bhikkhuniṃ sammannitvā sāḷhassa migāranattuno navakammikaṃ adāsi. Tena kho pana samayena sundarīnandā bhikkhunī sāḷhassa migāranattuno nivesanaṃ abhikkhaṇaṃ gacchati – ‘‘vāsiṃ detha, parasuṃ ³ detha, kuṭhāriṃ ⁴ detha, kuddālaṃ detha, nikhādanaṃ dethā’’ti. Sāḷhopi migāranattā bhikkhunupassayaṃ abhikkhaṇaṃ gacchati katākataṃ jānituṃ. Te abhiṇhadassanena paṭibaddhacittā ahesuṃ.

ཨཐ ཁོ སཱལ༹ྷོ མིགཱརནཏྟཱ སུནྡརཱིནནྡཾ བྷིཀྑུནིཾ དཱུསེཏུཾ ཨོཀཱསཾ ཨལབྷམཱནོ ཨེཏདེཝཏྠཱཡ བྷིཀྑུནིསངྒྷསྶ བྷཏྟཾ ཨཀཱསི། ཨཐ ཁོ སཱལ༹ྷོ མིགཱརནཏྟཱ བྷཏྟགྒེ ཨཱསནཾ པཉྙཔེནྟོ – ‘‘ཨེཏྟཀཱ བྷིཀྑུནིཡོ ཨཡྻཱཡ སུནྡརཱིནནྡཱཡ ཝུཌྜྷཏརཱ’’ཏི ཨེཀམནྟཾ ཨཱསནཾ པཉྙཔེསི ‘‘ཨེཏྟཀཱ ནཝཀཏརཱ’’ཏི – ཨེཀམནྟཾ ཨཱསནཾ པཉྙཔེསི། པཊིཙྪནྣེ ཨོཀཱསེ ནིཀཱུཊེ སུནྡརཱིནནྡཱཡ བྷིཀྑུནིཡཱ ཨཱསནཾ པཉྙཔེསི, ཡཐཱ ཐེརཱ བྷིཀྑུནིཡོ ཛཱནེཡྻུཾ – ‘‘ནཝཀཱནཾ བྷིཀྑུནཱིནཾ སནྟིཀེ ནིསིནྣཱ’’ཏི; ནཝཀཱཔི བྷིཀྑུནིཡོ ཛཱནེཡྻུཾ – ‘‘ཐེརཱནཾ བྷིཀྑུནཱིནཾ སནྟིཀེ ནིསིནྣཱ’’ཏི། ཨཐ ཁོ སཱལ༹ྷོ མིགཱརནཏྟཱ བྷིཀྑུནིསངྒྷསྶ ཀཱལཾ ཨཱརོཙཱཔེསི – ‘‘ཀཱལོ, ཨཡྻེ, ནིཊྛིཏཾ བྷཏྟ’’ནྟི། སུནྡརཱིནནྡཱ བྷིཀྑུནཱི སལླཀྑེཏྭཱ – ‘‘ན བཧུཀཏོ སཱལ༹ྷོ མིགཱརནཏྟཱ བྷིཀྑུནིསངྒྷསྶ བྷཏྟཾ ཨཀཱསི; མཾ སོ དཱུསེཏུཀཱམོ། སཙཱཧཾ གམིསྶཱམི ཝིསྶརོ མེ བྷཝིསྶཏཱི’’ཏི, ཨནྟེཝཱསིནིཾ བྷིཀྑུནིཾ ཨཱཎཱཔེསི – ‘‘གཙྪ མེ པིཎྜཔཱཏཾ ནཱིཧར། ཡོ ཙེ མཾ པུཙྪཏི, ‘གིལཱནཱ’ཏི པཊིཝེདེཧཱི’’ཏི། ‘‘ཨེཝཾ, ཨཡྻེ’’ཏི ཁོ སཱ བྷིཀྑུནཱི སུནྡརཱིནནྡཱཡ བྷིཀྑུནིཡཱ པཙྩསྶོསི།

Atha kho sāḷho migāranattā sundarīnandaṃ bhikkhuniṃ dūsetuṃ okāsaṃ alabhamāno etadevatthāya bhikkhunisaṅghassa bhattaṃ akāsi. Atha kho sāḷho migāranattā bhattagge āsanaṃ paññapento – ‘‘ettakā bhikkhuniyo ayyāya sundarīnandāya vuḍḍhatarā’’ti ekamantaṃ āsanaṃ paññapesi ‘‘ettakā navakatarā’’ti – ekamantaṃ āsanaṃ paññapesi. Paṭicchanne okāse nikūṭe sundarīnandāya bhikkhuniyā āsanaṃ paññapesi, yathā therā bhikkhuniyo jāneyyuṃ – ‘‘navakānaṃ bhikkhunīnaṃ santike nisinnā’’ti; navakāpi bhikkhuniyo jāneyyuṃ – ‘‘therānaṃ bhikkhunīnaṃ santike nisinnā’’ti. Atha kho sāḷho migāranattā bhikkhunisaṅghassa kālaṃ ārocāpesi – ‘‘kālo, ayye, niṭṭhitaṃ bhatta’’nti. Sundarīnandā bhikkhunī sallakkhetvā – ‘‘na bahukato sāḷho migāranattā bhikkhunisaṅghassa bhattaṃ akāsi; maṃ so dūsetukāmo. Sacāhaṃ gamissāmi vissaro me bhavissatī’’ti, antevāsiniṃ bhikkhuniṃ āṇāpesi – ‘‘gaccha me piṇḍapātaṃ nīhara. Yo ce maṃ pucchati, ‘gilānā’ti paṭivedehī’’ti. ‘‘Evaṃ, ayye’’ti kho sā bhikkhunī sundarīnandāya bhikkhuniyā paccassosi.

ཏེན ཁོ པན སམཡེན སཱལ༹ྷོ མིགཱརནཏྟཱ བཧིདྭཱརཀོཊྛཀེ ཋིཏོ ཧོཏི སུནྡརཱིནནྡཾ བྷིཀྑུནིཾ པཊིཔུཙྪནྟོ – ‘‘ཀཧཾ, ཨཡྻེ, ཨཡྻཱ སུནྡརཱིནནྡཱ? ཀཧཾ, ཨཡྻེ, ཨཡྻཱ སུནྡརཱིནནྡཱ’’ཏི? ཨེཝཾ ཝུཏྟེ སུནྡརཱིནནྡཱཡ བྷིཀྑུནིཡཱ ཨནྟེཝཱསིནཱི བྷིཀྑུནཱི སཱལ༹ྷཾ མིགཱརནཏྟཱརཾ ཨེཏདཝོཙ – ‘‘གིལཱནཱཝུསོ; པིཎྜཔཱཏཾ ནཱིཧརིསྶཱམཱི’’ཏི། ཨཐ ཁོ སཱལ༹ྷོ མིགཱརནཏྟཱ – ‘‘ཡམྤཱཧཾ ཨཏྠཱཡ ⁵ བྷིཀྑུནིསངྒྷསྶ བྷཏྟཾ ཨཀཱསིཾ ཨཡྻཱཡ སུནྡརཱིནནྡཱཡ ཀཱརཎཱ’’ཏི མནུསྶེ ཨཱཎཱཔེཏྭཱ – ‘‘བྷིཀྑུནིསངྒྷཾ བྷཏྟེན པརིཝིསཐཱ’’ཏི ཝཏྭཱ ཡེན བྷིཀྑུནུཔསྶཡོ ཏེནུཔསངྐམི། ཏེན ཁོ པན སམཡེན སུནྡརཱིནནྡཱ བྷིཀྑུནཱི བཧཱརཱམཀོཊྛཀེ ཋིཏཱ ཧོཏི སཱལ༹ྷཾ མིགཱརནཏྟཱརཾ པཏིམཱནེནྟཱི། ཨདྡསཱ ཁོ སུནྡརཱིནནྡཱ བྷིཀྑུནཱི སཱལ༹ྷཾ མིགཱརནཏྟཱརཾ དཱུརཏོཝ ཨཱགཙྪནྟཾ། དིསྭཱན ཨུཔསྶཡཾ པཝིསིཏྭཱ སསཱིསཾ པཱརུཔིཏྭཱ མཉྩཀེ ནིཔཛྫི། ཨཐ ཁོ སཱལ༹ྷོ མིགཱརནཏྟཱ ཡེན སུནྡརཱིནནྡཱ བྷིཀྑུནཱི ཏེནུཔསངྐམི; ཨུཔསངྐམིཏྭཱ སུནྡརཱིནནྡཾ བྷིཀྑུནིཾ ཨེཏདཝོཙ – ‘‘ཀིཾ ཏེ, ཨཡྻེ, ཨཕཱསུ, ཀིསྶ ནིཔནྣཱསཱི’’ཏི? ‘‘ཨེཝཉྷེཏཾ, ཨཱཝུསོ, ཧོཏི ཡཱ ཨནིཙྪནྟཾ ཨིཙྪཏཱི’’ཏི། ‘‘ཀྱཱཧཾ ཏཾ, ཨཡྻེ , ན ཨིཙྪིསྶཱམི? ཨཔི ཙཱཧཾ ཨོཀཱསཾ ན ལབྷཱམི ཏཾ དཱུསེཏུ’’ནྟི། ཨཝསྶུཏོ ཨཝསྶུཏཱཡ སུནྡརཱིནནྡཱཡ བྷིཀྑུནིཡཱ ཀཱཡསཾསགྒཾ སམཱཔཛྫི།

Tena kho pana samayena sāḷho migāranattā bahidvārakoṭṭhake ṭhito hoti sundarīnandaṃ bhikkhuniṃ paṭipucchanto – ‘‘kahaṃ, ayye, ayyā sundarīnandā? Kahaṃ, ayye, ayyā sundarīnandā’’ti? Evaṃ vutte sundarīnandāya bhikkhuniyā antevāsinī bhikkhunī sāḷhaṃ migāranattāraṃ etadavoca – ‘‘gilānāvuso; piṇḍapātaṃ nīharissāmī’’ti. Atha kho sāḷho migāranattā – ‘‘yampāhaṃ atthāya ⁶ bhikkhunisaṅghassa bhattaṃ akāsiṃ ayyāya sundarīnandāya kāraṇā’’ti manusse āṇāpetvā – ‘‘bhikkhunisaṅghaṃ bhattena parivisathā’’ti vatvā yena bhikkhunupassayo tenupasaṅkami. Tena kho pana samayena sundarīnandā bhikkhunī bahārāmakoṭṭhake ṭhitā hoti sāḷhaṃ migāranattāraṃ patimānentī. Addasā kho sundarīnandā bhikkhunī sāḷhaṃ migāranattāraṃ dūratova āgacchantaṃ. Disvāna upassayaṃ pavisitvā sasīsaṃ pārupitvā mañcake nipajji. Atha kho sāḷho migāranattā yena sundarīnandā bhikkhunī tenupasaṅkami; upasaṅkamitvā sundarīnandaṃ bhikkhuniṃ etadavoca – ‘‘kiṃ te, ayye, aphāsu, kissa nipannāsī’’ti? ‘‘Evañhetaṃ, āvuso, hoti yā anicchantaṃ icchatī’’ti. ‘‘Kyāhaṃ taṃ, ayye , na icchissāmi? Api cāhaṃ okāsaṃ na labhāmi taṃ dūsetu’’nti. Avassuto avassutāya sundarīnandāya bhikkhuniyā kāyasaṃsaggaṃ samāpajji.

ཏེན ཁོ པན སམཡེན ཨཉྙཏརཱ བྷིཀྑུནཱི ཛརཱདུབྦལཱ ཙརཎགིལཱནཱ སུནྡརཱིནནྡཱཡ བྷིཀྑུནིཡཱ ཨཝིདཱུརེ ནིཔནྣཱ ཧོཏི། ཨདྡསཱ ཁོ སཱ བྷིཀྑུནཱི སཱལ༹ྷཾ མིགཱརནཏྟཱརཾ ཨཝསྶུཏཾ ཨཝསྶུཏཱཡ སུནྡརཱིནནྡཱཡ བྷིཀྑུནིཡཱ ཀཱཡསཾསགྒཾ སམཱཔཛྫནྟཾ། དིསྭཱན ཨུཛ྄ཛྷཱཡཏི ཁིཡྻཏི ཝིཔཱཙེཏི – ‘‘ཀཐཉྷི ནཱམ ཨཡྻཱ སུནྡརཱིནནྡཱ ཨཝསྶུཏཱ ཨཝསྶུཏསྶ པུརིསཔུགྒལསྶ ཀཱཡསཾསགྒཾ སཱདིཡིསྶཏཱི’’ཏི ! ཨཐ ཁོ སཱ བྷིཀྑུནཱི བྷིཀྑུནཱིནཾ ཨེཏམཏྠཾ ཨཱརོཙེསི། ཡཱ ཏཱ བྷིཀྑུནིཡོ ཨཔྤིཙྪཱ སནྟུཊྛཱ ལཛྫིནིཡོ ཀུཀྐུཙྩིཀཱ སིཀྑཱཀཱམཱ ཏཱ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཨཡྻཱ སུནྡརཱིནནྡཱ ཨཝསྶུཏཱ ཨཝསྶུཏསྶ པུརིསཔུགྒལསྶ ཀཱཡསཾསགྒཾ སཱདིཡིསྶཏཱི’’ཏི! ཨཐ ཁོ ཏཱ བྷིཀྑུནིཡོ བྷིཀྑཱུནཾ ཨེཏམཏྠཾ ཨཱརོཙེསུཾ། ཡེ ཏེ བྷིཀྑཱུ ཨཔྤིཙྪཱ སནྟུཊྛཱ ལཛྫིནོ ཀུཀྐུཙྩཀཱ སིཀྑཱཀཱམཱ ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ སུནྡརཱིནནྡཱ བྷིཀྑུནཱི ཨཝསྶུཏཱ ཨཝསྶུཏསྶ པུརིསཔུགྒལསྶ ཀཱཡསཾསགྒཾ སཱདིཡིསྶཏཱི’’ཏི!

Tena kho pana samayena aññatarā bhikkhunī jarādubbalā caraṇagilānā sundarīnandāya bhikkhuniyā avidūre nipannā hoti. Addasā kho sā bhikkhunī sāḷhaṃ migāranattāraṃ avassutaṃ avassutāya sundarīnandāya bhikkhuniyā kāyasaṃsaggaṃ samāpajjantaṃ. Disvāna ujjhāyati khiyyati vipāceti – ‘‘kathañhi nāma ayyā sundarīnandā avassutā avassutassa purisapuggalassa kāyasaṃsaggaṃ sādiyissatī’’ti ! Atha kho sā bhikkhunī bhikkhunīnaṃ etamatthaṃ ārocesi. Yā tā bhikkhuniyo appicchā santuṭṭhā lajjiniyo kukkuccikā sikkhākāmā tā ujjhāyanti khiyyanti vipācenti – ‘‘kathañhi nāma ayyā sundarīnandā avassutā avassutassa purisapuggalassa kāyasaṃsaggaṃ sādiyissatī’’ti! Atha kho tā bhikkhuniyo bhikkhūnaṃ etamatthaṃ ārocesuṃ. Ye te bhikkhū appicchā santuṭṭhā lajjino kukkuccakā sikkhākāmā te ujjhāyanti khiyyanti vipācenti – ‘‘kathañhi nāma sundarīnandā bhikkhunī avassutā avassutassa purisapuggalassa kāyasaṃsaggaṃ sādiyissatī’’ti!

ཨཐ ཁོ ཏེ བྷིཀྑཱུ སུནྡརཱིནནྡཾ བྷིཀྑུནིཾ ཨནེཀཔརིཡཱཡེན ཝིགརཧིཏྭཱ བྷགཝཏོ ཨེཏམཏྠཾ ཨཱརོཙེསུཾ། ཨཐ ཁོ བྷགཝཱ ཨེཏསྨིཾ ནིདཱནེ ཨེཏསྨིཾ པཀརཎེ བྷིཀྑུསངྒྷཾ སནྣིཔཱཏཱཔེཏྭཱ བྷིཀྑཱུ པཊིཔུཙྪི – ‘‘སཙྩཾ ཀིར, བྷིཀྑཝེ, སུནྡརཱིནནྡཱ བྷིཀྑུནཱི ཨཝསྶུཏཱ ཨཝསྶུཏསྶ པུརིསཔུགྒལསྶ ཀཱཡསཾསགྒཾ སཱདིཡཏཱི’’ཏི ⁷? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ – ‘‘ཨནནུཙྪཝིཀཾ, བྷིཀྑཝེ, སུནྡརཱིནནྡཱཡ བྷིཀྑུནིཡཱ ཨནནུལོམིཀཾ ཨཔྤཏིརཱུཔཾ ཨསྶཱམཎཀཾ ཨཀཔྤིཡཾ ཨཀརཎཱིཡཾ། ཀཐཉྷི ནཱམ, བྷིཀྑཝེ, སུནྡརཱིནནྡཱ བྷིཀྑུནཱི ཨཝསྶུཏཱ ཨཝསྶུཏསྶ པུརིསཔུགྒལསྶ ཀཱཡསཾསགྒཾ སཱདིཡིསྶཏི! ནེཏཾ, བྷིཀྑཝེ, ཨཔྤསནྣཱནཾ ཝཱ པསཱདཱཡ པསནྣཱནཾ ཝཱ བྷིཡྻོབྷཱཝཱཡ། ཨཐ ཁྭེཏཾ, བྷིཀྑཝེ , ཨཔྤསནྣཱནཉྩེཝ ཨཔྤསཱདཱཡ པསནྣཱནཉྩ ཨེཀཙྩཱནཾ ཨཉྙཐཏྟཱཡཱ’’ཏི། ཨཐ ཁོ བྷགཝཱ སུནྡརཱིནནྡཾ བྷིཀྑུནིཾ ཨནེཀཔརིཡཱཡེན ཝིགརཧིཏྭཱ དུབྦྷརཏཱཡ དུཔྤོསཏཱཡ མཧིཙྪཏཱཡ ཨསནྟུཊྛིཏཱཡ ⁸ སངྒཎིཀཱཡ ཀོསཛྫསྶ ཨཝཎྞཾ བྷཱསིཏྭཱ, ཨནེཀཔརིཡཱཡེན སུབྷརཏཱཡ སུཔོསཏཱཡ ཨཔྤིཙྪསྶ སནྟུཊྛསྶ ⁹ སལླེཁསྶ དྷུཏསྶ པཱསཱདིཀསྶ ཨཔཙཡསྶ ཝཱིརིཡཱརམྦྷསྶ ཝཎྞཾ བྷཱསིཏྭཱ, བྷིཀྑཱུནཾ ཏདནུཙྪཝིཀཾ ཏདནུལོམིཀཾ དྷམྨིཾ ཀཐཾ ཀཏྭཱ བྷིཀྑཱུ ཨཱམནྟེསི – ‘‘ཏེན ཧི, བྷིཀྑཝེ, བྷིཀྑུནཱིནཾ སིཀྑཱཔདཾ པཉྙཔེསྶཱམི དས ཨཏྠཝསེ པཊིཙྩ – སངྒྷསུཊྛུཏཱཡ, སངྒྷཕཱསུཏཱཡ, དུམྨངྐཱུནཾ བྷིཀྑུནཱིནཾ ནིགྒཧཱཡ , པེསལཱནཾ བྷིཀྑུནཱིནཾ ཕཱསུཝིཧཱརཱཡ, དིཊྛདྷམྨིཀཱནཾ ཨཱསཝཱནཾ སཾཝརཱཡ, སམྤརཱཡིཀཱནཾ ཨཱསཝཱནཾ པཊིགྷཱཏཱཡ, ཨཔྤསནྣཱནཾ པསཱདཱཡ, པསནྣཱནཾ བྷིཡྻོབྷཱཝཱཡ, སདྡྷམྨཊྛིཏིཡཱ ཝིནཡཱནུགྒཧཱཡ། ཨེཝཉྩ པན, བྷིཀྑཝེ, བྷིཀྑུནིཡོ ཨིམཾ སིཀྑཱཔདཾ ཨུདྡིསནྟུ –

Atha kho te bhikkhū sundarīnandaṃ bhikkhuniṃ anekapariyāyena vigarahitvā bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā bhikkhū paṭipucchi – ‘‘saccaṃ kira, bhikkhave, sundarīnandā bhikkhunī avassutā avassutassa purisapuggalassa kāyasaṃsaggaṃ sādiyatī’’ti ¹⁰? ‘‘Saccaṃ, bhagavā’’ti. Vigarahi buddho bhagavā – ‘‘ananucchavikaṃ, bhikkhave, sundarīnandāya bhikkhuniyā ananulomikaṃ appatirūpaṃ assāmaṇakaṃ akappiyaṃ akaraṇīyaṃ. Kathañhi nāma, bhikkhave, sundarīnandā bhikkhunī avassutā avassutassa purisapuggalassa kāyasaṃsaggaṃ sādiyissati! Netaṃ, bhikkhave, appasannānaṃ vā pasādāya pasannānaṃ vā bhiyyobhāvāya. Atha khvetaṃ, bhikkhave , appasannānañceva appasādāya pasannānañca ekaccānaṃ aññathattāyā’’ti. Atha kho bhagavā sundarīnandaṃ bhikkhuniṃ anekapariyāyena vigarahitvā dubbharatāya dupposatāya mahicchatāya asantuṭṭhitāya ¹¹ saṅgaṇikāya kosajjassa avaṇṇaṃ bhāsitvā, anekapariyāyena subharatāya suposatāya appicchassa santuṭṭhassa ¹² sallekhassa dhutassa pāsādikassa apacayassa vīriyārambhassa vaṇṇaṃ bhāsitvā, bhikkhūnaṃ tadanucchavikaṃ tadanulomikaṃ dhammiṃ kathaṃ katvā bhikkhū āmantesi – ‘‘tena hi, bhikkhave, bhikkhunīnaṃ sikkhāpadaṃ paññapessāmi dasa atthavase paṭicca – saṅghasuṭṭhutāya, saṅghaphāsutāya, dummaṅkūnaṃ bhikkhunīnaṃ niggahāya , pesalānaṃ bhikkhunīnaṃ phāsuvihārāya, diṭṭhadhammikānaṃ āsavānaṃ saṃvarāya, samparāyikānaṃ āsavānaṃ paṭighātāya, appasannānaṃ pasādāya, pasannānaṃ bhiyyobhāvāya, saddhammaṭṭhitiyā vinayānuggahāya. Evañca pana, bhikkhave, bhikkhuniyo imaṃ sikkhāpadaṃ uddisantu –

༦༥༧. ‘‘ཡཱ པན བྷིཀྑུནཱི ཨཝསྶུཏཱ ཨཝསྶུཏསྶ པུརིསཔུགྒལསྶ ཨདྷཀྑཀཾ ཨུབྦྷཛཱཎུམཎྜལཾ ཨཱམསནཾ ཝཱ པརཱམསནཾ ཝཱ གཧཎཾ ཝཱ ཚུཔནཾ ཝཱ པཊིཔཱིལ༹ནཾ ཝཱ སཱདིཡེཡྻ, ཨཡམྤི པཱརཱཛིཀཱ ཧོཏི ཨསཾཝཱསཱ ཨུབྦྷཛཱཎུམཎྜལིཀཱ’’ཏི།

657.‘‘Yā pana bhikkhunī avassutā avassutassa purisapuggalassa adhakkhakaṃ ubbhajāṇumaṇḍalaṃ āmasanaṃ vā parāmasanaṃ vā gahaṇaṃ vā chupanaṃ vā paṭipīḷanaṃ vā sādiyeyya, ayampi pārājikā hoti asaṃvāsā ubbhajāṇumaṇḍalikā’’ti.

༦༥༨. ཡཱ པནཱཏི ཡཱ ཡཱདིསཱ ཡཐཱཡུཏྟཱ ཡཐཱཛཙྩཱ ཡཐཱནཱམཱ ཡཐཱགོཏྟཱ ཡཐཱསཱིལཱ ཡཐཱཝིཧཱརིནཱི ཡཐཱགོཙརཱ ཐེརཱ ཝཱ ནཝཱ ཝཱ མཛ྄ཛྷིམཱ ཝཱ, ཨེསཱ ཝུཙྩཏི ཡཱ པནཱཏི།

658.Yāpanāti yā yādisā yathāyuttā yathājaccā yathānāmā yathāgottā yathāsīlā yathāvihārinī yathāgocarā therā vā navā vā majjhimā vā, esā vuccati yā panāti.

བྷིཀྑུནཱིཏི བྷིཀྑིཀཱཏི བྷིཀྑུནཱི; བྷིཀྑཱཙརིཡཾ ཨཛ྄ཛྷུཔགཏཱཏི བྷིཀྑུནཱི; བྷིནྣཔཊདྷརཱཏི བྷིཀྑུནཱི ; སམཉྙཱཡ བྷིཀྑུནཱི; པཊིཉྙཱཡ བྷིཀྑུནཱི; ཨེཧི བྷིཀྑུནཱིཏི བྷིཀྑུནཱི; ཏཱིཧི སརཎགམནེཧི ཨུཔསམྤནྣཱཏི བྷིཀྑུནཱི; བྷདྲཱ བྷིཀྑུནཱི; སཱརཱ བྷིཀྑུནཱི; སེཁཱ བྷིཀྑུནཱི; ཨསེཁཱ བྷིཀྑུནཱི; སམགྒེན ཨུབྷཏོསངྒྷེན ཉཏྟིཙཏུཏྠེན ཀམྨེན ཨཀུཔྤེན ཋཱནཱརཧེན ཨུཔསམྤནྣཱཏི བྷིཀྑུནཱི། ཏཏྲ ཡཱཡཾ བྷིཀྑུནཱི སམགྒེན ཨུབྷཏོསངྒྷེན ཉཏྟིཙཏུཏྠེན ཀམྨེན ཨཀུཔྤེན ཋཱནཱརཧེན ཨུཔསམྤནྣཱ, ཨཡཾ ཨིམསྨིཾ ཨཏྠེ ཨདྷིཔྤེཏཱ བྷིཀྑུནཱིཏི།

Bhikkhunīti bhikkhikāti bhikkhunī; bhikkhācariyaṃ ajjhupagatāti bhikkhunī; bhinnapaṭadharāti bhikkhunī ; samaññāya bhikkhunī; paṭiññāya bhikkhunī; ehi bhikkhunīti bhikkhunī; tīhi saraṇagamanehi upasampannāti bhikkhunī; bhadrā bhikkhunī; sārā bhikkhunī; sekhā bhikkhunī; asekhā bhikkhunī; samaggena ubhatosaṅghena ñatticatutthena kammena akuppena ṭhānārahena upasampannāti bhikkhunī. Tatra yāyaṃ bhikkhunī samaggena ubhatosaṅghena ñatticatutthena kammena akuppena ṭhānārahena upasampannā, ayaṃ imasmiṃ atthe adhippetā bhikkhunīti.

ཨཝསྶུཏཱ ནཱམ སཱརཏྟཱ ཨཔེཀྑཝཏཱི པཊིབདྡྷཙིཏྟཱ།

Avassutā nāma sārattā apekkhavatī paṭibaddhacittā.

ཨཝསྶུཏོ ནཱམ སཱརཏྟོ ཨཔེཀྑཝཱ པཊིབདྡྷཙིཏྟོ།

Avassuto nāma sāratto apekkhavā paṭibaddhacitto.

པུརིསཔུགྒལོ ནཱམ མནུསྶཔུརིསོ ན ཡཀྑོ ན པེཏོ ན ཏིརཙྪཱནགཏོ ཝིཉྙཱུ པཊིབལོ ཀཱཡསཾསགྒཾ སམཱཔཛྫིཏུཾ།

Purisapuggalo nāma manussapuriso na yakkho na peto na tiracchānagato viññū paṭibalo kāyasaṃsaggaṃ samāpajjituṃ.

ཨདྷཀྑཀནྟི ཧེཊྛཀྑཀཾ།

Adhakkhakanti heṭṭhakkhakaṃ.

ཨུབྦྷཛཱཎུམཎྜལནྟི ཨུཔརིཛཱཎུམཎྜལཾ།

Ubbhajāṇumaṇḍalanti uparijāṇumaṇḍalaṃ.

ཨཱམསནཾ ནཱམ ཨཱམཊྛམཏྟཾ།

Āmasanaṃ nāma āmaṭṭhamattaṃ.

པརཱམསནཾ ནཱམ ཨིཏོཙིཏོ ཙ སཉྩོཔནཾ།

Parāmasanaṃ nāma itocito ca sañcopanaṃ.

གཧཎཾ ནཱམ གཧིཏམཏྟཾ།

Gahaṇaṃ nāma gahitamattaṃ.

ཚུཔནཾ ནཱམ ཕུཊྛམཏྟཾ།

Chupanaṃ nāma phuṭṭhamattaṃ.

པཊིཔཱིལ༹ནཾ ཝཱ སཱདིཡེཡྻཱཏི ཨངྒཾ གཧེཏྭཱ ནིཔྤཱིལ༹ནཾ སཱདིཡཏི།

Paṭipīḷanaṃvā sādiyeyyāti aṅgaṃ gahetvā nippīḷanaṃ sādiyati.

ཨཡམྤཱིཏི པུརིམཱཡོ ཨུཔཱདཱཡ ཝུཙྩཏི།

Ayampīti purimāyo upādāya vuccati.

པཱརཱཛིཀཱ ཧོཏཱིཏི སེཡྻཐཱཔི ནཱམ པུརིསོ སཱིསཙྪིནྣོ ཨབྷབྦོ ཏེན སརཱིརབནྡྷནེན ཛཱིཝིཏུཾ, ཨེཝམེཝ བྷིཀྑུནཱི ཨཝསྶུཏཱ ཨཝསྶུཏསྶ པུརིསཔུགྒལསྶ ཨདྷཀྑཀཾ ཨུབྦྷཛཱཎུམཎྜལཾ ཨཱམསནཾ ཝཱ པརཱམསནཾ ཝཱ གཧཎཾ ཝཱ ཚུཔནཾ ཝཱ པཊིཔཱིལ༹ནཾ ཝཱ སཱདིཡནྟཱི ཨསྶམཎཱི ཧོཏི ཨསཀྱདྷཱིཏཱ། ཏེན ཝུཙྩཏི པཱརཱཛིཀཱ ཧོཏཱིཏི།

Pārājikā hotīti seyyathāpi nāma puriso sīsacchinno abhabbo tena sarīrabandhanena jīvituṃ, evameva bhikkhunī avassutā avassutassa purisapuggalassa adhakkhakaṃ ubbhajāṇumaṇḍalaṃ āmasanaṃ vā parāmasanaṃ vā gahaṇaṃ vā chupanaṃ vā paṭipīḷanaṃ vā sādiyantī assamaṇī hoti asakyadhītā. Tena vuccati pārājikā hotīti.

ཨསཾཝཱསཱཏི སཾཝཱསོ ནཱམ ཨེཀཀམྨཾ ཨེཀུདྡེསོ སམསིཀྑཏཱ, ཨེསོ སཾཝཱསོ ནཱམ། སོ ཏཱཡ སདྡྷིཾ ནཏྠི, ཏེན ཝུཙྩཏི ཨསཾཝཱསཱཏི།

Asaṃvāsāti saṃvāso nāma ekakammaṃ ekuddeso samasikkhatā, eso saṃvāso nāma. So tāya saddhiṃ natthi, tena vuccati asaṃvāsāti.

༦༥༩. ཨུབྷཏོཨཝསྶུཏེ ཨདྷཀྑཀཾ ཨུབྦྷཛཱཎུམཎྜལཾ ཀཱཡེན ཀཱཡཾ ཨཱམསཏི, ཨཱཔཏྟི པཱརཱཛིཀསྶ། ཀཱཡེན ཀཱཡཔཊིབདྡྷཾ ཨཱམསཏི, ཨཱཔཏྟི ཐུལླཙྩཡསྶ། ཀཱཡཔཊིབདྡྷེན ཀཱཡཾ ཨཱམསཏི, ཨཱཔཏྟི ཐུལླཙྩཡསྶ། ཀཱཡཔཊིབདྡྷེན ཀཱཡཔཊིབདྡྷཾ ཨཱམསཏི, ཨཱཔཏྟི དུཀྐཊསྶ།

659. Ubhatoavassute adhakkhakaṃ ubbhajāṇumaṇḍalaṃ kāyena kāyaṃ āmasati, āpatti pārājikassa. Kāyena kāyapaṭibaddhaṃ āmasati, āpatti thullaccayassa. Kāyapaṭibaddhena kāyaṃ āmasati, āpatti thullaccayassa. Kāyapaṭibaddhena kāyapaṭibaddhaṃ āmasati, āpatti dukkaṭassa.

ནིསྶགྒིཡེན ཀཱཡཾ ཨཱམསཏི , ཨཱཔཏྟི དུཀྐཊསྶ། ནིསྶགྒིཡེན ཀཱཡཔཊིབདྡྷཾ ཨཱམསཏི, ཨཱཔཏྟི དུཀྐཊསྶ། ནིསྶགྒིཡེན ནིསྶགྒིཡཾ ཨཱམསཏི, ཨཱཔཏྟི དུཀྐཊསྶ།

Nissaggiyena kāyaṃ āmasati , āpatti dukkaṭassa. Nissaggiyena kāyapaṭibaddhaṃ āmasati, āpatti dukkaṭassa. Nissaggiyena nissaggiyaṃ āmasati, āpatti dukkaṭassa.

ཨུབྦྷཀྑཀཾ ཨདྷོཛཱཎུམཎྜལཾ ཀཱཡེན ཀཱཡཾ ཨཱམསཏི, ཨཱཔཏྟི ཐུལླཙྩཡསྶ། ཀཱཡེན ཀཱཡཔཊིབདྡྷཾ ཨཱམསཏི, ཨཱཔཏྟི དུཀྐཊསྶ། ཀཱཡཔཊིབདྡྷེན ཀཱཡཾ ཨཱམསཏི, ཨཱཔཏྟི དུཀྐཊསྶ། ཀཱཡཔཊིབདྡྷེན ཀཱཡཔཊིབདྡྷཾ ཨཱམསཏི, ཨཱཔཏྟི དུཀྐཊསྶ།

Ubbhakkhakaṃ adhojāṇumaṇḍalaṃ kāyena kāyaṃ āmasati, āpatti thullaccayassa. Kāyena kāyapaṭibaddhaṃ āmasati, āpatti dukkaṭassa. Kāyapaṭibaddhena kāyaṃ āmasati, āpatti dukkaṭassa. Kāyapaṭibaddhena kāyapaṭibaddhaṃ āmasati, āpatti dukkaṭassa.

ནིསྶགྒིཡེན ཀཱཡཾ ཨཱམསཏི, ཨཱཔཏྟི དུཀྐཊསྶ། ནིསྶགྒིཡེན ཀཱཡཔཊིབདྡྷཾ ཨཱམསཏི, ཨཱཔཏྟི དུཀྐཊསྶ། ནིསྶགྒིཡེན ནིསྶགྒིཡཾ ཨཱམསཏི, ཨཱཔཏྟི དུཀྐཊསྶ།