Library / Tipiṭaka / ਤਿਪਿਟਕ • Tipiṭaka / ਭਿਕ੍ਖੁਨੀવਿਭਙ੍ਗ • Bhikkhunīvibhaṅga

॥ ਨਮੋ ਤਸ੍ਸ ਭਗવਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ॥

Namo tassa bhagavato arahato sammāsambuddhassa

ਭਿਕ੍ਖੁਨੀવਿਭਙ੍ਗੋ

Bhikkhunīvibhaṅgo

੧. ਪਾਰਾਜਿਕਕਣ੍ਡਂ (ਭਿਕ੍ਖੁਨੀવਿਭਙ੍ਗੋ)

1. Pārājikakaṇḍaṃ (bhikkhunīvibhaṅgo)

੧. ਪਠਮਪਾਰਾਜਿਕਂ

1. Paṭhamapārājikaṃ

੬੫੬. ਤੇਨ ਸਮਯੇਨ ਬੁਦ੍ਧੋ ਭਗવਾ ਸਾવਤ੍ਥਿਯਂ વਿਹਰਤਿ ਜੇਤવਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ। ਤੇਨ ਖੋ ਪਨ ਸਮਯੇਨ ਸਾਲ਼੍ਹੋ ਮਿਗਾਰਨਤ੍ਤਾ ਭਿਕ੍ਖੁਨਿਸਙ੍ਘਸ੍ਸ વਿਹਾਰਂ ਕਤ੍ਤੁਕਾਮੋ ਹੋਤਿ। ਅਥ ਖੋ ਸਾਲ਼੍ਹੋ ਮਿਗਾਰਨਤ੍ਤਾ ਭਿਕ੍ਖੁਨਿਯੋ ਉਪਸਙ੍ਕਮਿਤ੍વਾ ਏਤਦવੋਚ – ‘‘ਇਚ੍ਛਾਮਹਂ, ਅਯ੍ਯੇ, ਭਿਕ੍ਖੁਨਿਸਙ੍ਘਸ੍ਸ વਿਹਾਰਂ ਕਾਤੁਂ। ਦੇਥ ਮੇ ਨવਕਮ੍ਮਿਕਂ ਭਿਕ੍ਖੁਨਿ’’ਨ੍ਤਿ। ਤੇਨ ਖੋ ਪਨ ਸਮਯੇਨ ਚਤਸ੍ਸੋ ਭਗਿਨਿਯੋ ਭਿਕ੍ਖੁਨੀਸੁ ਪਬ੍ਬਜਿਤਾ ਹੋਨ੍ਤਿ – ਨਨ੍ਦਾ, ਨਨ੍ਦવਤੀ, ਸੁਨ੍ਦਰੀਨਨ੍ਦਾ, ਥੁਲ੍ਲਨਨ੍ਦਾਤਿ। ਤਾਸੁ ਸੁਨ੍ਦਰੀਨਨ੍ਦਾ ਭਿਕ੍ਖੁਨੀ ਤਰੁਣਪਬ੍ਬਜਿਤਾ ਅਭਿਰੂਪਾ ਹੋਤਿ ਦਸ੍ਸਨੀਯਾ ਪਾਸਾਦਿਕਾ ਪਣ੍ਡਿਤਾ ਬ੍ਯਤ੍ਤਾ ਮੇਧਾવਿਨੀ ਦਕ੍ਖਾ ਅਨਲਸਾ, ਤਤ੍ਰੁਪਾਯਾਯ વੀਮਂਸਾਯ ਸਮਨ੍ਨਾਗਤਾ, ਅਲਂ ਕਾਤੁਂ ਅਲਂ ਸਂવਿਧਾਤੁਂ। ਅਥ ਖੋ ਭਿਕ੍ਖੁਨਿਸਙ੍ਘੋ ਸੁਨ੍ਦਰੀਨਨ੍ਦਂ ਭਿਕ੍ਖੁਨਿਂ ਸਮ੍ਮਨ੍ਨਿਤ੍વਾ ਸਾਲ਼੍ਹਸ੍ਸ ਮਿਗਾਰਨਤ੍ਤੁਨੋ ਨવਕਮ੍ਮਿਕਂ ਅਦਾਸਿ। ਤੇਨ ਖੋ ਪਨ ਸਮਯੇਨ ਸੁਨ੍ਦਰੀਨਨ੍ਦਾ ਭਿਕ੍ਖੁਨੀ ਸਾਲ਼੍ਹਸ੍ਸ ਮਿਗਾਰਨਤ੍ਤੁਨੋ ਨਿવੇਸਨਂ ਅਭਿਕ੍ਖਣਂ ਗਚ੍ਛਤਿ – ‘‘વਾਸਿਂ ਦੇਥ, ਪਰਸੁਂ ¹ ਦੇਥ, ਕੁਠਾਰਿਂ ² ਦੇਥ, ਕੁਦ੍ਦਾਲਂ ਦੇਥ, ਨਿਖਾਦਨਂ ਦੇਥਾ’’ਤਿ। ਸਾਲ਼੍ਹੋਪਿ ਮਿਗਾਰਨਤ੍ਤਾ ਭਿਕ੍ਖੁਨੁਪਸ੍ਸਯਂ ਅਭਿਕ੍ਖਣਂ ਗਚ੍ਛਤਿ ਕਤਾਕਤਂ ਜਾਨਿਤੁਂ। ਤੇ ਅਭਿਣ੍ਹਦਸ੍ਸਨੇਨ ਪਟਿਬਦ੍ਧਚਿਤ੍ਤਾ ਅਹੇਸੁਂ।

656. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena sāḷho migāranattā bhikkhunisaṅghassa vihāraṃ kattukāmo hoti. Atha kho sāḷho migāranattā bhikkhuniyo upasaṅkamitvā etadavoca – ‘‘icchāmahaṃ, ayye, bhikkhunisaṅghassa vihāraṃ kātuṃ. Detha me navakammikaṃ bhikkhuni’’nti. Tena kho pana samayena catasso bhaginiyo bhikkhunīsu pabbajitā honti – nandā, nandavatī, sundarīnandā, thullanandāti. Tāsu sundarīnandā bhikkhunī taruṇapabbajitā abhirūpā hoti dassanīyā pāsādikā paṇḍitā byattā medhāvinī dakkhā analasā, tatrupāyāya vīmaṃsāya samannāgatā, alaṃ kātuṃ alaṃ saṃvidhātuṃ. Atha kho bhikkhunisaṅgho sundarīnandaṃ bhikkhuniṃ sammannitvā sāḷhassa migāranattuno navakammikaṃ adāsi. Tena kho pana samayena sundarīnandā bhikkhunī sāḷhassa migāranattuno nivesanaṃ abhikkhaṇaṃ gacchati – ‘‘vāsiṃ detha, parasuṃ ³ detha, kuṭhāriṃ ⁴ detha, kuddālaṃ detha, nikhādanaṃ dethā’’ti. Sāḷhopi migāranattā bhikkhunupassayaṃ abhikkhaṇaṃ gacchati katākataṃ jānituṃ. Te abhiṇhadassanena paṭibaddhacittā ahesuṃ.

ਅਥ ਖੋ ਸਾਲ਼੍ਹੋ ਮਿਗਾਰਨਤ੍ਤਾ ਸੁਨ੍ਦਰੀਨਨ੍ਦਂ ਭਿਕ੍ਖੁਨਿਂ ਦੂਸੇਤੁਂ ਓਕਾਸਂ ਅਲਭਮਾਨੋ ਏਤਦੇવਤ੍ਥਾਯ ਭਿਕ੍ਖੁਨਿਸਙ੍ਘਸ੍ਸ ਭਤ੍ਤਂ ਅਕਾਸਿ। ਅਥ ਖੋ ਸਾਲ਼੍ਹੋ ਮਿਗਾਰਨਤ੍ਤਾ ਭਤ੍ਤਗ੍ਗੇ ਆਸਨਂ ਪਞ੍ਞਪੇਨ੍ਤੋ – ‘‘ਏਤ੍ਤਕਾ ਭਿਕ੍ਖੁਨਿਯੋ ਅਯ੍ਯਾਯ ਸੁਨ੍ਦਰੀਨਨ੍ਦਾਯ વੁਡ੍ਢਤਰਾ’’ਤਿ ਏਕਮਨ੍ਤਂ ਆਸਨਂ ਪਞ੍ਞਪੇਸਿ ‘‘ਏਤ੍ਤਕਾ ਨવਕਤਰਾ’’ਤਿ – ਏਕਮਨ੍ਤਂ ਆਸਨਂ ਪਞ੍ਞਪੇਸਿ। ਪਟਿਚ੍ਛਨ੍ਨੇ ਓਕਾਸੇ ਨਿਕੂਟੇ ਸੁਨ੍ਦਰੀਨਨ੍ਦਾਯ ਭਿਕ੍ਖੁਨਿਯਾ ਆਸਨਂ ਪਞ੍ਞਪੇਸਿ, ਯਥਾ ਥੇਰਾ ਭਿਕ੍ਖੁਨਿਯੋ ਜਾਨੇਯ੍ਯੁਂ – ‘‘ਨવਕਾਨਂ ਭਿਕ੍ਖੁਨੀਨਂ ਸਨ੍ਤਿਕੇ ਨਿਸਿਨ੍ਨਾ’’ਤਿ; ਨવਕਾਪਿ ਭਿਕ੍ਖੁਨਿਯੋ ਜਾਨੇਯ੍ਯੁਂ – ‘‘ਥੇਰਾਨਂ ਭਿਕ੍ਖੁਨੀਨਂ ਸਨ੍ਤਿਕੇ ਨਿਸਿਨ੍ਨਾ’’ਤਿ। ਅਥ ਖੋ ਸਾਲ਼੍ਹੋ ਮਿਗਾਰਨਤ੍ਤਾ ਭਿਕ੍ਖੁਨਿਸਙ੍ਘਸ੍ਸ ਕਾਲਂ ਆਰੋਚਾਪੇਸਿ – ‘‘ਕਾਲੋ, ਅਯ੍ਯੇ, ਨਿਟ੍ਠਿਤਂ ਭਤ੍ਤ’’ਨ੍ਤਿ। ਸੁਨ੍ਦਰੀਨਨ੍ਦਾ ਭਿਕ੍ਖੁਨੀ ਸਲ੍ਲਕ੍ਖੇਤ੍વਾ – ‘‘ਨ ਬਹੁਕਤੋ ਸਾਲ਼੍ਹੋ ਮਿਗਾਰਨਤ੍ਤਾ ਭਿਕ੍ਖੁਨਿਸਙ੍ਘਸ੍ਸ ਭਤ੍ਤਂ ਅਕਾਸਿ; ਮਂ ਸੋ ਦੂਸੇਤੁਕਾਮੋ। ਸਚਾਹਂ ਗਮਿਸ੍ਸਾਮਿ વਿਸ੍ਸਰੋ ਮੇ ਭવਿਸ੍ਸਤੀ’’ਤਿ, ਅਨ੍ਤੇવਾਸਿਨਿਂ ਭਿਕ੍ਖੁਨਿਂ ਆਣਾਪੇਸਿ – ‘‘ਗਚ੍ਛ ਮੇ ਪਿਣ੍ਡਪਾਤਂ ਨੀਹਰ। ਯੋ ਚੇ ਮਂ ਪੁਚ੍ਛਤਿ, ‘ਗਿਲਾਨਾ’ਤਿ ਪਟਿવੇਦੇਹੀ’’ਤਿ। ‘‘ਏવਂ, ਅਯ੍ਯੇ’’ਤਿ ਖੋ ਸਾ ਭਿਕ੍ਖੁਨੀ ਸੁਨ੍ਦਰੀਨਨ੍ਦਾਯ ਭਿਕ੍ਖੁਨਿਯਾ ਪਚ੍ਚਸ੍ਸੋਸਿ।

Atha kho sāḷho migāranattā sundarīnandaṃ bhikkhuniṃ dūsetuṃ okāsaṃ alabhamāno etadevatthāya bhikkhunisaṅghassa bhattaṃ akāsi. Atha kho sāḷho migāranattā bhattagge āsanaṃ paññapento – ‘‘ettakā bhikkhuniyo ayyāya sundarīnandāya vuḍḍhatarā’’ti ekamantaṃ āsanaṃ paññapesi ‘‘ettakā navakatarā’’ti – ekamantaṃ āsanaṃ paññapesi. Paṭicchanne okāse nikūṭe sundarīnandāya bhikkhuniyā āsanaṃ paññapesi, yathā therā bhikkhuniyo jāneyyuṃ – ‘‘navakānaṃ bhikkhunīnaṃ santike nisinnā’’ti; navakāpi bhikkhuniyo jāneyyuṃ – ‘‘therānaṃ bhikkhunīnaṃ santike nisinnā’’ti. Atha kho sāḷho migāranattā bhikkhunisaṅghassa kālaṃ ārocāpesi – ‘‘kālo, ayye, niṭṭhitaṃ bhatta’’nti. Sundarīnandā bhikkhunī sallakkhetvā – ‘‘na bahukato sāḷho migāranattā bhikkhunisaṅghassa bhattaṃ akāsi; maṃ so dūsetukāmo. Sacāhaṃ gamissāmi vissaro me bhavissatī’’ti, antevāsiniṃ bhikkhuniṃ āṇāpesi – ‘‘gaccha me piṇḍapātaṃ nīhara. Yo ce maṃ pucchati, ‘gilānā’ti paṭivedehī’’ti. ‘‘Evaṃ, ayye’’ti kho sā bhikkhunī sundarīnandāya bhikkhuniyā paccassosi.

ਤੇਨ ਖੋ ਪਨ ਸਮਯੇਨ ਸਾਲ਼੍ਹੋ ਮਿਗਾਰਨਤ੍ਤਾ ਬਹਿਦ੍વਾਰਕੋਟ੍ਠਕੇ ਠਿਤੋ ਹੋਤਿ ਸੁਨ੍ਦਰੀਨਨ੍ਦਂ ਭਿਕ੍ਖੁਨਿਂ ਪਟਿਪੁਚ੍ਛਨ੍ਤੋ – ‘‘ਕਹਂ, ਅਯ੍ਯੇ, ਅਯ੍ਯਾ ਸੁਨ੍ਦਰੀਨਨ੍ਦਾ? ਕਹਂ, ਅਯ੍ਯੇ, ਅਯ੍ਯਾ ਸੁਨ੍ਦਰੀਨਨ੍ਦਾ’’ਤਿ? ਏવਂ વੁਤ੍ਤੇ ਸੁਨ੍ਦਰੀਨਨ੍ਦਾਯ ਭਿਕ੍ਖੁਨਿਯਾ ਅਨ੍ਤੇવਾਸਿਨੀ ਭਿਕ੍ਖੁਨੀ ਸਾਲ਼੍ਹਂ ਮਿਗਾਰਨਤ੍ਤਾਰਂ ਏਤਦવੋਚ – ‘‘ਗਿਲਾਨਾવੁਸੋ; ਪਿਣ੍ਡਪਾਤਂ ਨੀਹਰਿਸ੍ਸਾਮੀ’’ਤਿ। ਅਥ ਖੋ ਸਾਲ਼੍ਹੋ ਮਿਗਾਰਨਤ੍ਤਾ – ‘‘ਯਮ੍ਪਾਹਂ ਅਤ੍ਥਾਯ ⁵ ਭਿਕ੍ਖੁਨਿਸਙ੍ਘਸ੍ਸ ਭਤ੍ਤਂ ਅਕਾਸਿਂ ਅਯ੍ਯਾਯ ਸੁਨ੍ਦਰੀਨਨ੍ਦਾਯ ਕਾਰਣਾ’’ਤਿ ਮਨੁਸ੍ਸੇ ਆਣਾਪੇਤ੍વਾ – ‘‘ਭਿਕ੍ਖੁਨਿਸਙ੍ਘਂ ਭਤ੍ਤੇਨ ਪਰਿવਿਸਥਾ’’ਤਿ વਤ੍વਾ ਯੇਨ ਭਿਕ੍ਖੁਨੁਪਸ੍ਸਯੋ ਤੇਨੁਪਸਙ੍ਕਮਿ। ਤੇਨ ਖੋ ਪਨ ਸਮਯੇਨ ਸੁਨ੍ਦਰੀਨਨ੍ਦਾ ਭਿਕ੍ਖੁਨੀ ਬਹਾਰਾਮਕੋਟ੍ਠਕੇ ਠਿਤਾ ਹੋਤਿ ਸਾਲ਼੍ਹਂ ਮਿਗਾਰਨਤ੍ਤਾਰਂ ਪਤਿਮਾਨੇਨ੍ਤੀ। ਅਦ੍ਦਸਾ ਖੋ ਸੁਨ੍ਦਰੀਨਨ੍ਦਾ ਭਿਕ੍ਖੁਨੀ ਸਾਲ਼੍ਹਂ ਮਿਗਾਰਨਤ੍ਤਾਰਂ ਦੂਰਤੋવ ਆਗਚ੍ਛਨ੍ਤਂ। ਦਿਸ੍વਾਨ ਉਪਸ੍ਸਯਂ ਪવਿਸਿਤ੍વਾ ਸਸੀਸਂ ਪਾਰੁਪਿਤ੍વਾ ਮਞ੍ਚਕੇ ਨਿਪਜ੍ਜਿ। ਅਥ ਖੋ ਸਾਲ਼੍ਹੋ ਮਿਗਾਰਨਤ੍ਤਾ ਯੇਨ ਸੁਨ੍ਦਰੀਨਨ੍ਦਾ ਭਿਕ੍ਖੁਨੀ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍વਾ ਸੁਨ੍ਦਰੀਨਨ੍ਦਂ ਭਿਕ੍ਖੁਨਿਂ ਏਤਦવੋਚ – ‘‘ਕਿਂ ਤੇ, ਅਯ੍ਯੇ, ਅਫਾਸੁ, ਕਿਸ੍ਸ ਨਿਪਨ੍ਨਾਸੀ’’ਤਿ? ‘‘ਏવਞ੍ਹੇਤਂ, ਆવੁਸੋ, ਹੋਤਿ ਯਾ ਅਨਿਚ੍ਛਨ੍ਤਂ ਇਚ੍ਛਤੀ’’ਤਿ। ‘‘ਕ੍ਯਾਹਂ ਤਂ, ਅਯ੍ਯੇ , ਨ ਇਚ੍ਛਿਸ੍ਸਾਮਿ? ਅਪਿ ਚਾਹਂ ਓਕਾਸਂ ਨ ਲਭਾਮਿ ਤਂ ਦੂਸੇਤੁ’’ਨ੍ਤਿ। ਅવਸ੍ਸੁਤੋ ਅવਸ੍ਸੁਤਾਯ ਸੁਨ੍ਦਰੀਨਨ੍ਦਾਯ ਭਿਕ੍ਖੁਨਿਯਾ ਕਾਯਸਂਸਗ੍ਗਂ ਸਮਾਪਜ੍ਜਿ।

Tena kho pana samayena sāḷho migāranattā bahidvārakoṭṭhake ṭhito hoti sundarīnandaṃ bhikkhuniṃ paṭipucchanto – ‘‘kahaṃ, ayye, ayyā sundarīnandā? Kahaṃ, ayye, ayyā sundarīnandā’’ti? Evaṃ vutte sundarīnandāya bhikkhuniyā antevāsinī bhikkhunī sāḷhaṃ migāranattāraṃ etadavoca – ‘‘gilānāvuso; piṇḍapātaṃ nīharissāmī’’ti. Atha kho sāḷho migāranattā – ‘‘yampāhaṃ atthāya ⁶ bhikkhunisaṅghassa bhattaṃ akāsiṃ ayyāya sundarīnandāya kāraṇā’’ti manusse āṇāpetvā – ‘‘bhikkhunisaṅghaṃ bhattena parivisathā’’ti vatvā yena bhikkhunupassayo tenupasaṅkami. Tena kho pana samayena sundarīnandā bhikkhunī bahārāmakoṭṭhake ṭhitā hoti sāḷhaṃ migāranattāraṃ patimānentī. Addasā kho sundarīnandā bhikkhunī sāḷhaṃ migāranattāraṃ dūratova āgacchantaṃ. Disvāna upassayaṃ pavisitvā sasīsaṃ pārupitvā mañcake nipajji. Atha kho sāḷho migāranattā yena sundarīnandā bhikkhunī tenupasaṅkami; upasaṅkamitvā sundarīnandaṃ bhikkhuniṃ etadavoca – ‘‘kiṃ te, ayye, aphāsu, kissa nipannāsī’’ti? ‘‘Evañhetaṃ, āvuso, hoti yā anicchantaṃ icchatī’’ti. ‘‘Kyāhaṃ taṃ, ayye , na icchissāmi? Api cāhaṃ okāsaṃ na labhāmi taṃ dūsetu’’nti. Avassuto avassutāya sundarīnandāya bhikkhuniyā kāyasaṃsaggaṃ samāpajji.

ਤੇਨ ਖੋ ਪਨ ਸਮਯੇਨ ਅਞ੍ਞਤਰਾ ਭਿਕ੍ਖੁਨੀ ਜਰਾਦੁਬ੍ਬਲਾ ਚਰਣਗਿਲਾਨਾ ਸੁਨ੍ਦਰੀਨਨ੍ਦਾਯ ਭਿਕ੍ਖੁਨਿਯਾ ਅવਿਦੂਰੇ ਨਿਪਨ੍ਨਾ ਹੋਤਿ। ਅਦ੍ਦਸਾ ਖੋ ਸਾ ਭਿਕ੍ਖੁਨੀ ਸਾਲ਼੍ਹਂ ਮਿਗਾਰਨਤ੍ਤਾਰਂ ਅવਸ੍ਸੁਤਂ ਅવਸ੍ਸੁਤਾਯ ਸੁਨ੍ਦਰੀਨਨ੍ਦਾਯ ਭਿਕ੍ਖੁਨਿਯਾ ਕਾਯਸਂਸਗ੍ਗਂ ਸਮਾਪਜ੍ਜਨ੍ਤਂ। ਦਿਸ੍વਾਨ ਉਜ੍ਝਾਯਤਿ ਖਿਯ੍ਯਤਿ વਿਪਾਚੇਤਿ – ‘‘ਕਥਞ੍ਹਿ ਨਾਮ ਅਯ੍ਯਾ ਸੁਨ੍ਦਰੀਨਨ੍ਦਾ ਅવਸ੍ਸੁਤਾ ਅવਸ੍ਸੁਤਸ੍ਸ ਪੁਰਿਸਪੁਗ੍ਗਲਸ੍ਸ ਕਾਯਸਂਸਗ੍ਗਂ ਸਾਦਿਯਿਸ੍ਸਤੀ’’ਤਿ ! ਅਥ ਖੋ ਸਾ ਭਿਕ੍ਖੁਨੀ ਭਿਕ੍ਖੁਨੀਨਂ ਏਤਮਤ੍ਥਂ ਆਰੋਚੇਸਿ। ਯਾ ਤਾ ਭਿਕ੍ਖੁਨਿਯੋ ਅਪ੍ਪਿਚ੍ਛਾ ਸਨ੍ਤੁਟ੍ਠਾ ਲਜ੍ਜਿਨਿਯੋ ਕੁਕ੍ਕੁਚ੍ਚਿਕਾ ਸਿਕ੍ਖਾਕਾਮਾ ਤਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ વਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਅਯ੍ਯਾ ਸੁਨ੍ਦਰੀਨਨ੍ਦਾ ਅવਸ੍ਸੁਤਾ ਅવਸ੍ਸੁਤਸ੍ਸ ਪੁਰਿਸਪੁਗ੍ਗਲਸ੍ਸ ਕਾਯਸਂਸਗ੍ਗਂ ਸਾਦਿਯਿਸ੍ਸਤੀ’’ਤਿ! ਅਥ ਖੋ ਤਾ ਭਿਕ੍ਖੁਨਿਯੋ ਭਿਕ੍ਖੂਨਂ ਏਤਮਤ੍ਥਂ ਆਰੋਚੇਸੁਂ। ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ ਸਨ੍ਤੁਟ੍ਠਾ ਲਜ੍ਜਿਨੋ ਕੁਕ੍ਕੁਚ੍ਚਕਾ ਸਿਕ੍ਖਾਕਾਮਾ ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ વਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸੁਨ੍ਦਰੀਨਨ੍ਦਾ ਭਿਕ੍ਖੁਨੀ ਅવਸ੍ਸੁਤਾ ਅવਸ੍ਸੁਤਸ੍ਸ ਪੁਰਿਸਪੁਗ੍ਗਲਸ੍ਸ ਕਾਯਸਂਸਗ੍ਗਂ ਸਾਦਿਯਿਸ੍ਸਤੀ’’ਤਿ!

Tena kho pana samayena aññatarā bhikkhunī jarādubbalā caraṇagilānā sundarīnandāya bhikkhuniyā avidūre nipannā hoti. Addasā kho sā bhikkhunī sāḷhaṃ migāranattāraṃ avassutaṃ avassutāya sundarīnandāya bhikkhuniyā kāyasaṃsaggaṃ samāpajjantaṃ. Disvāna ujjhāyati khiyyati vipāceti – ‘‘kathañhi nāma ayyā sundarīnandā avassutā avassutassa purisapuggalassa kāyasaṃsaggaṃ sādiyissatī’’ti ! Atha kho sā bhikkhunī bhikkhunīnaṃ etamatthaṃ ārocesi. Yā tā bhikkhuniyo appicchā santuṭṭhā lajjiniyo kukkuccikā sikkhākāmā tā ujjhāyanti khiyyanti vipācenti – ‘‘kathañhi nāma ayyā sundarīnandā avassutā avassutassa purisapuggalassa kāyasaṃsaggaṃ sādiyissatī’’ti! Atha kho tā bhikkhuniyo bhikkhūnaṃ etamatthaṃ ārocesuṃ. Ye te bhikkhū appicchā santuṭṭhā lajjino kukkuccakā sikkhākāmā te ujjhāyanti khiyyanti vipācenti – ‘‘kathañhi nāma sundarīnandā bhikkhunī avassutā avassutassa purisapuggalassa kāyasaṃsaggaṃ sādiyissatī’’ti!

ਅਥ ਖੋ ਤੇ ਭਿਕ੍ਖੂ ਸੁਨ੍ਦਰੀਨਨ੍ਦਂ ਭਿਕ੍ਖੁਨਿਂ ਅਨੇਕਪਰਿਯਾਯੇਨ વਿਗਰਹਿਤ੍વਾ ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਥ ਖੋ ਭਗવਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਭਿਕ੍ਖੁਸਙ੍ਘਂ ਸਨ੍ਨਿਪਾਤਾਪੇਤ੍વਾ ਭਿਕ੍ਖੂ ਪਟਿਪੁਚ੍ਛਿ – ‘‘ਸਚ੍ਚਂ ਕਿਰ, ਭਿਕ੍ਖવੇ, ਸੁਨ੍ਦਰੀਨਨ੍ਦਾ ਭਿਕ੍ਖੁਨੀ ਅવਸ੍ਸੁਤਾ ਅવਸ੍ਸੁਤਸ੍ਸ ਪੁਰਿਸਪੁਗ੍ਗਲਸ੍ਸ ਕਾਯਸਂਸਗ੍ਗਂ ਸਾਦਿਯਤੀ’’ਤਿ ⁷? ‘‘ਸਚ੍ਚਂ, ਭਗવਾ’’ਤਿ। વਿਗਰਹਿ ਬੁਦ੍ਧੋ ਭਗવਾ – ‘‘ਅਨਨੁਚ੍ਛવਿਕਂ, ਭਿਕ੍ਖવੇ, ਸੁਨ੍ਦਰੀਨਨ੍ਦਾਯ ਭਿਕ੍ਖੁਨਿਯਾ ਅਨਨੁਲੋਮਿਕਂ ਅਪ੍ਪਤਿਰੂਪਂ ਅਸ੍ਸਾਮਣਕਂ ਅਕਪ੍ਪਿਯਂ ਅਕਰਣੀਯਂ। ਕਥਞ੍ਹਿ ਨਾਮ, ਭਿਕ੍ਖવੇ, ਸੁਨ੍ਦਰੀਨਨ੍ਦਾ ਭਿਕ੍ਖੁਨੀ ਅવਸ੍ਸੁਤਾ ਅવਸ੍ਸੁਤਸ੍ਸ ਪੁਰਿਸਪੁਗ੍ਗਲਸ੍ਸ ਕਾਯਸਂਸਗ੍ਗਂ ਸਾਦਿਯਿਸ੍ਸਤਿ! ਨੇਤਂ, ਭਿਕ੍ਖવੇ, ਅਪ੍ਪਸਨ੍ਨਾਨਂ વਾ ਪਸਾਦਾਯ ਪਸਨ੍ਨਾਨਂ વਾ ਭਿਯ੍ਯੋਭਾવਾਯ। ਅਥ ਖ੍વੇਤਂ, ਭਿਕ੍ਖવੇ , ਅਪ੍ਪਸਨ੍ਨਾਨਞ੍ਚੇવ ਅਪ੍ਪਸਾਦਾਯ ਪਸਨ੍ਨਾਨਞ੍ਚ ਏਕਚ੍ਚਾਨਂ ਅਞ੍ਞਥਤ੍ਤਾਯਾ’’ਤਿ। ਅਥ ਖੋ ਭਗવਾ ਸੁਨ੍ਦਰੀਨਨ੍ਦਂ ਭਿਕ੍ਖੁਨਿਂ ਅਨੇਕਪਰਿਯਾਯੇਨ વਿਗਰਹਿਤ੍વਾ ਦੁਬ੍ਭਰਤਾਯ ਦੁਪ੍ਪੋਸਤਾਯ ਮਹਿਚ੍ਛਤਾਯ ਅਸਨ੍ਤੁਟ੍ਠਿਤਾਯ ⁸ ਸਙ੍ਗਣਿਕਾਯ ਕੋਸਜ੍ਜਸ੍ਸ ਅવਣ੍ਣਂ ਭਾਸਿਤ੍વਾ, ਅਨੇਕਪਰਿਯਾਯੇਨ ਸੁਭਰਤਾਯ ਸੁਪੋਸਤਾਯ ਅਪ੍ਪਿਚ੍ਛਸ੍ਸ ਸਨ੍ਤੁਟ੍ਠਸ੍ਸ ⁹ ਸਲ੍ਲੇਖਸ੍ਸ ਧੁਤਸ੍ਸ ਪਾਸਾਦਿਕਸ੍ਸ ਅਪਚਯਸ੍ਸ વੀਰਿਯਾਰਮ੍ਭਸ੍ਸ વਣ੍ਣਂ ਭਾਸਿਤ੍વਾ, ਭਿਕ੍ਖੂਨਂ ਤਦਨੁਚ੍ਛવਿਕਂ ਤਦਨੁਲੋਮਿਕਂ ਧਮ੍ਮਿਂ ਕਥਂ ਕਤ੍વਾ ਭਿਕ੍ਖੂ ਆਮਨ੍ਤੇਸਿ – ‘‘ਤੇਨ ਹਿ, ਭਿਕ੍ਖવੇ, ਭਿਕ੍ਖੁਨੀਨਂ ਸਿਕ੍ਖਾਪਦਂ ਪਞ੍ਞਪੇਸ੍ਸਾਮਿ ਦਸ ਅਤ੍ਥવਸੇ ਪਟਿਚ੍ਚ – ਸਙ੍ਘਸੁਟ੍ਠੁਤਾਯ, ਸਙ੍ਘਫਾਸੁਤਾਯ, ਦੁਮ੍ਮਙ੍ਕੂਨਂ ਭਿਕ੍ਖੁਨੀਨਂ ਨਿਗ੍ਗਹਾਯ , ਪੇਸਲਾਨਂ ਭਿਕ੍ਖੁਨੀਨਂ ਫਾਸੁવਿਹਾਰਾਯ, ਦਿਟ੍ਠਧਮ੍ਮਿਕਾਨਂ ਆਸવਾਨਂ ਸਂવਰਾਯ, ਸਮ੍ਪਰਾਯਿਕਾਨਂ ਆਸવਾਨਂ ਪਟਿਘਾਤਾਯ, ਅਪ੍ਪਸਨ੍ਨਾਨਂ ਪਸਾਦਾਯ, ਪਸਨ੍ਨਾਨਂ ਭਿਯ੍ਯੋਭਾવਾਯ, ਸਦ੍ਧਮ੍ਮਟ੍ਠਿਤਿਯਾ વਿਨਯਾਨੁਗ੍ਗਹਾਯ। ਏવਞ੍ਚ ਪਨ, ਭਿਕ੍ਖવੇ, ਭਿਕ੍ਖੁਨਿਯੋ ਇਮਂ ਸਿਕ੍ਖਾਪਦਂ ਉਦ੍ਦਿਸਨ੍ਤੁ –

Atha kho te bhikkhū sundarīnandaṃ bhikkhuniṃ anekapariyāyena vigarahitvā bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā bhikkhū paṭipucchi – ‘‘saccaṃ kira, bhikkhave, sundarīnandā bhikkhunī avassutā avassutassa purisapuggalassa kāyasaṃsaggaṃ sādiyatī’’ti ¹⁰? ‘‘Saccaṃ, bhagavā’’ti. Vigarahi buddho bhagavā – ‘‘ananucchavikaṃ, bhikkhave, sundarīnandāya bhikkhuniyā ananulomikaṃ appatirūpaṃ assāmaṇakaṃ akappiyaṃ akaraṇīyaṃ. Kathañhi nāma, bhikkhave, sundarīnandā bhikkhunī avassutā avassutassa purisapuggalassa kāyasaṃsaggaṃ sādiyissati! Netaṃ, bhikkhave, appasannānaṃ vā pasādāya pasannānaṃ vā bhiyyobhāvāya. Atha khvetaṃ, bhikkhave , appasannānañceva appasādāya pasannānañca ekaccānaṃ aññathattāyā’’ti. Atha kho bhagavā sundarīnandaṃ bhikkhuniṃ anekapariyāyena vigarahitvā dubbharatāya dupposatāya mahicchatāya asantuṭṭhitāya ¹¹ saṅgaṇikāya kosajjassa avaṇṇaṃ bhāsitvā, anekapariyāyena subharatāya suposatāya appicchassa santuṭṭhassa ¹² sallekhassa dhutassa pāsādikassa apacayassa vīriyārambhassa vaṇṇaṃ bhāsitvā, bhikkhūnaṃ tadanucchavikaṃ tadanulomikaṃ dhammiṃ kathaṃ katvā bhikkhū āmantesi – ‘‘tena hi, bhikkhave, bhikkhunīnaṃ sikkhāpadaṃ paññapessāmi dasa atthavase paṭicca – saṅghasuṭṭhutāya, saṅghaphāsutāya, dummaṅkūnaṃ bhikkhunīnaṃ niggahāya , pesalānaṃ bhikkhunīnaṃ phāsuvihārāya, diṭṭhadhammikānaṃ āsavānaṃ saṃvarāya, samparāyikānaṃ āsavānaṃ paṭighātāya, appasannānaṃ pasādāya, pasannānaṃ bhiyyobhāvāya, saddhammaṭṭhitiyā vinayānuggahāya. Evañca pana, bhikkhave, bhikkhuniyo imaṃ sikkhāpadaṃ uddisantu –

੬੫੭. ‘‘ਯਾ ਪਨ ਭਿਕ੍ਖੁਨੀ ਅવਸ੍ਸੁਤਾ ਅવਸ੍ਸੁਤਸ੍ਸ ਪੁਰਿਸਪੁਗ੍ਗਲਸ੍ਸ ਅਧਕ੍ਖਕਂ ਉਬ੍ਭਜਾਣੁਮਣ੍ਡਲਂ ਆਮਸਨਂ વਾ ਪਰਾਮਸਨਂ વਾ ਗਹਣਂ વਾ ਛੁਪਨਂ વਾ ਪਟਿਪੀਲ਼ਨਂ વਾ ਸਾਦਿਯੇਯ੍ਯ, ਅਯਮ੍ਪਿ ਪਾਰਾਜਿਕਾ ਹੋਤਿ ਅਸਂવਾਸਾ ਉਬ੍ਭਜਾਣੁਮਣ੍ਡਲਿਕਾ’’ਤਿ।

657.‘‘Yā pana bhikkhunī avassutā avassutassa purisapuggalassa adhakkhakaṃ ubbhajāṇumaṇḍalaṃ āmasanaṃ vā parāmasanaṃ vā gahaṇaṃ vā chupanaṃ vā paṭipīḷanaṃ vā sādiyeyya, ayampi pārājikā hoti asaṃvāsā ubbhajāṇumaṇḍalikā’’ti.

੬੫੮. ਯਾ ਪਨਾਤਿ ਯਾ ਯਾਦਿਸਾ ਯਥਾਯੁਤ੍ਤਾ ਯਥਾਜਚ੍ਚਾ ਯਥਾਨਾਮਾ ਯਥਾਗੋਤ੍ਤਾ ਯਥਾਸੀਲਾ ਯਥਾવਿਹਾਰਿਨੀ ਯਥਾਗੋਚਰਾ ਥੇਰਾ વਾ ਨવਾ વਾ ਮਜ੍ਝਿਮਾ વਾ, ਏਸਾ વੁਚ੍ਚਤਿ ਯਾ ਪਨਾਤਿ।

658.Yāpanāti yā yādisā yathāyuttā yathājaccā yathānāmā yathāgottā yathāsīlā yathāvihārinī yathāgocarā therā vā navā vā majjhimā vā, esā vuccati yā panāti.

ਭਿਕ੍ਖੁਨੀਤਿ ਭਿਕ੍ਖਿਕਾਤਿ ਭਿਕ੍ਖੁਨੀ; ਭਿਕ੍ਖਾਚਰਿਯਂ ਅਜ੍ਝੁਪਗਤਾਤਿ ਭਿਕ੍ਖੁਨੀ; ਭਿਨ੍ਨਪਟਧਰਾਤਿ ਭਿਕ੍ਖੁਨੀ ; ਸਮਞ੍ਞਾਯ ਭਿਕ੍ਖੁਨੀ; ਪਟਿਞ੍ਞਾਯ ਭਿਕ੍ਖੁਨੀ; ਏਹਿ ਭਿਕ੍ਖੁਨੀਤਿ ਭਿਕ੍ਖੁਨੀ; ਤੀਹਿ ਸਰਣਗਮਨੇਹਿ ਉਪਸਮ੍ਪਨ੍ਨਾਤਿ ਭਿਕ੍ਖੁਨੀ; ਭਦ੍ਰਾ ਭਿਕ੍ਖੁਨੀ; ਸਾਰਾ ਭਿਕ੍ਖੁਨੀ; ਸੇਖਾ ਭਿਕ੍ਖੁਨੀ; ਅਸੇਖਾ ਭਿਕ੍ਖੁਨੀ; ਸਮਗ੍ਗੇਨ ਉਭਤੋਸਙ੍ਘੇਨ ਞਤ੍ਤਿਚਤੁਤ੍ਥੇਨ ਕਮ੍ਮੇਨ ਅਕੁਪ੍ਪੇਨ ਠਾਨਾਰਹੇਨ ਉਪਸਮ੍ਪਨ੍ਨਾਤਿ ਭਿਕ੍ਖੁਨੀ। ਤਤ੍ਰ ਯਾਯਂ ਭਿਕ੍ਖੁਨੀ ਸਮਗ੍ਗੇਨ ਉਭਤੋਸਙ੍ਘੇਨ ਞਤ੍ਤਿਚਤੁਤ੍ਥੇਨ ਕਮ੍ਮੇਨ ਅਕੁਪ੍ਪੇਨ ਠਾਨਾਰਹੇਨ ਉਪਸਮ੍ਪਨ੍ਨਾ, ਅਯਂ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤਾ ਭਿਕ੍ਖੁਨੀਤਿ।

Bhikkhunīti bhikkhikāti bhikkhunī; bhikkhācariyaṃ ajjhupagatāti bhikkhunī; bhinnapaṭadharāti bhikkhunī ; samaññāya bhikkhunī; paṭiññāya bhikkhunī; ehi bhikkhunīti bhikkhunī; tīhi saraṇagamanehi upasampannāti bhikkhunī; bhadrā bhikkhunī; sārā bhikkhunī; sekhā bhikkhunī; asekhā bhikkhunī; samaggena ubhatosaṅghena ñatticatutthena kammena akuppena ṭhānārahena upasampannāti bhikkhunī. Tatra yāyaṃ bhikkhunī samaggena ubhatosaṅghena ñatticatutthena kammena akuppena ṭhānārahena upasampannā, ayaṃ imasmiṃ atthe adhippetā bhikkhunīti.

ਅવਸ੍ਸੁਤਾ ਨਾਮ ਸਾਰਤ੍ਤਾ ਅਪੇਕ੍ਖવਤੀ ਪਟਿਬਦ੍ਧਚਿਤ੍ਤਾ।

Avassutā nāma sārattā apekkhavatī paṭibaddhacittā.

ਅવਸ੍ਸੁਤੋ ਨਾਮ ਸਾਰਤ੍ਤੋ ਅਪੇਕ੍ਖવਾ ਪਟਿਬਦ੍ਧਚਿਤ੍ਤੋ।

Avassuto nāma sāratto apekkhavā paṭibaddhacitto.

ਪੁਰਿਸਪੁਗ੍ਗਲੋ ਨਾਮ ਮਨੁਸ੍ਸਪੁਰਿਸੋ ਨ ਯਕ੍ਖੋ ਨ ਪੇਤੋ ਨ ਤਿਰਚ੍ਛਾਨਗਤੋ વਿਞ੍ਞੂ ਪਟਿਬਲੋ ਕਾਯਸਂਸਗ੍ਗਂ ਸਮਾਪਜ੍ਜਿਤੁਂ।

Purisapuggalo nāma manussapuriso na yakkho na peto na tiracchānagato viññū paṭibalo kāyasaṃsaggaṃ samāpajjituṃ.

ਅਧਕ੍ਖਕਨ੍ਤਿ ਹੇਟ੍ਠਕ੍ਖਕਂ।

Adhakkhakanti heṭṭhakkhakaṃ.

ਉਬ੍ਭਜਾਣੁਮਣ੍ਡਲਨ੍ਤਿ ਉਪਰਿਜਾਣੁਮਣ੍ਡਲਂ।

Ubbhajāṇumaṇḍalanti uparijāṇumaṇḍalaṃ.

ਆਮਸਨਂ ਨਾਮ ਆਮਟ੍ਠਮਤ੍ਤਂ।

Āmasanaṃ nāma āmaṭṭhamattaṃ.

ਪਰਾਮਸਨਂ ਨਾਮ ਇਤੋਚਿਤੋ ਚ ਸਞ੍ਚੋਪਨਂ।

Parāmasanaṃ nāma itocito ca sañcopanaṃ.

ਗਹਣਂ ਨਾਮ ਗਹਿਤਮਤ੍ਤਂ।

Gahaṇaṃ nāma gahitamattaṃ.

ਛੁਪਨਂ ਨਾਮ ਫੁਟ੍ਠਮਤ੍ਤਂ।

Chupanaṃ nāma phuṭṭhamattaṃ.

ਪਟਿਪੀਲ਼ਨਂ વਾ ਸਾਦਿਯੇਯ੍ਯਾਤਿ ਅਙ੍ਗਂ ਗਹੇਤ੍વਾ ਨਿਪ੍ਪੀਲ਼ਨਂ ਸਾਦਿਯਤਿ।

Paṭipīḷanaṃvā sādiyeyyāti aṅgaṃ gahetvā nippīḷanaṃ sādiyati.

ਅਯਮ੍ਪੀਤਿ ਪੁਰਿਮਾਯੋ ਉਪਾਦਾਯ વੁਚ੍ਚਤਿ।

Ayampīti purimāyo upādāya vuccati.

ਪਾਰਾਜਿਕਾ ਹੋਤੀਤਿ ਸੇਯ੍ਯਥਾਪਿ ਨਾਮ ਪੁਰਿਸੋ ਸੀਸਚ੍ਛਿਨ੍ਨੋ ਅਭਬ੍ਬੋ ਤੇਨ ਸਰੀਰਬਨ੍ਧਨੇਨ ਜੀવਿਤੁਂ, ਏવਮੇવ ਭਿਕ੍ਖੁਨੀ ਅવਸ੍ਸੁਤਾ ਅવਸ੍ਸੁਤਸ੍ਸ ਪੁਰਿਸਪੁਗ੍ਗਲਸ੍ਸ ਅਧਕ੍ਖਕਂ ਉਬ੍ਭਜਾਣੁਮਣ੍ਡਲਂ ਆਮਸਨਂ વਾ ਪਰਾਮਸਨਂ વਾ ਗਹਣਂ વਾ ਛੁਪਨਂ વਾ ਪਟਿਪੀਲ਼ਨਂ વਾ ਸਾਦਿਯਨ੍ਤੀ ਅਸ੍ਸਮਣੀ ਹੋਤਿ ਅਸਕ੍ਯਧੀਤਾ। ਤੇਨ વੁਚ੍ਚਤਿ ਪਾਰਾਜਿਕਾ ਹੋਤੀਤਿ।

Pārājikā hotīti seyyathāpi nāma puriso sīsacchinno abhabbo tena sarīrabandhanena jīvituṃ, evameva bhikkhunī avassutā avassutassa purisapuggalassa adhakkhakaṃ ubbhajāṇumaṇḍalaṃ āmasanaṃ vā parāmasanaṃ vā gahaṇaṃ vā chupanaṃ vā paṭipīḷanaṃ vā sādiyantī assamaṇī hoti asakyadhītā. Tena vuccati pārājikā hotīti.

ਅਸਂવਾਸਾਤਿ ਸਂવਾਸੋ ਨਾਮ ਏਕਕਮ੍ਮਂ ਏਕੁਦ੍ਦੇਸੋ ਸਮਸਿਕ੍ਖਤਾ, ਏਸੋ ਸਂવਾਸੋ ਨਾਮ। ਸੋ ਤਾਯ ਸਦ੍ਧਿਂ ਨਤ੍ਥਿ, ਤੇਨ વੁਚ੍ਚਤਿ ਅਸਂવਾਸਾਤਿ।

Asaṃvāsāti saṃvāso nāma ekakammaṃ ekuddeso samasikkhatā, eso saṃvāso nāma. So tāya saddhiṃ natthi, tena vuccati asaṃvāsāti.

੬੫੯. ਉਭਤੋਅવਸ੍ਸੁਤੇ ਅਧਕ੍ਖਕਂ ਉਬ੍ਭਜਾਣੁਮਣ੍ਡਲਂ ਕਾਯੇਨ ਕਾਯਂ ਆਮਸਤਿ, ਆਪਤ੍ਤਿ ਪਾਰਾਜਿਕਸ੍ਸ। ਕਾਯੇਨ ਕਾਯਪਟਿਬਦ੍ਧਂ ਆਮਸਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ। ਕਾਯਪਟਿਬਦ੍ਧੇਨ ਕਾਯਂ ਆਮਸਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ। ਕਾਯਪਟਿਬਦ੍ਧੇਨ ਕਾਯਪਟਿਬਦ੍ਧਂ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ।

659. Ubhatoavassute adhakkhakaṃ ubbhajāṇumaṇḍalaṃ kāyena kāyaṃ āmasati, āpatti pārājikassa. Kāyena kāyapaṭibaddhaṃ āmasati, āpatti thullaccayassa. Kāyapaṭibaddhena kāyaṃ āmasati, āpatti thullaccayassa. Kāyapaṭibaddhena kāyapaṭibaddhaṃ āmasati, āpatti dukkaṭassa.

ਨਿਸ੍ਸਗ੍ਗਿਯੇਨ ਕਾਯਂ ਆਮਸਤਿ , ਆਪਤ੍ਤਿ ਦੁਕ੍ਕਟਸ੍ਸ। ਨਿਸ੍ਸਗ੍ਗਿਯੇਨ ਕਾਯਪਟਿਬਦ੍ਧਂ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ। ਨਿਸ੍ਸਗ੍ਗਿਯੇਨ ਨਿਸ੍ਸਗ੍ਗਿਯਂ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ।

Nissaggiyena kāyaṃ āmasati , āpatti dukkaṭassa. Nissaggiyena kāyapaṭibaddhaṃ āmasati, āpatti dukkaṭassa. Nissaggiyena nissaggiyaṃ āmasati, āpatti dukkaṭassa.

ਉਬ੍ਭਕ੍ਖਕਂ ਅਧੋਜਾਣੁਮਣ੍ਡਲਂ ਕਾਯੇਨ ਕਾਯਂ ਆਮਸਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ। ਕਾਯੇਨ ਕਾਯਪਟਿਬਦ੍ਧਂ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ। ਕਾਯਪਟਿਬਦ੍ਧੇਨ ਕਾਯਂ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ। ਕਾਯਪਟਿਬਦ੍ਧੇਨ ਕਾਯਪਟਿਬਦ੍ਧਂ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ।

Ubbhakkhakaṃ adhojāṇumaṇḍalaṃ kāyena kāyaṃ āmasati, āpatti thullaccayassa. Kāyena kāyapaṭibaddhaṃ āmasati, āpatti dukkaṭassa. Kāyapaṭibaddhena kāyaṃ āmasati, āpatti dukkaṭassa. Kāyapaṭibaddhena kāyapaṭibaddhaṃ āmasati, āpatti dukkaṭassa.