| Library / Tipiṭaka / တိပိဋက • Tipiṭaka / ပရိဝာရ-အဋ္ဌကထာ • Parivāra-aṭṭhakathā |
ပဌမပာရာဇိကသမုဋ္ဌာနဝဏ္ဏနာ
Paṭhamapārājikasamuṭṭhānavaṇṇanā
၂၅၈. ဣဒာနိ တာနိ ဒသ္သေတုံ ‘‘မေထုနံ သုက္ကသံသဂ္ဂော’’တိအာဒိ ဝုတ္တံ။ တတ္ထ မေထုနန္တိ ဣဒံ တာဝ ပဌမပာရာဇိကံ နာမ ဧကံ သမုဋ္ဌာနသီသံ, သေသာနိ တေန သဒိသာနိ။ တတ္ထ သုက္ကသံသဂ္ဂောတိ သုက္ကဝိသ္သဋ္ဌိ စေဝ ကာယသံသဂ္ဂော စ။ အနိယတာ ပဌမိကာတိ ပဌမံ အနိယတသိက္ခာပဒံ။ ပုဗ္ဗူပပရိပာစိတာတိ ‘‘ဇာနံ ပုဗ္ဗူပဂတံ ဘိက္ခု’’န္တိ သိက္ခာပဒဉ္စ ဘိက္ခုနိပရိပာစိတပိဏ္ဍပာတသိက္ခာပဒဉ္စ။ ရဟော ဘိက္ခုနိယာ သဟာတိ ဘိက္ခုနိယာ သဒ္ဓိံ ရဟော နိသဇ္ဇသိက္ခာပဒဉ္စ။
258. Idāni tāni dassetuṃ ‘‘methunaṃ sukkasaṃsaggo’’tiādi vuttaṃ. Tattha methunanti idaṃ tāva paṭhamapārājikaṃ nāma ekaṃ samuṭṭhānasīsaṃ, sesāni tena sadisāni. Tattha sukkasaṃsaggoti sukkavissaṭṭhi ceva kāyasaṃsaggo ca. Aniyatā paṭhamikāti paṭhamaṃ aniyatasikkhāpadaṃ. Pubbūpaparipācitāti ‘‘jānaṃ pubbūpagataṃ bhikkhu’’nti sikkhāpadañca bhikkhuniparipācitapiṇḍapātasikkhāpadañca. Raho bhikkhuniyā sahāti bhikkhuniyā saddhiṃ raho nisajjasikkhāpadañca.
သဘောဇနေ ရဟော ဒ္ဝေ စာတိ သဘောဇနေ ကုလေ အနုပခဇ္ဇနိသဇ္ဇသိက္ခာပဒဉ္စ ဒ္ဝေ ရဟောနိသဇ္ဇသိက္ခာပဒာနိ စ။ အင္ဂုလိ ဥဒကေ ဟသန္တိ အင္ဂုလိပတောဒကဉ္စ ဥဒကေ ဟသဓမ္မသိက္ခာပဒဉ္စ။ ပဟာရေ ဥဂ္ဂိရေ စေဝာတိ ပဟာရဒာနသိက္ခာပဒဉ္စ တလသတ္တိကဥဂ္ဂိရဏသိက္ခာပဒဉ္စ။ တေပညာသာ စ သေခိယာတိ ပရိမဏ္ဍလနိဝာသနာဒီနိ ခုဒ္ဒကဝဏ္ဏနာဝသာနေ ဝုတ္တာနိ တေပညာသ သေခိယသိက္ခာပဒာနိ စ။
Sabhojane raho dve cāti sabhojane kule anupakhajjanisajjasikkhāpadañca dve rahonisajjasikkhāpadāni ca. Aṅguli udake hasanti aṅgulipatodakañca udake hasadhammasikkhāpadañca. Pahāre uggire cevāti pahāradānasikkhāpadañca talasattikauggiraṇasikkhāpadañca. Tepaññāsā ca sekhiyāti parimaṇḍalanivāsanādīni khuddakavaṇṇanāvasāne vuttāni tepaññāsa sekhiyasikkhāpadāni ca.
အဓက္ခဂာမာဝသ္သုတာတိ ဘိက္ခုနီနံ အဓက္ခကသိက္ခာပဒဉ္စ ဂာမန္တရဂမနံ အဝသ္သုတာ အဝသ္သုတသ္သ ဟတ္ထတော ခာဒနီယဘောဇနီယဂ္ဂဟဏသိက္ခာပဒဉ္စ။ တလမဋ္ဌဉ္စ သုဒ္ဓိကာတိ တလဃာတကံ ဇတုမဋ္ဌံ ဥဒကသုဒ္ဓိကာဒိယနဉ္စ။ ဝသ္သံဝုဋ္ဌာ စ ဩဝာဒန္တိ ဝသ္သံဝုဋ္ဌာ ဆပ္ပဉ္စယောဇနာနိ သိက္ခာပဒဉ္စ ဩဝာဒာယ အဂမနသိက္ခာပဒဉ္စ။ နာနုဗန္ဓေ ပဝတ္တိနိန္တိ ယာ ပန ဘိက္ခုနီ ဝုဋ္ဌာပိတံ ပဝတ္တိနိံ ဒ္ဝေ ဝသ္သာနိ နာနုဗန္ဓေယ္ယာတိ ဝုတ္တသိက္ခာပဒံ။
Adhakkhagāmāvassutāti bhikkhunīnaṃ adhakkhakasikkhāpadañca gāmantaragamanaṃ avassutā avassutassa hatthato khādanīyabhojanīyaggahaṇasikkhāpadañca. Talamaṭṭhañca suddhikāti talaghātakaṃ jatumaṭṭhaṃ udakasuddhikādiyanañca. Vassaṃvuṭṭhā ca ovādanti vassaṃvuṭṭhā chappañcayojanāni sikkhāpadañca ovādāya agamanasikkhāpadañca. Nānubandhe pavattininti yā pana bhikkhunī vuṭṭhāpitaṃ pavattiniṃ dve vassāni nānubandheyyāti vuttasikkhāpadaṃ.
ဣမေ သိက္ခာတိ ဣမာ သိက္ခာယော; လိင္ဂဝိပရိယာယော ကတော။ ကာယမာနသိကာ ကတာတိ ကာယစိတ္တသမုဋ္ဌာနာ ကတာ။
Imesikkhāti imā sikkhāyo; liṅgavipariyāyo kato. Kāyamānasikā katāti kāyacittasamuṭṭhānā katā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / ပရိဝာရပာဠိ • Parivārapāḷi / ၁. ပဌမပာရာဇိကသမုဋ္ဌာနံ • 1. Paṭhamapārājikasamuṭṭhānaṃ
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / သမုဋ္ဌာနသီသဝဏ္ဏနာ • Samuṭṭhānasīsavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ပဌမပာရာဇိကသမုဋ္ဌာနဝဏ္ဏနာ • Paṭhamapārājikasamuṭṭhānavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / သမုဋ္ဌာနသီသဝဏ္ဏနာ • Samuṭṭhānasīsavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ပဌမပာရာဇိကသမုဋ္ဌာနဝဏ္ဏနာ • Paṭhamapārājikasamuṭṭhānavaṇṇanā
