| Library / Tipiṭaka / තිපිටක • Tipiṭaka / පරිවාර-අට්‌ඨකථා • Parivāra-aṭṭhakathā |
පඨමපාරාජිකසමුට්‌ඨානවණ්‌ණනා
Paṭhamapārājikasamuṭṭhānavaṇṇanā
258. ඉදානි තානි දස්‌සෙතුං ‘‘මෙථුනං සුක්‌කසංසග්‌ගො’’තිආදි වුත්‌තං. තත්‌ථ මෙථුනන්‌ති ඉදං තාව පඨමපාරාජිකං නාම එකං සමුට්‌ඨානසීසං, සෙසානි තෙන සදිසානි. තත්‌ථ සුක්‌කසංසග්‌ගොති සුක්‌කවිස්‌සට්‌ඨි චෙව කායසංසග්‌ගො ච. අනියතා පඨමිකාති පඨමං අනියතසික්‌ඛාපදං. පුබ්‌බූපපරිපාචිතාති ‘‘ජානං පුබ්‌බූපගතං භික්‌ඛු’’න්‌ති සික්‌ඛාපදඤ්‌ච භික්‌ඛුනිපරිපාචිතපිණ්‌ඩපාතසික්‌ඛාපදඤ්‌ච. රහො භික්‌ඛුනියා සහාති භික්‌ඛුනියා සද්‌ධිං රහො නිසජ්‌ජසික්‌ඛාපදඤ්‌ච.
258. Idāni tāni dassetuṃ ‘‘methunaṃ sukkasaṃsaggo’’tiādi vuttaṃ. Tattha methunanti idaṃ tāva paṭhamapārājikaṃ nāma ekaṃ samuṭṭhānasīsaṃ, sesāni tena sadisāni. Tattha sukkasaṃsaggoti sukkavissaṭṭhi ceva kāyasaṃsaggo ca. Aniyatā paṭhamikāti paṭhamaṃ aniyatasikkhāpadaṃ. Pubbūpaparipācitāti ‘‘jānaṃ pubbūpagataṃ bhikkhu’’nti sikkhāpadañca bhikkhuniparipācitapiṇḍapātasikkhāpadañca. Raho bhikkhuniyā sahāti bhikkhuniyā saddhiṃ raho nisajjasikkhāpadañca.
සභොජනෙ රහො ද්‌වෙ චාති සභොජනෙ කුලෙ අනුපඛජ්‌ජනිසජ්‌ජසික්‌ඛාපදඤ්‌ච ද්‌වෙ රහොනිසජ්‌ජසික්‌ඛාපදානි ච. අඞ්‌ගුලි උදකෙ හසන්‌ති අඞ්‌ගුලිපතොදකඤ්‌ච උදකෙ හසධම්‌මසික්‌ඛාපදඤ්‌ච. පහාරෙ උග්‌ගිරෙ චෙවාති පහාරදානසික්‌ඛාපදඤ්‌ච තලසත්‌තිකඋග්‌ගිරණසික්‌ඛාපදඤ්‌ච. තෙපඤ්‌ඤාසා ච සෙඛියාති පරිමණ්‌ඩලනිවාසනාදීනි ඛුද්‌දකවණ්‌ණනාවසානෙ වුත්‌තානි තෙපඤ්‌ඤාස සෙඛියසික්‌ඛාපදානි ච.
Sabhojane raho dve cāti sabhojane kule anupakhajjanisajjasikkhāpadañca dve rahonisajjasikkhāpadāni ca. Aṅguli udake hasanti aṅgulipatodakañca udake hasadhammasikkhāpadañca. Pahāre uggire cevāti pahāradānasikkhāpadañca talasattikauggiraṇasikkhāpadañca. Tepaññāsā ca sekhiyāti parimaṇḍalanivāsanādīni khuddakavaṇṇanāvasāne vuttāni tepaññāsa sekhiyasikkhāpadāni ca.
අධක්‌ඛගාමාවස්‌සුතාති භික්‌ඛුනීනං අධක්‌ඛකසික්‌ඛාපදඤ්‌ච ගාමන්‌තරගමනං අවස්‌සුතා අවස්‌සුතස්‌ස හත්‌ථතො ඛාදනීයභොජනීයග්‌ගහණසික්‌ඛාපදඤ්‌ච. තලමට්‌ඨඤ්‌ච සුද්‌ධිකාති තලඝාතකං ජතුමට්‌ඨං උදකසුද්‌ධිකාදියනඤ්‌ච. වස්‌සංවුට්‌ඨා ච ඔවාදන්‌ති වස්‌සංවුට්‌ඨා ඡප්‌පඤ්‌චයොජනානි සික්‌ඛාපදඤ්‌ච ඔවාදාය අගමනසික්‌ඛාපදඤ්‌ච. නානුබන්‌ධෙ පවත්‌තිනින්‌ති යා පන භික්‌ඛුනී වුට්‌ඨාපිතං පවත්‌තිනිං ද්‌වෙ වස්‌සානි නානුබන්‌ධෙය්‍යාති වුත්‌තසික්‌ඛාපදං.
Adhakkhagāmāvassutāti bhikkhunīnaṃ adhakkhakasikkhāpadañca gāmantaragamanaṃ avassutā avassutassa hatthato khādanīyabhojanīyaggahaṇasikkhāpadañca. Talamaṭṭhañca suddhikāti talaghātakaṃ jatumaṭṭhaṃ udakasuddhikādiyanañca. Vassaṃvuṭṭhā ca ovādanti vassaṃvuṭṭhā chappañcayojanāni sikkhāpadañca ovādāya agamanasikkhāpadañca. Nānubandhe pavattininti yā pana bhikkhunī vuṭṭhāpitaṃ pavattiniṃ dve vassāni nānubandheyyāti vuttasikkhāpadaṃ.
ඉමෙ සික්‌ඛාති ඉමා සික්‌ඛායො; ලිඞ්‌ගවිපරියායො කතො. කායමානසිකා කතාති කායචිත්‌තසමුට්‌ඨානා කතා.
Imesikkhāti imā sikkhāyo; liṅgavipariyāyo kato. Kāyamānasikā katāti kāyacittasamuṭṭhānā katā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / පරිවාරපාළි • Parivārapāḷi / 1. පඨමපාරාජිකසමුට්‌ඨානං • 1. Paṭhamapārājikasamuṭṭhānaṃ
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / සමුට්‌ඨානසීසවණ්‌ණනා • Samuṭṭhānasīsavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / පඨමපාරාජිකසමුට්‌ඨානවණ්‌ණනා • Paṭhamapārājikasamuṭṭhānavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / සමුට්‌ඨානසීසවණ්‌ණනා • Samuṭṭhānasīsavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / පඨමපාරාජිකසමුට්‌ඨානවණ්‌ණනා • Paṭhamapārājikasamuṭṭhānavaṇṇanā
