| Library / Tipiṭaka / ཏིཔིཊཀ • Tipiṭaka / པརིཝཱར-ཨཊྛཀཐཱ • Parivāra-aṭṭhakathā |
པཋམཔཱརཱཛིཀསམུཊྛཱནཝཎྞནཱ
Paṭhamapārājikasamuṭṭhānavaṇṇanā
༢༥༨. ཨིདཱནི ཏཱནི དསྶེཏུཾ ‘‘མེཐུནཾ སུཀྐསཾསགྒོ’’ཏིཨཱདི ཝུཏྟཾ། ཏཏྠ མེཐུནནྟི ཨིདཾ ཏཱཝ པཋམཔཱརཱཛིཀཾ ནཱམ ཨེཀཾ སམུཊྛཱནསཱིསཾ, སེསཱནི ཏེན སདིསཱནི། ཏཏྠ སུཀྐསཾསགྒོཏི སུཀྐཝིསྶཊྛི ཙེཝ ཀཱཡསཾསགྒོ ཙ། ཨནིཡཏཱ པཋམིཀཱཏི པཋམཾ ཨནིཡཏསིཀྑཱཔདཾ། པུབྦཱུཔཔརིཔཱཙིཏཱཏི ‘‘ཛཱནཾ པུབྦཱུཔགཏཾ བྷིཀྑུ’’ནྟི སིཀྑཱཔདཉྩ བྷིཀྑུནིཔརིཔཱཙིཏཔིཎྜཔཱཏསིཀྑཱཔདཉྩ། རཧོ བྷིཀྑུནིཡཱ སཧཱཏི བྷིཀྑུནིཡཱ སདྡྷིཾ རཧོ ནིསཛྫསིཀྑཱཔདཉྩ།
258. Idāni tāni dassetuṃ ‘‘methunaṃ sukkasaṃsaggo’’tiādi vuttaṃ. Tattha methunanti idaṃ tāva paṭhamapārājikaṃ nāma ekaṃ samuṭṭhānasīsaṃ, sesāni tena sadisāni. Tattha sukkasaṃsaggoti sukkavissaṭṭhi ceva kāyasaṃsaggo ca. Aniyatā paṭhamikāti paṭhamaṃ aniyatasikkhāpadaṃ. Pubbūpaparipācitāti ‘‘jānaṃ pubbūpagataṃ bhikkhu’’nti sikkhāpadañca bhikkhuniparipācitapiṇḍapātasikkhāpadañca. Raho bhikkhuniyā sahāti bhikkhuniyā saddhiṃ raho nisajjasikkhāpadañca.
སབྷོཛནེ རཧོ དྭེ ཙཱཏི སབྷོཛནེ ཀུལེ ཨནུཔཁཛྫནིསཛྫསིཀྑཱཔདཉྩ དྭེ རཧོནིསཛྫསིཀྑཱཔདཱནི ཙ། ཨངྒུལི ཨུདཀེ ཧསནྟི ཨངྒུལིཔཏོདཀཉྩ ཨུདཀེ ཧསདྷམྨསིཀྑཱཔདཉྩ། པཧཱརེ ཨུགྒིརེ ཙེཝཱཏི པཧཱརདཱནསིཀྑཱཔདཉྩ ཏལསཏྟིཀཨུགྒིརཎསིཀྑཱཔདཉྩ། ཏེཔཉྙཱསཱ ཙ སེཁིཡཱཏི པརིམཎྜལནིཝཱསནཱདཱིནི ཁུདྡཀཝཎྞནཱཝསཱནེ ཝུཏྟཱནི ཏེཔཉྙཱས སེཁིཡསིཀྑཱཔདཱནི ཙ།
Sabhojane raho dve cāti sabhojane kule anupakhajjanisajjasikkhāpadañca dve rahonisajjasikkhāpadāni ca. Aṅguli udake hasanti aṅgulipatodakañca udake hasadhammasikkhāpadañca. Pahāre uggire cevāti pahāradānasikkhāpadañca talasattikauggiraṇasikkhāpadañca. Tepaññāsā ca sekhiyāti parimaṇḍalanivāsanādīni khuddakavaṇṇanāvasāne vuttāni tepaññāsa sekhiyasikkhāpadāni ca.
ཨདྷཀྑགཱམཱཝསྶུཏཱཏི བྷིཀྑུནཱིནཾ ཨདྷཀྑཀསིཀྑཱཔདཉྩ གཱམནྟརགམནཾ ཨཝསྶུཏཱ ཨཝསྶུཏསྶ ཧཏྠཏོ ཁཱདནཱིཡབྷོཛནཱིཡགྒཧཎསིཀྑཱཔདཉྩ། ཏལམཊྛཉྩ སུདྡྷིཀཱཏི ཏལགྷཱཏཀཾ ཛཏུམཊྛཾ ཨུདཀསུདྡྷིཀཱདིཡནཉྩ། ཝསྶཾཝུཊྛཱ ཙ ཨོཝཱདནྟི ཝསྶཾཝུཊྛཱ ཚཔྤཉྩཡོཛནཱནི སིཀྑཱཔདཉྩ ཨོཝཱདཱཡ ཨགམནསིཀྑཱཔདཉྩ། ནཱནུབནྡྷེ པཝཏྟིནིནྟི ཡཱ པན བྷིཀྑུནཱི ཝུཊྛཱཔིཏཾ པཝཏྟིནིཾ དྭེ ཝསྶཱནི ནཱནུབནྡྷེཡྻཱཏི ཝུཏྟསིཀྑཱཔདཾ།
Adhakkhagāmāvassutāti bhikkhunīnaṃ adhakkhakasikkhāpadañca gāmantaragamanaṃ avassutā avassutassa hatthato khādanīyabhojanīyaggahaṇasikkhāpadañca. Talamaṭṭhañca suddhikāti talaghātakaṃ jatumaṭṭhaṃ udakasuddhikādiyanañca. Vassaṃvuṭṭhā ca ovādanti vassaṃvuṭṭhā chappañcayojanāni sikkhāpadañca ovādāya agamanasikkhāpadañca. Nānubandhe pavattininti yā pana bhikkhunī vuṭṭhāpitaṃ pavattiniṃ dve vassāni nānubandheyyāti vuttasikkhāpadaṃ.
ཨིམེ སིཀྑཱཏི ཨིམཱ སིཀྑཱཡོ; ལིངྒཝིཔརིཡཱཡོ ཀཏོ། ཀཱཡམཱནསིཀཱ ཀཏཱཏི ཀཱཡཙིཏྟསམུཊྛཱནཱ ཀཏཱ།
Imesikkhāti imā sikkhāyo; liṅgavipariyāyo kato. Kāyamānasikā katāti kāyacittasamuṭṭhānā katā.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / པརིཝཱརཔཱལི༹ • Parivārapāḷi / ༡. པཋམཔཱརཱཛིཀསམུཊྛཱནཾ • 1. Paṭhamapārājikasamuṭṭhānaṃ
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / སམུཊྛཱནསཱིསཝཎྞནཱ • Samuṭṭhānasīsavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / པཋམཔཱརཱཛིཀསམུཊྛཱནཝཎྞནཱ • Paṭhamapārājikasamuṭṭhānavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / སམུཊྛཱནསཱིསཝཎྞནཱ • Samuṭṭhānasīsavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / པཋམཔཱརཱཛིཀསམུཊྛཱནཝཎྞནཱ • Paṭhamapārājikasamuṭṭhānavaṇṇanā
