பி⁴க்கு²னீவிப⁴ங்க³வண்ணனா

Bhikkhunīvibhaṅgavaṇṇanā

1. பாராஜிககண்ட³ங் (பி⁴க்கு²னீவிப⁴ங்க³வண்ணனா)

1. Pārājikakaṇḍaṃ (bhikkhunīvibhaṅgavaṇṇanā)

யோ பி⁴க்கூ²னங் விப⁴ங்க³ஸ்ஸ, ஸங்க³ஹிதோ அனந்தரங்;

Yo bhikkhūnaṃ vibhaṅgassa, saṅgahito anantaraṃ;

பி⁴க்கு²னீனங் விப⁴ங்க³ஸ்ஸ, தஸ்ஸ ஸங்வண்ணனாக்கமோ.

Bhikkhunīnaṃ vibhaṅgassa, tassa saṃvaṇṇanākkamo.

பத்தோ யதோ ததோ தஸ்ஸ, அபுப்³ப³பத³வண்ணனங்;

Patto yato tato tassa, apubbapadavaṇṇanaṃ;

காதுங் பாராஜிகே தாவ, ஹோதி ஸங்வண்ணனா அயங்.

Kātuṃ pārājike tāva, hoti saṃvaṇṇanā ayaṃ.

1. பட²மபாராஜிகஸிக்கா²பத³வண்ணனா

1. Paṭhamapārājikasikkhāpadavaṇṇanā

656. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி…பே॰… ஸாள்ஹோ மிகா³ரனத்தாதி எத்த² ஸாள்ஹோதி தஸ்ஸ நாமங்; மிகா³ரமாதுயா பன நத்தா ஹோதி, தேன வுத்தங் – ‘‘மிகா³ரனத்தா’’தி. நவகம்மிகந்தி நவகம்மாதி⁴ட்டா²யிகங். பண்டி³தாதி பண்டி³ச்சேன ஸமன்னாக³தா. ப்³யத்தாதி வெய்யத்திகேன ஸமன்னாக³தா. மேதா⁴வினீதி பாளிக்³க³ஹணே ஸதிபுப்³ப³ங்க³மாய பஞ்ஞாய அத்த²க்³க³ஹணே பஞ்ஞாபுப்³ப³ங்க³மாய ஸதியா ஸமன்னாக³தா. த³க்கா²தி சே²கா; அவிரஜ்ஜி²த்வா ஸீக⁴ங் கத்தப்³ப³காரினீதி அத்தோ². அனலஸாதி ஆலஸியவிரஹிதா. தத்ருபாயாயாதி தேஸு தேஸு கம்மேஸு உபாயபூ⁴தாய. வீமங்ஸாயாதி கத்தப்³ப³கம்முபபரிக்கா²ய . ஸமன்னாக³தாதி ஸம்பயுத்தா. அலங் காதுந்தி ஸமத்தா² தங் தங் கம்மங் காதுங். அலங் ஸங்விதா⁴துந்தி ஏவஞ்ச ஏவஞ்ச இத³ங் ஹோதூதி ஏவங் ஸங்வித³ஹிதும்பி ஸமத்தா². கதாகதங் ஜானிதுந்தி கதஞ்ச அகதஞ்ச ஜானிதுங். தேதி தே உபோ⁴; ஸா ச ஸுந்த³ரீனந்தா³ ஸோ ச ஸாள்ஹோதி அத்தோ². ப⁴த்தக்³கே³தி பரிவேஸனட்டா²னே. நிகூடேதி கோணஸதி³ஸங் கத்வா த³ஸ்ஸிதே க³ம்பீ⁴ரே. விஸ்ஸரோ மே ப⁴விஸ்ஸதீதி விரூபோ மே ஸரோ ப⁴விஸ்ஸதி; விப்பகாரஸத்³தோ³ ப⁴விஸ்ஸதீதி அத்தோ². பதிமானெந்தீதி அபெக்க²மானா. க்யாஹந்தி கிங் அஹங். ஜராது³ப்³ப³லாதி ஜராய து³ப்³ப³லா. சரணகி³லானாதி பாத³ரோகே³ன ஸமன்னாக³தா.

656.Tena samayena buddho bhagavā sāvatthiyaṃ viharati…pe… sāḷho migāranattāti ettha sāḷhoti tassa nāmaṃ; migāramātuyā pana nattā hoti, tena vuttaṃ – ‘‘migāranattā’’ti. Navakammikanti navakammādhiṭṭhāyikaṃ. Paṇḍitāti paṇḍiccena samannāgatā. Byattāti veyyattikena samannāgatā. Medhāvinīti pāḷiggahaṇe satipubbaṅgamāya paññāya atthaggahaṇe paññāpubbaṅgamāya satiyā samannāgatā. Dakkhāti chekā; avirajjhitvā sīghaṃ kattabbakārinīti attho. Analasāti ālasiyavirahitā. Tatrupāyāyāti tesu tesu kammesu upāyabhūtāya. Vīmaṃsāyāti kattabbakammupaparikkhāya . Samannāgatāti sampayuttā. Alaṃ kātunti samatthā taṃ taṃ kammaṃ kātuṃ. Alaṃ saṃvidhātunti evañca evañca idaṃ hotūti evaṃ saṃvidahitumpi samatthā. Katākataṃ jānitunti katañca akatañca jānituṃ. Teti te ubho; sā ca sundarīnandā so ca sāḷhoti attho. Bhattaggeti parivesanaṭṭhāne. Nikūṭeti koṇasadisaṃ katvā dassite gambhīre. Vissaro me bhavissatīti virūpo me saro bhavissati; vippakārasaddo bhavissatīti attho. Patimānentīti apekkhamānā. Kyāhanti kiṃ ahaṃ. Jarādubbalāti jarāya dubbalā. Caraṇagilānāti pādarogena samannāgatā.

657-8. அவஸ்ஸுதாதி காயஸங்ஸக்³க³ராகே³ன அவஸ்ஸுதா; திந்தா கிலின்னாதி அத்தோ². பத³பா⁴ஜனே பனஸ்ஸ தமேவ ராக³ங் க³ஹெத்வா ‘‘ஸாரத்தா’’திஆதி³ வுத்தங். தத்த² ஸாரத்தாதி வத்த²ங் விய ரங்க³ஜாதேன காயஸங்ஸக்³க³ராகே³ன ஸுட்டு² ரத்தா. அபெக்க²வதீதி தஸ்ஸேவ ராக³ஸ்ஸ வஸேன தஸ்மிங் புரிஸே பவத்தாய அபெக்கா²ய ஸமன்னாக³தா. படிப³த்³த⁴சித்தாதி தேன ராகே³ன தஸ்மிங் புரிஸே ப³ந்தி⁴த்வா ட²பிதசித்தா விய. ஏஸ நயோ து³தியபத³விப⁴ங்கே³பி. புரிஸபுக்³க³லஸ்ஸாதி புரிஸஸங்கா²தஸ்ஸ புக்³க³லஸ்ஸ. அத⁴க்க²கந்தி அக்க²கானங் அதோ⁴. உப்³ப⁴ஜாணுமண்ட³லந்தி ஜாணுமண்ட³லானங் உபரி. பத³பா⁴ஜனே பன பத³படிபாடியா ஏவ ‘‘ஹெட்ட²க்க²கங் உபரிஜாணுமண்ட³ல’’ந்தி வுத்தங். எத்த² ச உப்³ப⁴கப்பரம்பி உப்³ப⁴ஜாணுமண்ட³லேனேவ ஸங்க³ஹிதங். ஸேஸங் மஹாவிப⁴ங்கே³ வுத்தனயேனேவ வேதி³தப்³ப³ங். புரிமாயோ உபாதா³யாதி ஸாதா⁴ரணபாராஜிகேஹி பாராஜிகாயோ சதஸ்ஸோ உபாதா³யாதி அத்தோ². உப்³ப⁴ஜாணுமண்ட³லிகாதி இத³ங் பன இமிஸ்ஸா பாராஜிகாய நாமமத்தங், தஸ்மா பத³பா⁴ஜனே ந விசாரிதங்.

657-8.Avassutāti kāyasaṃsaggarāgena avassutā; tintā kilinnāti attho. Padabhājane panassa tameva rāgaṃ gahetvā ‘‘sārattā’’tiādi vuttaṃ. Tattha sārattāti vatthaṃ viya raṅgajātena kāyasaṃsaggarāgena suṭṭhu rattā. Apekkhavatīti tasseva rāgassa vasena tasmiṃ purise pavattāya apekkhāya samannāgatā. Paṭibaddhacittāti tena rāgena tasmiṃ purise bandhitvā ṭhapitacittā viya. Esa nayo dutiyapadavibhaṅgepi. Purisapuggalassāti purisasaṅkhātassa puggalassa. Adhakkhakanti akkhakānaṃ adho. Ubbhajāṇumaṇḍalanti jāṇumaṇḍalānaṃ upari. Padabhājane pana padapaṭipāṭiyā eva ‘‘heṭṭhakkhakaṃ uparijāṇumaṇḍala’’nti vuttaṃ. Ettha ca ubbhakapparampi ubbhajāṇumaṇḍaleneva saṅgahitaṃ. Sesaṃ mahāvibhaṅge vuttanayeneva veditabbaṃ. Purimāyo upādāyāti sādhāraṇapārājikehi pārājikāyo catasso upādāyāti attho. Ubbhajāṇumaṇḍalikāti idaṃ pana imissā pārājikāya nāmamattaṃ, tasmā padabhājane na vicāritaṃ.

659. ஏவங் உத்³தி³ட்ட²ஸிக்கா²பத³ங் பதா³னுக்கமேன விப⁴ஜித்வா இதா³னி அவஸ்ஸுதாதி³பே⁴தே³ன ஆபத்திபே⁴த³ங் த³ஸ்ஸேதுங் ‘‘உப⁴தோஅவஸ்ஸுதே’’திஆதி³மாஹ. தத்த² உப⁴தோஅவஸ்ஸுதேதி உப⁴தோஅவஸ்ஸவே; பி⁴க்கு²னியா சேவ புரிஸஸ்ஸ ச காயஸங்ஸக்³க³ராகே³ன அவஸ்ஸுதபா⁴வே ஸதீதி அத்தோ². காயேன காயங் ஆமஸதீதி பி⁴க்கு²னீ யதா²பரிச்சி²ன்னேன காயேன புரிஸஸ்ஸ யங்கிஞ்சி காயங் புரிஸோ வா யேன கேனசி காயேன பி⁴க்கு²னியா யதா²பரிச்சி²ன்னங் காயங் ஆமஸதி, உப⁴யதா²பி பி⁴க்கு²னியா பாராஜிகங். காயேன காயபடிப³த்³த⁴ந்தி வுத்தப்பகாரேனேவ அத்தனோ காயேன புரிஸஸ்ஸ காயபடிப³த்³த⁴ங். ஆமஸதீதி எத்த² ஸயங் வா ஆமஸது, தஸ்ஸ வா ஆமஸனங் ஸாதி³யது, து²ல்லச்சயமேவ. காயபடிப³த்³தே⁴ன காயந்தி அத்தனோ வுத்தப்பகாரகாயபடிப³த்³தே⁴ன புரிஸஸ்ஸ காயங். ஆமஸதீதி இதா⁴பி ஸயங் வா ஆமஸது, தஸ்ஸ வா ஆமஸனங் ஸாதி³யது, து²ல்லச்சயமேவ. அவஸேஸபதே³ஸுபி இமினாவ நயேன வினிச்ச²யோ வேதி³தப்³போ³.

659. Evaṃ uddiṭṭhasikkhāpadaṃ padānukkamena vibhajitvā idāni avassutādibhedena āpattibhedaṃ dassetuṃ ‘‘ubhatoavassute’’tiādimāha. Tattha ubhatoavassuteti ubhatoavassave; bhikkhuniyā ceva purisassa ca kāyasaṃsaggarāgena avassutabhāve satīti attho. Kāyena kāyaṃ āmasatīti bhikkhunī yathāparicchinnena kāyena purisassa yaṃkiñci kāyaṃ puriso vā yena kenaci kāyena bhikkhuniyā yathāparicchinnaṃ kāyaṃ āmasati, ubhayathāpi bhikkhuniyā pārājikaṃ. Kāyena kāyapaṭibaddhanti vuttappakāreneva attano kāyena purisassa kāyapaṭibaddhaṃ. Āmasatīti ettha sayaṃ vā āmasatu, tassa vā āmasanaṃ sādiyatu, thullaccayameva. Kāyapaṭibaddhena kāyanti attano vuttappakārakāyapaṭibaddhena purisassa kāyaṃ. Āmasatīti idhāpi sayaṃ vā āmasatu, tassa vā āmasanaṃ sādiyatu, thullaccayameva. Avasesapadesupi imināva nayena vinicchayo veditabbo.

ஸசே பன பி⁴க்கு² சேவ பி⁴க்கு²னீ ச ஹோதி, தத்ர சே பி⁴க்கு²னீ ஆமஸதி, பி⁴க்கு² நிச்சலோ ஹுத்வா சித்தேன ஸாதி³யதி, பி⁴க்கு² ஆபத்தியா ந காரேதப்³போ³. ஸசே பி⁴க்கு² ஆமஸதி, பி⁴க்கு²னீ நிச்சலா ஹுத்வா சித்தேனேவ அதி⁴வாஸேதி, காயங்க³ங் அசோபயமானாபி பாராஜிகக்கெ²த்தே பாராஜிகேன, து²ல்லச்சயக்கெ²த்தே து²ல்லச்சயேன, து³க்கடக்கெ²த்தே து³க்கடேன காரேதப்³பா³. கஸ்மா? ‘‘காயஸங்ஸக்³க³ங் ஸாதி³யெய்யா’’தி வுத்தத்தா. அயங் அட்ட²கதா²ஸு வினிச்ச²யோ. ஏவங் பன ஸதி கிரியாஸமுட்டா²னதா ந தி³ஸ்ஸதி, தஸ்மா தப்³ப³ஹுலனயேன ஸா வுத்தாதி வேதி³தப்³பா³.

Sace pana bhikkhu ceva bhikkhunī ca hoti, tatra ce bhikkhunī āmasati, bhikkhu niccalo hutvā cittena sādiyati, bhikkhu āpattiyā na kāretabbo. Sace bhikkhu āmasati, bhikkhunī niccalā hutvā citteneva adhivāseti, kāyaṅgaṃ acopayamānāpi pārājikakkhette pārājikena, thullaccayakkhette thullaccayena, dukkaṭakkhette dukkaṭena kāretabbā. Kasmā? ‘‘Kāyasaṃsaggaṃ sādiyeyyā’’ti vuttattā. Ayaṃ aṭṭhakathāsu vinicchayo. Evaṃ pana sati kiriyāsamuṭṭhānatā na dissati, tasmā tabbahulanayena sā vuttāti veditabbā.

660. உப்³ப⁴க்க²கந்தி அக்க²கானங் உபரி. அதோ⁴ஜாணுமண்ட³லந்தி ஜாணுமண்ட³லானங் ஹெட்டா². எத்த² ச அதோ⁴கப்பரம்பி அதோ⁴ஜாணுமண்ட³லேனேவ ஸங்க³ஹிதங்.

660.Ubbhakkhakanti akkhakānaṃ upari. Adhojāṇumaṇḍalanti jāṇumaṇḍalānaṃ heṭṭhā. Ettha ca adhokapparampi adhojāṇumaṇḍaleneva saṅgahitaṃ.

662. ஏகதோஅவஸ்ஸுதேதி எத்த² கிஞ்சாபி ஏகதோதி அவிஸேஸேன வுத்தங், ததா²பி பி⁴க்கு²னியா ஏவ அவஸ்ஸுதே ஸதி அயங் ஆபத்திபே⁴தோ³ வுத்தோதி வேதி³தப்³போ³.

662.Ekatoavassuteti ettha kiñcāpi ekatoti avisesena vuttaṃ, tathāpi bhikkhuniyā eva avassute sati ayaṃ āpattibhedo vuttoti veditabbo.

தத்ராயங் ஆதி³தோ பட்டா²ய வினிச்ச²யோ – பி⁴க்கு²னீ காயஸங்ஸக்³க³ராகே³ன அவஸ்ஸுதா, புரிஸோபி ததே²வ. அத⁴க்க²கே உப்³ப⁴ஜாணுமண்ட³லே காயப்பதே³ஸே காயஸங்ஸக்³க³ஸாதி³யனே ஸதி பி⁴க்கு²னியா பாராஜிகங். பி⁴க்கு²னியா காயஸங்ஸக்³க³ராகோ³, புரிஸஸ்ஸ மேது²னராகோ³ வா கே³ஹஸ்ஸிதபேமங் வா ஸுத்³த⁴சித்தங் வா ஹோது, து²ல்லச்சயமேவ. பி⁴க்கு²னியா மேது²னராகோ³, புரிஸஸ்ஸ காயஸங்ஸக்³க³ராகோ³ வா மேது²னராகோ³ வா க³ஹெஸ்ஸிதபேமங் வா ஸுத்³த⁴சித்தங் வா ஹோது, து³க்கடங். பி⁴க்கு²னியா கே³ஹஸ்ஸிதபேமங், புரிஸஸ்ஸ வுத்தேஸு சதூஸு யங் வா தங் வா ஹோது, து³க்கடமேவ. பி⁴க்கு²னியா ஸுத்³த⁴சித்தங், புரிஸஸ்ஸ வுத்தேஸு சதூஸு யங் வா தங் வா ஹோது, அனாபத்தி.

Tatrāyaṃ ādito paṭṭhāya vinicchayo – bhikkhunī kāyasaṃsaggarāgena avassutā, purisopi tatheva. Adhakkhake ubbhajāṇumaṇḍale kāyappadese kāyasaṃsaggasādiyane sati bhikkhuniyā pārājikaṃ. Bhikkhuniyā kāyasaṃsaggarāgo, purisassa methunarāgo vā gehassitapemaṃ vā suddhacittaṃ vā hotu, thullaccayameva. Bhikkhuniyā methunarāgo, purisassa kāyasaṃsaggarāgo vā methunarāgo vā gahessitapemaṃ vā suddhacittaṃ vā hotu, dukkaṭaṃ. Bhikkhuniyā gehassitapemaṃ, purisassa vuttesu catūsu yaṃ vā taṃ vā hotu, dukkaṭameva. Bhikkhuniyā suddhacittaṃ, purisassa vuttesu catūsu yaṃ vā taṃ vā hotu, anāpatti.

ஸசே பன பி⁴க்கு² சேவ ஹோதி பி⁴க்கு²னீ ச உபி⁴ன்னங் காயஸங்ஸக்³க³ராகோ³, பி⁴க்கு²ஸ்ஸ ஸங்கா⁴தி³ஸேஸோ, பி⁴க்கு²னியா பாராஜிகங். பி⁴க்கு²னியா காயஸங்ஸக்³க³ராகோ³, பி⁴க்கு²ஸ்ஸ மேது²னராகோ³ வா கே³ஹஸ்ஸிதபேமங் வா, பி⁴க்கு²னியா து²ல்லச்சயங், பி⁴க்கு²ஸ்ஸ து³க்கடங். உபி⁴ன்னங் மேது²னராகோ³ வா கே³ஹஸ்ஸிதபேமங் வா, உபி⁴ன்னம்பி து³க்கடமேவ. யஸ்ஸ யத்த² ஸுத்³த⁴சித்தங், தஸ்ஸ தத்த² அனாபத்தி. உபி⁴ன்னம்பி ஸுத்³த⁴சித்தங், உபி⁴ன்னம்பி அனாபத்தி.

Sace pana bhikkhu ceva hoti bhikkhunī ca ubhinnaṃ kāyasaṃsaggarāgo, bhikkhussa saṅghādiseso, bhikkhuniyā pārājikaṃ. Bhikkhuniyā kāyasaṃsaggarāgo, bhikkhussa methunarāgo vā gehassitapemaṃ vā, bhikkhuniyā thullaccayaṃ, bhikkhussa dukkaṭaṃ. Ubhinnaṃ methunarāgo vā gehassitapemaṃ vā, ubhinnampi dukkaṭameva. Yassa yattha suddhacittaṃ, tassa tattha anāpatti. Ubhinnampi suddhacittaṃ, ubhinnampi anāpatti.

663. அனாபத்தி அஸஞ்சிச்சாதிஆதீ³ஸு விரஜ்ஜி²த்வா வா ஆமஸந்தியா அஞ்ஞவிஹிதாய வா ‘‘அயங் புரிஸோ வா இத்தீ² வா’’தி அஜானந்தியா வா தேன பு²ட்டா²யபி தங் ப²ஸ்ஸங் அஸாதி³யந்தியா வா ஆமஸனேபி ஸதி அனாபத்தி. ஸேஸங் ஸப்³ப³த்த² உத்தானமேவ .

663.Anāpattiasañciccātiādīsu virajjhitvā vā āmasantiyā aññavihitāya vā ‘‘ayaṃ puriso vā itthī vā’’ti ajānantiyā vā tena phuṭṭhāyapi taṃ phassaṃ asādiyantiyā vā āmasanepi sati anāpatti. Sesaṃ sabbattha uttānameva .

பட²மபாராஜிகஸமுட்டா²னங் – கிரியங், ஸஞ்ஞாவிமொக்க²ங், ஸசித்தகங், லோகவஜ்ஜங், காயகம்மங், அகுஸலசித்தங், த்³விவேத³னந்தி.

Paṭhamapārājikasamuṭṭhānaṃ – kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, akusalacittaṃ, dvivedananti.

பட²மபாராஜிகங்.

Paṭhamapārājikaṃ.

Next: 2. து³தியபாராஜிகஸிக்கா²பத³வண்ணனா • 2. Dutiyapārājikasikkhāpadavaṇṇanā

Related texts:

திபிடக (மூல) • Tipiṭaka (Mūla) / வினயபிடக • Vinayapiṭaka / பி⁴க்கு²னீவிப⁴ங்க³ • Bhikkhunīvibhaṅga / 1. பட²மபாராஜிகங் • 1. Paṭhamapārājikaṃ

டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 1. பட²மபாராஜிகஸிக்கா²பத³வண்ணனா • 1. Paṭhamapārājikasikkhāpadavaṇṇanā

டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 1. பட²மபாராஜிகஸிக்கா²பத³வண்ணனா • 1. Paṭhamapārājikasikkhāpadavaṇṇanā

டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 1. உப்³ப⁴ஜாணுமண்ட³லிகஸிக்கா²பத³வண்ணனா • 1. Ubbhajāṇumaṇḍalikasikkhāpadavaṇṇanā

டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 1. பட²மபாராஜிகஸிக்கா²பத³ங் • 1. Paṭhamapārājikasikkhāpadaṃ

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact