| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
8. පඨමපරිහානිසුත්‌තං
8. Paṭhamaparihānisuttaṃ
28. එවං මෙ සුතං – එකං සමයං භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තත්‍ර ඛො භගවා භික්‌ඛූ ආමන්‌තෙසි – ‘‘සත්‌තිමෙ, භික්‌ඛවෙ, ධම්‌මා සෙඛස්‌ස භික්‌ඛුනො පරිහානාය සංවත්‌තන්‌ති. කතමෙ සත්‌ත? කම්‌මාරාමතා, භස්‌සාරාමතා, නිද්‌දාරාමතා, සඞ්‌ගණිකාරාමතා, ඉන්‌ද්‍රියෙසු අගුත්‌තද්‌වාරතා, භොජනෙ අමත්‌තඤ්‌ඤුතා, සන්‌ති ඛො පන සඞ්‌ඝෙ සඞ්‌ඝකරණීයානි; තත්‍ර සෙඛො භික්‌ඛු 1 ඉති පටිසඤ්‌චික්‌ඛති – ‘සන්‌ති ඛො පන සඞ්‌ඝෙ ථෙරා 2 රත්‌තඤ්‌ඤූ චිරපබ්‌බජිතා භාරවාහිනො, තෙ 3 තෙන පඤ්‌ඤායිස්‌සන්‌තී’ති අත්‌තනා තෙසු යොගං 4 ආපජ්‌ජති. ඉමෙ ඛො, භික්‌ඛවෙ, සත්‌ත ධම්‌මා සෙඛස්‌ස භික්‌ඛුනො පරිහානාය සංවත්‌තන්‌ති.
28. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho bhagavā bhikkhū āmantesi – ‘‘sattime, bhikkhave, dhammā sekhassa bhikkhuno parihānāya saṃvattanti. Katame satta? Kammārāmatā, bhassārāmatā, niddārāmatā, saṅgaṇikārāmatā, indriyesu aguttadvāratā, bhojane amattaññutā, santi kho pana saṅghe saṅghakaraṇīyāni; tatra sekho bhikkhu 5 iti paṭisañcikkhati – ‘santi kho pana saṅghe therā 6 rattaññū cirapabbajitā bhāravāhino, te 7 tena paññāyissantī’ti attanā tesu yogaṃ 8 āpajjati. Ime kho, bhikkhave, satta dhammā sekhassa bhikkhuno parihānāya saṃvattanti.
‘‘සත්‌තිමෙ, භික්‌ඛවෙ, ධම්‌මා සෙඛස්‌ස භික්‌ඛුනො අපරිහානාය සංවත්‌තන්‌ති. කතමෙ සත්‌ත? න කම්‌මාරාමතා, න භස්‌සාරාමතා, න නිද්‌දාරාමතා, න සඞ්‌ගණිකාරාමතා, ඉන්‌ද්‍රියෙසු ගුත්‌තද්‌වාරතා, භොජනෙ මත්‌තඤ්‌ඤුතා, සන්‌ති ඛො පන සඞ්‌ඝෙ සඞ්‌ඝකරණීයානි; තත්‍ර සෙඛො භික්‌ඛු ඉති පටිසඤ්‌චික්‌ඛති – ‘සන්‌ති ඛො පන සඞ්‌ඝෙ ථෙරා රත්‌තඤ්‌ඤූ චිරපබ්‌බජිතා භාරවාහිනො, තෙ තෙන පඤ්‌ඤායිස්‌සන්‌තී’ති අත්‌තනා න තෙසු යොගං ආපජ්‌ජති. ඉමෙ ඛො, භික්‌ඛවෙ, සත්‌ත ධම්‌මා සෙඛස්‌ස භික්‌ඛුනො අපරිහානාය සංවත්‌තන්‌තී’’ති. අට්‌ඨමං.
‘‘Sattime, bhikkhave, dhammā sekhassa bhikkhuno aparihānāya saṃvattanti. Katame satta? Na kammārāmatā, na bhassārāmatā, na niddārāmatā, na saṅgaṇikārāmatā, indriyesu guttadvāratā, bhojane mattaññutā, santi kho pana saṅghe saṅghakaraṇīyāni; tatra sekho bhikkhu iti paṭisañcikkhati – ‘santi kho pana saṅghe therā rattaññū cirapabbajitā bhāravāhino, te tena paññāyissantī’ti attanā na tesu yogaṃ āpajjati. Ime kho, bhikkhave, satta dhammā sekhassa bhikkhuno aparihānāya saṃvattantī’’ti. Aṭṭhamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 8. පඨමපරිහානිසුත්‌තවණ්‌ණනා • 8. Paṭhamaparihānisuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 7-11. සඤ්‌ඤාසුත්‌තාදිවණ්‌ණනා • 7-11. Saññāsuttādivaṇṇanā
