| Library / Tipiṭaka / তিপিটক • Tipiṭaka / ৰিমানৰত্থুপাল়ি • Vimānavatthupāḷi |
১১. পঠমপতিব্বতাৰিমানৰত্থু
11. Paṭhamapatibbatāvimānavatthu
৯৩.
93.
‘‘কোঞ্চা মযূরা দিৰিযা চ হংসা, ৰগ্গুস্সরা কোকিলা সম্পতন্তি।
‘‘Koñcā mayūrā diviyā ca haṃsā, vaggussarā kokilā sampatanti;
পুপ্ফাভিকিণ্ণং রম্মমিদং ৰিমানং, অনেকচিত্তং নরনারিসেৰিতং 1॥
Pupphābhikiṇṇaṃ rammamidaṃ vimānaṃ, anekacittaṃ naranārisevitaṃ 2.
৯৪.
94.
‘‘তত্থচ্ছসি দেৰি মহানুভাৰে, ইদ্ধী ৰিকুব্বন্তি অনেকরূপা।
‘‘Tatthacchasi devi mahānubhāve, iddhī vikubbanti anekarūpā;
ইমা চ তে অচ্ছরাযো সমন্ততো, নচ্চন্তি গাযন্তি পমোদযন্তি চ॥
Imā ca te accharāyo samantato, naccanti gāyanti pamodayanti ca.
৯৫.
95.
‘‘দেৰিদ্ধিপত্তাসি মহানুভাৰে, মনুস্সভূতা কিমকাসি পুঞ্ঞং।
‘‘Deviddhipattāsi mahānubhāve, manussabhūtā kimakāsi puññaṃ;
কেনাসি এৰং জলিতানুভাৰা, ৰণ্ণো চ তে সব্বদিসা পভাসতী’’তি॥
Kenāsi evaṃ jalitānubhāvā, vaṇṇo ca te sabbadisā pabhāsatī’’ti.
৯৬.
96.
সা দেৰতা অত্তমনা, মোগ্গল্লানেন পুচ্ছিতা।
Sā devatā attamanā, moggallānena pucchitā;
পঞ্হং পুট্ঠা ৰিযাকাসি, যস্স কম্মস্সিদং ফলং॥
Pañhaṃ puṭṭhā viyākāsi, yassa kammassidaṃ phalaṃ.
৯৭.
97.
‘‘অহং মনুস্সেসু মনুস্সভূতা, পতিব্বতানঞ্ঞমনা অহোসিং।
‘‘Ahaṃ manussesu manussabhūtā, patibbatānaññamanā ahosiṃ;
মাতাৰ পুত্তং অনুরক্খমানা, কুদ্ধাপিহং 3 নপ্ফরুসং অৰোচং॥
Mātāva puttaṃ anurakkhamānā, kuddhāpihaṃ 4 nappharusaṃ avocaṃ.
৯৮.
98.
‘‘সচ্চে ঠিতা মোসৰজ্জং পহায, দানে রতা সঙ্গহিতত্তভাৰা।
‘‘Sacce ṭhitā mosavajjaṃ pahāya, dāne ratā saṅgahitattabhāvā;
অন্নঞ্চ পানঞ্চ পসন্নচিত্তা, সক্কচ্চ দানং ৰিপুলং অদাসিং॥
Annañca pānañca pasannacittā, sakkacca dānaṃ vipulaṃ adāsiṃ.
৯৯.
99.
‘‘তেন মেতাদিসো ৰণ্ণো, তেন মে ইধ মিজ্ঝতি।
‘‘Tena metādiso vaṇṇo, tena me idha mijjhati;
উপ্পজ্জন্তি চ মে ভোগা, যে কেচি মনসো পিযা॥
Uppajjanti ca me bhogā, ye keci manaso piyā.
১০০.
100.
‘‘অক্খামি তে ভিক্খু মহানুভাৰ, মনুস্সভূতা যমকাসি পুঞ্ঞং।
‘‘Akkhāmi te bhikkhu mahānubhāva, manussabhūtā yamakāsi puññaṃ;
তেনম্হি এৰং জলিতানুভাৰা, ৰণ্ণো চ মে সব্বদিসা পভাসতী’’তি॥
Tenamhi evaṃ jalitānubhāvā, vaṇṇo ca me sabbadisā pabhāsatī’’ti.
পঠমপতিব্বতাৰিমানং একাদসমং।
Paṭhamapatibbatāvimānaṃ ekādasamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / ৰিমানৰত্থু-অট্ঠকথা • Vimānavatthu-aṭṭhakathā / ১১. পঠমপতিব্বতাৰিমানৰণ্ণনা • 11. Paṭhamapatibbatāvimānavaṇṇanā
