| Library / Tipiṭaka / තිපිටක • Tipiṭaka / විමානවත්‌ථුපාළි • Vimānavatthupāḷi |
11. පඨමපතිබ්‌බතාවිමානවත්‌ථු
11. Paṭhamapatibbatāvimānavatthu
93.
93.
‘‘කොඤ්‌චා මයූරා දිවියා ච හංසා, වග්‌ගුස්‌සරා කොකිලා සම්‌පතන්‌ති;
‘‘Koñcā mayūrā diviyā ca haṃsā, vaggussarā kokilā sampatanti;
පුප්‌ඵාභිකිණ්‌ණං රම්‌මමිදං විමානං, අනෙකචිත්‌තං නරනාරිසෙවිතං 1.
Pupphābhikiṇṇaṃ rammamidaṃ vimānaṃ, anekacittaṃ naranārisevitaṃ 2.
94.
94.
‘‘තත්‌ථච්‌ඡසි දෙවි මහානුභාවෙ, ඉද්‌ධී විකුබ්‌බන්‌ති අනෙකරූපා;
‘‘Tatthacchasi devi mahānubhāve, iddhī vikubbanti anekarūpā;
ඉමා ච තෙ අච්‌ඡරායො සමන්‌තතො, නච්‌චන්‌ති ගායන්‌ති පමොදයන්‌ති ච.
Imā ca te accharāyo samantato, naccanti gāyanti pamodayanti ca.
95.
95.
‘‘දෙවිද්‌ධිපත්‌තාසි මහානුභාවෙ, මනුස්‌සභූතා කිමකාසි පුඤ්‌ඤං;
‘‘Deviddhipattāsi mahānubhāve, manussabhūtā kimakāsi puññaṃ;
කෙනාසි එවං ජලිතානුභාවා, වණ්‌ණො ච තෙ සබ්‌බදිසා පභාසතී’’ති.
Kenāsi evaṃ jalitānubhāvā, vaṇṇo ca te sabbadisā pabhāsatī’’ti.
96.
96.
සා දෙවතා අත්‌තමනා, මොග්‌ගල්‌ලානෙන පුච්‌ඡිතා;
Sā devatā attamanā, moggallānena pucchitā;
පඤ්‌හං පුට්‌ඨා වියාකාසි, යස්‌ස කම්‌මස්‌සිදං ඵලං.
Pañhaṃ puṭṭhā viyākāsi, yassa kammassidaṃ phalaṃ.
97.
97.
‘‘අහං මනුස්‌සෙසු මනුස්‌සභූතා, පතිබ්‌බතානඤ්‌ඤමනා අහොසිං;
‘‘Ahaṃ manussesu manussabhūtā, patibbatānaññamanā ahosiṃ;
මාතාව පුත්‌තං අනුරක්‌ඛමානා, කුද්‌ධාපිහං 3 නප්‌ඵරුසං අවොචං.
Mātāva puttaṃ anurakkhamānā, kuddhāpihaṃ 4 nappharusaṃ avocaṃ.
98.
98.
‘‘සච්‌චෙ ඨිතා මොසවජ්‌ජං පහාය, දානෙ රතා සඞ්‌ගහිතත්‌තභාවා;
‘‘Sacce ṭhitā mosavajjaṃ pahāya, dāne ratā saṅgahitattabhāvā;
අන්‌නඤ්‌ච පානඤ්‌ච පසන්‌නචිත්‌තා, සක්‌කච්‌ච දානං විපුලං අදාසිං.
Annañca pānañca pasannacittā, sakkacca dānaṃ vipulaṃ adāsiṃ.
99.
99.
‘‘තෙන මෙතාදිසො වණ්‌ණො, තෙන මෙ ඉධ මිජ්‌ඣති;
‘‘Tena metādiso vaṇṇo, tena me idha mijjhati;
උප්‌පජ්‌ජන්‌ති ච මෙ භොගා, යෙ කෙචි මනසො පියා.
Uppajjanti ca me bhogā, ye keci manaso piyā.
100.
100.
‘‘අක්‌ඛාමි තෙ භික්‌ඛු මහානුභාව, මනුස්‌සභූතා යමකාසි පුඤ්‌ඤං;
‘‘Akkhāmi te bhikkhu mahānubhāva, manussabhūtā yamakāsi puññaṃ;
තෙනම්‌හි එවං ජලිතානුභාවා, වණ්‌ණො ච මෙ සබ්‌බදිසා පභාසතී’’ති.
Tenamhi evaṃ jalitānubhāvā, vaṇṇo ca me sabbadisā pabhāsatī’’ti.
පඨමපතිබ්‌බතාවිමානං එකාදසමං.
Paṭhamapatibbatāvimānaṃ ekādasamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / විමානවත්‌ථු-අට්‌ඨකථා • Vimānavatthu-aṭṭhakathā / 11. පඨමපතිබ්‌බතාවිමානවණ්‌ණනා • 11. Paṭhamapatibbatāvimānavaṇṇanā
