| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³ • Bhikkhunīvibhaṅga |
5. பாடிதே³ஸனீயகண்ட³ங் (பி⁴க்கு²னீவிப⁴ங்கோ³)
5. Pāṭidesanīyakaṇḍaṃ (bhikkhunīvibhaṅgo)
1. பட²மபாடிதே³ஸனீயஸிக்கா²பத³ங்
1. Paṭhamapāṭidesanīyasikkhāpadaṃ
இமே கோ² பனாய்யாயோ அட்ட² பாடிதே³ஸனீயா
Ime kho panāyyāyo aṭṭha pāṭidesanīyā
த⁴ம்மா உத்³தே³ஸங் ஆக³ச்ச²ந்தி.
Dhammā uddesaṃ āgacchanti.
1228. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ச²ப்³ப³க்³கி³யா பி⁴க்கு²னியோ ஸப்பிங் விஞ்ஞாபெத்வா பு⁴ஞ்ஜந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம பி⁴க்கு²னியோ ஸப்பிங் விஞ்ஞாபெத்வா பு⁴ஞ்ஜிஸ்ஸந்தி! கஸ்ஸ ஸம்பன்னங் ந மனாபங், கஸ்ஸ ஸாது³ங் ந ருச்சதீ’’தி! அஸ்ஸோஸுங் கோ² பி⁴க்கு²னியோ தேஸங் மனுஸ்ஸானங் உஜ்ஜா²யந்தானங் கி²ய்யந்தானங் விபாசெந்தானங். யா தா பி⁴க்கு²னியோ அப்பிச்சா²…பே॰… தா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கு²னியோ ஸப்பிங் விஞ்ஞாபெத்வா பு⁴ஞ்ஜிஸ்ஸந்தீ’’தி…பே॰… ஸச்சங் கிர, பி⁴க்க²வே, ச²ப்³ப³க்³கி³யா, பி⁴க்கு²னியோ ஸப்பிங் விஞ்ஞாபெத்வா பு⁴ஞ்ஜந்தீதி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே, ச²ப்³ப³க்³கி³யா பி⁴க்கு²னியோ ஸப்பிங் விஞ்ஞாபெத்வா பு⁴ஞ்ஜிஸ்ஸந்தி! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
1228. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena chabbaggiyā bhikkhuniyo sappiṃ viññāpetvā bhuñjanti. Manussā ujjhāyanti khiyyanti vipācenti – ‘‘kathañhi nāma bhikkhuniyo sappiṃ viññāpetvā bhuñjissanti! Kassa sampannaṃ na manāpaṃ, kassa sāduṃ na ruccatī’’ti! Assosuṃ kho bhikkhuniyo tesaṃ manussānaṃ ujjhāyantānaṃ khiyyantānaṃ vipācentānaṃ. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma chabbaggiyā bhikkhuniyo sappiṃ viññāpetvā bhuñjissantī’’ti…pe… saccaṃ kira, bhikkhave, chabbaggiyā, bhikkhuniyo sappiṃ viññāpetvā bhuñjantīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, chabbaggiyā bhikkhuniyo sappiṃ viññāpetvā bhuñjissanti! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
‘‘யா பன பி⁴க்கு²னீ ஸப்பிங் விஞ்ஞாபெத்வா பு⁴ஞ்ஜெய்ய, படிதே³ஸேதப்³ப³ங் தாய பி⁴க்கு²னியா – ‘கா³ரய்ஹங், அய்யே, த⁴ம்மங் ஆபஜ்ஜிங் அஸப்பாயங் பாடிதே³ஸனீயங், தங் படிதே³ஸேமீ’’’தி.
‘‘Yā pana bhikkhunī sappiṃ viññāpetvā bhuñjeyya, paṭidesetabbaṃ tāya bhikkhuniyā – ‘gārayhaṃ, ayye, dhammaṃ āpajjiṃ asappāyaṃ pāṭidesanīyaṃ, taṃ paṭidesemī’’’ti.
ஏவஞ்சித³ங் ப⁴க³வதா பி⁴க்கு²னீனங் ஸிக்கா²பத³ங் பஞ்ஞத்தங் ஹோதி.
Evañcidaṃ bhagavatā bhikkhunīnaṃ sikkhāpadaṃ paññattaṃ hoti.
1229. தேன கோ² பன ஸமயேன பி⁴க்கு²னியோ கி³லானா ஹொந்தி. கி³லானபுச்சி²கா பி⁴க்கு²னியோ கி³லானா பி⁴க்கு²னியோ ஏதத³வோசுங் – ‘‘கச்சி, அய்யே, க²மனீயங், கச்சி யாபனீய’’ந்தி? ‘‘புப்³பே³ மயங், அய்யே, ஸப்பிங் விஞ்ஞாபெத்வா பு⁴ஞ்ஜாம, தேன நோ பா²ஸு ஹோதி; இதா³னி பன ‘‘ப⁴க³வதா படிக்கி²த்த’’ந்தி குக்குச்சாயந்தா ந விஞ்ஞாபேம, தேன நோ ந பா²ஸு ஹோதீ’’தி…பே॰… ப⁴க³வதோ ஏதமத்த²ங் ஆரோசேஸுங்…பே॰… அனுஜானாமி, பி⁴க்க²வே, கி³லானாய பி⁴க்கு²னியா ஸப்பிங் விஞ்ஞாபெத்வா பு⁴ஞ்ஜிதுங் . ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
1229. Tena kho pana samayena bhikkhuniyo gilānā honti. Gilānapucchikā bhikkhuniyo gilānā bhikkhuniyo etadavocuṃ – ‘‘kacci, ayye, khamanīyaṃ, kacci yāpanīya’’nti? ‘‘Pubbe mayaṃ, ayye, sappiṃ viññāpetvā bhuñjāma, tena no phāsu hoti; idāni pana ‘‘bhagavatā paṭikkhitta’’nti kukkuccāyantā na viññāpema, tena no na phāsu hotī’’ti…pe… bhagavato etamatthaṃ ārocesuṃ…pe… anujānāmi, bhikkhave, gilānāya bhikkhuniyā sappiṃ viññāpetvā bhuñjituṃ . Evañca pana, bhikkhave, bhikkhuniyo imaṃ sikkhāpadaṃ uddisantu –
1230. ‘‘யா பன பி⁴க்கு²னீ அகி³லானா ஸப்பிங் விஞ்ஞாபெத்வா பு⁴ஞ்ஜெய்ய, படிதே³ஸேதப்³ப³ங் தாய பி⁴க்கு²னியா – ‘கா³ரய்ஹங், அய்யே, த⁴ம்மங் ஆபஜ்ஜிங் அஸப்பாயங் பாடிதே³ஸனீயங் தங் படிதே³ஸேமீ’’’தி.
1230.‘‘Yā pana bhikkhunī agilānā sappiṃ viññāpetvā bhuñjeyya, paṭidesetabbaṃ tāya bhikkhuniyā – ‘gārayhaṃ, ayye, dhammaṃ āpajjiṃ asappāyaṃ pāṭidesanīyaṃ taṃ paṭidesemī’’’ti.
1231. யா பனாதி யா யாதி³ஸா…பே॰… பி⁴க்கு²னீதி…பே॰… அயங் இமஸ்மிங் அத்தே² அதி⁴ப்பேதா பி⁴க்கு²னீதி.
1231.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
அகி³லானா நாம யஸ்ஸா வினா ஸப்பினா பா²ஸு ஹோதி.
Agilānā nāma yassā vinā sappinā phāsu hoti.
கி³லானா நாம யஸ்ஸா வினா ஸப்பினா ந பா²ஸு ஹோதி.
Gilānā nāma yassā vinā sappinā na phāsu hoti.
ஸப்பி நாம கோ³ஸப்பி வா அஜிகாஸப்பி வா மஹிங்ஸஸப்பி வா. யேஸங் மங்ஸங் கப்பதி தேஸங் ஸப்பி.
Sappi nāma gosappi vā ajikāsappi vā mahiṃsasappi vā. Yesaṃ maṃsaṃ kappati tesaṃ sappi.
அகி³லானா அத்தனோ அத்தா²ய விஞ்ஞாபேதி, பயோகே³ து³க்கடங். படிலாபே⁴ன ‘‘பு⁴ஞ்ஜிஸ்ஸாமீ’’தி படிக்³க³ண்ஹாதி, ஆபத்தி து³க்கடஸ்ஸ. அஜ்ஜோ²ஹாரே அஜ்ஜோ²ஹாரே ஆபத்தி பாடிதே³ஸனீயஸ்ஸ.
Agilānā attano atthāya viññāpeti, payoge dukkaṭaṃ. Paṭilābhena ‘‘bhuñjissāmī’’ti paṭiggaṇhāti, āpatti dukkaṭassa. Ajjhohāre ajjhohāre āpatti pāṭidesanīyassa.
1232. அகி³லானா அகி³லானஸஞ்ஞா ஸப்பிங் விஞ்ஞாபெத்வா பு⁴ஞ்ஜதி, ஆபத்தி பாடிதே³ஸனீயஸ்ஸ. அகி³லானா வேமதிகா ஸப்பிங் விஞ்ஞாபெத்வா பு⁴ஞ்ஜதி, ஆபத்தி பாடிதே³ஸனீயஸ்ஸ. அகி³லானா கி³லானஸஞ்ஞா ஸப்பிங் விஞ்ஞாபெத்வா பு⁴ஞ்ஜதி, ஆபத்தி பாடிதே³ஸனீயஸ்ஸ.
1232. Agilānā agilānasaññā sappiṃ viññāpetvā bhuñjati, āpatti pāṭidesanīyassa. Agilānā vematikā sappiṃ viññāpetvā bhuñjati, āpatti pāṭidesanīyassa. Agilānā gilānasaññā sappiṃ viññāpetvā bhuñjati, āpatti pāṭidesanīyassa.
கி³லானா அகி³லானஸஞ்ஞா, ஆபத்தி து³க்கடஸ்ஸ. கி³லானா வேமதிகா, ஆபத்தி து³க்கடஸ்ஸ. கி³லானா கி³லானஸஞ்ஞா, அனாபத்தி.
Gilānā agilānasaññā, āpatti dukkaṭassa. Gilānā vematikā, āpatti dukkaṭassa. Gilānā gilānasaññā, anāpatti.
1233. அனாபத்தி கி³லானாய, கி³லானா ஹுத்வா விஞ்ஞாபெத்வா அகி³லானா பு⁴ஞ்ஜதி, கி³லானாய ஸேஸகங் பு⁴ஞ்ஜதி, ஞாதகானங் பவாரிதானங், அஞ்ஞஸ்ஸத்தா²ய, அத்தனோ த⁴னேன, உம்மத்திகாய, ஆதி³கம்மிகாயாதி.
1233. Anāpatti gilānāya, gilānā hutvā viññāpetvā agilānā bhuñjati, gilānāya sesakaṃ bhuñjati, ñātakānaṃ pavāritānaṃ, aññassatthāya, attano dhanena, ummattikāya, ādikammikāyāti.
பட²மபாடிதே³ஸனீயஸிக்கா²பத³ங் நிட்டி²தங்.
Paṭhamapāṭidesanīyasikkhāpadaṃ niṭṭhitaṃ.
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / பாடிதே³ஸனீயஸிக்கா²பத³வண்ணனா • Pāṭidesanīyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / பாடிதே³ஸனீயஸிக்கா²பத³வண்ணனா • Pāṭidesanīyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / பாடிதே³ஸனீயஸிக்கா²பத³வண்ணனா • Pāṭidesanīyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 5. பாடிதே³ஸனீயஸிக்கா²பத³-அத்த²யோஜனா • 5. Pāṭidesanīyasikkhāpada-atthayojanā
