| Library / Tipiṭaka / තිපිටක • Tipiṭaka / භික්‌ඛුනීවිභඞ්‌ග • Bhikkhunīvibhaṅga |
5. පාටිදෙසනීයකණ්‌ඩං (භික්‌ඛුනීවිභඞ්‌ගො)
5. Pāṭidesanīyakaṇḍaṃ (bhikkhunīvibhaṅgo)
1. පඨමපාටිදෙසනීයසික්‌ඛාපදං
1. Paṭhamapāṭidesanīyasikkhāpadaṃ
ඉමෙ ඛො පනාය්‍යායො අට්‌ඨ පාටිදෙසනීයා
Ime kho panāyyāyo aṭṭha pāṭidesanīyā
ධම්‌මා උද්‌දෙසං ආගච්‌ඡන්‌ති.
Dhammā uddesaṃ āgacchanti.
1228. තෙන සමයෙන බුද්‌ධො භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තෙන ඛො පන සමයෙන ඡබ්‌බග්‌ගියා භික්‌ඛුනියො සප්‌පිං විඤ්‌ඤාපෙත්‌වා භුඤ්‌ජන්‌ති. මනුස්‌සා උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම භික්‌ඛුනියො සප්‌පිං විඤ්‌ඤාපෙත්‌වා භුඤ්‌ජිස්‌සන්‌ති! කස්‌ස සම්‌පන්‌නං න මනාපං, කස්‌ස සාදුං න රුච්‌චතී’’ති! අස්‌සොසුං ඛො භික්‌ඛුනියො තෙසං මනුස්‌සානං උජ්‌ඣායන්‌තානං ඛිය්‍යන්‌තානං විපාචෙන්‌තානං. යා තා භික්‌ඛුනියො අප්‌පිච්‌ඡා…පෙ.… තා උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම ඡබ්‌බග්‌ගියා භික්‌ඛුනියො සප්‌පිං විඤ්‌ඤාපෙත්‌වා භුඤ්‌ජිස්‌සන්‌තී’’ති…පෙ.… සච්‌චං කිර, භික්‌ඛවෙ, ඡබ්‌බග්‌ගියා, භික්‌ඛුනියො සප්‌පිං විඤ්‌ඤාපෙත්‌වා භුඤ්‌ජන්‌තීති? ‘‘සච්‌චං, භගවා’’ති. විගරහි බුද්‌ධො භගවා…පෙ.… කථඤ්‌හි නාම, භික්‌ඛවෙ, ඡබ්‌බග්‌ගියා භික්‌ඛුනියො සප්‌පිං විඤ්‌ඤාපෙත්‌වා භුඤ්‌ජිස්‌සන්‌ති! නෙතං, භික්‌ඛවෙ, අප්‌පසන්‌නානං වා පසාදාය…පෙ.… එවඤ්‌ච පන, භික්‌ඛවෙ, භික්‌ඛුනියො ඉමං සික්‌ඛාපදං උද්‌දිසන්‌තු –
1228. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena chabbaggiyā bhikkhuniyo sappiṃ viññāpetvā bhuñjanti. Manussā ujjhāyanti khiyyanti vipācenti – ‘‘kathañhi nāma bhikkhuniyo sappiṃ viññāpetvā bhuñjissanti! Kassa sampannaṃ na manāpaṃ, kassa sāduṃ na ruccatī’’ti! Assosuṃ kho bhikkhuniyo tesaṃ manussānaṃ ujjhāyantānaṃ khiyyantānaṃ vipācentānaṃ. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma chabbaggiyā bhikkhuniyo sappiṃ viññāpetvā bhuñjissantī’’ti…pe… saccaṃ kira, bhikkhave, chabbaggiyā, bhikkhuniyo sappiṃ viññāpetvā bhuñjantīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, chabbaggiyā bhikkhuniyo sappiṃ viññāpetvā bhuñjissanti! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
‘‘යා පන භික්‌ඛුනී සප්‌පිං විඤ්‌ඤාපෙත්‌වා භුඤ්‌ජෙය්‍ය, පටිදෙසෙතබ්‌බං තාය භික්‌ඛුනියා – ‘ගාරය්‌හං, අය්‍යෙ, ධම්‌මං ආපජ්‌ජිං අසප්‌පායං පාටිදෙසනීයං, තං පටිදෙසෙමී’’’ති.
‘‘Yā pana bhikkhunī sappiṃ viññāpetvā bhuñjeyya, paṭidesetabbaṃ tāya bhikkhuniyā – ‘gārayhaṃ, ayye, dhammaṃ āpajjiṃ asappāyaṃ pāṭidesanīyaṃ, taṃ paṭidesemī’’’ti.
එවඤ්‌චිදං භගවතා භික්‌ඛුනීනං සික්‌ඛාපදං පඤ්‌ඤත්‌තං හොති.
Evañcidaṃ bhagavatā bhikkhunīnaṃ sikkhāpadaṃ paññattaṃ hoti.
1229. තෙන ඛො පන සමයෙන භික්‌ඛුනියො ගිලානා හොන්‌ති. ගිලානපුච්‌ඡිකා භික්‌ඛුනියො ගිලානා භික්‌ඛුනියො එතදවොචුං – ‘‘කච්‌චි, අය්‍යෙ, ඛමනීයං, කච්‌චි යාපනීය’’න්‌ති? ‘‘පුබ්‌බෙ මයං, අය්‍යෙ, සප්‌පිං විඤ්‌ඤාපෙත්‌වා භුඤ්‌ජාම, තෙන නො ඵාසු හොති; ඉදානි පන ‘‘භගවතා පටික්‌ඛිත්‌ත’’න්‌ති කුක්‌කුච්‌චායන්‌තා න විඤ්‌ඤාපෙම, තෙන නො න ඵාසු හොතී’’ති…පෙ.… භගවතො එතමත්‌ථං ආරොචෙසුං…පෙ.… අනුජානාමි, භික්‌ඛවෙ, ගිලානාය භික්‌ඛුනියා සප්‌පිං විඤ්‌ඤාපෙත්‌වා භුඤ්‌ජිතුං . එවඤ්‌ච පන, භික්‌ඛවෙ, භික්‌ඛුනියො ඉමං සික්‌ඛාපදං උද්‌දිසන්‌තු –
1229. Tena kho pana samayena bhikkhuniyo gilānā honti. Gilānapucchikā bhikkhuniyo gilānā bhikkhuniyo etadavocuṃ – ‘‘kacci, ayye, khamanīyaṃ, kacci yāpanīya’’nti? ‘‘Pubbe mayaṃ, ayye, sappiṃ viññāpetvā bhuñjāma, tena no phāsu hoti; idāni pana ‘‘bhagavatā paṭikkhitta’’nti kukkuccāyantā na viññāpema, tena no na phāsu hotī’’ti…pe… bhagavato etamatthaṃ ārocesuṃ…pe… anujānāmi, bhikkhave, gilānāya bhikkhuniyā sappiṃ viññāpetvā bhuñjituṃ . Evañca pana, bhikkhave, bhikkhuniyo imaṃ sikkhāpadaṃ uddisantu –
1230. ‘‘යා පන භික්‌ඛුනී අගිලානා සප්‌පිං විඤ්‌ඤාපෙත්‌වා භුඤ්‌ජෙය්‍ය, පටිදෙසෙතබ්‌බං තාය භික්‌ඛුනියා – ‘ගාරය්‌හං, අය්‍යෙ, ධම්‌මං ආපජ්‌ජිං අසප්‌පායං පාටිදෙසනීයං තං පටිදෙසෙමී’’’ති.
1230.‘‘Yā pana bhikkhunī agilānā sappiṃ viññāpetvā bhuñjeyya, paṭidesetabbaṃ tāya bhikkhuniyā – ‘gārayhaṃ, ayye, dhammaṃ āpajjiṃ asappāyaṃ pāṭidesanīyaṃ taṃ paṭidesemī’’’ti.
1231. යා පනාති යා යාදිසා…පෙ.… භික්‌ඛුනීති…පෙ.… අයං ඉමස්‌මිං අත්‌ථෙ අධිප්‌පෙතා භික්‌ඛුනීති.
1231.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
අගිලානා නාම යස්‌සා විනා සප්‌පිනා ඵාසු හොති.
Agilānā nāma yassā vinā sappinā phāsu hoti.
ගිලානා නාම යස්‌සා විනා සප්‌පිනා න ඵාසු හොති.
Gilānā nāma yassā vinā sappinā na phāsu hoti.
සප්‌පි නාම ගොසප්‌පි වා අජිකාසප්‌පි වා මහිංසසප්‌පි වා. යෙසං මංසං කප්‌පති තෙසං සප්‌පි.
Sappi nāma gosappi vā ajikāsappi vā mahiṃsasappi vā. Yesaṃ maṃsaṃ kappati tesaṃ sappi.
අගිලානා අත්‌තනො අත්‌ථාය විඤ්‌ඤාපෙති, පයොගෙ දුක්‌කටං. පටිලාභෙන ‘‘භුඤ්‌ජිස්‌සාමී’’ති පටිග්‌ගණ්‌හාති, ආපත්‌ති දුක්‌කටස්‌ස. අජ්‌ඣොහාරෙ අජ්‌ඣොහාරෙ ආපත්‌ති පාටිදෙසනීයස්‌ස.
Agilānā attano atthāya viññāpeti, payoge dukkaṭaṃ. Paṭilābhena ‘‘bhuñjissāmī’’ti paṭiggaṇhāti, āpatti dukkaṭassa. Ajjhohāre ajjhohāre āpatti pāṭidesanīyassa.
1232. අගිලානා අගිලානසඤ්‌ඤා සප්‌පිං විඤ්‌ඤාපෙත්‌වා භුඤ්‌ජති, ආපත්‌ති පාටිදෙසනීයස්‌ස. අගිලානා වෙමතිකා සප්‌පිං විඤ්‌ඤාපෙත්‌වා භුඤ්‌ජති, ආපත්‌ති පාටිදෙසනීයස්‌ස. අගිලානා ගිලානසඤ්‌ඤා සප්‌පිං විඤ්‌ඤාපෙත්‌වා භුඤ්‌ජති, ආපත්‌ති පාටිදෙසනීයස්‌ස.
1232. Agilānā agilānasaññā sappiṃ viññāpetvā bhuñjati, āpatti pāṭidesanīyassa. Agilānā vematikā sappiṃ viññāpetvā bhuñjati, āpatti pāṭidesanīyassa. Agilānā gilānasaññā sappiṃ viññāpetvā bhuñjati, āpatti pāṭidesanīyassa.
ගිලානා අගිලානසඤ්‌ඤා, ආපත්‌ති දුක්‌කටස්‌ස. ගිලානා වෙමතිකා, ආපත්‌ති දුක්‌කටස්‌ස. ගිලානා ගිලානසඤ්‌ඤා, අනාපත්‌ති.
Gilānā agilānasaññā, āpatti dukkaṭassa. Gilānā vematikā, āpatti dukkaṭassa. Gilānā gilānasaññā, anāpatti.
1233. අනාපත්‌ති ගිලානාය, ගිලානා හුත්‌වා විඤ්‌ඤාපෙත්‌වා අගිලානා භුඤ්‌ජති, ගිලානාය සෙසකං භුඤ්‌ජති, ඤාතකානං පවාරිතානං, අඤ්‌ඤස්‌සත්‌ථාය, අත්‌තනො ධනෙන, උම්‌මත්‌තිකාය, ආදිකම්‌මිකායාති.
1233. Anāpatti gilānāya, gilānā hutvā viññāpetvā agilānā bhuñjati, gilānāya sesakaṃ bhuñjati, ñātakānaṃ pavāritānaṃ, aññassatthāya, attano dhanena, ummattikāya, ādikammikāyāti.
පඨමපාටිදෙසනීයසික්‌ඛාපදං නිට්‌ඨිතං.
Paṭhamapāṭidesanīyasikkhāpadaṃ niṭṭhitaṃ.
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / භික්‌ඛුනීවිභඞ්‌ග-අට්‌ඨකථා • Bhikkhunīvibhaṅga-aṭṭhakathā / පාටිදෙසනීයසික්‌ඛාපදවණ්‌ණනා • Pāṭidesanīyasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / පාටිදෙසනීයසික්‌ඛාපදවණ්‌ණනා • Pāṭidesanīyasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / පාටිදෙසනීයසික්‌ඛාපදවණ්‌ණනා • Pāṭidesanīyasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 5. පාටිදෙසනීයසික්‌ඛාපද-අත්‌ථයොජනා • 5. Pāṭidesanīyasikkhāpada-atthayojanā
