| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
6. பாடிதே³ஸனீயகண்ட³ங்
6. Pāṭidesanīyakaṇḍaṃ
1. பட²மபாடிதே³ஸனீயஸிக்கா²பத³வண்ணனா
1. Paṭhamapāṭidesanīyasikkhāpadavaṇṇanā
பாடிதே³ஸனீயா த⁴ம்மா, கு²த்³த³கானங் அனந்தரா;
Pāṭidesanīyā dhammā, khuddakānaṃ anantarā;
ட²பிதா யே அயங் தா³னி, தேஸங் ப⁴வதி வண்ணனா.
Ṭhapitā ye ayaṃ dāni, tesaṃ bhavati vaṇṇanā.
552. பட²மபாடிதே³ஸனீயே தாவ படிக்கமனகாலேதி பிண்டா³ய சரித்வா படிஆக³மனகாலே. ஸப்³பே³வ அக்³க³ஹேஸீதி ஸப்³ப³மேவ அக்³க³ஹேஸி. பவேதெ⁴ந்தீதி கம்பமானா. அபேஹீதி அபக³ச்ச².
552. Paṭhamapāṭidesanīye tāva paṭikkamanakāleti piṇḍāya caritvā paṭiāgamanakāle. Sabbeva aggahesīti sabbameva aggahesi. Pavedhentīti kampamānā. Apehīti apagaccha.
553-5. கா³ரய்ஹங் ஆவுஸோதிஆதி³ படிதே³ஸேதப்³பா³காரத³ஸ்ஸனங். ரதி²காதி ரச்சா². ப்³யூஹந்தி அனிப்³பி³ஜ்ஜி²த்வா டி²தா க³தபச்சாக³தரச்சா². ஸிங்கா⁴டகந்தி சதுக்கோணங் வா திகோணங் வா மக்³க³ஸமோதா⁴னட்டா²னங். க⁴ரந்தி குலக⁴ரங். ஏதேஸு யத்த² கத்த²சி ட²த்வா க³ண்ஹந்தஸ்ஸ க³ஹணே து³க்கடங், அஜ்ஜோ²ஹாரே அஜ்ஜோ²ஹாரக³ணனாய பாடிதே³ஸனீயங். ஹத்தி²ஸாலாதீ³ஸு க³ண்ஹந்தஸ்ஸாபி ஏஸேவ நயோ. பி⁴க்கு²னீ ரதி²காய ட²த்வா தே³தி, பி⁴க்கு² ஸசேபி அந்தராராமாதீ³ஸு ட²த்வா க³ண்ஹாதி, ஆபத்தியேவ. ‘‘அந்தரக⁴ரங் பவிட்டா²யா’’தி ஹி வசனதோ பி⁴க்கு²னியா அந்தரக⁴ரே ட²த்வா த³த³மானாய வஸேனெத்த² ஆபத்தி வேதி³தப்³பா³, பி⁴க்கு²ஸ்ஸ டி²தட்டா²னங் பன அப்பமாணங். தஸ்மா ஸசேபி வீதி²ஆதீ³ஸு டி²தோ பி⁴க்கு² அந்தராராமாதீ³ஸு ட²த்வா த³த³மானாய பி⁴க்கு²னியா க³ண்ஹாதி, அனாபத்தியேவ.
553-5.Gārayhaṃ āvusotiādi paṭidesetabbākāradassanaṃ. Rathikāti racchā. Byūhanti anibbijjhitvā ṭhitā gatapaccāgataracchā. Siṅghāṭakanti catukkoṇaṃ vā tikoṇaṃ vā maggasamodhānaṭṭhānaṃ. Gharanti kulagharaṃ. Etesu yattha katthaci ṭhatvā gaṇhantassa gahaṇe dukkaṭaṃ, ajjhohāre ajjhohāragaṇanāya pāṭidesanīyaṃ. Hatthisālādīsu gaṇhantassāpi eseva nayo. Bhikkhunī rathikāya ṭhatvā deti, bhikkhu sacepi antarārāmādīsu ṭhatvā gaṇhāti, āpattiyeva. ‘‘Antaragharaṃ paviṭṭhāyā’’ti hi vacanato bhikkhuniyā antaraghare ṭhatvā dadamānāya vasenettha āpatti veditabbā, bhikkhussa ṭhitaṭṭhānaṃ pana appamāṇaṃ. Tasmā sacepi vīthiādīsu ṭhito bhikkhu antarārāmādīsu ṭhatvā dadamānāya bhikkhuniyā gaṇhāti, anāpattiyeva.
யாமகாலிகங் ஸத்தாஹகாலிகங் யாவஜீவிகங் ஆஹாரத்தா²ய படிக்³க³ண்ஹாதி, ஆபத்தி து³க்கடஸ்ஸ. அஜ்ஜோ²ஹாரே அஜ்ஜோ²ஹாரே ஆபத்தி து³க்கடஸ்ஸாதி இத³ங் ஆமிஸேன அஸம்பி⁴ன்னங் ஸந்தா⁴ய வுத்தங், ஸம்பி⁴ன்னே பன ஏகரஸே பாடிதே³ஸனீயமேவ. ஏகதோ உபஸம்பன்னாயாதி பி⁴க்கு²னீனங் ஸந்திகே உபஸம்பன்னாய. பி⁴க்கூ²னங் ஸந்திகே உபஸம்பன்னாய பன யதா²வத்து²கமேவ.
Yāmakālikaṃ sattāhakālikaṃ yāvajīvikaṃ āhāratthāya paṭiggaṇhāti, āpatti dukkaṭassa. Ajjhohāre ajjhohāre āpatti dukkaṭassāti idaṃ āmisena asambhinnaṃ sandhāya vuttaṃ, sambhinne pana ekarase pāṭidesanīyameva. Ekato upasampannāyāti bhikkhunīnaṃ santike upasampannāya. Bhikkhūnaṃ santike upasampannāya pana yathāvatthukameva.
556. தா³பேதி ந தே³தீதி அஞ்ஞாதிகா அஞ்ஞேன கேனசி தா³பேதி தங் க³ண்ஹந்தஸ்ஸ அனாபத்தி. உபனிக்கி²பித்வா தே³தீதி பூ⁴மியங் ட²பெத்வா ‘‘இத³ங் அய்ய தும்ஹாகங் த³ம்மீ’’தி தே³தி, ஏவங் தி³ன்னங் ‘‘ஸாது⁴ ப⁴கி³னீ’’தி ஸம்படிச்சி²த்வா தாய ஏவ வா பி⁴க்கு²னியா அஞ்ஞேன வா கேனசி படிக்³க³ஹாபெத்வா பு⁴ஞ்ஜிதுங் வட்டதி. ஸிக்க²மானாய ஸாமணேரியாதி ஏதாஸங் த³த³மானானங் க³ண்ஹந்தஸ்ஸ அனாபத்தி. ஸேஸமெத்த² உத்தானமேவ.
556.Dāpeti na detīti aññātikā aññena kenaci dāpeti taṃ gaṇhantassa anāpatti. Upanikkhipitvā detīti bhūmiyaṃ ṭhapetvā ‘‘idaṃ ayya tumhākaṃ dammī’’ti deti, evaṃ dinnaṃ ‘‘sādhu bhaginī’’ti sampaṭicchitvā tāya eva vā bhikkhuniyā aññena vā kenaci paṭiggahāpetvā bhuñjituṃ vaṭṭati. Sikkhamānāya sāmaṇeriyāti etāsaṃ dadamānānaṃ gaṇhantassa anāpatti. Sesamettha uttānameva.
ஏளகலோமஸமுட்டா²னங் – கிரியங், நோஸஞ்ஞாவிமொக்க²ங், அசித்தகங், பண்ணத்திவஜ்ஜங், காயகம்மங், திசித்தங், திவேத³னந்தி.
Eḷakalomasamuṭṭhānaṃ – kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, ticittaṃ, tivedananti.
பட²மபாடிதே³ஸனீயங்.
Paṭhamapāṭidesanīyaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 1. பட²மபாடிதே³ஸனீயஸிக்கா²பத³ங் • 1. Paṭhamapāṭidesanīyasikkhāpadaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / பாடிதே³ஸனீயஸிக்கா²பத³வண்ணனா • Pāṭidesanīyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 1. பட²மபாடிதே³ஸனீயஸிக்கா²பத³வண்ணனா • 1. Paṭhamapāṭidesanīyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 1. பட²மபாடிதே³ஸனீயஸிக்கா²பத³வண்ணனா • 1. Paṭhamapāṭidesanīyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 1. பட²மபாடிதே³ஸனீயஸிக்கா²பத³-அத்த²யோஜனா • 1. Paṭhamapāṭidesanīyasikkhāpada-atthayojanā
