| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
பாடிதே³ஸனீயகண்ட³ங்
Pāṭidesanīyakaṇḍaṃ
1. பட²மபாடிதே³ஸனீயஸிக்கா²பத³வண்ணனா
1. Paṭhamapāṭidesanīyasikkhāpadavaṇṇanā
அந்தரக⁴ரங் பவிட்டா²யாதி ரதி²கங் ப்³யூஹங் ஸிங்கா⁴டகங் க⁴ரங் பவிட்டா²ய. அஸப்பாயந்தி ஸக்³க³மொக்கா²னங் அஹிதங் அனநுகூலங். பி⁴க்கு²னியா அந்தரக⁴ரே ட²த்வா த³த³மானாய வஸேனெத்த² ஆபத்தி வேதி³தப்³பா³, பி⁴க்கு²ஸ்ஸ டி²தட்டா²னங் பன அப்பமாணங். தேனாஹ ‘‘அந்தரக⁴ரங் பவிட்டா²யாதி வசனதோ’’திஆதி³. அந்தராராமாதீ³ஸூதி அந்தராராமபி⁴க்கு²னுபஸ்ஸயதித்தி²யஸெய்யாபடிக்கமனேஸு. ரதி²யாப்³யூஹஸிங்கா⁴டகக⁴ரானந்தி எத்த² ரதி²யாதி ரச்சா². ப்³யூஹந்தி அனிப்³பி³ஜ்ஜி²த்வா டி²தா க³தபச்சாக³தரச்சா². ஸிங்கா⁴டகந்தி சதுக்கோணங் வா திகோணங் வா மக்³க³ஸமோதா⁴னட்டா²னங். க⁴ரந்தி குலக⁴ரங். யதா² ச ரதி²யாதீ³ஸு ட²த்வா த³த³மானாய க³ண்ஹதோ ஆபத்தி, ஏவங் ஹத்தி²ஸாலாதீ³ஸுபி த³ட்ட²ப்³ப³ங்.
Antaragharaṃpaviṭṭhāyāti rathikaṃ byūhaṃ siṅghāṭakaṃ gharaṃ paviṭṭhāya. Asappāyanti saggamokkhānaṃ ahitaṃ ananukūlaṃ. Bhikkhuniyā antaraghare ṭhatvā dadamānāya vasenettha āpatti veditabbā, bhikkhussa ṭhitaṭṭhānaṃ pana appamāṇaṃ. Tenāha ‘‘antaragharaṃ paviṭṭhāyāti vacanato’’tiādi. Antarārāmādīsūti antarārāmabhikkhunupassayatitthiyaseyyāpaṭikkamanesu. Rathiyābyūhasiṅghāṭakagharānanti ettha rathiyāti racchā. Byūhanti anibbijjhitvā ṭhitā gatapaccāgataracchā. Siṅghāṭakanti catukkoṇaṃ vā tikoṇaṃ vā maggasamodhānaṭṭhānaṃ. Gharanti kulagharaṃ. Yathā ca rathiyādīsu ṭhatvā dadamānāya gaṇhato āpatti, evaṃ hatthisālādīsupi daṭṭhabbaṃ.
‘‘யாமகாலிகாதீ³ஸு படிக்³க³ஹணேபி அஜ்ஜோ²ஹரணேபி து³க்கட’’ந்தி இத³ங் ஆமிஸேன அஸம்பி⁴ன்னங் ஸந்தா⁴ய வுத்தங், ஸம்பி⁴ன்னே பன ஏகரஸே பாடிதே³ஸனீயமேவ. ஏகதோ உபஸம்பன்னாயாதி பி⁴க்கு²னீனங் ஸந்திகே உபஸம்பன்னாய, பி⁴க்கூ²னங் ஸந்திகே உபஸம்பன்னாய பன யதா²வத்து²கமேவ.
‘‘Yāmakālikādīsu paṭiggahaṇepi ajjhoharaṇepi dukkaṭa’’nti idaṃ āmisena asambhinnaṃ sandhāya vuttaṃ, sambhinne pana ekarase pāṭidesanīyameva. Ekato upasampannāyāti bhikkhunīnaṃ santike upasampannāya, bhikkhūnaṃ santike upasampannāya pana yathāvatthukameva.
ஞாதிகாய வா தா³பெந்தியாதி ஸயங் அத³த்வா யாய காயசி ஞாதிகாய தா³பெந்தியா, அஞ்ஞாதிகாயாதி அத்தோ². உபனிக்கி²பித்வா வா த³த³மானாயாதி பூ⁴மியங் ட²பெத்வா ‘‘இத³ங், அய்ய, தும்ஹாகங் த³ம்மீ’’தி த³த³மானாய. ஏவங் தி³ன்னங் ‘‘ஸாது⁴, ப⁴கி³னீ’’தி ஸம்படிச்சி²த்வா தாய ஏவ வா பி⁴க்கு²னியா, அஞ்ஞேன வா கேனசி படிக்³க³ஹாபெத்வா இத³ங் பு⁴ஞ்ஜிதுங் வட்டதி.
Ñātikāya vā dāpentiyāti sayaṃ adatvā yāya kāyaci ñātikāya dāpentiyā, aññātikāyāti attho. Upanikkhipitvā vā dadamānāyāti bhūmiyaṃ ṭhapetvā ‘‘idaṃ, ayya, tumhākaṃ dammī’’ti dadamānāya. Evaṃ dinnaṃ ‘‘sādhu, bhaginī’’ti sampaṭicchitvā tāya eva vā bhikkhuniyā, aññena vā kenaci paṭiggahāpetvā idaṃ bhuñjituṃ vaṭṭati.
பட²மபாடிதே³ஸனீயஸிக்கா²பத³வண்ணனா நிட்டி²தா.
Paṭhamapāṭidesanīyasikkhāpadavaṇṇanā niṭṭhitā.
