| Library / Tipiṭaka / তিপিটক • Tipiṭaka / মহাৰিভঙ্গ-অট্ঠকথা • Mahāvibhaṅga-aṭṭhakathā |
৬. পাটিদেসনীযকণ্ডং
6. Pāṭidesanīyakaṇḍaṃ
১. পঠমপাটিদেসনীযসিক্খাপদৰণ্ণনা
1. Paṭhamapāṭidesanīyasikkhāpadavaṇṇanā
পাটিদেসনীযা ধম্মা, খুদ্দকানং অনন্তরা।
Pāṭidesanīyā dhammā, khuddakānaṃ anantarā;
ঠপিতা যে অযং দানি, তেসং ভৰতি ৰণ্ণনা॥
Ṭhapitā ye ayaṃ dāni, tesaṃ bhavati vaṇṇanā.
৫৫২. পঠমপাটিদেসনীযে তাৰ পটিক্কমনকালেতি পিণ্ডায চরিত্ৰা পটিআগমনকালে। সব্বেৰ অগ্গহেসীতি সব্বমেৰ অগ্গহেসি। পৰেধেন্তীতি কম্পমানা। অপেহীতি অপগচ্ছ।
552. Paṭhamapāṭidesanīye tāva paṭikkamanakāleti piṇḍāya caritvā paṭiāgamanakāle. Sabbeva aggahesīti sabbameva aggahesi. Pavedhentīti kampamānā. Apehīti apagaccha.
৫৫৩-৫. গারয্হং আৰুসোতিআদি পটিদেসেতব্বাকারদস্সনং। রথিকাতি রচ্ছা। ব্যূহন্তি অনিব্বিজ্ঝিত্ৰা ঠিতা গতপচ্চাগতরচ্ছা। সিঙ্ঘাটকন্তি চতুক্কোণং ৰা তিকোণং ৰা মগ্গসমোধানট্ঠানং। ঘরন্তি কুলঘরং। এতেসু যত্থ কত্থচি ঠত্ৰা গণ্হন্তস্স গহণে দুক্কটং, অজ্ঝোহারে অজ্ঝোহারগণনায পাটিদেসনীযং। হত্থিসালাদীসু গণ্হন্তস্সাপি এসেৰ নযো। ভিক্খুনী রথিকায ঠত্ৰা দেতি, ভিক্খু সচেপি অন্তরারামাদীসু ঠত্ৰা গণ্হাতি, আপত্তিযেৰ। ‘‘অন্তরঘরং পৰিট্ঠাযা’’তি হি ৰচনতো ভিক্খুনিযা অন্তরঘরে ঠত্ৰা দদমানায ৰসেনেত্থ আপত্তি ৰেদিতব্বা, ভিক্খুস্স ঠিতট্ঠানং পন অপ্পমাণং। তস্মা সচেপি ৰীথিআদীসু ঠিতো ভিক্খু অন্তরারামাদীসু ঠত্ৰা দদমানায ভিক্খুনিযা গণ্হাতি, অনাপত্তিযেৰ।
553-5.Gārayhaṃ āvusotiādi paṭidesetabbākāradassanaṃ. Rathikāti racchā. Byūhanti anibbijjhitvā ṭhitā gatapaccāgataracchā. Siṅghāṭakanti catukkoṇaṃ vā tikoṇaṃ vā maggasamodhānaṭṭhānaṃ. Gharanti kulagharaṃ. Etesu yattha katthaci ṭhatvā gaṇhantassa gahaṇe dukkaṭaṃ, ajjhohāre ajjhohāragaṇanāya pāṭidesanīyaṃ. Hatthisālādīsu gaṇhantassāpi eseva nayo. Bhikkhunī rathikāya ṭhatvā deti, bhikkhu sacepi antarārāmādīsu ṭhatvā gaṇhāti, āpattiyeva. ‘‘Antaragharaṃ paviṭṭhāyā’’ti hi vacanato bhikkhuniyā antaraghare ṭhatvā dadamānāya vasenettha āpatti veditabbā, bhikkhussa ṭhitaṭṭhānaṃ pana appamāṇaṃ. Tasmā sacepi vīthiādīsu ṭhito bhikkhu antarārāmādīsu ṭhatvā dadamānāya bhikkhuniyā gaṇhāti, anāpattiyeva.
যামকালিকং সত্তাহকালিকং যাৰজীৰিকং আহারত্থায পটিগ্গণ্হাতি, আপত্তি দুক্কটস্স। অজ্ঝোহারে অজ্ঝোহারে আপত্তি দুক্কটস্সাতি ইদং আমিসেন অসম্ভিন্নং সন্ধায ৰুত্তং, সম্ভিন্নে পন একরসে পাটিদেসনীযমেৰ। একতো উপসম্পন্নাযাতি ভিক্খুনীনং সন্তিকে উপসম্পন্নায। ভিক্খূনং সন্তিকে উপসম্পন্নায পন যথাৰত্থুকমেৰ।
Yāmakālikaṃ sattāhakālikaṃ yāvajīvikaṃ āhāratthāya paṭiggaṇhāti, āpatti dukkaṭassa. Ajjhohāre ajjhohāre āpatti dukkaṭassāti idaṃ āmisena asambhinnaṃ sandhāya vuttaṃ, sambhinne pana ekarase pāṭidesanīyameva. Ekato upasampannāyāti bhikkhunīnaṃ santike upasampannāya. Bhikkhūnaṃ santike upasampannāya pana yathāvatthukameva.
৫৫৬. দাপেতি ন দেতীতি অঞ্ঞাতিকা অঞ্ঞেন কেনচি দাপেতি তং গণ্হন্তস্স অনাপত্তি। উপনিক্খিপিত্ৰা দেতীতি ভূমিযং ঠপেত্ৰা ‘‘ইদং অয্য তুম্হাকং দম্মী’’তি দেতি, এৰং দিন্নং ‘‘সাধু ভগিনী’’তি সম্পটিচ্ছিত্ৰা তায এৰ ৰা ভিক্খুনিযা অঞ্ঞেন ৰা কেনচি পটিগ্গহাপেত্ৰা ভুঞ্জিতুং ৰট্টতি। সিক্খমানায সামণেরিযাতি এতাসং দদমানানং গণ্হন্তস্স অনাপত্তি। সেসমেত্থ উত্তানমেৰ।
556.Dāpeti na detīti aññātikā aññena kenaci dāpeti taṃ gaṇhantassa anāpatti. Upanikkhipitvā detīti bhūmiyaṃ ṭhapetvā ‘‘idaṃ ayya tumhākaṃ dammī’’ti deti, evaṃ dinnaṃ ‘‘sādhu bhaginī’’ti sampaṭicchitvā tāya eva vā bhikkhuniyā aññena vā kenaci paṭiggahāpetvā bhuñjituṃ vaṭṭati. Sikkhamānāya sāmaṇeriyāti etāsaṃ dadamānānaṃ gaṇhantassa anāpatti. Sesamettha uttānameva.
এল়কলোমসমুট্ঠানং – কিরিযং, নোসঞ্ঞাৰিমোক্খং, অচিত্তকং, পণ্ণত্তিৰজ্জং, কাযকম্মং, তিচিত্তং, তিৰেদনন্তি।
Eḷakalomasamuṭṭhānaṃ – kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, ticittaṃ, tivedananti.
পঠমপাটিদেসনীযং।
Paṭhamapāṭidesanīyaṃ.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ১. পঠমপাটিদেসনীযসিক্খাপদং • 1. Paṭhamapāṭidesanīyasikkhāpadaṃ
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / পাটিদেসনীযসিক্খাপদৰণ্ণনা • Pāṭidesanīyasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ১. পঠমপাটিদেসনীযসিক্খাপদৰণ্ণনা • 1. Paṭhamapāṭidesanīyasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ১. পঠমপাটিদেসনীযসিক্খাপদৰণ্ণনা • 1. Paṭhamapāṭidesanīyasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ১. পঠমপাটিদেসনীযসিক্খাপদ-অত্থযোজনা • 1. Paṭhamapāṭidesanīyasikkhāpada-atthayojanā
