| Library / Tipiṭaka / तिपिटक • Tipiṭaka / महाविभङ्ग-अट्ठकथा • Mahāvibhaṅga-aṭṭhakathā |
६. पाटिदेसनीयकण्डं
6. Pāṭidesanīyakaṇḍaṃ
१. पठमपाटिदेसनीयसिक्खापदवण्णना
1. Paṭhamapāṭidesanīyasikkhāpadavaṇṇanā
पाटिदेसनीया धम्मा, खुद्दकानं अनन्तरा।
Pāṭidesanīyā dhammā, khuddakānaṃ anantarā;
ठपिता ये अयं दानि, तेसं भवति वण्णना॥
Ṭhapitā ye ayaṃ dāni, tesaṃ bhavati vaṇṇanā.
५५२. पठमपाटिदेसनीये ताव पटिक्कमनकालेति पिण्डाय चरित्वा पटिआगमनकाले। सब्बेव अग्गहेसीति सब्बमेव अग्गहेसि। पवेधेन्तीति कम्पमाना। अपेहीति अपगच्छ।
552. Paṭhamapāṭidesanīye tāva paṭikkamanakāleti piṇḍāya caritvā paṭiāgamanakāle. Sabbeva aggahesīti sabbameva aggahesi. Pavedhentīti kampamānā. Apehīti apagaccha.
५५३-५. गारय्हं आवुसोतिआदि पटिदेसेतब्बाकारदस्सनं। रथिकाति रच्छा। ब्यूहन्ति अनिब्बिज्झित्वा ठिता गतपच्चागतरच्छा। सिङ्घाटकन्ति चतुक्कोणं वा तिकोणं वा मग्गसमोधानट्ठानं। घरन्ति कुलघरं। एतेसु यत्थ कत्थचि ठत्वा गण्हन्तस्स गहणे दुक्कटं, अज्झोहारे अज्झोहारगणनाय पाटिदेसनीयं। हत्थिसालादीसु गण्हन्तस्सापि एसेव नयो। भिक्खुनी रथिकाय ठत्वा देति, भिक्खु सचेपि अन्तरारामादीसु ठत्वा गण्हाति, आपत्तियेव। ‘‘अन्तरघरं पविट्ठाया’’ति हि वचनतो भिक्खुनिया अन्तरघरे ठत्वा ददमानाय वसेनेत्थ आपत्ति वेदितब्बा, भिक्खुस्स ठितट्ठानं पन अप्पमाणं। तस्मा सचेपि वीथिआदीसु ठितो भिक्खु अन्तरारामादीसु ठत्वा ददमानाय भिक्खुनिया गण्हाति, अनापत्तियेव।
553-5.Gārayhaṃ āvusotiādi paṭidesetabbākāradassanaṃ. Rathikāti racchā. Byūhanti anibbijjhitvā ṭhitā gatapaccāgataracchā. Siṅghāṭakanti catukkoṇaṃ vā tikoṇaṃ vā maggasamodhānaṭṭhānaṃ. Gharanti kulagharaṃ. Etesu yattha katthaci ṭhatvā gaṇhantassa gahaṇe dukkaṭaṃ, ajjhohāre ajjhohāragaṇanāya pāṭidesanīyaṃ. Hatthisālādīsu gaṇhantassāpi eseva nayo. Bhikkhunī rathikāya ṭhatvā deti, bhikkhu sacepi antarārāmādīsu ṭhatvā gaṇhāti, āpattiyeva. ‘‘Antaragharaṃ paviṭṭhāyā’’ti hi vacanato bhikkhuniyā antaraghare ṭhatvā dadamānāya vasenettha āpatti veditabbā, bhikkhussa ṭhitaṭṭhānaṃ pana appamāṇaṃ. Tasmā sacepi vīthiādīsu ṭhito bhikkhu antarārāmādīsu ṭhatvā dadamānāya bhikkhuniyā gaṇhāti, anāpattiyeva.
यामकालिकं सत्ताहकालिकं यावजीविकं आहारत्थाय पटिग्गण्हाति, आपत्ति दुक्कटस्स। अज्झोहारे अज्झोहारे आपत्ति दुक्कटस्साति इदं आमिसेन असम्भिन्नं सन्धाय वुत्तं, सम्भिन्ने पन एकरसे पाटिदेसनीयमेव। एकतो उपसम्पन्नायाति भिक्खुनीनं सन्तिके उपसम्पन्नाय। भिक्खूनं सन्तिके उपसम्पन्नाय पन यथावत्थुकमेव।
Yāmakālikaṃ sattāhakālikaṃ yāvajīvikaṃ āhāratthāya paṭiggaṇhāti, āpatti dukkaṭassa. Ajjhohāre ajjhohāre āpatti dukkaṭassāti idaṃ āmisena asambhinnaṃ sandhāya vuttaṃ, sambhinne pana ekarase pāṭidesanīyameva. Ekato upasampannāyāti bhikkhunīnaṃ santike upasampannāya. Bhikkhūnaṃ santike upasampannāya pana yathāvatthukameva.
५५६. दापेति न देतीति अञ्ञातिका अञ्ञेन केनचि दापेति तं गण्हन्तस्स अनापत्ति। उपनिक्खिपित्वा देतीति भूमियं ठपेत्वा ‘‘इदं अय्य तुम्हाकं दम्मी’’ति देति, एवं दिन्नं ‘‘साधु भगिनी’’ति सम्पटिच्छित्वा ताय एव वा भिक्खुनिया अञ्ञेन वा केनचि पटिग्गहापेत्वा भुञ्जितुं वट्टति। सिक्खमानाय सामणेरियाति एतासं ददमानानं गण्हन्तस्स अनापत्ति। सेसमेत्थ उत्तानमेव।
556.Dāpeti na detīti aññātikā aññena kenaci dāpeti taṃ gaṇhantassa anāpatti. Upanikkhipitvā detīti bhūmiyaṃ ṭhapetvā ‘‘idaṃ ayya tumhākaṃ dammī’’ti deti, evaṃ dinnaṃ ‘‘sādhu bhaginī’’ti sampaṭicchitvā tāya eva vā bhikkhuniyā aññena vā kenaci paṭiggahāpetvā bhuñjituṃ vaṭṭati. Sikkhamānāya sāmaṇeriyāti etāsaṃ dadamānānaṃ gaṇhantassa anāpatti. Sesamettha uttānameva.
एळकलोमसमुट्ठानं – किरियं, नोसञ्ञाविमोक्खं, अचित्तकं, पण्णत्तिवज्जं, कायकम्मं, तिचित्तं, तिवेदनन्ति।
Eḷakalomasamuṭṭhānaṃ – kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, ticittaṃ, tivedananti.
पठमपाटिदेसनीयं।
Paṭhamapāṭidesanīyaṃ.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / महाविभङ्ग • Mahāvibhaṅga / १. पठमपाटिदेसनीयसिक्खापदं • 1. Paṭhamapāṭidesanīyasikkhāpadaṃ
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / पाटिदेसनीयसिक्खापदवण्णना • Pāṭidesanīyasikkhāpadavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā / १. पठमपाटिदेसनीयसिक्खापदवण्णना • 1. Paṭhamapāṭidesanīyasikkhāpadavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / १. पठमपाटिदेसनीयसिक्खापदवण्णना • 1. Paṭhamapāṭidesanīyasikkhāpadavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / १. पठमपाटिदेसनीयसिक्खापद-अत्थयोजना • 1. Paṭhamapāṭidesanīyasikkhāpada-atthayojanā
