| Library / Tipiṭaka / តិបិដក • Tipiṭaka / កង្ខាវិតរណី-អភិនវ-ដីកា • Kaṅkhāvitaraṇī-abhinava-ṭīkā |
បាដិទេសនីយកណ្ឌំ
Pāṭidesanīyakaṇḍaṃ
១. បឋមបាដិទេសនីយសិក្ខាបទវណ្ណនា
1. Paṭhamapāṭidesanīyasikkhāpadavaṇṇanā
អន្តរឃរំ បវិដ្ឋាយាតិ រថិកំ ព្យូហំ សិង្ឃាដកំ ឃរំ បវិដ្ឋាយ។ អសប្បាយន្តិ សគ្គមោក្ខានំ អហិតំ អននុកូលំ។ ភិក្ខុនិយា អន្តរឃរេ ឋត្វា ទទមានាយ វសេនេត្ថ អាបត្តិ វេទិតព្ពា, ភិក្ខុស្ស ឋិតដ្ឋានំ បន អប្បមាណំ។ តេនាហ ‘‘អន្តរឃរំ បវិដ្ឋាយាតិ វចនតោ’’តិអាទិ។ អន្តរារាមាទីសូតិ អន្តរារាមភិក្ខុនុបស្សយតិត្ថិយសេយ្យាបដិក្កមនេសុ។ រថិយាព្យូហសិង្ឃាដកឃរានន្តិ ឯត្ថ រថិយាតិ រច្ឆា។ ព្យូហន្តិ អនិព្ពិជ្ឈិត្វា ឋិតា គតបច្ចាគតរច្ឆា។ សិង្ឃាដកន្តិ ចតុក្កោណំ វា តិកោណំ វា មគ្គសមោធានដ្ឋានំ។ ឃរន្តិ កុលឃរំ។ យថា ច រថិយាទីសុ ឋត្វា ទទមានាយ គណ្ហតោ អាបត្តិ, ឯវំ ហត្ថិសាលាទីសុបិ ទដ្ឋព្ពំ។
Antaragharaṃpaviṭṭhāyāti rathikaṃ byūhaṃ siṅghāṭakaṃ gharaṃ paviṭṭhāya. Asappāyanti saggamokkhānaṃ ahitaṃ ananukūlaṃ. Bhikkhuniyā antaraghare ṭhatvā dadamānāya vasenettha āpatti veditabbā, bhikkhussa ṭhitaṭṭhānaṃ pana appamāṇaṃ. Tenāha ‘‘antaragharaṃ paviṭṭhāyāti vacanato’’tiādi. Antarārāmādīsūti antarārāmabhikkhunupassayatitthiyaseyyāpaṭikkamanesu. Rathiyābyūhasiṅghāṭakagharānanti ettha rathiyāti racchā. Byūhanti anibbijjhitvā ṭhitā gatapaccāgataracchā. Siṅghāṭakanti catukkoṇaṃ vā tikoṇaṃ vā maggasamodhānaṭṭhānaṃ. Gharanti kulagharaṃ. Yathā ca rathiyādīsu ṭhatvā dadamānāya gaṇhato āpatti, evaṃ hatthisālādīsupi daṭṭhabbaṃ.
‘‘យាមកាលិកាទីសុ បដិគ្គហណេបិ អជ្ឈោហរណេបិ ទុក្កដ’’ន្តិ ឥទំ អាមិសេន អសម្ភិន្នំ សន្ធាយ វុត្តំ, សម្ភិន្នេ បន ឯករសេ បាដិទេសនីយមេវ។ ឯកតោ ឧបសម្បន្នាយាតិ ភិក្ខុនីនំ សន្តិកេ ឧបសម្បន្នាយ, ភិក្ខូនំ សន្តិកេ ឧបសម្បន្នាយ បន យថាវត្ថុកមេវ។
‘‘Yāmakālikādīsu paṭiggahaṇepi ajjhoharaṇepi dukkaṭa’’nti idaṃ āmisena asambhinnaṃ sandhāya vuttaṃ, sambhinne pana ekarase pāṭidesanīyameva. Ekato upasampannāyāti bhikkhunīnaṃ santike upasampannāya, bhikkhūnaṃ santike upasampannāya pana yathāvatthukameva.
ញាតិកាយ វា ទាបេន្តិយាតិ សយំ អទត្វា យាយ កាយចិ ញាតិកាយ ទាបេន្តិយា, អញ្ញាតិកាយាតិ អត្ថោ។ ឧបនិក្ខិបិត្វា វា ទទមានាយាតិ ភូមិយំ ឋបេត្វា ‘‘ឥទំ, អយ្យ, តុម្ហាកំ ទម្មី’’តិ ទទមានាយ។ ឯវំ ទិន្នំ ‘‘សាធុ, ភគិនី’’តិ សម្បដិច្ឆិត្វា តាយ ឯវ វា ភិក្ខុនិយា, អញ្ញេន វា កេនចិ បដិគ្គហាបេត្វា ឥទំ ភុញ្ជិតុំ វដ្ដតិ។
Ñātikāya vā dāpentiyāti sayaṃ adatvā yāya kāyaci ñātikāya dāpentiyā, aññātikāyāti attho. Upanikkhipitvā vā dadamānāyāti bhūmiyaṃ ṭhapetvā ‘‘idaṃ, ayya, tumhākaṃ dammī’’ti dadamānāya. Evaṃ dinnaṃ ‘‘sādhu, bhaginī’’ti sampaṭicchitvā tāya eva vā bhikkhuniyā, aññena vā kenaci paṭiggahāpetvā idaṃ bhuñjituṃ vaṭṭati.
បឋមបាដិទេសនីយសិក្ខាបទវណ្ណនា និដ្ឋិតា។
Paṭhamapāṭidesanīyasikkhāpadavaṇṇanā niṭṭhitā.
